“Mina, Yehovha Xikwembu Xa Wena, Ndzi Khoma Voko Ra Wena Ra Xinene”

LOKO tatana a lunghekela ku tsemakanya xitarata lexi nga ni mphesamphesa ni xifanyetana xakwe u ri: “Tana ndzi ku khoma hi voko.” Xifanyetana xexo xi titwa xi sirhelelekile naswona a xi chavi tanihi leswi tata wa xona a xi khomeke hi voko. Xana u tshame u navela onge munhu un’wana a nga ku khoma hi voko kutani a ku kongomisa loko u nga tiyiseki hileswi vumundzuku byi ku khomeleke swona? Loko swi ri tano, u nga ha kuma nchavelelo eka marito lama nga eka Esaya.—Hlaya Esaya 41:10, 13.

Loko Esaya a vula marito wolawo a ma kongomisa eka Vaisrayele. Hambileswi Xikwembu a xi va teka tanihi ‘ndzhaka ya xona yo hlawuleka,’ a va rhendzeriwe hi valala. (Eksoda 19:5) Xana Vaisrayele a va fanele va chava? Yehovha u tirhise Esaya leswaku a va byela marito lama chavelelaka. Loko hi ri karhi hi kambisisa marito wolawo, a hi tsundzukeni leswaku ma tirha ni le ka vagandzeri va Xikwembu namuntlha.—Varhoma 15:4.

Yehovha u va khutaza a ku: “U nga chavi.” (Ndzimana 10) Yehovha u ni xivangelo xo byela vanhu vakwe leswaku va nga chavi. U ri: “Hikuva ndzi na wena.” A nga le kule na vona kutani u va tshembisa ku va pfuna minkarhi hinkwayo loko va ri emaxangwini. U lava leswaku vanhu vakwe va swi tiva leswaku u na vona—onge hiloko a ri etlhelo ka vona—u tshama a lunghekele ku va seketela. Ya chavelela hakunene mhaka leyi!

Yehovha u tlhela a tiyisekisa vagandzeri vakwe a ku: “U nga languti ematlhelweni.” (Ndzimana 10) Riendli ra Xiheveru leri tirhisiweke laha ri nga ha kombetela eka lava va “rhalarhalaka ku vona leswaku a ku na nchumu lowu nga va vavisaka.” Loko Yehovha a hlamusela leswaku ha yini vanhu vakwe va nga fanelanga va languta endzhaku hi ku chava, u ri: ‘Hikuva mina ndzi Xikwembu xa wena.’ A ku na nchumu lowu tiyisaka ku tlula sweswo. Yehovha hi “La nge Henhla-henhla” ni “Lowa Matimba Hinkwawo.” (Pisalema 91:1) Leswi a va ri na Yehovha wa matimba hinkwawo tanihi Xikwembu xa vona, ha yini a va fanele va chava?

Kutani, xana vagandzeri va Yehovha va nga langutela yini eka yena? U tshembisa leswi: “Kunene ndzi ta ku khoma swi tiya hi voko ra mina ra xinene ra ku lulama.” (Ndzimana 10) U tlhela a ku: “Mina, Yehovha Xikwembu xa wena, ndzi khoma voko ra wena ra xinene.” (Ndzimana 13) Xana u ehleketa yini loko u twa marito wolawo? Buku yin’wana ya tinhlamuselo ta Bibele yi hlamusela leswaku “tindzimana letimbirhi ti hi endla hi anakanya hi mutswari ni n’wana. [Tatana] a nga lo yimela ntsena ku sirhelela n’wana kambe u na yena hi xiviri; a nge pfumeli leswaku n’wana a hambanisiwa na yena.” Yehovha a nge pfumeli leswaku vanhu vakwe va hambanisiwa na yena, hambi ku ri eminkarhini leyi tikombaka yi tika swinene evuton’wini bya vona.—Vaheveru 13:5, 6.

Marito lama tsariweke hi Esaya ma nga ha chavelela vagandzeri va Yehovha namuntlha. ‘Eminkarhini leyi ya mangava leyi swi nonon’hwaka ku langutana na yona,’ hi nga ha titwa hi tshikileriwile hi swiphiqo swa vutomi. (2 Timotiya 3:1) Kambe a hi fanelanga hi langutana ni swiphiqo swo tano hi ri hexe. Yehovha u tiyimiserile ku tshambuluta voko rakwe kutani a khoma voko ra hina. Ku fana ni vana lava tshembaka vatswari va vona, hi nga khomelela eka voko rakwe ra matimba hi ri ni ntshembo wa leswaku u ta hi rhangela a tlhela a hi pfuna hi nkarhi lowu faneleke.—Pisalema 63:7, 8.

Tindzimana ta Bibele leti u nga ti hlayaka hi January:

◼ Esaya 24-42