Swivutiso Swa Vahlayi

Loko Vakreste va hlawula tindlela leti va lavaka ku tisirhelela ha tona, va landzela leswi misinya ya milawu ya Bibele yi swi vulaka. Milawu yoleyo ya Bibele yi sola ku tirhisiwa ka matlhari yo tanihi swibamu leswaku hi tisirhelela hi swona eka vanhu van’wana. Xiya yin’wana ya yona.

Vutomi bya vanhu bya kwetsima ematihlweni ya Yehovha. Mupisalema Davhida a swi tiva leswaku Yehovha i “xihlovo xa vutomi.” (Ps. 36:9) Kutani loko Mukreste a lava ku tisirhelela kumbe ku sirhelela nhundzu yakwe, u ta teka magoza lama faneleke leswaku a papalata ku dlaya leswi nga endlaka leswaku a va ni nandzu wa ngati.—Det. 22:8; Ps. 51:14.

Hambiswiritano ku tirhisa swilo leswi vavisaka leswaku hi tisirhelela swi nga endla leswaku hi va ni nandzu wa ngati naswona swibamu swi nga endla leswaku hi tikuma hi dlaye munhu hi nga tiyimiselanga kumbe hi vomu.a Nakambe loko nsulavoya yi vona leswaku munhu lowun’wana u khome xibamu, swi nga ha nyanyisa xiyimo tanihi leswi na yona yi nga ta ringeta ku tisirhelela naswona eku heteleleni wun’wana wa vona a nga ha fa.

Loko Yesu a byela valandzeri vakwe leswaku va teka mabanga hi vusiku byakwe byo hetelela laha misaveni, a nga vuli swona leswaku va ta tisirhelela ha wona. (Luka 22:36, 38) Ku ri na sweswo a a lava ku va dyondzisa dyondzo ya nkoka ya leswaku a va fanelanga va lwa hambileswi a va pfukeriwe hi ntshungu lowu a wu hlomile. (Luka 22:52) Endzhaku ka loko Petro a tseme ndleve ya hlonga ra muprista lonkulu, Yesu u n’wi lerise leswaku a “vuyisela banga [rakwe] endhawini ya rona.” Kutani Yesu u tlhele a kandziyisa nsinya wa nawu lowu tirhaka ni le ka malandza yakwe namuntlha lowu nge: “Hinkwavo lava khomaka banga va ta lova hi banga.”—Mat. 26:51, 52.

Hi ku ya hi Mikiya 4:3, vanhu va Xikwembu “va ta fula mabanga ya vona ma va swikomu ni mafumu ya vona ma va swikhutulo.” Mhaka leyi yi pfumelelana ni marito lama muapostola Pawulo a huhuteriweke ku ma tsala lama nge: “Mi nga tlheriseli swo biha hi swo biha hambi eka mani. . . . Loko swi koteka, swi titshege hi n’wina, vanani ni ku rhula ni vanhu hinkwavo.” (Rhom. 12:17, 18) Ku nga khathariseki swiphiqo leswi Pawulo a langutaneke na swona leswi a swi katsa ni ku hlaseriwa hi “tinsulavoya” u hambete a hanya hi ku pfumelelana ni marito lawa a huhuteriweke ku ma tsala, a nga rihiselanga. (2 Kor. 11:26) Ku ri na sweswo, a tshembela eka Xikwembu ni le ka marito lama kumekaka eRitweni ra Xona lama nge: “Vutlhari bya antswa ku ri ni matlhari ya ku lwa.”— Ekl. 9:18

Vakreste va teka vutomi byi ri bya nkoka ku tlula swilo leswi va nga na swona. Va swi tiva leswaku “vutomi . . . a byi humi eka swilo leswi [munhu] a nga na swona.” (Luka 12:15) Kutani Vakreste va tsundzuka marito ya Yesu lama nge: “Mi nga n’wi kaneti la hombolokeke” loko va xiya leswaku muhlaseri la hlomeke a nga yingisi hambiloko va vulavula na yena hi moya wo rhula. Nakambe swi nga ha lava leswaku hi n’wi nyika leswi a swi lavaka. (Mat. 5:39, 40; Luka 6:29)b I swinene ku papalata ku tiveka khombyeni ro hlaseriwa hi tinsulavoya. Loko hi papalata “ku bombisa rifuwo ra munhu ra vutomi” naswona vaakelani va hina va hi tiva tanihi vanhu va Yehovha vo rhula, swi ta endla leswaku tinsulavoya ti nga hi hlaseli hi ku olova.—1 Yoh. 2:16; Swiv. 18:10.

Vakreste va xixima ripfalo ra van’wana. (Rhom. 14:21) Loko evandlheni ko tshuka ku va ni makwerhu loyi a nga ni xibamu lexi a tisirhelelaka ha xona eka vanhu swi nga hlamarisa Vakrestekulobye ni ku tlhela swi va khunguvanyisa. Rirhandzu ri hi susumetela ku rhangisa swilaveko swa van’wana eka swa hina hambiloko sweswo swi vula papalata swilo leswi hi vonaka onge a swi hoxanga ku swi endla.—1 Kor. 10:32, 33; 13:4, 5.

Vakreste va tikarhatela ku va swikombiso leswinene. (2 Kor. 4:2; 1 Pet. 5:2, 3) Loko Mukreste a hambeta a tshama na xibamu leswaku a ta tisirhelela hi xona eka vanhu van’wana hambiloko se a nyikiwe ndzayo, u ta tekiwa a nga ri xikombiso lexinene. Nakambe a nge he faneleki ku nyikiwa vutihlamuleri byo karhi kumbe malunghelo yo hlawuleka evandlheni. Swi tano ni hi Mukreste loyi a hambetaka a khoma xibamu tanihi hi xiphemu xa ntirho wakwe wa ku tihanyisa. Swi nga va swinene ku va a lava ntirho wun’wana wo tihanyisa.c

Ndlela leyi munhu a yi hlawulaka leswaku a tisirhelela, a sirhelela ndyangu, rifuwo rakwe ku katsa hambi ku ri ku hlawula ntirho wo tihanyisa i xiboho xa yena n’wini. Misinya ya milawu ya Bibele leyi boxiweke laha henhla yi kombisa vutlhari bya Xikwembu ni ndlela leyi xi hi rhandzaka ha yona. Hikwalaho, Vakreste lava wupfeke va yingisa milawu yoleyo hi ku ka va nga tshami na xibamu leswaku va tisirhelela hi xona eka vanhu van’wana. Va swi tiva leswaku nsirhelelo wa xiviri ni wa hilaha ku nga heriki wu ta kumiwa hi lava va tshembaka Xikwembu va tlhela va hanya hi ku pfumelelana ni misinya ya milawu ya Bibele.—Ps. 97:10; Swiv. 1:33; 2:6, 7.