Bibele Yi Ri Yini Hi Wanuna Ni Wansati Lava Tshamaka Swin’we Va Nga Tekananga Hi Nawu?

Bibele yi vula leswaku Xikwembu xi lava leswaku vanhu va “papalata ku tikhoma ko biha hi swa masangu.” (1 Vatesalonika 4:3) EBibeleni rito leri nge, “ku tikhoma ku biha hi swa masangu” ri katsa swilo swo fana ni ku endla vuoswi, ku va vanhu vambirhi va rimbewu leri fanaka va endla timhaka ta masangu ni ku va wanuna ni wansati lava nga tekanangiki va endla timhaka ta masangu.

• Hikwalaho ka yini Xikwembu xi lava leswaku vanhu lava sungulaka ndyangu va tekana?

• Xana swi hoxile ku va vanhu vambirhi va rhanga va tshama swin’we va nga se tekana ku vona loko va fanelana?

• Vatekani va nga byi tiyisa njhani vukati bya vona?

• Mhaka ya ku vanhu va tekana yi sunguriwe hi Xikwembu. Xi yi sungule loko xi catisa vanhu vo sungula. (Genesa 2:22-24) Ku sukela eku sunguleni Xikwembu a xi nga lavi leswaku wanuna ni wansati va tshama swin’we va nga tekananga hi nawu.

• Xikwembu xa swi tiva leswi nga endlaka vanhu va tsaka. Xi endle leswaku vatekani va va ni vun’we vutomi bya vona hinkwabyo leswaku va tsaka ni ku va ni ndyangu lowu sirhelelekeke. Xiya xikombiso lexi landzelaka. Ku fana ni leswi swiletelo leswi taka ni fenichara swi pfunaka munhu ku tiva ndlela yo yi hlanganisa, milawu ya Xikwembu na yona yi pfuna vatekani ku tiva ndlela leyi va faneleke va hanyisana ha yona. Mikarhi hinkwayo milawu ya Xikwembu yi pfuna lava yi yingisaka.—Esaya 48:17, 18.

  

• Ku endla timhaka ta masangu ni munhu loyi u nga tekanangiki na yena hi nawu swi nga tisa vuyelo byo vava ngopfu. Hi xikombiso u nga ha tika kumbe u tikisa munhu u nga swi pulananga, u nga ha khomiwa hi mavabyi hambi ku ri ku tshamela ku kingindziwa hi ripfalo.a

• Xikwembu xi endle leswaku wanuna ni wansati va kota ku tswala vana loko va endla timhaka ta masangu. Vutomi bya kwetsima eka Xikwembu naswona ku va vanhu va kota ku va na vana i nyiko ya risima. Xikwembu xi lava hi xixima nyiko yoleyo hikuva hi yingisa nawu lowu xi wu vekeke mayelana ni vukati.—Vaheveru 13:4.

Lexi endlaka leswaku wanuna ni wansati va tsaka a hi ku va va rhanga hi ku tshama swin’we ku ringana nkarhi wo karhi ku vona loko va ta kota ku tshamisana. Kambe vukati bya tiya loko vanhu vambirhi va ti bohile naswona va tirhisana leswaku va lulamisa swiphiqo.b Vanhu lava tekaneke hi nawu va va va endle xihlambanyo naswona a swi talanga leswaku va hambana.—Matewu 19:6.

A ku na vatekani lava nga riki na swiphiqo. Kambe vatekani va nga tsaka loko va tirhisa switsundzuxo swa Bibele. Hileswi swin’wana swa swona:

• Rhangisa swilaveko swa nuna kumbe nsati wa wena.—1 Vakorinto 7:3-5; Vafilipiya 2:3, 4.

• Rhandzanani mi tlhela mi xiximana.—Vaefesa 5:25, 33.

• Dyondzani ku hlawula marito loko mi vulavurisana.—Swivuriso 12:18.

• Hatlani mi rivalelana mi tlhela mi lehiselana mbilu.—Vakolosa 3:13, 14.