Xikombiso Xa Nkoka Swinene Ku Tlula Maxelo

MATIKO yo tala ma ni swivuriso malunghana ni maxelo: Xibakabaka xo tshwuka nivusiku xi vula leswaku mutluti u ta tsakela riendzo ra yena; xibakabaka xo tshwuka nimixo xi vula leswaku mutluti a xalamuka. Va ta maxelo namuntlha va nyikela swivangelo leswi dzikeke swa leswaku ha yini swiyimo swa maxelo swi va hilaha xivuriso lexi xi vulaka hakona.

Enkarhini wa Yesu, vanhu a va tolovele ku kambisisa xibakabaka ivi va hlamusela xiyimo xa xona. Yesu u byele Vayuda van’wana a ku: “Loko ri pela mi tolovele ku vula mi ku, ‘Ku ta va ni maxelo lamanene, hikuva xibakabaka xi tshwuke bya ndzilo’; naswona nimixo mi ri, ‘Namuntlha ku ta va ni maxelo yo titimela, ya mpfula, hikuva xibakabaka xi tshwuke bya ndzilo, kambe xi visinganile.’ Ma swi tiva ku hlamusela ku languteka ka xibakabaka, kambe . . . ” Kambe yini? Yesu u ye emahlweni a hlamusela mhaka ya nkoka a ku: “A mi swi koti ku hlamusela swikombiso swa minkarhi.”—Matewu 16:2, 3.

A ku ri swihi “swikombiso [sweswo] swa minkarhi”? A ku ri swikombiso swo tala leswi nga erivaleni swa leswaku Yesu a ku ri yena Mesiya wa ntiyiso loyi a rhumiweke hi Xikwembu. Swiendlo swa yena a swi tikomba eka mani na mani tanihi ku tshwuka ka xibakabaka. Hambiswiritano, Vayuda vo tala va honise swikombiso swa leswaku Mesiya u tile—ku nga xiendlakalo xa nkoka swinene ku tlula maxelo.

Ni namuntlha, ku ni xikombiso xa nkoka swinene lexi hi faneleke hi xi twisisa ku tlula muvala wa xibakabaka xa xiviri. Yesu u vule ka ha ri emahlweni leswaku misava leyi yo homboloka a yi ta herisiwa leswaku ku va ni misava yo antswa. U hlamusele swiendlakalo swo tala leswi a swi ta kombisa leswaku ku cinca loku ku tshinele. Swin’wana swa swona i tinyimpi ni tindlala emisaveni hinkwayo. Yesu u vule leswaku loko swilo leswi swi humelela, nkarhi wa ku nghenelela ka Xikwembu wu ta va wu ri kusuhi.—Matewu 24:3-21.

Xana wa swi vona “swikombiso swa minkarhi”?