Vakulu—Khomani Ntlhambi Wa Xikwembu Hi Musa!

“Hi hanyisane na n’wina hi moya wa musa, kukotisa manana la hlayisaka swinene vana va yena.”—1 VATESALONIKA 2:7.

 1. Ha yini Mbhoni yin’wana ni yin’wana leyi tshembekaka ya Yehova yi nga titwaka yi sirhelelekile?

YEHOVA i Murisi Lonkulu. U lunghiselela swinene malandza yakwe yo tanihi tinyimpfu naswona a ma fambisa “e tindleleni le’to lulama” hikwalaho ka vito ra yena lero kwetsima. Hikwalaho, lava endlaka ku rhandza ka yena a va fanelanga ku chava nchumu xo biha naswona va nga langutela nkhongotelo eka Xikwembu xa vona xa ntwela-vusiwana. Hakunene, Mbhoni yin’wana ni yin’wana leyi tshembekaka ya Yehova yi ni xivangelo xo twala xo titwa yi hlayisekile evokweni ra Xikwembu ra rirhandzu.—Psalma 23:1-4.

 2. Tanihi xikombiso xa ku kwetsima ka Xikwembu, i timfanelo tihi leti Yesu a ti kombisaka?

² Yesu Kriste “hi yena loyi ku kwetsima ka Xikwembu ku tikombaka eka yena, kutani ú tekelele leswi Xikwembu xi nga swona hi xiviri xa xona.” (Vaheveru 1:1-4) Kutani Yesu, Murisi Lonene, na yena u kombisa rirhandzu ni ntwela-vusiwana. (Yohane 10:14, 15) Hi xikombiso, eka xiendlakalo xin’wana “[u vone] ntshungu lowukulu wa vanhu, a va twela vusiwana, hikuva a va fana ni tinyimpfu leti nga riki na murisi; kutani a va dyondzisa leswo tala.”—Marka 6:34.

 3. (a) Ku fana na Yehova Xikwembu na Yesu Kriste, varisi-ntsongo va Vukrsite va fanele ku kombisa timfanelo tihi? (b) I ndzayo ni xitsundzuxo xihi leswi muapostola Pawulo a swi nyikeke valanguteri?

³ Vakriste hinkwavo va fanele ‘va tekelela Xikwembu naswona va ya emahlweni va famba hi rirhandzu hi laha Kriste a va rhandzeke ha kona.’ (Vaefesa 5:1, 2) Kutani va fanele va va ni rirhandzu ni ntwela-vusiwana. Ngopfu-ngopfu leswi swi fanele swi va ntiyiso hi varisi-ntsongo va ntlhambi wa Xikwembu. Muapostola Pawulo u te: “Tilanguteleni ke, mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani [bandlha ra] Xikwembu, [leri] xi nga tifuwela [rona] hi rifu ra N’wana wa xona wa xiviri. Hikuva mina ndza swi tiva leswaku, loko ndzi sukile, mi ta ngheneriwa hi timhisi leto leva, leti nga ta ka ti nga tsetseleli ntlhambi; na swona, ndzi tiva leswaku ku ta huma van’wana exikarhi ka n’wina lava nga ta vula mavunwa ku tilavela vadyondzisiwa.”—Mintirho 20:28-30.

 4. (a) Hi ku famba ka nkarhi, ku humelele yini hi ku pfumelelana ni xitsundzuxo xa Pawulo eka Mintirho 20:29, 30? (b) I swivutiso swihi leswi sweswi swi faneleke ku kambisisiwa?

⁴ Hi ku famba ka nkarhi, “timhisi leto leva” leti gwineheke ti humelerile naswona ‘a ti khomanga ntlhambi hi musa.’ Kambe ha tsaka swinene swonghasi leswi vakulu exikarhi ka Timbhoni ta Yehova va nga ti tirhisiki tihanyi to tano! Hambi swi ri tano, vapfumeri-kulobye va fanele va langutela ku khomiwa ka muxaka muni eka valanguteri lava va hlawuriweke hi moya ke? Naswona vahlawuriwa volavo va nga wu kombisa njhani musa eka tinyimpfu ta Yehova ke?

Hayi Ku Fuma Ntlhambi Hi Ntamu

 5. (a) Varhangeri va misava hakanyingi va ma khoma njhani malandza ya vona? (b) Yesu u swi kombisise ku yini leswaku tihanyi a ti pfumeleriwi exikarhi ka valandzeri vakwe?

⁵ Hi laha ku faneleke hi nga langutela vakulu va Vukriste ku hi khoma hi ndlela ya ntwela-vusiwana. A va fani ni vafumi va misava, lava hakanyingi va kandziyelaka malandza ya vona. Hi xikombiso, ku vikiwe leswaku hosi ya Mufurwa, Charlemagne (la fumeke hi 768-814 C.E.) “u sindzise Masaxon, ehansi ka nxaniso lowukulu, leswaku ma amukela nkhuvulo, a humesela lava tlulaka Lent minxupulo yo vava swinene naswona kun’wana ni kun’wana a tirhisa matimba ematshan’wini yo khutaza.” (The History of the Christian Church, hi William Jones) Tihanyi a ti pfumeleriwi exikarhi ka valandzeri va Yesu, hikuva u te: “Ma swi tiva leswaku tihosi ta matiko ti ma fuma hi ntamu, na vona vakulukumba va ma fuma hi matimba; swi nga tshuki swi va tano exikarhi ka n’wina, kambe un’wana ni un’wana la navelaka ku va lonkulu exikarhi ka n’wina, a a ve tani hi mutirheri wa n’wina; na swona un’wana ni un’wana la navelaka ku va wa le mahlweni exikarhi ka n’wina, a a ve nandza wa n’wina; hi mukhuva lowu, N’wana-wa-Munhu a nga telanga ku tirheriwa, kambe ku tirhela van’wana ni ku nyiketa vutomi bya yena ku kutsula lavo tala.”—Matewu 20:25-28.

 6. (a) Malunghana ni vakulu, i tinhla tihi ta xisekelo leti xiyekaka? (b) Bandlha ri ni xivangelo xo langutela yini eka vakulu naswona vavanuna lava va fanele va tilanguta njhani?

⁶ Wanuna wa Mukritse loyi a ‘navelaka xikhundla xa vulanguteri u navela ntirho lowunene.’ (1 Timotiya 3:1) Loko hi kambisisa leswi ni ndzayo ya Yesu leyi ya ha ku tshahiwaka, swilaveko leswi swa xisekelo swa xiyeka: (1) Vakulu va Vukriste a va fanelanga ku tshikilela van’wana; (2) lava va rhwalaka vutihlamuleri exikarhi ka valandzeri va Yesu va fanele ku va mahlonga ya vona, hayi vini va vona; naswona (3) vavanuna lava fanekelaka xikhundla xa vulanguteri va fanele ku xi teka tanihi “ntirho lowunene,” hayi tanihi xiyimo lexi tlakukeke. (Swivuriso 25:27; 1 Vakorinto 1:31) Rito “nkulu” a ri tlakusi munhu ehenhla ka vagandzeri van’wana va Yehova. Ematshan’wini ya sweswo, bandlha ri ni xivangelo xo langutela vakulu hinkwavo ku va vavanuna lava vupfeke hi tlhelo ra moya, lava nga ni ntokoto ni lava titsongahataka lava rhangelaka entirhweni wo kwetsima. Hakunene, vakulu va fanele va titeka tanihi malandza ya le hansi ya Yehova Xikwembu, Yesu Kriste ni Vakriste-kulobye.—Varhoma 12:11; Vagalatiya 5:13; Vakolosa 3:24.

 7. (a) Xana vakulu va fanele va tirhisa 2 Vakorinto 1:24 eku tirhisaneni ni van’wana hi ndlela yihi? (b) I yini leswi vakulu va faneleke va swi endla hi swiletelo leswi humaka eka Huvo leyi Fumaka?

⁷ Ku tirhela van’wana hi ku titsongahata hi ku olova swi sivela nkulu ku ringeta ku ‘fuma van’wana hi matimba.’ Kutani i swinene swonghasi leswi valanguteri va hina va kombisaka langutelo leri fanaka ni ra Pawulo! U te eka Vakriste va le Korinto: ‘A hi vafumi ehenhla ka ripfumelo ra n’wina, kambe hi vatirhi-kuloni leswaku mi kuma ku tsaka.’ (2 Vakorinto 1:24) Hi ku fanana, lava va langutelaka hi rirhandzu a va tikiseli vapfumeri-kulobye hi milawu leyi nga riki ya nkoka ya vanhu ntsena. Ematshan’wini ya sweswo, valanguteri exikarhi ka Timbhoni ta Yehova va fumiwa hi misinya ya milawu ya Matsalwa naswona va nyikela ntirho wa musa, lowu pfunaka. Nakambe, va kombisa ku khathalela loku enteke eka ntlhambi wa Xikwembu hi ku tirhisa swiletelo leswi humaka eka Huvo leyi Fumaka ya Timbhoni ta Yehova hi ku hatlisa.—Mintirho, ndzima 15.

 8. I langutelo rihi leri Pawulo a a ri na rona eka vapfumeri-kulobye naswona leswi swi fanele swi va khumbisa ku yini vakulu va lembe xidzana ra vu-20 ke?

⁸ Hikwalaho ka leswi Pawulo a a ri ni musa eka ntlhambi wa Xikwembu, a a ta swi kota ku byela Vakriste va le Tesalonika a ku: “Hi hanyisene na n’wina hi moya wa musa, kukotisa manana la hlayisaka swinene vana va yena. Hikokwalaho, hi ku navela ngopfu ku mi komba rirhandzu, hi tilunghiserile ku avelana na n’wina ku nga ri ntsena Evangeli ya Xikwembu, kambe na byona vutomi bya hina, hikuva mi hundzukile varhandziwa va hina swinene ngopfu.” (1 Vatesalonika 2:7, 8) Pawulo u endle hi laha manana la khathalelaka, la rhandzaka vana vakwe hi laha ku enteke lerova a rhangisa swilaveko swa vona eka swa yena ni la nga ni musa eka vona a endlaka ha kona. Mawaku ndlela leyi leswi swi faneleke swi susumeta vakulu va lembe xidzana ra vu-20 ku khoma ntlhambi wa Xikwembu hi musa ha yona!

Xihlovo Xa Ntshunxeko Ni Ku Phyuphya

 9. I swiyimo swihi swa vanhu va Yehova va namuntlha leswi vhumbiweke eka Esaya 32:1, 2?

⁹ Loko a kombetela esikwini leri ra ku fuma ka Mfumo ha Yesu Kriste, muprofeta Esaya u vhumbe leswaku hosi a yi ta “fuma hi ku lulama” ni “tihosana” a ti ta fuma “hi ku lulama.” Hikwalaho, vakulu eka nhlengeletano ya siku ra namuntlha ya le tilweni va hetisisa swilaveko swa Mfumo wa le tilweni lowu simekiweke—ntirho wa tihosana hakunene! Eka vavanuna lava va nga ni vutihlamuleri, ku tirha marito man’wana ya vuprofeta ya Esaya: “Uṅwana ni uṅwana wa v̌ona o ta kotisa šisirelelo loko moya wu hunga, kukota šitšhavelo loko šidzedze ši fika, kukota šinambyana ša mati e tikweni ra dyanḍa, ni nḍuti wa ribye le’ri tlakukeke tikweni le’ri omeke.”—Esaya 32:1, 2.

10. Nkulu un’wana ni un’wana exikarhi ka Timbhoni ta Yehova u fanele a va xihlovo xa yini?

¹⁰ Ku hambana ni varhangeri va vukhongeri bya Vujagana lava tshikilelaka, vakulu exikarhi ka Timbhoni ta Yehova i swihlovo swa ntshunxeko ni ku phyuphya. Tanihi tihuvo ta vakulukumba, va kondletela ku rhula, ku tsaka ni nsirhelelo exikarhi ka vanhu va Yehova. Ha un’we-un’we, nkulu un’wana ni un’wana a nga seketela xiyimo lexi xinene hi ku khoma ntlhambi wa Xikwembu hi musa.

Hi Vululami Ni Vunene

11. (a) I xiyimo xihi lexi tolovelekeke lexi a xi ri exikarhi ka Vakriste va lembe xidzana ro sungula lexi nga kona emabandlheni yo tala ya Timbhoni ta Yehova namuntlha? (b) Valanguteri va ni vutihlamuleri byihi ebandlheni naswona ha yini?

¹¹ Hambi loko swiphiqo swi humelerile eka mabandlha man’wana ya Vukriste eka lembe xidzana ro sungula, xiyimo xa vona hi ntolovelo a ku ri lexiya xa ku rhula, vun’we ni ntsako. (1 Vakorinto 1:10-12; 3:5-9; Vaefesa 1:2; Yakobo 2:1-9; 3:2-12; 4:11, 12; 1 Yohane 1:3, 4) Xiyimo lexinene xa moya nakambe xi kona emabandlheni yo tala ya Timbhoni ta Yehova namuntlha hikwalaho ka mikateko ya Xikwembu, vurhangeri bya Kriste ni ntirho wa ku tshembeka wa valanguteri lava hlawuriweke. Ku tiyisekisa ku rhula, vun’we ni ntsako wa bandlha, vavanuna lava va lava mpfuno wa Xikwembu naswona hi ku chivirika va tiyimisela ku hlayisa nhlengeletano ya Xikwembu yi basile, emahanyelweni ni le moyeni. (Esaya 52:11) Nhlengeletano leyi thyakeke a yi nge vi na ku rhula ni ntsako naswona entiyisweni a yi nge amukeriwi ni ku katekisiwa hi Xikwembu. Xi ni “mahlo lama tengeke la’ma tšhav̌anaka ni ku biha,” ni ku tiyiselela xidyoho. (Habakuk 1:13) Kutani ke, exikarhi ka swilo swin’wana vakulu va languteriwe ku khathalela timhaka ta vuavanyisi hi mukhuva lowunene, wa Matsalwa. Kambe i swilo swihi swin’wana swo swi tsundzuka loko ku kambisisiwa timhaka to tano ke?

12. Hambi leswi vakulu va nga languteriwangiki ku nghenelela swinene timhaka ta munhu hi xiyexe leti nga lwisaniki ni milawu kumbe misinya ya milawu ya Bibele, i yini leswi faneleke ku endliwa hi ku ya hi Vagalatiya 6:1?

¹² Hi xikombiso, etimhakeni leti katsaka ku holova ka vanhu, swi nga ha koteka eka vanhu va kona ku tlhantlha timhaka exihundleni. (Matewu 18:15-17) Tanihi leswi vakulu va nga riki ‘vafumi ehenhla ka ripfumelo ra hina,’ a va languteriwanga ku nghenelela timhaka ta munhu hi xiyexe hi vuenti leti ti nga katsiki ku tluriwa lokukulu ka milawu ni misinya ya milawu ya Bibele. Hi ntolovelo, loko ku ri ni vumbhoni leswaku munhu u teke ‘goza leri hoxeke hi ku pfumala ku tiva,’ lava va nga ni timfanelo ta moya va fanele ‘va ringeta ku pfuna munhu wo tano hi moya wa musa.’—Vagalatiya 6:1.

13. Matsalwa ma swi kombisisa ku yini leswaku vakulu va fanele ku teka goza ehenhleni ka vumbhoni bya xidyoho, hayi eka mavari-vari?

¹³ Vakulu va fanele va tirha “hi ku lulama,” hi minkarhi hinkwayo va nga yi hi nghohe. Kutani va fanele ku teka goza ehenhleni ka vumbhoni bya xidyoho, hayi eka mavari-vari. Pawulo u tsundzuxile a ku: “U nga amukeli mhaka ya ku mangalela nkulukumba, ehandle ka vumbhoni bya vanhu vambirhi kumbe vanharhu.” (1 Timotiya 5:19) Hi ku ya hi mpimanyeto wa Yehova, eka Israyele wa khale munhu la hehliweke hi xidyoho lexikulu a a fanele ku dlayiwa hi ‘marito ya timbhoni timbirhi kumbe tinharhu, hayi yin’we.’ Ku tlula kwalaho, la mangaleriweke swi le rivaleni leswaku a a ri ni nkarhi wo langutana ni vahehli vakwe, naswona loko vumbhoni byi anerile, ‘voko ra timbhoni a ri fanele ri sungula ku n’wi dlaya eka hinkwawo.’—Deuteronoma 17:6, 7.

14. (a) I yini lexi hi laha ku hoxeke Diyotrefo a ringeteke ku xi endla? (b) Xikwembu xi langutele yini eka vakulu loko va kambisisa timhaka ta vuavanyisi?

¹⁴ Ku fanele ku va ni xisekelo lexi twalaka xa Matsalwa eka goza ra vuavanyisi. Mawaku ntsako lowu hi nga na wona leswi valanguteri va bandlha va nga faniki na Diyotrefo wa lembe xidzana ro sungula C.E.! Hi laha ku hoxeke u ringete ku ‘hlongola ebandlheni’ lava a va navela ku amukela vamakwavo lava famba-fambaka hi malwandla. Muapostola Yohane a nga xi tekelanga hansi xiendlo lexi xo biha ni swin’wana kambe u tsundzuxile a ku: “Loko ndzi ta, ndzi ta humesa timhaka leti a ti endlaka ti vulavuriwa.” (3 Yohane 9, 10) Xisweswo, komiti ya vuavanyisi ya siku ra namuntlha yi fanele ku tiyiseka leswaku ku ni xisekelo xa le Bibeleni xa goza rihi na rihi ra ku susa eku hlanganyeleni leri va ri tekaka.a Kavula, Xikwembu xi langutele vakulu va Vukriste ku tirhisana ni van’wana hi ku lulama. Hakunene, lava va fambisaka timhaka ta nhlengeletano ya Yehova ya le misaveni va fanele va va “v̌av̌anuna la’v̌anene, lav̌a tšhav̌aka Šikwembu, e v̌av̌anuna la’v̌a lulameke.”—Eksoda 18:21.

15. I xiphemu xihi lexi xikhongelo xi faneleke ku xi hetisisa etimhakeni ta vuavanyisi?

¹⁵ Komiti yin’wana ni yin’wana ya vuavanyisi ya Vukriste yi fanele ku kombela mpfuno wa Yehova hi xikhongelo lexi humaka embilwini. Nhlangano ni makwerhu wa xinuna kumbe wa xisati la hehliweke hi xidyoho lexikulu wu fanele wu pfuriwa hi xikhongelo. Entiyisweni, swi ta va swi fanerile ku khongela nkarhi wihi na wihi hi nkarhi wa ku vulavurisana leswaku xilaveko xo karhi xa mpfuno wa Xikwembu xi humelela.—Yakobo 5:13-18.

16. Vakulu va fanele va kambisisa timhaka ta vuavanyisi hi mukhuva wihi naswona ha yini?

¹⁶ Vakulu va swi tiva leswaku mupfumeri-kulobye la hehliweke hi xidyoho i “nyimpfu” entlhambini wa Xikwembu naswona u fanele ku khomiwa hi musa. (Ringanisa Ezekiel 34:7-14.) Tinyimpfu ta xiviri ti lava nkhathalelo, hikuva i swivumbiwa leswi nga kotiki nchumu leswi titshegeke hi murisi wa swona ku kuma nsirhelelo. Kutani ke, ku vuriwa yini hi tinyimpfu to fanekisela ebandlheni ra ka n’wina? Handle ko kanakana ti titwa ti sirhelelekile enkhathalelweni wa Murisi Lonkulu, Yehova Xikwembu ni Murisi Lonene, Yesu Kriste. Kambe varisi-ntsongo va ntlhambi va fanele ku tirhisa tindlela leti kondletelaka ku rhula ka le ndzeni ni ku tokota ku sirheleleka ka malandza ya Yehova lama fanaka ni tinyimpfu. Kutani ke, loko u ri murisi-ntsongo wa Vukriste, xana vamakwenu va xisati ni va xinuna va titwa va sirhelelekile ni ku tsaka enkhathalelweni wa wena ke? I ntiyiso, vakulu va fanele ku namarhela swinene milawu ni misinya ya milawu ya Bibele. Kambe hi ku ya hi Matsalwa va languteriwe ku hanyisana ni tinyimpfu hi ndlela ya rirhandzu ni ku fambisa timhaka ta vuavanyisi hi ndlela yo rhula, yo hleleka, ya musa ni ya ku ehleketelela.

17. I tinhla tihi ta Matsalwa leti vakulu va faneleke ku ti tsundzuka, ngopfu-ngopfu hi nkarhi wa timhaka ta vuavanyisi?

¹⁷ Hikwalaho ka ku nga hetiseki, “swi tele leswi hina hinkwerhu hi swi hoxaka” eka leswi hi swi vulaka. (Yakobo 3:2) Un’wana ni un’wana wa hina u lava musa wa Xikwembu ni ‘gandzelo leri yelanaka’ ra Kriste. (1 Yohane 1:8–2:2; Psalma 130:3) Kutani murisi wa Mukriste u fanele a titsongahata. U fanele ku tlhela a tsundzuka marito ya Yesu lama nge: “Leswi mi lavaka leswaku vanhu va mi endla swona, va endleni swona na n’wina.” (Luka 6:31) Xitsundzuxo lexi xi fanele ku tirhisiwa ngopfu-ngopfu hi nkarhi wa timhaka ta vuavanyisi. Vavanuna lava fanelekaka hi tlhelo ra moya va fanele va ringeta ku pfuna Mukriste la hoxeke ‘hi moya wa ku rhula, loko va ri karhi va tivonela, leswaku na vona va nga ringiwi.’—Vagalatiya 6:1; 1 Vakorinto 10:12.

18. (a) Ku nga ha humelela yini loko vakulu va khoma van’wana hi tihanyi hi nkarhi wa timhaka ta vuavanyisi? (b) Hi ku ya hi Marka 9:42, vakulu ni Vakriste van’wana va fanele va tivonela ehenhleni ka yini?

¹⁸ Loko vakulu vo khoma van’wana hi tihanyi hi nkarhi wa timhaka ta ku avanyisa, leswi swi nga ha va leswi vavisaka eka vanhu volavo. Hambi loko ku vaviseka ka mintlhaveko kumbe ka miri ku nga ri kona, ku nga ha va ni ku vaviseka lokukulu ka moya naswona timfanelo ta valanguteri na tona ti nga ha va ekhombyeni. (Ringanisa Yakobo 2:13.) Hikwalaho, hi nkarhi wa timhaka ta vuavanyisi ni le ka minkarhi yin’wana hinkwayo, vakulu va fanele va va ni musa naswona va fanele va tivonela ehenhleni ka ku khunguvanyisa van’wana. Kavula, Vakriste hinkwavo va fanele ku va ni vukheta emhakeni leyi, hikuva Yesu u te: “La khunguvanyisaka un’wana wa lavantsongo lava pfumelaka eka mina, swi nga antswa loko a boheleriwa ribye ra ku sila enhan’wini [leri kokiwaka hi mbhongolo], a hoxiwa lwandle.” (Marka 9:42) Ribye ra ku sila ra le henhla a ri va lerikulu swinene lerova matimba ya xihari a ma laveka ku ri susumeta naswona ku hava la nga cukumetiwaka elwandle ni ntiko wo tano enhan’wini yakwe la nga ponaka. Kutani ke, entiyisweni nkulu u fanele ku tivonela leswaku a nga vi xikhunguvanyiso lexi xi nga vangaka mbanga leyi nga horiki ya moya eka yena ni le ka munhu wihi na wihi la khunguvanyekaka.—Vafilipiya 1:9-11.

Hambetani Mi Kombisa Musa

19. I xitsundzuxo xihi lexi Petro a xi nyikeke vakulu-kulobye naswona i vuyelo byihi lebyi ku xi amukela hi mfanelo ku nga na byona eka mintshembo ya vona?

¹⁹ Muapostola Petro u kombise ndlela leyi valanguteri-kulobye a va fanele ku risa ntlhambi ha yona loko a tsarile a ku: “Risani ntlhambi wa Xikwembu lowu nge hansi ka n’wina, mi wu hlayisa ku nga ri hi ku sindzisiwa, kambe ku ri hi ku swi rhandza, hi laha Xikwembu xi swi lavaka ha kona, na swona ku nga ri hi ku langutela bindzu leri khomisaka tingana, kambe hi ku hiseka. Mi nga tshuki mi fuma lava mi nga nyikiwa vona ku va risa, kambe mi boxela ntlhambi entila lowunene. Kutani siku murisi lonkulu a nga ta humelela, mi ta kuma harhi leyo kwetsima, leyi nga riki na ku onhaka.” (1 Petro 5:2-4) Valanguteri lava totiweke va nga kuma hakelo ya vona ya le tilweni tanihi swivumbiwa swa moya leswi nga fiki naswona vakulu va nga kuma vutomi lebyi nga heriki ni mintshembo ya le misaveni eParadeyisini leyi taka ya misava hinkwayo ntsena hi ku tirhisa xitsundzuxo xo tano ni ku kombisa musa eka ntlhambi wa Xikwembu.

20. (a) Xana varisi-ntsongo va Vukriste va fanele va hanyisana njhani ni vapfumeri-kulobye? (b) U titwisa ku yini hi ntirho lowunene ni nkhathalelo wa rirhandzu wa vakulu ke?

²⁰ Yehova Xikwembu na Yesu Kriste va ni rirhandzu, i Varisi lava nga ni ntwela-vusiwana. Kutani loko varisi-ntsongo va Vukriste va ri karhi va namarhela swinene mimpimanyeto ya Xikwembu, va fanele va kombisa rirhandzu ni ntwela-vusiwana eku tirhisaneni ni vapfumeri-kulobye lava fanaka ni tinyimpfu. Entiyisweni, Timbhoni hinkwato leti tshembekaka ta Yehova ti tsakela swinene ntirho lowunene wa vakulu volavo lava tinyiketelaka lava hlayisaka vutihlamuleri bya vona ni ku khoma ntlhambi wa Xikwembu hi musa. Ku tlangela koloko, kun’we ni ku xixima loku faneleke ku nga kombisiwa hi ku yingisa lava rhangelaka exikarhi ka hina.

[Nhlamuselo ya le hansi]

Mianakanyo Ya Wena Hi Yihi?

◻ Yesu Kriste u swi kombisise ku yini leswaku tihanyi a ti pfumeleriwi exikarhi ka valandzeri vakwe?

◻ Vakulu va fanele ku endla yini loko swiletelo leswi humaka eka Huvo leyi Fumaka swi amukeriwa?

◻ Hi ku ya hi Esaya 32:1, 2, vakulu va fanele va va swihlovo swa yini?

◻ Xana Matsalwa ma swi kombisa njhani leswaku vakulu a va fanelanga ku teka goza ehenhleni ka mavari-vari ntsena?

◻ Xana varisi-ntsongo va Vukriste va fanele va wu khomisa ku yini ntlhambi?

[Xifaniso lexi nga eka tluka 18]

Xikhongelo lexi humaka embilwini i xa nkoka loko komiti ya vuavanyisi yi hlangana ni mupfumeri-kulobye