TINHLAMULO TA SWIVUTISO SWA BIBELE

Swi vula yini ku va mutswari lonene?

Tatana ni n’wana va ri karhi va languta xipereta — Xana u dyondzisa vana va wena ku rhandza Xikwembu?

Loko vatswari ekaya va rhandzana ni ku tlhela va xiximana, swi endla leswaku vana va vona va va ni mahanyelo lamanene. (Vakolosa 3:14, 19) Vatswari lavanene va rhandza vana va vona va tlhela va va bumabumela hilaha Yehovha a endleke hakona eka N’wana wakwe.—Hlaya Matewu 3:17.

Tata wa hina loyi a nga ematilweni wa ma yingisela malandza yakwe a tlhela a khathala hi ndlela leyi ma titwaka ha yona. I swinene loko vatswari va tekelela Xikwembu kutani va yingisela loko vana va vona va lava ku va byela swo karhi. (Yakobo 1:19) Va fanele va twisisa ndlela leyi vana va vona va titwaka ha yona ku katsa ni loko va vula leswi va nga swi tsakeriki.—Hlaya Tinhlayo 11:11, 15.

U nga va kurisa njhani vana leswaku va va ni mahanyelo lamanene?

Wena tanihi mutswari, u ni mfanelo ya ku veka milawu. (Vaefesa 6:1) Dyondza eka Xikwembu, xi ni rirhandzu eka vana va xona xi va vekela milawu hi ndlela leyi twisisekaka xi tlhela xi va byela leswi nga ta endleka loko va nga yi yingisi milawu yoleyo. (Genesa 3:3) Kambe ematshan’weni ya ku va sindzisa leswaku va yingisa, xi va dyondzisa ndlela leyi va nga ta pfuneka ha yona loko va endla leswinene.—Hlaya Esaya 48:18, 19.

Tiyimisele ku pfuna vana va wena leswaku va rhandza Xikwembu. Loko u endla tano, va ta endla swilo hi vutlhari hambiloko u nga ri na vona. Leswi Xikwembu xi ku dyondzisaka hi ku ku vekela xikombiso lexinene, na wena dyondzisa vana va wena leswaku va rhandza Xikwembu hi ku va va vona wena u xi rhandza.—Hlaya Deteronoma 6:5-7; Vaefesa 4:32; 5:1.

Leswaku u kuma rungula leri engetelekeke, hlaya ndzima 14 eka buku leyi, leyi nge Xana Bibele Yi Dyondxisa Yini Hakunene? leyi kandziyisiweke hi Timbhoni ta Yehovha

Nakambe ya kumeka eka www.jw.org/ts