Mahungu Lamanene Ma Chumayeriwa eMatikweni Yo Tala

Vaapostola va yingise xileriso xa Yesu xo chumayela mahungu lamanene emisaveni hinkwayo. Hi 47 C.E., vamakwerhu va le Antiyoka va rhumele Pawulo na Barnaba leswaku va ya chumayela. Vachumayeri lavambirhi lava hisekaka, va endzele matiko hinkwawo ya le Asia Minor va ya fika etindhawini to tanihi Derbe, Listra na Ikoniya.

Pawulo na Barnaba va chumayele vanhu hinkwavo, ku nga khathariseki leswaku a va ri swifumi kumbe swisiwana, a va ri lavatsongo kumbe lavakulu. Vanhu vo tala va amukele ntiyiso lowu vulavulaka hi Kreste. Loko Pawulo na Barnaba va chumayele Sergiyo Pawulosi loyi a a ri ndhunankulu ya le Kipra, noyi un’wana u ringete ku va sivela. Pawulo u byele noyi yoloye a ku: ‘Yehovha u ku hlundzukerile.’ Hi ku hatlisa, noyi yoloye u fe matihlo. Loko Ndhunankulu Pawulosi a vona sweswo, u ve mupfumeri.

Pawulo na Barnaba a va chumayela kun’wana ni kun’wana, hi yindlu ni yindlu, etindhawini ta mabindzu, emapatwini ni le masinagogeni. Loko va horise wanuna loyi a lamarile eListra, lava va voneke singita rolero a va ehleketa leswaku i swikwembu kutani va ringete ku va gandzela. Kambe Pawulo na Barnaba va va siverile, va ku: ‘Gandzelani Xikwembu ntsena! Na hina hi vanhu lava fanaka na n’wina.’ Kutani Vayuda van’wana va tile ivi va endla leswaku ntshungu wu pfukela Pawulo. Ntshungu wu n’wi khandle hi maribye, ivi wu n’wi humesela ehandle ka muti, wu n’wi siya a ri kusuhi ni ku fa. Hambiswiritano, Pawulo a a nga fanga! Hi nkarhi wolowo, vamakwerhu va tile kutani va n’wi teka va famba na yena emutini. Endzhakunyana, Pawulo u tlhelele eAntiyoka.

Hi 49 C.E., Pawulo u teke riendzo rin’wana. Endzhaku ka loko a vuyile leswaku a ta vona vamakwerhu eAsia Minor, u ye emahlweni a chumayela mahungu lamanene ku ya fika eYuropa. U ye eAtena, Efesa, eFilipiya, eTesalonika ni le tindhawini tin’wana. Silasi na Luka ni jaha leri vuriwaka Timotiya, va fambe na Pawulo eka riendzo rakwe. Va tirhe swin’we leswaku va sungula mavandlha ni ku ma pfuna leswaku ma tshama ma tiyile. Pawulo u tshame eKorinto ku ringana lembe ni hafu, a tiyisa vamakwerhu. U chumayerile, a dyondzisa a tlhela a tsalela mavandlha yo tala mapapila. A a tihanyisa hi ku endla matende. Hi ku famba ka nkarhi, Pawulo u tlhelele eAntiyoka.

Endzhakunyana, hi 52 C.E., Pawulo u teke riendzo ra vunharhu, a sungula hi le Asia Minor. U fambe ku ya fika en’walungu eFilipiya a tlhela a rhelela a ya eKorinto. Pawulo u hete malembe yo hlayanyana a ri Efesa, a dyondzisa, a horisa a tlhela a pfuna mavandlha. Siku ni siku a a nyikela tinkulumo ta le rivaleni eholweni ya xikolo. Vanhu vo tala va yingisile kutani va cinca mahanyelo ya vona. Eku heteleleni, loko a chumayele mahungu lamanene ematikweni yo tala, Pawulo u ye eYerusalema.