Ntlhantlho Wa Vutlhari

VAMAKWERHU vanharhu lava ha riki majaha va le Afrika Xikarhi a va lava ku ya entsombanweni kona kwale tikweni ra rikwavo. Xana a va ta fambisa ku yini? Mpfhuka wo ya laha a wu ta khomeriwa kona a ku ri tikhilomitara ta kwalomu ka 90, naswona a va ta famba etindleleni leti nga ni maribye ni ritshuri, kasi a va nga ri na xo famba hi xona. Hiloko va ehleketa ku lomba swikanyakanya swinharhu kambe a va swi kumanga leswi nga ta kota ku famba mpfhuka wolowo.

Nkulu un’wana evandlheni ra kwalaho u twe xiphiqo xa vona, kutani a va lomba xikanyakanya xakwe—a xi ri xa khale kambe a xa ha famba. U va byele leswi yena ni vamakwerhu van’wana va nga tshama va swi endla leswaku va kota ku ya entsombanweni. Nkulu loyi u va byele leswaku va tirhisa xikanyakanya xexo havanharhu ka vona. Wolowo a ku ri ntlhantlho wo olova wa xiphiqo xa vona kambe a wu lava leswaku va hlela kahle. Xana a swi ta kotekisa ku yini leswaku vanhu vanharhu va tirhisa xikanyakanya xin’we?

Leswaku va nga vavuriwi hi dyambu, vamakwerhu lava va hlangane ka ha ri mixo swinene kutani va bohelela mindzhwalo ya vona ehenhla ka xikanyakanya. Makwerhu wo sungula u khandziye xikanyakanya kutani lavambirhi va n’wi landzela hi milenge va ri karhi va famba hi ku hatlisa. Endzhaku ko famba timitara ta 500, loyi a fambaka hi xikanyakanya u xi tshege hi nsinya, kambe a a tiyiseka leswaku u xi veka laha lavan’wana vambirhi va nga ta xi vona leswaku xi nga tekiwi hi makhamba. Mukhandziyi wo sungula a a ya emahlweni a famba hi milenge.

Loko lavan’wana vambirhi va fika laha ku nga ni xikanyakanya, un’we wa vona a a xi khandziya kutani lowa vunharhu a hambeta a famba hi milenge mpfhuka wa kwalomu ka timitara ta 500. Hikwalaho ko hlela kahle ni ku tiyimisela, vamakwerhu lavanharhu va swi kotile ku hunguta mpfhuka wa vona wa 90 wa tikhilomitara wu ya eka 60 wa tona. Matshalatshala ya vona ma va pfunile swinene. Loko va fika entsombanweni va hlangane ni vamakwerhu va tlhela va tiphina hi ndzalo ya swakudya swa moya. (Det. 31:12) Xana nan’waka u ta endla leswi u nga swi kotaka leswaku u va kona entsombanweni wa muganga endhawini ya ka n’wina?