Swivutiso Swa Vahlayi

Loko mhaka leyi a ku ri ntiyiso anakanya ndlela leyi a yi ta khumba vutomi bya hina ha yona. Hi xikombiso, a hi nge n’wana wa makwerhu un’wana u tisungile kutani makwerhu loyi a tivutisa a ku: ‘Xana Yehovha u kambisise ka ha ri emahlweni kutani a vona leswaku mina ni nsati wa mina hi ta ri tiyiselela rifu ra n’wana wa hina? Xana leswi swi endleke hileswi Xikwembu xi voneke leswaku hi ta swi kota ku swi tiyiselela?’ Xana ku ni xivangelo lexi twalaka xo tshemba leswaku Yehovha u kunguhata ka ha ri emahlweni leswi nga ta endleka evuton’wini bya hina?

Ku anakanyisisa hi marito ya Pawulo lama nga eka 1 Vakorinto 10:13, swi endla hi vula leswaku a ku na xivangelo lexi nga eMatsalweni xo tshemba leswaku Yehovha u kambela ka ha ri emahlweni miringo leyi hi nga kotaka ku yi tiyisela kutani a hlawula leyi faneleke yi hi wela. A hi kambisiseni swivangelo swa mune leswi nga endlaka hi vula tano.

Xo sungula, Yehovha u nyike vanhu ntshunxeko wo tihlawulela. U lava leswaku hi tihlawulela ndlela leyi hi lavaka ku hanya ha yona. (Det. 30:19, 20; Yox. 24:15) Loko hi hlawula ndlela leyinene, Yehovha u ta hi kongomisa. (Swiv. 16:9) Kambe loko hi hlawula ndlela yo biha hi ta tshovela leswi hi swi byaleke. (Gal. 6:7) Loko ku ri leswaku Yehovha wa hi hlawulela miringo leyi hi faneleke hi langutana na yona, swi ta vula leswaku a hi na wona ntshunxeko wo tihlawulela.

Xa vumbirhi, Yehovha a nga hi sirheleli eka “nkarhi ni xiendlakalo lexi nga languteriwangiki.” (Ekl. 9:11) Timhangu to chavisa ti nga hi wela hikwalaho ka leswi hi nga ha vaka hi ri endhawini leyi nga fanelangiki hi nkarhi lowu nga fanelangiki. Yesu u vulavule hi mhangu leyi khumbeke vanhu va 18 lava weriweke hi xihondzo kutani va fa naswona u vule leswaku rifu ra vona a ri vangiwanga hi Xikwembu. (Luka 13:1-5) Kutani a swi twali ku vula leswaku Xikwembu xi kunguhata ka ha ri emahlweni leswaku i mani loyi a faneleke a fa kumbe a hanya eka timhangu to tano leti ngo tiendlekela.

Xa vunharhu, un’wana ni un’wana wa hina wa katseka eka swihehlo swa Sathana leswi khumbaka mhaka ya ku tshembeka. Tsundzuka leswaku Sathana u sole vanhu hinkwavo lava tirhelaka Yehovha, a vula leswaku a va nge swi koti ku tshama va tshembekile eka yena loko va langutane ni miringo. (Yobo 1:9-11; 2:4; Nhlav. 12:10) Loko Yehovha a a hi hlawulela miringo leyi faneleke yi hi wela hikwalaho ka leswi a vonaka leswaku a hi nge swi koti ku yi tiyiselela, sweswo a swi ta vula leswaku Sathana a a tiyisile.

Xa vumune, Yehovha u hlawula ku nga tivi swilo hinkwaswo leswi nga ta hi endlekela. Mhaka ya leswaku Xikwembu xi tiva miringo leyi nga ta hi endlekela yi nga ha kombisa leswaku xi fanele xi tiva swilo hinkwaswo hi vumundzuku bya hina. Kambe vonelo ro tano a ri humi eMatsalweni. Xikwembu xi nga swi kota ku tiva vumundzuku bya hina. (Esa. 46:10) Kambe Bibele yi kombisa leswaku xa hlawula leswi xi lavaka ku swi tiva hi leswi nga ta endleka enkarhini lowu taka. (Gen. 18:20, 21; 22:12) Xi endla sweswo hikwalaho ka leswi xi xiximaka ntshunxeko wa hina wo tihlawulela. Xana leswi a hi swona leswi a hi ta swi langutela eka Xikwembu lexi minkarhi hinkwayo xi tirhisaka matimba ya xona hi ndlela leyi faneleke?—Det. 32:4; 2 Kor. 3:17.

Kutani hi fanele hi ma twisisa njhani marito ya Pawulo lama nge: “Xikwembu . . . a xi nge mi tshiki mi ringiwa hi ndlela leyi tlulaka leswi mi nga swi tiyiselaka”? Eka tsalwa leri, Pawulo a a vulavula hi leswi Yehovha a swi endlaka loko hi ri emiringweni ku nga ri loko yi nga si hi wela. Marito ya muapostola Pawulo ma hi tiyisekisa leswaku hambi ho wela hi ndzingo wihi na wihi evuton’wini, Yehovha u ta hi seketela ntsena loko hi tshembela eka yena. (Ps. 55:22) Hi ta kambisisa swivangelo swimbirhi leswi paluxaka xivangelo xa ku va Pawulo a vule marito lawa.

Xo sungula, miringo leyi hi langutanaka na yona yi “[tolovelekile] evanhwini.” Minkarhi yo tala miringo leyi hi langutanaka na yona ya fana ni leyi vanhu van’wana va langutanaka na yona. Hi nga swi kota ku yi tiyiselela miringo yo tano loko hi titshega hi Xikwembu. (1 Pet. 5:8, 9) Loko Pawulo a tsala marito lama nga eka 1 Vakorinto 10:13 a a kombetela eka miringo leyi Vaisrayele va langutaneke na yona loko va ri emananga. (1 Kor. 10:6-11) Vaisrayele a va ta swi kota ku yi tiyiselela miringo yoleyo. Ku ringana minkarhi ya mune, Pawulo u vule leswaku “van’wana va vona” a va yingisanga. Lexi twisaka ku vava, Vaisrayele van’wana va tikhome hi ndlela yo biha hikuva a va nga titsheganga hi Xikwembu.

Xa vumbirhi, “Xikwembu xa tshembeka.” Ndlela leyi Xikwembu xi tirhisaneke ni vanhu va xona ha yona yi kombisa leswaku xi kombisa rirhandzu ra xona ro tshembeka eka “lava va xi rhandzaka ni lava va hlayisaka milawu ya xona.” (Det. 7:9) Mhaka leyi yi kombisa leswaku minkarhi hinkwayo Xikwembu xi hetisisa leswi xi swi tshembisaka. (Yox. 23:14) Loko hi kambisisa ndlela leyi Yehovha a va khomeke ha yona vanhu lava n’wi rhandzaka ni ku n’wi yingisa, hi nga tiyiseka leswaku u ta hetisisa switshembiso leswimbirhi loko hi langutana ni miringo: (1) A nge yi pfumeleli yi hi tikela lerova hi nga swi koti ku yi tiyisela naswona (2) ‘u ta hi nyika ndlela yo huma’ eka yona.

Yehovha u va nyika njhani ndlela yo huma emiringweni lava titshegaka ha yena loko va langutane ni miringo? I ntiyiso leswaku loko a swi lava a nga yi susa miringo yoleyo. Kambe tsundzuka marito ya Pawulo lama nge: “[Yehovha u] ta mi nyika ndlela yo huma, leswaku mi kota ku swi tiyisela.” Kambe minkarhi yo tala u hi nyika “ndlela yo huma” hi ku hi nyika leswi hi swi lavaka leswaku hi kota ku tiyisela. Anakanya hi tindlela tin’wana leti Yehovha a hi nyikaka ndlela yo huma ha tona:

• Wa hi “[chavelela] enhlomulweni wa hina hinkwawo.” (2 Kor. 1:3, 4) Yehovha a nga rhurisa mianakanyo ya hina, timbilu ta hina ni ndlela leyi hi titwaka ha yona hi ku tirhisa Rito rakwe, moya lowo kwetsima ni swakudya swa moya leswi hlonga ro tshembeka ri hi phamelaka swona.—Mat. 24:45; Yoh. 14:16; Rhom. 15:4.

• A nga hi kongomisa hi ku tirhisa moya lowo kwetsima. (Yoh. 14:26) Loko hi langutana ni miringo, moya lowo kwetsima wu nga hi pfuna ku tsundzuka Matsalwa ni misinya ya milawu leswaku hi endla swiboho leswinene.

• A nga tirhisa tintsumi leswaku ti hi pfuna.—Hev. 1:14.

• A nga hi pfuna hi ku tirhisa vamakwerhu lava hi marito ni swiendlo swa vona va nga va ka “mpfuno lowu tiyisaka” eka hina.—Kol. 4:11.

Xana marito ya Pawulo lama nga eka 1 Vakorinto 10:13 ma vula yini? Yehovha a nga hi hlawuleli miringo leyi hi faneleke hi langutana na yona. Kambe loko hi weriwa hi miringo, hi nga tiyiseka hi leswi: Loko hi tshemba Yehovha hi ku helela a nge yi pfumeleli miringo leswaku yi hi tikela lerova hi nga swi koti ku yi tiyisela. Minkarhi hinkwayo u ta hi nyika ndlela yo kota ku langutana na yona leswaku hi tiyisela. Marito lawa ma chavelela hakunene!