Swivutiso Swa Vahlayi

◼ Hikwalaho ka marito ya Yesu eka Yohane 15:15, xana Vakriste va fanele ku tilanguta tanihi “malandza,” kumbe hi nga titeka hi ri “vanakulorhi” va yena ke?

Hi nga swi endla naswona swa hi fanela hinkwaswo. Ku vona leswaku hikwalaho ka yini, a hi xiyeni leswi Yesu a swi vuleke eka vaapostola va yena vo tshembeka loko a ri na vona hi vusiku byo hetelela:

“A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye. Mi vanakulorhi loko mi endla leswi ndzi mi lerisaka swona. A ndza ha mi vuri malandza, hikuva nandza a nga tivi lexi n’wini wa yena a xi endlaka; kambe ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tata wa mina.”—Yohane 15:13-15.

Xo sungula, xana Yesu a a vula yini loko a ku vadyondzisiwa va yena vo tshembeka a va ri malandza? A a nga vuli malandza hi langutelo ra leswi vanhu hinkwavo lava nga vatukulu va Adamu va tswariweke va nga hetisekanga, xisweswo va xavisiwa kumbe ku va malandza ya xidyoho. (Yohane 8:34; Varhoma 5:18, 19; 6:16; 7:14) Tanihi Vakriste ku sukela kwalaho, vaapostola na vona va tshame va va evuhlongeni hi ndlela yoleyo, kambe gandzelo ra Yesu a ri ta tisa xa ku va ntshunxa, kumbe ku va kutsula. (1 Petro 1:18, 19; Vagalatiya 4:5) Kambe, a va ntshunxekanga hi ku helela hi nkarhi wolowo. Tanihi laha endzhakunyana muapostola Pawulo a tsaleke ha kona, va “xaviwile hi hakelo,” ngati ya Yesu, kutani va va malandza ya Xikwembu ni ya Kriste.—1 Vakorinto 6:20; 7:22, 23.

Eka Yohane 15:15 Yesu a a nga vuli swona leswaku vaapostola vo tshembeka lava ku nga ri khale a va ta kuma moya lowo kwetsima naswona va va Vakriste lava totiweke a va nga ha ri malandza. (Ringanisa Yohane 15:20.) Kavula, ku va nandza wa Xikwembu ha Kriste a swi tshikileri ni ku dlaya. I ka rirhandzu ni ku hlayisa vutomi. (2 Timotiya 4:8; Tito 1:1, 2) Mukriste la amukelaka nkoka wa ngati ya Kriste hi ku tsaka naswona a va nandza wa Xikwembu a a ta kongomana ni rifu ra makumu loko endzhakunyana a landzula gandzelo rolero naswona a tlhelela exidyohweni, a va nandza wa xona nakambe. (Vagalatiya 1:10; 4:8, 9; Vaheveru 6:4-6) Kambe, vadyondzisiwa va Yesu a va ta ya emahlweni va va malandza ya Xikwembu ni ya Kriste, kambe a va tlula ni malandza. Ha yini?

Yesu ni vaapostola va swi twisisile leswaku enkarhini wolowo, eka vuxaka lebyi hi ntolovelo byi nga nyawuriki kumbe lebyi nga tiyangiki bya malandza ni vini, ‘nandza a a nga ta swi tiva leswi n’wini a swi endlaka.’ Hi ntolovelo, n’wini wa munhu a nge vulavurisani ni nandza wa yena la xaviweke, kumbe ku paluxa mianakanyo kumbe mintlhaveko ya munhu hi xiyexe.

Hambi swi ri tano, hi nga swi vona eka marito ya Yesu leswaku a swi hambanile eka vaapostola. U te: “Ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tata wa mina.” (Yohane 15:15) Ina, tanihi leswi swi tolovelekeke eka vanghana lavakulu, Yesu u va paluxele timhaka ni ku twisisa leswi a swi ri xihundla. (Matewu 13:10-12; 1 Vakorinto 2:14-16) Hambi leswi a va ha ri malandza kumbe mahlonga ya Xikwembu ha Yesu, vaapostola va tsakele vunghana byo kufumela lebyi va fungheke tanihi vanghana vo tshembeka. (Ringanisa Psalma 25:14.) Sweswo swi nga endleka naswona swi fanele swi va ntiyiso ni le ka hina. I ntsako muni wonghasi ku va ni Vini etilweni Lava hi khomaka tanihi vanakulorhi lava tshembekaka ni lava xiximekaka, tanihi vanghana!