Tshinela Eka Xikwembu
“Vanani Vatekeleri Va Xikwembu”
MUSA. Ntwela-vusiwana. Ku rivalela. Rirhandzu. Khombo ra kona, vanhu a va ha tali ku ti kombisa timfanelo teto namuntlha. Xana wena wa ti kombisa timfanelo teto? Xana u tshame u vona leswaku matshalatshala lawa u ma endlaka yo hlakulela timfanelo leti letinene a ma humeleli? Munhu loyi a ti tekelaka ehansi a nga ha vula leswaku swihinga swo karhi, swo fana ni mikhuva yo biha leyi dzikeke kumbe swilo swo vava leswi humeleleke enkarhini lowu hundzeke, swi endla leswaku a nga swi koti ku va ni timfanelo letinene. Kambe Bibele yi dyondzisa ntiyiso lowu lowu khutazaka—Muvumbi wa hina wa swi tiva leswaku hi nga swi kota ku va ni timfanelo letinene.
Rito ra Xikwembu ri tsundzuxa Vakreste va ntiyiso ri ku: “Hikokwalaho, leswi mi nga vana lava rhandzekaka, vanani vatekeleri va Xikwembu.” (Vaefesa 5:1) Marito lawa ma kombisa leswaku Xikwembu xa va tshemba vagandzeri va xona. Njhani? Yehovha Xikwembu u vumbe munhu hi xifaniso Xakwe, a fana na Yena. (Genesa 1:26, 27) Xisweswo Xikwembu xi vumbe vanhu va ri ni timfanelo to fana ni ta xona.a Hikokwalaho, loko Bibele yi khutaza Vakreste leswaku va va “vatekeleri va Xikwembu,” swi fana ni loko Yehovha hi byakwe a va byela a ku: ‘Ndza tshemba leswaku mi nga swi kota. Ndza swi tiva leswaku hambileswi mi nga hetisekangiki mi nga swi kota ku fana na mina hi ndlela yo karhi.’
Hi tihi timfanelo tin’wana ta Xikwembu leti hi nga ti tekelelaka? Vaefesa 4:32 na 5:2 ya hlamula. Xiya leswaku loko Pawulo a hi khutaza ku va vatekeleri va Xikwembu u sungule hi ku vula rito leri nge “hikokwalaho.” Rito leri ri hlanganisa leswi vuriweke eka ndzimana 32, leyi boxaka musa, ntwela-vusiwana ni ku rivalela. (Vaefesa 4:32; 5:1) Kutani eka ndzimana leyi landzelaka leyi nga ni ndzayo yo tekelela Xikwembu, Pawulo u khutaza Vakreste ku hanya hi ndlela leyi kombisaka leswaku va ni rirhandzu ra xiviri. (Vaefesa 5:2) Hakunene, loko swi ta emhakeni yo kombisa musa, ntwela-vusiwana, ku rivalela van’wana hi ku ntshunxeka ni ku kombisa rirhandzu, hi ni xikombiso lexikulu eka hinkwaswo lexi hi nga xi tekelelaka, ku nga Yehovha Xikwembu.
Ha yini hi fanele hi lava ku fana ni Xikwembu? Xiya marito ya Pawulo lama hi susumetelaka swinene ku endla tano: “Leswi mi nga vana lava rhandzekaka, vanani vatekeleri va Xikwembu.” Xana yoleyo a hi mhaka leyi khutazaka? Yehovha u teka vagandzeri vakwe tanihi vana lava a va rhandzaka hi mbilu yakwe hinkwayo. Tanihi leswi xifanyetana xi nga ha ringetaka ku fana ni tata wa xona, Vakreste va ntiyiso va endla leswi nga ematimbeni ya vona leswaku va fana ni Tata wa vona wa le tilweni.
Yehovha a nga va sindzisi vanhu leswaku va n’wi tekelela. Ku hambana ni sweswo, u hi nyike ntshunxeko wa ku tihlawulela. Hikwalaho swi le ka wena leswaku u ta hlawula ku va mutekeleri wa Xikwembu kumbe e-e. (Deteronoma 30:19, 20) Kambe u nga rivali leswaku u nga swi kota ku kombisa timfanelo leti fanaka ni ta Xikwembu. Leswaku u kota ku tekelela Xikwembu u fanele u rhanga u tiva timfanelo ni tindlela ta xona. Bibele yi nga ku pfuna ku dyondza timfanelo ni tindlela ta Xikwembu lexi vumunhu bya xona lebyi nga pimanisiwiki na nchumu byi kokeke vanhu va timiliyoni leswaku va va vatekeleri va xona.
[Nhlamuselo ya le hansi]
a Vakolosa 3:9, 10 yi kombisa leswaku ku va munhu a endliwe hi xifaniso xa Xikwembu swi vula leswaku u ni timfanelo leti fanaka ni ta xona. Lava lavaka ku tsakisa Xikwembu va khutaziwa ku ambala “vumunhu lebyintshwa,” lebyi “endliwaka byi va byintshwa hi ku ya hi xifaniso xa [Xikwembu lexi] byi tumbuluxeke.”