Ku Phikelela Ka Yena Ku Hakeriwile

Vanhu vo tala va timbilu letinene va lava leswaku varhandziwa va vona va dyondza hi swikongomelo swa Xikwembu xisweswo va hanya vutomi lebyi tsakisaka. Loko un’wana a tinyiketela eka Xikwembu, vanhu van’wana lavatsongo ni lavakulu va nga ha va va hoxe xandla eka xiboho xolexo xa vutlhari hi ndlela leyinene leyi va tikhomaka ha yona. Sweswo swi humelerile eka Jearim, nhwanyana wa kondlo-a-ndzi-dyi wa le Mexico, loyi a nyikeke vamakwerhu xipapilana lexi landzelaka enhlengeletanweni yo hlawuleka ya siku rin’we ya Timbhoni ta Yehovha:

“Ndzi lava mi tsaka na mina. Mi nge ndzi mi byela xivangelo xa kona. Malembe ya 18 lama hundzeke, mina ndzi nga si velekiwa, vatswari va mina va dyondze ntiyiso. Manana u endle nhluvuko, kutani endzhakunyana ku landzela makwerhu wa xinuna ivi ku landzela hina. Hinkwerhu hi khongele eka Yehovha leswaku tatana na yena a nghena endleleni leyi ya vutomi. Se ku hundze malembe ya 18, kutani namuntlha i siku ro hlawuleka eka hina. Tatana wa khuvuriwa. Ndzi nkhensa Yehovha hileswi nkarhi lowu ku nga khale hi wu rindzerile wu fikeke makumu ma nga si fika. Ndza ku nkhensa Yehovha!”

Emalembeni lama hundzeke, ndyangu wa ka va xinhwanyetana lexi, entiyisweni a wu tshama wu ri karhi wu anakanya hi misinya ya milawu leyi hlamuseriweke eka ndzayo leyi huhuteriweke leyi nga eka 1 Petro 3:1, 2, leyi nge: “N’wina vavasati lava tekiweke, tivekeni ehansi ka vanuna va n’wina, leswaku, loko ku ri ni lava nga yingisiki rito, va ta kokiwa handle ka rito hi ku tikhoma ka vasati va vona, hikwalaho ka leswi va veke timbhoni leti ti ku voneke hi mahlo ku tikhoma ka n’wina loku tengeke swin’we ni xichavo lexi enteke.” Swi le rivaleni leswaku Jearim lontsongo u tirhise marito lama kumekaka eka Deteronoma 5:16, lama nge: “Xixima tata wa wena ni mana wa wena, hilaha Yehovha Xikwembu xa wena a ku leriseke hakona.” A swi kanakanisi leswaku ku tirhisa misinya yoleyo ya milawu ni ku rindzela Yehovha hi ku lehisa mbilu swi tisele Jearim ni ndyangu wa ka vona mikateko.