TINHLAMULO TA SWIVUTISO SWA BIBELE

Kahle-kahle i mani loyi a fumaka misava?

Ndhawu ya nyimpi, vugevenga, madzolonga ni makhombo — Loko ku ri leswaku Xikwembu hi xona mufumi wa misava leyi, xana misava a yi ta va yi tele hi ku xaniseka?

Vanhu vo tala va pfumela leswaku Xikwembu xa ntiyiso hi xona xi fumaka misava leyi. Loko ku ri leswaku mhaka yoleyo i ntiyiso, xana misava a yi ta va yi tele hi ku xaniseka? (Deteronoma 32:4, 5) Bibele yi vula leswaku misava yi lawuriwa hi lowo homboloka.—Hlaya 1 Yohane 5:19.

Xana lowo homboloka u swi kotise ku yini ku lawula vanhu? Eku sunguleni ka matimu ya vanhu, ntsumi yin’wana yi xandzukele Xikwembu kutani yi kucetela vatekani vo sungula leswaku na vona va xandzuka. (Genesa 3:1-6) Vatekani volavo, va hlawule ku yingisa ntsumi yoleyo leyi xandzukeke, ku nga Sathana kutani va n’wi endla mufumi wa vona. Xikwembu xa Matimba Hinkwawo hi xona ntsena mufumi wo lulama kambe xi lava leswaku vanhu va hlawula vulawuri bya xona hi ku tirhandzela. (Deteronoma 6:6; 30:16, 19) Kambe lexi twisaka ku vava, vanhu vo tala va kanganyisiwile leswaku va endla xihoxo lexi endliweke hi vatekani vo sungula.—Hlaya Nhlavutelo 12:9.

I mani loyi a nga ta tlhantlha swiphiqo swa vanhu?

Xana Xikwembu xi ta pfumelela Sathana leswaku a hambeta a fuma hi ndlela yo biha? Doo! Xikwembu xi ta tirhisa Yesu leswaku a herisa vubihi lebyi Sathana a byi endlaka.—Hlaya 1 Yohane 3:8.

Xikwembu xi ta nyika Yesu matimba yo lovisa Sathana. (Varhoma 16:20) Endzhaku ka sweswo, Xikwembu xi ta fuma vanhu kutani xi endla leswaku va hanya va tsakile naswona va sirhelelekile hilaha a xi lava va hanya hakona eku sunguleni.—Hlaya Nhlavutelo 21:3-5.

Leswaku u kuma rungula leri engetelekeke, hlaya ndzima 3 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha

U nga yi kopa eka www.jw.org/ts