Xana U Swi Lunghekerile Ku Khuvuriwa?

 1. Munhu u fanele a endla yini a nga si sungula ku aka yindlu?

EHLEKETA hi munhu loyi a lavaka ku aka yindlu. Wa swi tiva leswaku u lava ku aka yindlu ya njhani. Xana u to namba a tsutsumela exitolo a ya xava nhundzu? Doo! Ku ni nchumu wun’wana wa nkoka lowu a faneleke a wu endla, ku nga ku kumisisa leswaku yindlu ya kona yi ta koxa mali yo tanihi kwihi. Hikwalaho ka yini? Phela u fanele a tiyiseka leswaku u ni mali leyi ringaneke yo heta yindlu leyi a yi lavaka. Loko a hlayela ntsengo a nga si sungula ku aka, u ta swi kota ku heta yindlu yakwe.

 2. Hi ku ya hi Luka 14:27-30, i yini leswi u faneleke u ehleketisisa hi swona u nga si khuvuriwa?

² Xana ndlela leyi u rhandzaka Yehovha ha yona ni ku tlangela leswi a ku endleleke swona, swi endla u ehleketa hi ku khuvuriwa? Loko swi ri tano, u le xiyin’weni xo fana ni xa wanuna luya a lavaka ku aka yindlu. Hikwalaho ka yini hi vula tano? Twana leswi Yesu a swi vuleke eka Luka 14:27-30. (Yi hlaye.) Yesu a a hlamusela leswi vulaka swona ku va mudyondzisiwa wakwe. Leswaku hi kota ku va valandzeri vakwe, hi fanele hi tiyimisela ku tiyisela mintlhontlho ni ku titsona swo karhi. (Luka 9:23-26; 12:51-53) Loko u nga si khuvuriwa, u fanele u ehleketisisa kahle hi swilo leswi u nga ta langutana na swona loko se u khuvuriwile. Sweswo swi ta endla u kota ku ya emahlweni u tirhela Yehovha hi ku tshembeka loko se u khuvuriwile.

 3. Hi ta kambisisa yini eka nhlokomhaka leyi?

³ Xana ku khuvuriwa u va mudyondzisiwa wa Kreste i swa nkoka ku tlula hinkwaswo? Ina! Ku khuvuriwa swi ta endla u kuma mikateko yo tala sweswi ni le nkarhini lowu taka. A hi kambisiseni swivutiso swin’wana swa nkoka mayelana ni nkhuvulo. Ku endla tano, swi ta ku pfuna u kota ku hlamula xivutiso lexi nge, “Xana ndzi swi lunghekerile ku khuvuriwa?”

 4. (a) I yini ku tinyiketela? (b) Swi vula yini ku ‘titshika’ hilaha swi boxiweke hakona eka Matewu 16:24?

⁴ I yini ku tinyiketela? U fanele u sungula hi ku tinyiketela u nga si khuvuriwa. Loko u tinyiketela, u khongela eka Yehovha hi mbilu hinkwayo kutani u n’wi byela leswaku u ta n’wi tirhela hilaha ku nga heriki. Loko u tinyiketela eka Xikwembu, wa ‘titshika.’ (Hlaya Matewu 16:24.) U sungula ku hanyela Yehovha, ku nga nkateko lowu nga pimanisiwiki na nchumu. (Rhom. 14:8) U va u n’wi byela leswaku ku sukela sweswi, u ta tirhela yena, ku nga ri ku titsakisa. Loko u tinyiketela, u va u endla xihlambanyo xa nkoka eka Xikwembu. Yehovha a nga hi sindzisi ku endla xihlambanyo xo tano. Kambe loko hi xi endla, u langutele leswaku hi xi hetisisa.—Ps. 116:12, 14.

 5. Ku tinyiketela swi fambisana njhani ni ku khuvuriwa?

⁵ Ku tinyiketela swi fambisana njhani ni ku khuvuriwa? Ku tinyiketela i xihundla xa wena na Yehovha ntsena. Ku khuvuriwa i nchumu lowu endliwaka emahlweni ka vanhu, hakanyingi wu endliwa etinhlengeletanweni ta miganga kumbe ta swifundzha. Loko u khuvuriwa, u komba van’wana leswaku u tinyiketerile eka Yehovha.b Ku khuvuriwa ka wena swi endla van’wana va swi tiva leswaku u rhandza Yehovha Xikwembu xa wena hi mbilu hinkwayo, hi moyaxiviri hinkwawo, hi miehleketo hinkwayo ni hi ntamu wa wena hinkwawo naswona u tiyimisele ku n’wi tirhela hilaha ku nga heriki.—Mar. 12:30.

6-7. Hi ku ya hi 1 Petro 3:18-22, hi swihi swivangelo swimbirhi leswi endlaka ku khuvuriwa swi boha?

⁶ Xana swa boha leswaku u khuvuriwa? Twana leswi 1 Petro 3:18-22, yi swi vulaka. (Yi hlaye.) Tanihi leswi ngalava leyi Nowa a yi akeke a yi kombisa ripfumelo leri a ri na rona, swi tano ni hi ku khuvuriwa ka wena, swi endla van’wana va swi vona leswaku u tinyiketerile eka Yehovha. Kambe xana swa boha leswaku u khuvuriwa? Ina. Petro u boxe xivangelo xa kona. Xo sungula, swi “ponisa wena.” Nkhuvulo wu nga hi ponisa ntsena loko hi kombisa leswaku hi ni ripfumelo eka Yesu naswona ha kholwa leswaku u hi ferile ivi a pfuxeriwa etilweni nileswaku sweswi “u le vokweni ra xinene ra Xikwembu.”

⁷ Xa vumbirhi, ku khuvuriwa swi endla hi va ni “ripfalo lerinene.” Loko hi tinyiketele eka Xikwembu kutani hi khuvuriwa, hi aka vuxaka byo hlawuleka na xona. Xikwembu xi hi rivalele swidyoho swa hina hileswi hi hundzukeke hi mbilu hinkwayo naswona hi nga ni ripfumelo eka gandzelo ra nkutsulo. Sweswo swi endla hi va ni ripfalo lerinene.

 8. I yini lexi faneleke xi ku susumetela ku khuvuriwa?

⁸ I yini lexi faneleke xi ku susumetela ku khuvuriwa? Leswi u dyondzaka Bibele, u dyondze swo tala hi Yehovha naswona u n’wi tiva ku antswa. Leswi u swi dyondzeke hi yena, swi ku khumbe mbilu lerova u kala u n’wi rhandza hi mbilu ni moya. Ku rhandza Yehovha hi swona leswi faneleke swi ku susumetela ku khuvuriwa.

 9. Swi vula yini ku khuvuriwa hi vito ra Tatana ni ra N’wana ni ra moya lowo kwetsima, hilaha Matewu 28:19, 20, yi vulaka hakona?

⁹ Nakambe ntiyiso lowu u wu dyondzeke eBibeleni, hi wona wu endlaka u teka xiboho xo khuvuriwa. Twana leswi Yesu a swi vuleke loko a nyika vadyondzisiwa vakwe xileriso xo endla vadyondzisiwa. (Hlaya Matewu 28:19, 20.) Yesu u vule leswaku lava khuvuriwaka, va fanele va endla tano “hi vito ra Tatana ni ra N’wana ni ra moya lowo kwetsima.” Swi vula yini leswi? U fanele u wu tshemba hi mbilu hinkwayo ntiyiso lowu u wu dyondzaka eBibeleni mayelana na Yehovha; N’wana wakwe, Yesu; ni moya lowo kwetsima. Ntiyiso wolowo i wa nkoka naswona wu nga fikelela mbilu ya wena. (Hev. 4:12) Sweswi a hi pfuxeteni swin’wana swa swona.

10-11. Hi wihi ntiyiso lowu u wu dyondzeke hi Tatana u tlhela u wu amukela?

¹⁰ Tsundzuka loko u sungula ku dyondza ntiyiso hi Tatana: Loyi ‘vito rakwe a nga Yehovha,’ u le “Henhlahenhla emisaveni hinkwayo” naswona yena a ri yexe i “Xikwembu xa ntiyiso.” (Ps. 83:18; Esa. 37:16) I Muvumbi wa hina naswona “ku ponisa i ka Yehovha.” (Ps. 3:8; 36:9) U endle lunghiselelo ro hi ponisa eka xidyoho ni rifu, a tlhela a hi nyika ntshembo wo kuma vutomi lebyi nga heriki. (Yoh. 17:3) Ku tinyiketela ni ku khuvuriwa ka wena swi kombisa leswaku u Mbhoni ya Yehovha. (Esa. 43:10-12) U ta va xirho xa ndyangu wa vagandzeri va Yehovha emisaveni hinkwayo, lowu vitaniwaka hi vito ra Xikwembu naswona wu tivisaka van’wana hi vito rero.—Ps. 86:12.

¹¹ Mayana ku tsakisa ka swona ku twisisa leswi Bibele yi swi dyondzisaka hi Tatana! Loko u amukela ntiyiso lowu wa risima, mbilu ya wena yi ta endla leswaku u tinyiketela eka Yehovha u tlhela u khuvuriwa.

12-13. Hi wihi ntiyiso lowu u wu dyondzeke hi N’wana u tlhela u wu amukela?

¹² U titwe njhani endzhaku ko dyondza hi ntiyiso lowu landzelaka mayelana ni N’wana? Yesu i xivumbiwa xa vumbirhi hi ku tlakuka evuakweni hinkwayo. I Mukutsuri wa hina. U nyikele hi vutomi byakwe hikwalaho ka hina. Loko hi kombisa leswaku hi ni ripfumelo eka nkutsulo, hi ta rivaleriwa swidyoho swa hina, hi va ni vuxaka ni Xikwembu naswona hi ta kuma vutomi lebyi nga heriki. (Yoh. 3:16) Yesu i Muprista wa hina Lonkulu. U lava hi vuyeriwa eka nkutsulo nileswaku hi va ni vuxaka lebyinene ni Xikwembu. (Hev. 4:15; 7:24, 25) Leswi a nga Hosi ya Mfumo wa Xikwembu, Yehovha u ta tirhisa yena leswaku a kwetsimisa vito rakwe, a herisa vuhomboloki ni ku tisela vanhu mikateko ya hilaha ku nga heriki eParadeyisini. (Mat. 6:9, 10; Nhlav. 11:15) Yesu u hi vekele ntila. (1 Pet. 2:21) U hi vekele xikombiso lexinene hi ku rhangisa ntirho wa Xikwembu evuton’wini byakwe.—Yoh. 4:34.

¹³ Loko u amukela leswi Bibele yi swi dyondzisaka hi Yesu, u ta n’wi rhandza N’wana loyi Xikwembu xi n’wi rhandzaka. Rirhandzu rero, ri ta ku susumetela ku endla ku rhandza ka Xikwembu hilaha Yesu a endleke hakona. Sweswo swi ta endla u tinyiketela eka Yehovha u tlhela u khuvuriwa.

14-15. Hi wihi ntiyiso lowu u wu dyondzeke mayelana ni moya lowo kwetsima u tlhela u wu amukela?

¹⁴ U titwe njhani endzhaku ko dyondza ntiyiso lowu landzelaka mayelana ni moya lowo kwetsima? A hi munhu kambe i matimba lama tirhaka ya Xikwembu. Yehovha u tirhise moya wakwe lowo kwetsima leswaku ku tsariwa Bibele naswona moya wolowo hi wona wu hi pfunaka hi kota ku twisisa ni ku tirhisa leswi hi swi dyondzaka. (Yoh. 14:26; 2 Pet. 1:21) Yehovha u tirhisa moya wakwe leswaku a hi nyika “matimba lama tlulaka lama tolovelekeke.” (2 Kor. 4:7) Moya wolowo wu hi nyika matimba yo chumayela mahungu lamanene, yo lwisana ni miringo ni yo tiyisela maxangu. Hi wona lowu hi pfunaka hi kota ku kombisa “mihandzu ya moya” evuton’wini bya hina. (Gal. 5:22) Xikwembu xi nyika vanhu lava kombelaka moya wa xona lowo kwetsima ni lava xi tshembaka hi mbilu hinkwayo.—Luka 11:13.

¹⁵ Swa chavelela hakunene ku tiva leswaku moya lowo kwetsima wu ta nyika vagandzeri va Yehovha matimba ya ku n’wi tirhela! Loko u amukela ntiyiso lowu u wu dyondzeke mayelana ni moya lowo kwetsima, u ta susumeteleka ku tinyiketela eka Xikwembu u tlhela u khuvuriwa.

16. I yini leswi hi swi dyondzeke ku ta fikela sweswi eka nhlokomhaka leyi?

¹⁶ Xiboho lexi u xi endlaka xa ku tinyiketela eka Xikwembu u tlhela u khuvuriwa i xa nkoka swinene. Hilaha hi dyondzeke hakona, u fanele u tiyimisela ku tiyisela mintlhontlho ni ku titsona swo karhi. Mikateko leyi u nga ta yi kuma, yi tele ngopfu loko yi pimanisiwa ni swilo leswi u nga ta va u titsone swona. Ku khuvuriwa swi ta ku ponisa ni ku endla leswaku u va ni ripfalo lerinene eka Xikwembu. Ku rhandza Yehovha Xikwembu, hi swona leswi faneleke swi ku susumetela ku khuvuriwa. Nakambe, u fanele u wu tshemba hi mbilu hinkwayo ntiyiso lowu u wu dyondzeke hi Tatana, hi N’wana ni hi moya lowo kwetsima. Eka leswi se hi swi dyondzeke ku ta fikela sweswi, u nga xi hlamula njhani xivutiso lexi nge, “Xana ndzi swi lunghekerile ku khuvuriwa?”

17. Hi wahi magoza man’wana lama kombisaka leswaku munhu u swi lunghekerile ku khuvuriwa?

¹⁷ Loko u titwa se u swi lunghekerile ku khuvuriwa, swi vula leswaku u endle matshalatshala yo tiyisa vuxaka bya wena na Yehovha.c Leswi u dyondzaka Bibele nkarhi ni nkarhi, se u tiva swo tala hi Yehovha na Yesu. U ni ripfumelo leri tiyeke. (Hev. 11:6) U swi tshemba hi ku helela switshembiso swa Yehovha leswi nga eBibeleni naswona wa tiyiseka leswaku ripfumelo leri u nga na rona eka gandzelo ra Yesu, ri ta ku ponisa eka xidyoho ni rifu. U hundzukile eswidyohweni swa wena; wa tisola hi swilo swo biha leswi u tshameke u swi endla naswona u kombele ku rivaleriwa eka Yehovha. U cince vutomi bya wena; u tshike mahanyelo yo biha naswona se u hanya hi ndlela leyi tsakisaka Xikwembu. (Mint. 3:19) Nakambe, u tiyimisele ku byela van’wana hi ripfumelo ra wena. U muhuweleri loyi a nga khuvuriwangiki naswona u sungule ku chumayela ni vandlha. (Mat. 24:14) Yehovha wa tinyungubyisa hi wena hikwalaho ka leswi u tekeke magoza lawa. U tsakise mbilu yakwe swinene.—Swiv. 27:11.

18. Hi swihi swin’wana leswi u faneleke u swi endla loko u nga si khuvuriwa?

¹⁸ Loko u nga si khuvuriwa, ku ni swilo swi nga ri swingani leswi u faneleke u swi endla. Hilaha hi dyondze hakona, u fanele u tinyiketela eka Xikwembu. Khongela eka Yehovha swi suka embilwini u ri wexe naswona n’wi tshembise leswaku u ta hanyela ku endla ku rhandza ka yena. (1 Pet. 4:2) Tivisa muhlanganisi wa huvo ya vakulu leswaku u lava ku khuvuriwa. U ta kombela vakulu leswaku va hlangana na wena. Titwe u ntshunxekile ku hlangana na vona. Vamakwerhu lava, va ku tiva naswona va ku rhandza. Va ta bula na wena hi tidyondzo ta xisekelo leti u ti dyondzeke. Va lava ku tiyiseka leswaku wa ti twisisa tidyondzo teto naswona wa wu tiva nkoka wa ku tinyiketela ni ku khuvuriwa. Loko va tiyiseka, va ta ku byela leswaku u ta khuvuriwa eka nhlengeletano ya muganga kumbe ya xifundzha leyi landzelaka.  

19-20. I yini leswi u faneleke u swi endla loko se u khuvuriwile naswona u nga swi endla njhani?

¹⁹ I yini leswi u faneleke u swi endla loko se u khuvuriwile?d Tsundzuka, ku tinyiketela i xihlambanyo lexi Yehovha a languteleke leswaku u xi hetisisa. Loko se u khuvuriwile, u fanele u hanya hi ku pfumelelana ni ku tinyiketela ka wena. U nga swi endlisa ku yini sweswo?

²⁰ Tshama u ri kona etinhlengeletanweni ta vandlha. Leswi se u nga Mukreste loyi a khuvuriweke, u xiphemu xa “nhlengeletano ya vamakwenu.” (1 Pet. 2:17) Loko u ri ni vamakwerhu evandlheni, titwe u ri ekaya. Loko u nga xwi etinhlengeletanweni ta vandlha, vuxaka bya wena na vona byi ta tiya. Hlaya Rito ra Xikwembu siku ni siku u tlhela u anakanyisisa hi leswi u swi hlayaka. (Ps. 1:1, 2) Loko u heta ku hlaya xiphemu xo karhi eBibeleni, tinyike nkarhi wo anakanyisisa hi leswi u swi hlayeke. Leswi u swi hlayeke swi ta khumba mbilu ya wena. “Khongela” nkarhi ni nkarhi. (Mat. 26:41) Swikhongelo swa wena leswi humaka embilwini swi ta endla u tshinela eka Yehovha. ‘Hambeta u lava Mfumo ku sungula.’ (Mat. 6:33) U nga endla tano hi ku rhangisa ntirho wo chumayela evuton’wini bya wena. Loko u ya ensin’wini nkarhi ni nkarhi, ripfumelo ra wena ri ta tiya naswona u ta kota ku pfuna van’wana leswaku va famba egondzweni leri yisaka evuton’wini lebyi nga heriki.—1 Tim. 4:16.

21. I yini leswi u nga ta tiphina hi swona loko u khuvuriwile?

²¹ Ku tinyiketela eka Yehovha ni ku khuvuriwa i xiboho xa nkoka swinene ku tlula swiboho hinkwaswo leswi u nga swi endlaka. I ntiyiso leswaku u ta langutana ni mintlhontlho. Xana swi kona leswi u nga ta vuyeriwa ha swona? Ina! Maxangu hinkwawo lawa u nga ta langutana na wona emisaveni leyi, mo va ya “nkarhinyana naswona [ma] vevukaka.” (2 Kor. 4:17) Kambe ku khuvuriwa ka wena, swi ta ku pfulela ndlela yo tiphina hi vutomi sweswi ni hi ‘vutomi bya xiviri’ enkarhini lowu taka. (1 Tim. 6:19) Hikwalaho, tinyike nkarhi wo khongela u tlhela u ehleketisisa kahle hi nhlamulo ya xivutiso lexi nge, “Xana ndzi swi lunghekerile ku khuvuriwa?”