Yehova—Matimba Ya Hina

“Yehova, Yehova i matimba ya mina ni risimu ra nga.”—ESAYA 12:2.

 1. (a) Ha yini Timbhoni ta Yehova ti hambanile swinene? (b) Esaya 12:2 yi swi veka njhani leswi Yehova a swi endleleke vanhu va yena?

XANA u va kona eminhlanganweni eHolweni ya Mfumo ya Timbhoni ta Yehova? Kwalaho u vona vanhu lava hambaneke swinene ni vanhu vahi ni vahi van’wana! I vamani vanhu lava, naswona ha yini va hambanile? Hi vanhu va Xikwembu hi xoxe, naswona hi hambanile hikuva hi byarha vito leri tlakukeke ku tlula mavito hinkwawo—ra Mutumbuluxi la kwetsimaka wa swihlamariso hinkwaswo swa vuako lebyi hi rhendzeleke. Vito ra yena ri le henhla ka hina. Hi hlengeletana hi ku tsaka hi vito ra yena ku hlanganyela eka swakudya swa moya leswi hlawulekeke leswi a swi nyikelaka “hi nkarhi wa kona” hi nhlengeletano ya yena. (Luka 12:42) Tanihi Timbhoni ta Yehova, hi ku tlangela hi tlakusa vito ra yena leri nga pimanisekiki hi marito ya Esaya ndzima 12, ndzimana 2, leyi nge: “V̌onani, Šikwembu i ku kuṭula ka mina; nḍi ta v̌a ni ku ṭhemba, a nḍa ha tšhav̌i ntšhumu, hikuva Yehova, Yehova i matimba ya mina ni risimu ra nga; hi yena l’a nḍi poniseke!” Xikwembu xa hina xi hi ponise emiringweni yo tala. Sweswi ku pona ka hina ko hetelela ka tshinela—nakambe evokweni ra Yehova!

 2. (a) Xiga “Yehova, Yehova” xi humelela kangani eBibeleni, naswona kwihi? (b) Hi tihi tinhlamuselo tin’wana ta “risimu” eka Esaya 12:2, naswona ha yini na tona ti faneleka?

² Xiga lexi “Yehova, Yehova,” ku phindhiwa ka vito ra Xikwembu, xi humelela kambirhi ntsena eBibeleni, laha ni le ka Esaya 26:4. Hambi ku ri vahundzuluxeri va King James Version va swi vone swi fanela ku xi hundzuluxela va ku “HOSI YEHOVA.” Hi ku ya hi nhlamuselo eka New World Translation Reference Bible, tinhlamuselo tin’wana ta “risimu” eka Esaya 12:2 i “miloti” ni ku “dzunisa.” I ntiyiso swonghasi leswaku Yehova wa matimba hinkwawo, loyi a nyikaka vagandzeri va yena matimba lama hlamarisaka, u lulameriwe hi tinsimu ta hina ta miloti ta ku dzunisa!—Esaya 40:28-31.

 3. (a) I yini lexi Yehova a nga xi pfulela ndlela, naswona exisekelweni xa yini? (b) Marito ya Pawulo eka Varhoma 11:33-36 ya na nsusumeto wihi eka Timbhoni ta Yehova?

³ Matimba ya Yehova ma tiyisiwa hi vutlhari, vululami ni rirhandzu. Eku tirhiseni ka timfanelo leti ta Xikwembu, Yehova u pfule ndlela ya ku ponisiwa ka vanhu lava pfumelaka exisekelweni xa gandzelo ra nkutsulo ra Yesu. Malunghana ni leswi, muapostola Pawulo u te: “Oo! ku enta ka vukosi, ni vutlhari, ni vutivi bya Xikwembu! Makungu ya xona ma nga pimisiwa ku yini, ni tindlela ta xona ti nga twisisiwa ku yini xana? Hikuva: ‘I mani la tiveke mianakanyo ya [Yehova] xana? Mutsundzuxi wa yena ú vile mani ke? I mani la nga rhanga a n’wi nyika xa nchumu lexi a nga ta lava ku tlheriseriwa xona ke?’ Hikuva swilo hinkwaswo swi huma ka yena, swi kona hikwalaho ka yena, swi kongoma yena. Eka yena a ku ve ku dzuneka hi laha ku nga heriki! Amen!” (Varhoma 11:33-36) Kutani ke, swa fanela swonghasi leswaku, hi khomelela swi tiya eka Yehova, Yehova ni ku twarisa ku tiyiseka ka hina loku heleleke ni ku n’wi tshemba tanihi Xikwembu xa hina xa matimba hinkwawo ni Hosi leyi Fumaka!—Ringanisa Vaheveru 3:14.

 4. (a) Ha yini muprofeta Esaya a ri na xivangelo lexinene xa ku vula a ku, ‘Ndzi ta tshemba Yehova naswona ndzi nga chavi’? (b) Ha yini vanhu va Yehova va ri na xivangelo lexinene xa ku tshemba Yehova eka lembe xidzana leri ra vu-20?

⁴ Esaya a a ri na xivangelo lexinene xa ku vula a ku, ‘Ndzi ta tshemba naswona ndzi nga chavi.’ Muprofeta loyi endzhakunyana u tolovelane kahle ni swiendlo swa Xikwembu swa ku ponisa. A a ri mbhoni leyi voneke hi mahlo loko Yehova a hetisisa rito ra Yena hi ku tsongahata Asur ni hosi ya wona ya vutikukumuxi, Sankerib. Hi vusiku byin’we, masocha ya Asur ya 185 000 ma dlayiwile hi ntsumi yin’we ntsena leyi rhumiweke hi Xikwembu xa hina xa matimba hinkwawo, Yehova! Ku pona koloko ko hlawuleka ku vangiwe hi leswi Hosi Ezekiyele ni tiko ra Yuda hinkwaro ri tshembeke Yehova handle ko kanakana. (Esaya 37:6, 7, 21, 36-38) Eka lembe xidzana leri ra vu-20, Yehova nakambe u ntshunxe vanhu va yena eka mintshikilelo, ku yirisiwa, minxaniso ni le mixaxeni ya nxaniso. Ku fana ni Vaasur volavo va ku tikukumuxa va nkarhi wa Esaya, mufumi wa Manazi Adolf Hitler u rhukane Timbhoni ta Yehova, eka xiendlo xin’wana u te, “Thyaka leri ri ta susiwa hi ku helela eJarimani!” Kambe a ku ri Hitler ni Manazi ya yena lava herisiweke. Naswona sweswi ntlawa lowuntsongo wa Timbhoni ta le Jarimani lowu tshembeke Yehova wu kule ku tlula 121 200!—Psalma 27:1, 2; Varhoma 8:31, 37.

 5. Marito ya Esaya 12:3-5 ma tirha njhani eka vanhu lava tshembaka Yehova namuntlha?

⁵ Hambi ku ri kwihi laha ku humelelaka nxaniso, vanhu lava tshembaka Yehova va phyuphyisiwa no tiyisiwa hi ku nwa mati ya ntiyiso lama nyikaka vutomi. Swi tanihi laha muprofeta wa Xikwembu a vuleke ha kona eka Esaya 12:3-5: “Mi ta tikela e mati hi ku ṭaka e ŝihlobyeni ŝa ku hlayiseka; kutani hi siku rero mi ta ku: Tlangelani Yehova, khongelani v̌ito ra yena, mi tiv̌isa matiko e mahlori ya yena, twarisani, mi ku: V̌ito ra yena hi le’ri tlakukeke. Yimbelelani Yehova, hikuv̌a o endlile timhaka le’ti hlamarisaka; a ti tiv̌iwe matikweni hikwawo!” Onge hi nga ya emahlweni hi nwa ntiyiso wa Mfumo hi ku enta naswona hi ku tlangela hi tlakusa vito ra Yehova, Hosi ya hina leyi Fumaka. Hi ntshembo lowu heleleke eka Yehova, a hi ‘twariseni Rito, hi hiseka hi nkarhi wa kona hambi ku nga ri nkarhi wa kona.’ (2 Timotiya 4:2) Hambi vakaneti va nga ha endla yini, Yehova, Yehova hi rirhandzu u ta hi kongomisa endleleni ya ku pona!

‘Muti Wa Vamatiko Lava Nga Ni Matimba’

 6, 7. (a) Hi ku pfumelelana na Esaya 25:1, ha yini vagandzeri va Yehova va fanele ku n’wi kwetsimisa? (b) Esaya 25:2, 3 yi hlamusela muti wun’wana hi ndlela yihi? (c) Muprofeta a nga va a kombetela eka muti wihi, naswona ha yini?

⁶ Sweswi a hi hundzukeleni eka Esaya ndzima 25. Eka ndzimana ya 1 ha hlaya: “Oho Yehova! u Šikwembu ša mina, nḍi ta ku ḍunisa; nḍi ta twarisa v̌ito ra wena, hikuv̌a u endlile le’ŝi hlamarisaka. Makungu ya wena ya khale ma ṭhembeka, ma tiyile.” Vagandzeri lava tshembaka Yehova va n’wi kwetsimisa hikwalaho ka mintirho yo hlamarisa leyi a yi endleke exikarhi ka vona. Kambe Esaya u endla ku pimanisa lokukulu, a ku eka Yehova: “Hikuv̌a hi muti u endlile nhulu ya maribye, hi muti wa khokholo u endlile rumbi; v̌uako bya v̌amatiko a bya ha ri muti, a byi nga ha pfušiwi. . . . Miti ya v̌amatiko la’v̌a nga ni matimba ya ku tšhav̌a [wena Yehova].”—Esaya 25:2, 3.

⁷ Xana muti lowu wa matimba lowu nga boxiwangiki i yini ke? Esaya a nga ha va a kombetela eka Ar, ntsindza wa Moab, hi nkarhi hinkwawo a wu ri nala wa vanhu va Xikwembu. Kambe mongo laha wu tikomba wu fanele rhavi rin’wana ra nhlengeletano ya Sathana ku antswa—nala lonkulu Babilona. Hi nkarhi lowu faneleke, Babilona a wu ta herisa Yuda na Yerusalema, wu onha yindlu ya Yehova ya vugandzeri, ivi wu yisa vaponi va vanhu ekhotsweni. Esaya u tshaha hosi ya Babilona yi ri karhi yi tikukumuxa: “Nḍi ta khanḍiya henhla, nḍi tlakusa šiluvelo ša mina e henhla ka tinyeleti ta Šikwembu; nḍi ṭhamisa e nṭhav̌eni ya nhlengeletano. . . . Nḍi ko nḍi fana ni muungameri l’a tlakukeke.” Kambe Yehova u ta tlakusa Koreš wa Persia ku wisa Babilona kutani a tlherisela vanhu va Xikwembu etikweni ra vona. Hi laha swi profetiweke ha kona, ndhawu ya Babilona wa khale yi siyiwe yi nga ri nchumu loko ku nga ri “nhulu ya maribye” ni “rumbi.”—Esaya 14:12-14; 13:17-22.

 8, 9. (a) Hi wihi Babilona wun’wana loyi vagandzeri va Yehova va faneleke ku lwisana na yena, naswona wu sungurise ku yini? (b) Esaya u wu hlamusela njhani, naswona ha yini vito ra kona ri fanerile?

⁸ Hambi swi ri tano, ku tlula 2 500 wa malembe endzhaku ka ku hluriwa ka Babilona, vagandzeri va Yehova nakambe va fanele ku lwisana na Babilona un’wana—“Babilona Lonkulu, mana wa vuoswi ni wa manyala ya misava.” (Nhlavutelo 17:5) I mfumo wa misava wa vukhongeri byo hemba. Wu ve ni masungulo ya wona endzhakunyana ka Ndhambi ya siku ra Nowa, loko Nimrod a ake Babilona wo sungula, lowu veke xihlovo xa vunwa, vukhongeri bya dyondzo yo hambuka. Endzhaku ka loko Vukriste byi sunguriwile hi Yesu ni vaapostola va yena, vagwinehi va thyakise ntiyiso wa Bibele hi ku nghenisa “tidyondzo ta mademona” ta Vujagana ta Babilona, kutani mafambiselo ya vukhongeri bya Vujagana ma sunguriwile. (1 Timotiya 4:1) Vukriste lebyi bya vukanganyisi byi ve xiphemu lexikulu xa “Babilona Lonkulu,” lebyi hangalakaka ni misava ku ya etinxakeni hinkwato ta vanhu. Esaya u wu hlamusela tanihi ‘muti wa matiko ya matimba.’

⁹ Hi nkarhi wo tlula malembe ya mune wa magidi, ku sukela eku sunguriweni ka Babilona wo sungula ku fikela sweswi, vafumi va tihanyi va tirhise vafundhisi lava tshikilelaka tanihi switirho swo tshikilela ni ku fambisa vanhu va xiyimo xa le hansi. Xisweswo, ‘vanhu va fume ehenhla ka van’wana ku va endla swo biha.’ (Eklesiasta 8:9) Yesu u va twele vusiwana vanhu “hikuva a va karhele, va tshamile ehansi” hikwalaho ka varisi vo tano vo hemba va vukhongeri. Namuntlha, ntlawa lowu solekaka swinene wu tiviwa tanihi “munhu wa ku homboloka,” la vumbiweke hi vafundhisi va Vujagana lava titlakusaka hi voxe, lava nga emahlweni eku kaneteni ni le ku xaniseni ka Timbhoni ta Yehova.—Matewu 9:36; 2 Vatesalonika 2:3, 4.

10. (a) Hi ku pfumelelana na Esaya 25:3, xana ‘muti wa matiko ya matimba’ wu boheke ku kwetsimisa Yehova, kun’we ni ku n’wi chava hi ndlela yihi? (b) Eka Esaya 25:4, 5, Esaya u vulavula hi Yehova hi ndlela yihi, ehenhleni ka “la’v̌a ṭaneke” ni “la’v̌a matimba”?

¹⁰ Hi lembe ra 1919 Yehova u ntshunxe vanhu va yena va ntiyiso eku fambisiweni hi “Babilona Lonkulu.” ‘Muti wolowo wa matiko ya matimba’ wu boheke ku kwetsimisa Yehova hikuva a wu boheka ku xiya hi laha ku vavaka ‘swilo swo hlamarisa’ leswi a swi endleke ku tlherisela vagandzeri va yena entirhweni wo hlamarisa. Nakambe, vakhongeri vo hemba va sindzisiwe ku chava Yehova, eku languteleni ka leswi va hlayiseriweke swona. Hi malembe xidzana, vafundhisi lava tshikilelaka va titlakusile ehenhla ka vanhu va vona. Kambe sweswi Esaya u vulavula hi Yehova, a ku: “Hikuv̌a u šitšhav̌elo ša la’v̌a ṭaneke, ni šitšhav̌elo ša šisiwana e mapfalweni ya šona, ni šisirelo hi siku ra šidzedze, ni nḍuti loko dyambu ri hisa; hikuv̌a moya wa v̌ašanisi wu kotisa šidzedze le’ši solov̌anyaka khumbi. U ṭongahatile pongo ra v̌amatiko, tani hi mumu loko wu phumerisiwa e tikweni le’ri omeke; risimu ro khana ra v̌a-matimba ri ṭongahatiwa tani hi sana loko ri siv̌eriwa hi nḍuti wa papa.”—Esaya 25:4, 5.

A Ku Na Risimu Ra Ntsako “eBabilona”!

11. Ha yini ku nga ri na risimu ra ntsako eka mfumo wa “Babilona Lonkulu” hinkwawo, naswona xana leswi swi kombisiwe njhani eka nhlengeletano ya vukhongeri byo hambana-hambana eAssisi, Italy?

¹¹ Hakunene, xexo i xiyimo lexi nga kona namuntlha eka mfumo wa “Babilona Lonkulu” hinkwawo. A ku na risimu ra ntsako leri nga kumiwaka kona. Varhangeri va vukhongeri bya wona a va swi tivi swikwembu leswi va faneleke ku swi gandzela. Leswi swi tiyisiwe kahle eka nhlengeletano ya vukhongeri byo hambana-hambana eAssisi, Italy, hi October 27, 1986. Kwalaho, malunghana ni Lembe ra ku Rhula ka Matiko Hinkwawo ra Nhlangano wa Matiko, Phophu John Paul II u hlanganise varhangeri va vukhongeri-nkulu bya “Babilona Lonkulu.” Hinkwavo va khongelele ku rhula, tinghwendza ta Mabudha ti khongele nkarhi wo leha ku ringana tiawara ta 12 hi siku rin’we. Kambe a va khongela eka mani xana? Xana a ku ri eka Mariya? Kumbe eka Vunharhu-un’we byo kwetsima bya Vujagana ke? Kumbe eka Vunharhu-un’we bya Mahindu? Kumbe eka magidi ya swikwembu swa Mabudha? Kumbe eka Allah? Kumbe eka xiharhi lexiya xo soleka, hlathi, lexi Mashinto ma xi gandzelaka? Kumbe swikhongelo leswi a swi amukeleka swinene a ku ri leswiya swa Muindiya wa le Amerika wa rixaka ra Macrow ke? U vikiwe a ri la ‘vangamaka eka xiambalo xa le nhlokweni xo hlamarisa,’ loko a ri karhi a lumeka pipi ya ku rhula kutani a vula swikhongelo swa yena “emusini loko wu ri karhi wu mbuluka ku fana ni murhi wa risuna emoyeni wo titimela.”

12. I marito wahi ya Mikiya na Esaya lawa vakhongeri lava va nga ma tirhisangiki?

¹² Ku na nchumu wun’we lowu tiyeke: Ku hava ni un’we wa vakhongeri volavo, la humaka eDalai Lama ya Vubudha va ya eka “Muchaviseki” Methodius wa Kereke ya Orthodox ya Magriki, la tirhisaka marito ya Bibele eka Mikea 4:5: “Kambe hina, hi famba hi v̌ito ra Yehova, Šikwembu ša hina, hi mikari ni mikari.” A va tirhisi ntiyiso wa marito lama huhuteriweke ya Esaya eka ndzima 42, tindzimana 5 na 8: “L’a v̌ulaka ŝeŝo i Yehova l’a tumbulušeke matilo loyi a ma andlaleke, l’a anekeke misav̌a ni ŝo mila ŝa yona, loyi a nyikeke moya ka la’v̌a akeke ka yona ni ku hefemula ka la’v̌a fambaka ka yona: ‘Hi mina Yehova, hi rona v̌ito ra mina, nḍi nga ka nḍi nga nyiki uṅwana e ku v̌onakala ka mina, ni ŝifaniŝo e ku v̌ongiwa ka mina.’”

13. Kahle-kahle i yini lexi humeleleke eAssisi, naswona leswi swi soriwe njhani hi Yesu loko a ha ri emisaveni?

¹³ EAssisi, minkhuvo leyikulu, xivumbeko xo hambana ni swikhongelo leswi phindha-phindhiwaka a ku ri tindlela to endla ku kombisa lokukulu ka le rivaleni. Sweswo hi leswi Yesu N’wana wa Yehova a swi soleke loko a ri laha misaveni. Eka varhangeri va vukhongeri va siku ra yena u te: “Mintirho ya vona hinkwayo, va yi tirha leswaku va ta voniwa hi vanhu,” naswona u va byele hi ku kongoma, a ku: “Mi ni khombo n’wina vatsari ni Vafarisi, vakanganyisi, hikuva mi pfalela vanhu ku nghena eMfun’weni wa matilo. Kutani n’wina a mi ngheni eka wona, na swona lava ringetaka ku nghena ma va sivela.” (Matewu 23:5, 13; nakambe vona Matewu 6:1-8.) A hi nkombiso wa le handle kumbe ndhawu yo gandzela ka yona leswi tsakisaka Xikwembu. Hi laha Yesu a vuleke ha kona: “Xikwembu i moya; kutani lava xi gandzelaka, va fanele ku xi gandzela hi moya ni ntiyiso.”—Yohane 4:21, 24.

Xihlovo Xa Ntiyiso Xa Ku Rhula

14. (a) Hikwalaho ka yini swikhongelo swa ku rhula swa vukhongeri bya misava swi ri swa vukanganyisi? (b) Hi kwihi ku avanyisa ka Xikwembu eka vukhongeri bya Vujagana?

¹⁴ Hi ku languta mpfilumpfilu eka vukhongeri bya misava, xana munhu a nga tidlaya dzanu a ehleketa leswaku swikhongelo swa varhangeri va vukhongeri swi nga tisa ku rhula ka misava? A va ri karhi va khongela hi ku kanganyisa hi madzana ya malembe, kambe hi nkarhi lowu fanaka va hlanganyela hi xitalo etinyimpini ta matiko, Tinyimpi ta Nkutsulo, ni minxaniso leyi nga tolovelekangiki. Muprofeta wa Yehova u vutisile: “Šana mu-Etiopia a nga tihunḍula nhlonge ya yena, kumbe yingwe yi nga tihunḍula mav̌ala ya yona-ke? Loko ŝi ri tano, mi nga ŝi tiv̌a e ku endla ŝinene, ṅwina lav̌a mi titolov̌eteke ku endla le’ŝo biha.” (Yeremia 13:23) Tanihi xiphemu lexikulu xa “Babilona Lonkulu”—mfumo wa misava wa vukhongeri byo hemba—vukhongeri bya Vujagana hi ku hlawuleka byi ringanisiwile exikalweni xa Xikwembu kutani byi kumiwa byi vevuka swinene. Byi le khombyeni!—Yeremia 2:34, 35, 37; 5:29-31; Daniel 5:27.

15. Yehova u ta ku tisa njhani ku rhula loku nga heriki, naswona lava va tshembaka yena va kondletela ku rhula hi ndlela yihi?

¹⁵ Yehova, “Xikwembu xa ku rhula,” u ta tisa ku rhula loku nga heriki hi ku herisa hinkwavo lava nga ni nandzu wa ngati kutani a tata misava hi vanhu lava hakunene va rhandzaka ntiyiso ni ku lulama. (Vafilipiya 4:9) Hi ku ya hi Hosi Davhida, hi lava titsongahataka lava ‘tshembaka Yehova, va endla leswo lulama’ lava nga “ta fuma misav̌a” naswona “v̌a ta tiṭakela e ku ruleni lo’kukulu ka v̌ona.” (Psalma 37:3, 11) Lava ‘tshembaka Yehova hi minkarhi hinkwayo naswona va endla leswinene’ va kondletela ku rhula hi ndlela leyi lava nyikelaka swikhongelo leswi hlanga-hlanganeke eka swikwembu leswi kanetanaka ni swifaniso va nga ta ka va nga swi koti.—Psalma 115:2-8; Esaya 44:14-20.

16. Yehova u lunghiselela nkhuvo wihi eka lava lulameke lava va hlengeletiwaka va huma ‘emutini wa matiko ya matimba’?

¹⁶ Mayana ku hambana loku nga kona exikarhi ka swikhongelo ni mintshembo ya vanhu va Xikwembu hi xoxe ni leswi swa vaseketeri va “Babilona Lonkulu!” Ha tlangela swonghasi leswi ‘risimu ro khana ra va-matimba ri tsongahatiweke!’ (Esaya 25:5) Kambe loko a vulavula hi lava titsongahataka lava va hlengeletiwaka va huma ‘emutini wa matiko ya matimba,’ Esaya u ya emahlweni a ku: “Yehova wa tinyimpi o ta lungisela matiko hikwawo e nṭhav̌eni leyi, e ŝakudya ŝa tinyama le’ti noneke, ni ŝakunwa ŝa tivinyo le’ti tengeke, . . . le’ti tengisiweke.” (Esaya 25:6) Nkhuvo wa moya lowu namuntlha wu kumiwaka hi lava teke ku ta gandzela Yehova wa tsakisa naswona wa anerisa, i swakudya swo tala hakunene! Timbilu ta hina ta tiyisiwa leswaku ti tiyisela ni ntsako wa hina wa khapa tanihi leswi hi tirhelaka Yehova hi ku chivirika hi langutele ku endliwa lavantshwa ni ndzalo wa swilo leswinene leswi Yehova a swi tshembiseke emisaveni leyintshwa.—Psalma 104:1, 14, 15; Matewu 19:28, KJ.

17. Hi swihi ‘swilo leswi hlamarisaka’ leswi Yehova a nga ta swi endla, swi tisa ku tsaka kwihi?

¹⁷ Ku nga ri khale, Yehova, Yehova u ta endla ‘swilo leswi hlamarisaka’ hayi eku suseni ka “Babilona Lonkulu” ntsena kambe ni “nkumba” wa ku sola lowu funengeteke vanhu hikwalaho ka xidyoho xa Adamu. (Esaya 25:7) Ina, exisekelweni xa gandzelo ra Yesu, Yehova u ta hetisisa vuprofeta bya Esaya 25:8: “O ta lov̌isa rifu hi laha ku nga heriki: Hosi, Yehova o ta hlangula mihloti e mimombyeni hikwayo; o ta sula tingana ta tiko ra yena hikwaro, hikuv̌a Yehova o v̌urisile.” Mayana ku tsakisa ka swona ku vona xidyoho xa Adamu ni rifu swi susiwile ni ku amukela varhandziwa loko va ntshuxeke ematimbeni ya rifu! Mayana ku tsakisa ka swona ku tiva leswaku timbhoni ta Yehova leti tshembekaka ti nyike nhlamulo leyi heleleke eka Murhukani lonkulu, Sathana Diyavulosi! (Swivuriso 27:11) A ku nga ha vi na loyi a nga ta va sola, hikuva va ta va va hlurile eku tshembekeni ka vona. ‘Hi ku tshembeka ni hi laha ku tiyeke’ Yehova hi yexe u ta va a hetisise swilo leswi profetiweke—‘switsundzuxo swa yena ku sukela eminkarhini ya le ku sunguleni.’ Misava hinkwayo yi ta va yi ri paradeyisi yo lulama, yi tele hi vanhu vo lulama. I ku langutela loku tsakisaka hakunene!

18. Handle ka mintshikilelo, xana hi tiyimisele ku endla yini, hi ku pfumelelana na Esaya 25:9?

¹⁸ Ku va minkarhi hinkwayo hi tshemba Yehova eka masiku lawa ya munyama hinkwawo ku ta va ni hakelo ya kona leyi tiyisekeke. Hambi ku ri mintshikilelo yihi leyi hi faneleke ku lwisana na yona evuton’wini bya hina bya siku rin’wana ni rin’wana—hambi ku ri eku wundleni ka mindyangu ya hina, eku khomeni swi tiya eka misinya ya milawu ya Bibele exikolweni, kumbe eku nyikeleni ka vumbhoni ensin’wini yo nonon’hwa—a hi tshembeni Yehova hi minkarhi hinkwayo. Ku hlayisa ka hina vuxaka bya le kusuhi na Yehova tanihi ‘muyingiseri wa mikhongelo’ swi ta tiyisekisa ku pona ka hina. (Psalma 65:2) Kutani ke, a hi tiyimiseleni ku va eka lava va nge, emaritweni ya Esaya 25:9: “V̌onani, hi šona Šikwembu ša hina; hi ṭhembile šona, kutani ši hi ponisile! Hi yena Yehova loyi hi ṅwi ṭhembeke; a hi ṭakisiseni hi ṭakela ku ponisa ka yena!”

Swivutiso Swa Mpfuxeto

◻ Xana Yehova, Yehova i matimba ya hina ni risimu ra hina hi ndlela yihi?

◻ ‘Muti wa matiko ya matimba’ i yini?

◻ Xana ‘muti wa matiko ya matimba’ wu boheke ku kwetsimisa Yehova, ni ku n’wi chava hi ndlela yihi?

◻ I yini lexi kombaka leswaku a ku na tinsimu ta ntsako eka “Babilona Lonkulu”?

◻ Hi swihi ‘swilo leswi hlamarisaka’ leswi Yehova a nga ta swi endlela vanhu va yena?