Ndlela Yo Hanya Vutomi Byo Leha Ni Lebyi Tsakisaka

VANHU van’wana va vula leswaku munhu un’wana ni un’wana u lava ku kula; kambe a nga swi lavi ku dyuhala. Vanhu vo tala lava yaka va kula va langutela ku kuma nkarhi wo tala wa ku tiendlela swilo swa vona va nga ri na vutihlamuleri byo tala. Kambe, va chava hikuva siku rin’wana va nga ha tikuma va hanya vutomi lebyi nga riki na xikongomelo. Va tlhela va vilerisiwa hileswaku siku rin’wana va nga tikuma va ri voxe, va nga tsakanga swin’we ni ku va ni rihanyo leri nga tsakisiki.

Kutani, hi xihi xilotlelo xo hanya vutomi lebyi tsakisaka? Ku va ni vanghana lavanene ni ndyangu lowu rhandzekaka swi pfuna vanhu lavatsongo ni lavakulu leswaku va va lava tsakeke. Kambe leswi vanhu van’wana va nga swi endlaka eka munhu la dyuhaleke a hi swona ntsena swi nga swa nkoka. Xa nkoka hi leswi munhu la dyuhaleke a nga swi endlelaka van’wana.

Nkambisiso lowu endliweke nkarhi wo leha eka mimpatswa leyi dyuhaleke ya 423 wu kombise leswaku “ku hoxa xandla eku pfuneni ka vanhu van’wana swi nga pfuna ku engetela malembe ya hina.” Stephanie Brown, loyi a endleke nkambisiso lowu, u te: “Vuyelo bya kona byi kombise leswaku nchumu lowu endlaka leswaku van’wana va vuyeriwa a hi leswi va swi kumaka eka van’wana; kambe hi leswi va hananaka ha swona.” Ku nyika koloko ku nga katsa ku pfuna van’wana hi mintirho ya le kaya, ku khathalela vana, ku endla swintirhwana swo karhi, ku pfuna hi swo famba ha swona, kumbe ku yingisela munhu un’wana loko a tiphofula.

Kwalomu ka malembe ya 2 000 lama hundzeke, Yesu Kreste u te: “Ku nyika swi tisa ntsako lowukulu ku tlula ku amukela.” (Mintirho 20:35) Ku hanya vutomi byo leha ni lebyi tsakisaka a swi lavi mali kumbe vutshunguri byo lwisana ni vudyuhari, naswona a swi lavi swakudya swo karhi. Ematshan’weni ya sweswo, swi lava leswaku munhu a tshama a ri karhi a hiseka, a tikarhatela ku pfuna van’wana.

Hambiswiritano, ku endla swilo leswi hinkwaswo a swi nge hi siveli ku dyuhala, ku vabya ni ku fa. Mfumo wa Xikwembu hi wona ntsena lowu nga ta herisa swilo leswi hinkwaswo. Ehansi ka wona vuvabyi byi ta herisiwa naswona “rifu a ri nge he vi kona.” (Nhlavutelo 21:3, 4; Esaya 33:24) Entiyisweni, vanhu lava yingisaka va ta hanya hilaha ku nga heriki va tsakile emisaveni ya paradeyisi. (Luka 23:43) Timbhoni ta Yehovha ta tsaka leswi ti kotaka ku komba van’wana ndlela leyi sekeriweke eBibeleni ya ku hanya vutomi byo leha ni lebyi tsakisaka.