Swivutiso Swa Vahlayi

Xana “Ndhawu yo Kwetsima ya Ndhawu yo Kwetsima Ngopfu” yi totiwe rini hilaha Daniyele 9:24 yi profeteke hakona?

Daniyele 9:24-27 i vuprofeta lebyi vulavulaka hi ku humelela ka “Mesiya lowa Murhangeri”—ku nga Kreste. Xisweswo, vuprofeta bya ku totiwa ka “Ndhawu yo Kwetsima ya Ndhawu yo Kwetsima Ngopfu,” a byi kombeteli eka Vukwetsimisiso bya tempele ya le Yerusalema. Kambe, marito lama nge “Ndhawu yo Kwetsima ya Ndhawu yo Kwetsima Ngopfu” ma kombetela eka xikwetsimisiso xa le matilweni xa Xikwembu—xa matilo lama Kwetsimaka Swinene—etempeleni leyikulu ya moya ya Yehovha.a—Vaheveru 8:1-5; 9:2-10, 23.

Xana tempele ya moya ya Xikwembu yi sungule ku tirha rini? Ina, anakanya hi leswi humeleleke loko Yesu a tinyiketela leswaku a khuvuriwa hi 29 C.E. Ku sukela kwalaho ku ya emahlweni, Yesu u hetisise marito ya Pisalema 40:6-8. Endzhakunyana muapostola Pawulo u kombise leswaku Yesu u khongele eka Xikwembu, a ku: “Xitlhavelo ni gandzelo a wu swi lavanga, kambe u ndzi lunghiselele miri.” (Vaheveru 10:5) Yesu a a swi tiva leswaku Xikwembu a xi “swi lavanga” leswaku va hambeta va nyikela switlhavelo swa swiharhi etempeleni ya le Yerusalema. Ematshan’weni ya sweswo, Yehovha u lunghiselele miri wa nyama lowu hetisekeke leswaku Yesu a wu nyikela wu va xitlhavelo. Loko a phofula leswi nga embilwini yakwe, Yesu wa engetela: “Waswivo! Ndza ta (ebukwini leyi songiwaka, swi tsariwile malunghana na mina) ku ta endla ku rhandza ka wena, Wena Xikwembu.” (Vaheveru 10:7) Xana Yehovha u angurise ku yini? Evhangeli ya Matewu yi ri: “Loko Yesu a khuvuriwile, a huma hi ku hatlisa ematini; kutani waswivo, matilo ma pfuleka, a vona moya wa Xikwembu wu xika ku fana ni tuva wu ta ehenhla ka yena. Waswivo! Nakambe, ku huma rito ematilweni, ri ku: ‘Loyi i N’wananga, la rhandzekaka, loyi ndzi n’wi amukeleke.’”—Matewu 3:16, 17.

Ku va Yehovha Xikwembu a amukele miri wa Yesu leswaku wu va gandzelo a swi vula leswaku se a ku ri ni alitari leyikulu ku tlula alitari ya xiviri leyi a yi ri etempeleni ya le Yerusalema. Leyi a yi ri alitari ya ku “rhandza” ka Xikwembu, kumbe lunghiselelo ro amukela miri wa Yesu leswaku wu va gandzelo. (Vaheveru 10:10) Ku totiwa ka Yesu hi moya lowo kwetsima swi vula leswaku sweswi Xikwembu xi tise lunghiselelo hinkwaro ra tempele ya xona ya moya.b Hikwalaho, loko Yesu a khuvuriwa, vutshamo bya Xikwembu bya le matilweni byi totiwile, kumbe ku hlawuriwa leswaku byi va “Ndhawu yo Kwetsima ya Ndhawu yo Kwetsima Ngopfu” elunghiselelweni ra tempele leyikulu ya moya.

[Tinhlamuselo ta le hansi]

[Xifaniso eka tluka 27]

“Ndhawu yo Kwetsima ya Ndhawu yo Kwetsima Ngopfu” yi totiwe loko Yesu a khuvuriwa