Vantshwa—Xana Mi Ta Endla Yini Hi Vutomi Bya N’wina?

“NDZI lava leswaku swilo swi ndzi fambela kahle evuton’wini.” Marito lawa ma vule hi xinhwanyetana xin’wana lexi nga emalembeni ya kondlo-a-ndzi-dyi. A swi kanakanisi leswaku na wena u titwa tano. Kambe u nga swi endlisa ku yini leswaku swilo swi ku “fambela kahle”? Swihaxa-mahungu ni tintangha ta wena, hambi ku ri vadyondzisi va wena, va nga ha vula leswaku loko munhu a humelela, swi vonaka hi ku kuma mali yo tala ni ku va ni ntirho-vutomi wa xiyimo xa le henhla!

Hambiswiritano, Bibele yi tsundzuxa vantshwa leswaku ku hlongorisa swilo leswi vonakaka swi fana ni “ku hlongorisa mheho.” (Eklesiasta 4:4) Nakambe, a hi vangani lava kumaka rifuwo ni ndhuma. Lava va swi kumaka hakanyingi va pfilunganyeka swinene. Muntshwa un’wana wa le Britain loyi a dyondzeleke ntirho-vutomi wa xiyimo xa le henhla, u ri: “Swi fana ni bokisi leri nga riki na nchumu. Loko u languta endzeni ka rona, a ku na nchumu.” Ina, swi nga ha endleka leswaku ntirho wu endla munhu a va ni rifuwo ro tala a tlhela a va ni ndhuma. Kambe a wu nge xi enerisi ‘xilaveko xa yena xa moya.’ (Matewu 5:3) Handle ka sweswo, 1 Yohane 2:17 yi tsundzuxa leswaku “misava ya hundza.” Hambi wo humelela emisaveni leyi, a swi nge tlhaveriwi hi dyambu.

Xisweswo, Eklesiasta 12:1 yi khutaza vantshwa yi ku: “Anakanya Muvumbi wa wena hi masiku ya vuntshwa bya wena.” (Bibele ya Xitsonga) Ina, ndlela yo antswa yo tirhisa vutomi bya wena i ku tirhela Yehovha Xikwembu. Kambe xo sungula, u fanele u faneleka leswaku u tirhela Xikwembu. Xana u nga swi endlisa ku yini sweswo? Xana ku tirhela Xikwembu swi katsa yini?

Ku Fanelekela Ku Va Mbhoni Ya Yehovha

Xo sungula, u fanele u hlakulela ku navela ku tirhela Xikwembu—naswona ku navela koloko a ku tiendlekeli, hambiloko vatswari va wena va ri Vakreste. U fanele u va ni vuxaka bya wena n’wini na Yehovha. Xinhwanyetana lexi nga emalembeni ya kondlo-a-ndzi-dyi, xi ri: “Ku khongela swi ku pfuna leswaku u va ni vuxaka bya wena n’wini na Yehovha.”—Pisalema 62:8; Yakobo 4:8.

Varhoma 12:2 yi kandziyisa goza rin’wana leri u faneleke u ri teka. Yi ri: “Tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” Xana u tshama u tikuma u ri karhi u kanakana swilo swin’wana leswi u dyondzisiweke swona? Loko swi ri tano, landzela xikhutazo xa Bibele xa leswaku u “tiyiseka” loko swilo leswi swi ri ntiyiso! Tiendlele ndzavisiso. Hlaya Bibele ni minkandziyiso leyi sekeriweke eBibeleni. Kambe, ku dyondza hi Xikwembu a hi mhaka yo tirhisa mianakanyo ntsena. Tinyike nkarhi wo anakanyisisa hi swilo leswi u swi hlayaka leswaku swi nghena swi dzika embilwini ya wena yo fanekisela. Leswi swi ta endla leswaku u xi rhandza swinene Xikwembu.—Pisalema 1:2, 3.

Xa vumbirhi, u nga ha ringeta ku vulavula ni vadyondzi-koloni hi leswi u swi dyondzeke. Goza rin’wana i ku chumayela hi yindlu ni yindlu. Loko wa ha sungula, minkarhi yin’wana u nga ha hlangana ni mudyondzi-koloni naswona u nga ha biwa hi ripfalo. Kambe Bibele yi hi khutaza leswaku hi nga “khomiwi hi tingana hi mahungu lamanene.” (Varhoma 1:16) U va yisela rungula leri nyikaka vutomi ni ntshembo! Ha yini swi fanele swi ku khomisa tingana?

Loko vatswari va wena va ri Vakreste, kumbexana u famba na vona loko va endla ntirho lowu wo chumayela. Kambe, xana u hetelela hi ku yima enyangweni u ku whii, kumbe u fambisa timagazini ni swiphephana ntsena, kumbe wa swi kota ku endla swo tlula leswi? Xana wa swi kota ku vulavula hi wexe loko u fika emutini, u dyondzisa n’wini wa muti u ri karhi u tirhisa Bibele? Loko u nga swi koti, kombela mpfuno eka vatswari va wena kumbe eka xirho xin’wana xa vandlha lexi wupfeke. Tivekele pakani ya leswaku u fanelekela ku va muhuweleri la nga khuvuriwangiki, wa mahungu lamanene!

Hi ku famba ka nkarhi, u ta navela ku tinyiketela—u tiboha eka Xikwembu leswaku u ta xi tirhela ku sukela hi nkarhi wolowo ku ya emahlweni. (Varhoma 12:1) Hambiswiritano, ku tinyiketela a swi heleleni exihundleni ntsena. Xikwembu xi lava leswaku hinkwerhu hi ‘vula erivaleni hi milomu ya hina leswaku hi ponisiwa.’ (Varhoma 10:10) Hi nkarhi wa ku khuvuriwa ka wena, u rhanga hi ku vula ripfumelo ra wena hi nomu. Kutani endzhaku ka sweswo u khuvuriwa hi mati. (Matewu 28:19, 20) Ina, nkhuvulo i goza ra nkoka swinene. Kambe u nga tshiki ku khuvuriwa hi ku anakanya leswaku u nga ha tsandzeka. Loko u tiseketela hi matimba ya Xikwembu, xi ta ku nyika “matimba lama tlulaka lama tolovelekeke” lama nga ta ku pfuna leswaku u yima u tiyile.—2 Vakorinto 4:7; 1 Petro 5:10.

Loko u khuvuriwa, u va un’wana wa Timbhoni ta Yehovha. (Esaya 43:10) Leswi swi fanele swi ku endla u va ni vuxiya-xiya swinene leswaku u byi tirhisa njhani vutomi bya wena. Ku tinyiketela swi katsa ku ‘titshika.’ (Matewu 16:24) U nga boheka ku tshika tipakani leti u ti vekeleke tona ni swilo leswi u swi navelaka kutani u ‘lava mfumo wa Xikwembu ku sungula.’ (Matewu 6:33) Xisweswo ku tinyiketela ni ku khuvuriwa swi ku pfulela tindlela to tala ta ku endla sweswo. A hi kambisiseni tin’wana ta tona.

Tindlela To Tirhela Xikwembu Nkarhi Hinkwawo

● Vuphayona hi yin’wana ya tindlela teto. Muhuweleri la nga phayona i Mukreste la khuvuriweke, loyi a nga xikombiso lexinene, la endleke malunghiselelo yo heta tiawara leti nga riki ehansi ka 70 hi n’hweti a ri karhi a chumayela mahungu lamanene. Ku heta nkarhi lowu engetelekeke ensin’wini swi ta ku pfuna leswaku u antswisa vuswikoti bya wena byo chumayela ni bya ku dyondzisa. Maphayona yo tala ma kume ntsako hi ku pfuna swichudeni swa wona swa Bibele leswaku swi va Timbhoni leti khuvuriweke. Xana wu kona ntirho wa ku tihanyisa lowu nga tsakisaka wu tlhela wu enerisa ku fana ni lowu?

Leswaku ma kota ku tihanyisa, maphayona yo tala ma ni ntirho wo tihanyisa wa nkarhinyana (part-time). Van’wana va lunghiselela ku byarha vutihlamuleri lebyi ka ha ri emahlweni, hi ku dyondzela ntirho exikolweni kumbe eka vatswari va vona. Loko wena ni vatswari va wena mi vona swi antswa ku kuma dyondzo leyi engetelekeke endzhaku ka loko u pasile exikolweni xa sekondari, tiyiseka leswaku makungu ya wena a hi ya ku kuma mali yo tala kambe i ya ku seketela vutirheli bya wena kumbe ku va mutirheli wa nkarhi hinkwawo.

Hambiswiritano, evuton’wini bya phayona ntirho wa ku tihanyisa a hi nchumu lowukulu, kambe nchumu lowukulu i vutirheli bya rona—ku nga ku pfuna van’wana leswaku va kuma vutomi! Ha yini u nga tivekeli pakani ya ku va phayona? Hakanyingi vuphayona byi endla leswaku u kuma malunghelo man’wana. Hi xikombiso, maphayona man’wana ma rhurhela etindhawini tin’wana leti eka tona ku nga ni xilaveko lexikulu xa vahuweleri va Mfumo. Van’wana va dyondza ririmi rimbe kutani va hlanganyela ni vandlha ra kwalaho leri tirhisaka ririmi rolero kumbe va rhurhela etikweni rimbe. Hakunene, vuphayona bya vuyerisa!

● Ntirho wa vurhumiwa i yin’wana ya tindlela toleto. Ku sukela hi 1943 Xikolo xa Bibele xa Gilead xa Watchtower xi pfune maphayona lama fanelekaka hi dyondzo leyinene ya ku ma letela leswaku ma endla ntirho wa vurhumiwa. Lama thwasaka ma kuma swiavelo swa leswaku ma va vachumayeri va nkarhi hinkwawo ematikweni mambe. Eka yo tala ya wona, swilo a swi olovi, kutani ku laveka leswaku varhumiwa va va ni rihanyo lerinene ni matimba. Hambiswiritano, varhumiwa va tiphina, va tsakela ntirho wa vona.

● Xikolo xa Ndzetelo wa Vutirheli xi simekeriwe ku letela vakulu ni malandza ya vutirheli lava fanelekaka, lava nga si tekaka. Exikolweni lexi xa mavhiki ya nhungu vakulu ni malandza ya vutirheli va dyondzisiwa vutihlamuleri bya vona, ku hleleka ni ku vulavula erivaleni. Van’wana va averiwa ku ya tirha ematikweni ya ka vona. Kasi van’wana va komberiwa ku ya tirha ematikweni mambe.

● Ntirho wa le Bethele wu katsa ku tirha hi ku tirhandzela eka rin’wana ra marhavi ya Timbhoni ta Yehovha. Swirho swin’wana swa ndyangu wa Bethele swi tirha ku endla tibuku leti sekeriweke eBibeleni. Van’wana va nyikiwa mintirho leyi pfunetaka yo tanihi ku pfuxeta miako ni ku lunghisa switirho kumbe ku khathalela swirho swa ndyangu wa Bethele. Swiavelo leswi hinkwaswo i malunghelo yo kwetsima yo tirhela Yehovha. Ku engetela kwalaho, vanhu lava va tirhaka eBethele va tsaka hi ku tiva leswaku xin’wana ni xin’wana lexi va xi endlaka, xi pfuna vamakwerhu vo tala emisaveni hinkwayo.

Minkarhi yin’wana vamakwerhu lava nga ni vutivi byo hlawuleka va rhambiwa leswaku va ta tirha eBethele. Hambiswiritano, van’wana va dyondzisiwa mintirho loko se va fikile. Lava va tirhaka eBethele, a va tirheli swilo leswi vonakaka kambe va eneriseka hi malunghiselelo ya swakudya, byetlelo ni swimalana swo kota ku tihanyisa. Muntshwa wun’wana la nga xirho xa ndyangu wa Bethele u hlamusela ntirho wa yena hi ndlela leyi: “Wa tsakisa hakunene! Ta vuya, kambe ndzi kume mikateko yo tala hi ku tirha endhawini leyi.”

● Ntirho wa matiko hinkwawo wu endla leswaku van’wana va hlanganyela eku akiweni ka marhavi ni Tiholo ta Mfumo. Vatirheli va matiko hinkwawo, hilaha va vitaniwaka hakona, va ya ematikweni mambe ku ya pfuneta eka ntirho wolowo wo aka. Lowu i ntirho wo kwetsima, lowu fanaka ni lowu endliweke hi lava akeke tempele ya Solomoni. (1 Tihosi 8:13-18) Malunghiselelo lama endliwaka ya ku khathalela vatirheli va matiko hinkwawo ma fana ni lawa ma endliwaka leswaku ku khathaleriwa swirho wa ndyangu wa Bethele. Mawaku lunghelo leri vamakwerhu lava va nga na rona ra ku tirhela Yehovha hi ndlela leyi!

Tirhela Yehovha Hi Moya Xiviri Wa Wena Hinkwawo

Ku tirhela Yehovha i ndlela leyinene ku tlula hinkwato ya ku tirhisa vutomi bya wena. Ha yini u nga anakanyisisi hi ku tivekela pakani ya wena n’wini ya ku tirhela Xikwembu nkarhi hinkwawo? Burisana ni vatswari va wena, vakulu va vandlha ra ka n’wina ni mulanguteri la famba-fambaka mayelana ni ntirho wa nkarhi hinkwawo. Loko u tsakela ku ya eBethele, eGilead, kumbe eka Xikolo xa Ndzetelo wa Vutirheli, vana kona eka minhlangano ya lava lavaka ku nghenela ntirho lowu, leyi khomiwaka eka tinhlengeletano ta xifundzha ni mintsombano ya muganga.

Ina, a hi hinkwavo lava nga ta faneleka kumbe lava nga ta swi kota ku nghenela ntirho wa nkarhi hinkwawo. Minkarhi yin’wana hi nga siveriwa hi swiphiqo swa rihanyo, swiyimo swa timali ni vutihlamuleri bya ndyangu. Hambiswiritano, Vakreste hinkwavo lava tinyiketeleke va fanele va yingisa xileriso xa Bibele lexi nge: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Yehovha u lava leswaku u endla leswi nga ematimbeni ya wena, hi ku pfumelelana ni swiyimo swa wena. Ku nga khathariseki leswaku xiyimo xa wena xi njhani, endla leswaku ku tirhela Yehovha ku va pakani ya wena evuton’wini. Tivekele tipakani leti fikelelekaka ta swa le tilweni. Ina, “anakanya Muvumbi wa wena hi masiku ya vuntshwa bya wena”—naswona loko wo endla tano u ta katekisiwa hilaha ku nga heriki!

Handle ka mfungho, ku tshaha hinkwako ka le Bibeleni ku tekiwe eka Vuhundzuluxeri Bya Misava Leyintshwa Bya Matsalwa Yo Kwetsima.