Swivutiso Swa Vahlayi . . .

I Yini Armagedoni?

▪ Eka vo tala, rito leri nge “Armagedoni” ri vula swiendlakalo swa ndzoviso lowukulu, wo tanihi nyimpi ya nyutliya, timhangu letikulu ta ntumbuluko hambi ku ri ku lovisiwa ka mbango loku vangiwaka hi maxelo lama hisaka swinene. Rito leri hilaha ri tirhisiweke hakona eBibeleni a ri vuli swona sweswo. Kutani, i yini Armagedoni leyi ku vulavuriwaka ha yona eBibeleni?

Rito leri nge “Armagedoni” (“Har–Magedoni”) ri humelela ebukwini ya Bibele ya Nhlavutelo. Ri vula nyimpi yo hlawuleka, ku nga “nyimpi ya siku lerikulu ra Xikwembu xa Matimba Hinkwawo,” leyi eka yona “[tihosi] ta misava hinkwayo leyi akiweke” ti hlengeleteriwaka nyimpi yo hetelela ya Xikwembu. Nyimpi yoleyo ku tlhela ku vulavuriwa ha yona eka Matsalwa man’wana yo hlayanyana.—Nhlavutelo 16:14-16; Ezekiyele 38:22, 23; Yuwele 3:12-14; Luka 21:34, 35; 2 Petro 3:11, 12.

Xana nyimpi leyi yi katsa yini? Hi marito yo fanekisela, buku ya Nhlavutelo yi hi byela leswi: “Tihosi ta misava ni mavuthu ya tona va hlengeletanile leswaku va lwa nyimpi ni loyi a gadeke hanci swin’we ni vuthu ra yena.” Loyi “a gadeke hanci” i N’wana wa Xikwembu, ku nga Yesu Kreste, loyi a vekiweke hi Xikwembu leswaku a rhangela vuthu ra tintsumi leti nga tinhenha leswaku ti ya hlula valala va xona. (Nhlavutelo 19:11-16, 19-21) Yeremiya 25:33 yi hlavutela ndlela leyi va nga ta lovisiwa ha yona vanhu vo tala lava nga xi chaviki Xikwembu, yi ri: “Lava dlayiweke hi Yehovha esikwini rero va ta suka emakun’wini ya misava ku ya fika emakun’wini man’wana ya misava.”

Ha yini Armagedoni yi fanerile? Matiko a ma byi tekeli enhlokweni vuhosi bya Xikwembu, kambe ma rhangisa vuhosi bya wona. (Pisalema 24:1) Ku nga yingisi ka wona ku hlamuseriwe eka Pisalema 2:2 leyi nge: “Tihosi ta misava ta tserhama ni tindhuna leti tlakukeke ti vungane swin’we tanihi munhu un’we ku lwa na Yehovha ni mutotiwa wakwe.”

Entiyisweni, vaxandzuki lava va fana ni vanhu lava tshamaka endhawini handle ka mpfumelelo, lava nga laviki ndhawu leyi nga riki ya vona ntsena kambe va tlhelaka va yi tirhisa hi ndlela yo biha kumbe va yi onha. Namuntlha, matiko ma onha misava ma tlhela ma thyakisa mbango. Rito ra Xikwembu ri profete hi xiyimo lexi, lexi solekaka, ri ri: “Matiko ma sungule ku kariha, kutani vukarhi bya wena [Xikwembu] byi fika.” Kutani Xikwembu xi ta “lovisa lava onhaka misava.” (Nhlavutelo 11:18) Xikwembu xi hlele leswaku Armagedoni ku va yona ndlela leyi xi nga ta lulamisa mhaka ya leswaku i mani loyi a nga ni mfanelo yo fuma vanhu hinkwavo.—Pisalema 83:18.

Xana Armagedoni yi ta fika rini? N’wana wa Xikwembu u swi veke erivaleni hi ku vula a ku: “Malunghana ni siku ra kona ni nkarhi wa kona a ku na munhu la swi tivaka, hambi ku ri tintsumi ta le matilweni hambi ku ri N’wana, kambe swi tiviwa hi Tatana ntsena.” (Matewu 24:36) Hambiswiritano, loko Hosi leyi nga Nhenha Yesu Kreste yi vulavula hi Armagedoni, yi tlhele yi lemukisa yi ku: “Maswivo! Ndzi ta ku fana ni khamba. Wa tsaka loyi a tshamaka a hitekile.” (Nhlavutelo 16:15) Xisweswo, nyimpi leyi ya misava hinkwayo yi hlanganisiwa ni vukona bya Kreste, lebyi vuprofeta bya Bibele byi kombisaka leswaku se byi fikile.

Armagedoni yi ta herisa vanhu vo homboloka ntsena naswona ku ta va ni “ntshungu lowukulu” wa vanhu lava poneke. (Nhlavutelo 7:9-14) Va ta vona ku hetiseka ka marito lawa, lama nge: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:10, 11.

[Marito lama tshahiweke exihlokweni lama nga eka tluka 10]

“Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu”