Ku Yi Tlhantlhela Makumu Mphikamakaneta Ya Vuako Hinkwabyo
“[Yehova la] nge v̌okweni ra wena ra šinene, [u] hete tihosi hi siku ra v̌ukari bya [yena].”—PSALMA 110:5.
1, 2. Hi lembe ra 70 C.E., i xiendlakalo xihi lexi xi nga ha vaka xi tise ku kanakana ehenhla ka vuhosi bya vuako hinkwabyo bya Yehova Xikwembu, kambe hi nkarhi wolowo, hi le ka vamani laha tintswalo ta yena a ti hundzuluxeriwe eka vona?
VUHOSI bya vuako hinkwabyo bya Muvumbi wa tilo ni misava i mhaka leyikulu emahlweni ka vanhu ni tintsumi. Ku nga ri khale, mhaka leyi yi ta tlhantlheriwa makumu, kambe hi malembe xidzana yo tala valala va Yehova va tlhontlhe vuhosi bya yena. Entiyisweni, ku lovisiwa ka muti wa Yerusalema hi 70 C.E. kun’we ni tempele ya yona leyi nyikeriweke eka Yehova swi nga ha va swi tise ku kanakana eka vuhosi bya vuako hinkwabyo bya Muvumbi. Hambi swi ri tano, a ku ri xivangelo lexi tiyeke lexi ha xona Yehova hi nkarhi wolowo a nga hlawulangiki ku va Xikwembu lexi nga nhenha ematshan’wini ya Vaisrayele va nyama.
2 A ku ri xihi xivangelo xa kona? Hi nkarhi wolowo Yehova Xikwembu a a yise tintswalo ta yena eka rixaka lerintshwa, Israyele wa moya, “Israel wa Šikwembu,” hi laha muapostola Pawulo a vulaka bandlha ra Yesu Kriste ha kona. (Vagalatiya 6:16, BX) Hambi swi ri tano, ku ta fikela sweswi, enkarhini hinkwawo wa leswi vuriwaka Nguva ya Vukriste, Yehova a nga lwelanga Israyele wa moya tanihi Xikwembu lexi nga nhenha hi ndlela leyi a lweleke Vaisrayele va ntumbuluko ehansi ka ntwanano wa Nawu ha yona. Nakambe u pfumelele masocha ya Rhoma, ehansi ka nkucetelo wa Vayuda, ku dlaya Yesu emhandzini ya nxaniso eGolgota. Sweswo swi humelele hi malembe ya 37 emahlweni ko va Yerusalema ri hlaseriwa ra vumbirhi hi Varhoma, hi 70 C.E.
3, 4. Ku sukela emasikwini ya Muxe ku ya ka Hosi Ezekiyasi, Yehova u tikombise njhani a ri nhenha, kambe emhakeni ya Vaisrayele va moya, i yini lexi a xi ri ntiyiso eka ku lwa ka yena ni le ka ku lwa ka vona?
3 Ku sukela emasikwini ya muprofeta Muxe ku ya eku fumeni ka Hosi Ezekiyasi wa Yerusalema, Yehova Xikwembu hi hlori u lwele rixaka ra Israyele, naswona Vaisrayele va lwile ehansi ka nkongomiso wa yena hi matlhari lama dlayaka. (Deuteronoma 1:30; 3:22; 20:3, 4; Yoxuwa 10:42) Kambe a swi nga ri tano emhakeni ya Vaisrayele va moya! Ku sukela eka rifu ra Yesu Kriste ehandle ka Yerusalema ku ta fika eNguveni ya hina leyi Tolovelekeke, Xikwembu lexi xa nhenha a xi hlawulanga ku lwa nyimpi leyi vonakaka eka Israyele wa Xikwembu. Hi ku fanana, a xi va pfumelelanga Vaisrayele va moya lava vumbaka bandlha ra Vukriste ku lwa hi matlhari lama vonakaka ya nyimpi. Vakriste va na muxaka wun’wana wa nyimpi wo wu nghenela.
4 Ku pfumelelana na leswi, un’wana wa valweri lavakulu va ripfumelo ra Vukriste u tsalele Vakriste-kulobye eKorinto, le Greece a ku: “Hikuva matlhari lawa hi lwaka ha wona, a hi lama tirhisiwaka hi vanhu, kambe hi matimba ya Xikwembu ma ni ntamu wo hirimuxa makhokholo. Hi hlanhla makungu ya vunwa, hi mbundzumuxa ni swihingakanyo hinkwaswo swa lava tikurisaka, va sivela vanhu ku tiva Xikwembu. Hi koka mianakanyo hinkwayo hi yi endla leswaku yi yingisa Kriste. Kutani loko mi ta va mi tinyiketile eka yena mi n’wi yingisa, hina hi tiyimisele ku lwa ni hinkwavo lava tiarisaka.” (2 Vakorinto 10:4-6) Emahlweninyana epapileni rero, Pawulo u vulavule hi ‘matlhari ya ku lulama evokweni ra xinene ni ra ximatsi.’—2 Vakorinto 6:7; nakambe vona Vaefesa 6:11-18.
I Yehova La Nga Ta Lwa eArmagedoni
5. Entangeni wa Getsemani, i xiyimo xihi lexi Yesu a xi tekeke mayelana ni ku tirhisiwa ka matlhari eku tisirheleleni, naswona i goza rihi leri vadyondzisiwa va yena va ri tekaka?
5 Yesu Kriste, loko a ha ri laha misaveni, a nga tirhisangi matlhari lama dlayaka eku tilweleni. Emadyambyini ya ku xengiwa ka yena entangeni wa Getsemani, Simoni Petro mudyondzisiwa wa yena la tinyiketeleke u humese banga kutani a tsema ndleve ya nandza wa muprista lonkulu wa Muyuda. Kambe Yesu hi hlori u vuyisele ndleve evutshan’wini bya yona kutani a ku: “Tlherisela banga ra wena enkotlotweni wa rona, hikuva hinkwavo lava tirhisaka mabanga, va ta dlawa hi mabanga. Xana u ehleketa leswaku ndzi nga tsandzeka ku khongela Tata wa mina, a ndzi pfuna sweswi-sweswi hi mavandla ya tintsumi lama tlulaka 12 xana? Kambe loko swi nga va tano, Matsalwa ma ta endlekisa ku yini, leswi ma vulaka leswaku swi fanekele ku famba hi ndlela yoleyo ke?” (Matewu 26:52-54) Ku nga khathariseki leswi hinkwaswo, valandzeri va ntiyiso va N’wana wa Xikwembu la tinyiketeleke va hlayisa vukala-tlhelo bya vona, hi matlhelo hinkwawo, loko ku tiwa eka nyimpi ya misava.—Yohane 17:16; 18:36.
6. Hi nkarhi wa nyimpi ya siku lerikulu ra Xikwembu xa Matimba Hinkwawo eArmagedoni, i xiyimo xihi lexi Timbhoni ta Yehova ti nga ta xi teka?
6 Kutani ke, matiko a ma tivisiwe leswaku hi nkarhi wa “ku lwa ka siku le’rikulu ra Šikwembu ša matimba hikwawo ešiv̌andleni le’ši v̌uriwaka Armagedoni hi Šiheberu,” Timbhoni ta Yehova a ti nga hlanganyeli eku lweni. Va ta swi tshikela eka Xikwembu lexi nga nhenha, “Yehova wa tinyimpi,” kun’we ni mavandla ya tinyimpi ta yena ehansi ka vukongomisi bya Yesu Kriste.—Nhlavutelo 16:14-16, BX; 19:11-21; Psalma 84:12.
Yehova U Kusuhi No Sungula Mintirho Ya Yena Ya Nyimpi
7. Tanihi Xikwembu lexi nga nhenha, xana Yehova u vitaniwe hi xithopo xihi, naswona xana xa ha n’wi fanela xiyimo xexo?
7 Xikwembu xa Israyele wa khale xi tiviwile naswona xi vitaniwa tanihi Yehova tseva·’ohthʹ, kumbe Yehova wa tinyimpi. (1 Samuel 1:3, 11) Eka Varhoma 9:29 Pawulo muapostola wa Mukriste u kombetela eka vuprofeta bya Esaya 1:9 kutani a tsala: “Loko Hosi ya matimba hinkwawo a yi nga hi siyelanga vatukulu, a hi ta va hi hundzukile hi fana na Sodoma, a hi ta va hi ringanisiwile na Gomora.” Nakambe, Yakobo mudyondzisiwa wa Mukriste u tsarile: “Swirilo swa vatshoveri swi fikile etindleveni ta Hosi ya matimba hinkwawo.” (Yakobo 5:4) Hikwalaho, Pawulo na Yakobo va teke Xikwembu tanihi Yehova wa tinyimpi enkarhini wa lembe xidzana ro sungula ra Nguva ya hina leyi Tolovelekeke. Malembe xidzana ya 18 lama landzeleke, Xikwembu a xi hlanganyelanga eka nyimpi ya nyama eka Israyele wa moya, Israyele wa Xikwembu, hi ndlela leyi xi endleke ha yona eka Israyele wa khale, kambe wa ha ri Yehova wa tinyimpi.
8-10. (a) I mani la pfumeleleke nyimpi etilweni, naswona ha yini Mikayele a ri la fanelekaka swinene ku lwa nyimpi? (b) Xana byi ve byihi vuyelo bya nyimpi etilweni, naswona i nkarhi wo tanihi kwihi lowu saleke emahlweni ka nyimpi ya siku lerikulu ra Yehova?
8 Eku tswariweni ka Mfumo wa Vumesiya hi 1914 eku heleni ka “nkari wa v̌amatiko,” ku tlhekeke nyimpi exivandleni xa le matilweni xa Yehova Xikwembu. (Luka 21:24, BX) I mani la pfumeleleke nyimpi yoleyo? Yehova Xikwembu hi yexe. U rhumele N’wana wa yena la nga hosi exivandleni xa nyimpi ehansi ka vito ra Mikayele hikuva yena Loyi u faneleka swinene ku hlamula xivutiso lexi nga eka vito rero, hi leswaku, “I Mani La Fanaka Ni Xikwembu?” Hi ku hatlisa Mikayele u teke goza tanihi muyimeri la lwaka wa Yehova wa tinyimpi.
9 Hi laha ku fanelaka, ha hlaya eka Nhlavutelo 12:7-10: “Kutani ku pfuka nyimpi etilweni, ya Mikayele ni tintsumi ta yena loko va lwa na dragona; na yona dragona yi lwa yi ri ni tintsumi ta yona. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona. Kutani ndzi twa rito leri tlakukeke etilweni ri ku: ‘Sweswi, ku hlayiseka ka Xikwembu xa hina ni matimba ya xona, ni mfumo wa xona, ni vuhosi bya Mesiya wa xona, swi fikile, hikuva loyi a hehlaka vamakwerhu, muhehli loyi a va mangalelaka vusiku ni nhlikanhi emahlweni ka Xikwembu xa hina, ú cukumetiwile a ya wela hansi.’”
10 Sweswi, ku tlula malembe ya 70 endzhaku ka nyimpi yoleyo ematilweni, ku sele ‘nkarhi wo koma’ swinene leswaku nyimpi ya siku lerikulu ra Yehova yi sungula kutani Xikwembu hi laha ku xiyekaka xi tikombisa xi ri Yehova wa tinyimpi eka rixaka ra sweswi ra vanhu.—Nhlavutelo 12:12, Zakaria 14:3.
Museketeri Wa Ku Lweriwa Ka Yehova
11. I nkarhi wihi lowu vekiweke lowu masalela ya ntlhambinyana ni ntshungu lowukulu va wu rindzeleke, kutani i yini lexi va nga xi twarisa hi ntsako hi nkarhi wolowo?
11 Ehansi ko huhuteriwa, Hosi Solomoni wa vutlhari wa Israyele wa khale u tsarile: “Šilo šiṅwana ni šiṅwana ši ni nkari wa šona, kutani nkari wu kona wa hikwaŝo le’ŝi endliwaka e hansi ka tilo. . . . Nkari wu kona wa nyimpi, wu kona nkari wa ku rula.” (Eklesiasta 3:1-8) Laha misaveni vadyondzisiwa va Hosi leyi fumaka leyi yi nga “[yikulu] ku tlula Solomoni” va yimele nkarhi ni xiendlakalo xa Yona xo kongomisa mavandla ya le tilweni ya tintsumi eka nyimpi leyi nga ta lweriwa eArmagedoni. (Matewu 12:42; Nhlavutelo 19:11-16) Kona u “ta [fuma matiko] hi nhonga ya nsimbi,” a ma tshova, “hi nhonga ya nsimbi.” (Nhlavutelo 19:15; Psalma 2:9) Mawaku ndlela leyi vadyondzisiwa va yena lava hlayisaka ku rhula, lava sirheleriweke va nga ta tsakela nkutsulo wa yena lowu hlamarisaka ha yona! Leswi swi ta katsa masalela ya “ntlhambinyana” wa vadya-ndzhaka kulobye va Mfumo ni “ntshungu lowukulu” wa “tinyimpfu” ta yena “tin’wana” leti hlanganyelaka eka ntshembo wo dya ndzhaka ya misava ya Paradeyisi ehansi ka mfumo wa yena lowunene wa gidi ra malembe. (Luka 12:32; Nhlavutelo 7:9-17; Yohane 10:16) Hi ntsako, “e nḍutini wa L’a-nga-ni-matimba-hikwawo,” va ta twarisa ku hlula loku tsakisaka ka Hosi ya Murisi, Yesu Kriste, eku lweleni ka vuhosi bya vuako hinkwabyo bya Yehova Xikwembu.—Psalma 91:1.
12. Nyimpi yi tshinela eka matiko yi huma kwihi, naswona vuyelo hi byihi hi ku ya hi Psalma 68:1, 2?
12 Handle ko hundzeleta, sweswi ku nga ha vuriwa leswaku nyimpi ya le handle swinene ka xivandla xa munhu na leyi katsaka ku tirhisiwa ka switlhavana leswi kongomisiweke hi ku pakanisa leswi tlulaka swinene tibombo ta yena ta nyutliya, ya tshinela eka matiko hinkwawo ya misava, hambi ma le ndzeni kumbe ehandle ka nhlengeletano ya Nhlangano wa Matiko. Yingisela: “Šikwembu a ši pfuke, v̌alala va šona a v̌a hangalake, ni lav̌a ši v̌engaka a v̌a ṭuṭume mahlweni ka šona. Hi laha musi wu nyumbaka ha kona va nyumbisa ŝeŝo, hi laha mumpfu wu nyukaka e nḍilweni, lav̌o biha v̌a ta lov̌isa ŝeŝo e mahlweni ka Šikwembu.”—Psalma 68:1, 2.
13. Tanihi leswi malunghiselelo ya nyimpi ya yaka emahlweni, hi le ka mani laha marito ya Psalma 45:1-6 sweswi ya kongomisiwaka kona hi ku pakanisa?
13 Ku lunghiseleriwa ka nyimpi ya tinyimpi hinkwato sweswi ku karhi ka endliwa. Tanihi Mulweri lonkulu wa Xikwembu, Museketeri wa ku lweriwa ka Yehova ku vulavuriwa hi yena hi marito lama landzelaka lama vumbiweke ehansi ka ku huhuteriwa hi xirho xa rixaka ra Israyele: “U tlula hi ku saseka e v̌ana v̌a v̌anhu, tintŝalo ti halakile miloṅwini ya wena; hikwalaho Šikwembu ši ku katekiseke hi laha ku nga heriki. We nhenha! tibohe banga ra wena e ṭhev̌eni ra wena, i ku ḍuneka ka wena ni ku kwetsima ka wena; khanḍiya golonyi ya wena u ya hlula, u ya lwela ntiyiso, ni ku lulama, ni musa. V̌oko ra wena ra šinene ri ta ku dyonḍisa mitiro le’yi tŝhavisaka. Misev̌e ya wena yi kariha, matiko ma ta wela e hansi ka wena, miseve ya wena yi ta nghena e timbilwini ta v̌alala v̌a hosi! Oho Šikwembu! šiluv̌ela ša wena ši tiyile hi mikari ni mikari nhonga ya v̌uhosi bya wena i nhonga ya ku lulama.”—Psalma 45:1-6.
Matiko Ya Hlengeletanela Ku Lwa Na Yehova
14, 15. Endzhaku ko kutsuriwa ekhotsweni, i marito wahi yo huma eka Psalma 2 lawa vaapostola va ma tshaheke lama hetisekaka; naswona i xikombelo xihi lexi va nga xi endla eka Xikwembu?
14 Xikan’we-kan’we endzhaku ka ku simekiwa ka bandlha ra Vukriste hi siku ra Pentekosta 33 C.E., Vakriste lava totiweke va twisise ku tirha ka Psalma 2:1, 2. Tsalwa leri ri hlayeka hi ndlela leyi: “Šana matiko ma ḍumaḍumela yini? Ni v̌amatiko v̌a anakanyela yini ŝa hav̌a šana? Šana tihosi ta misav̌a ti pfukele yini, ni tihosana ti hlengeletene ha yini na v̌ona, ku pfukela Yehova ni Muhlawuriwa wa yena?” Endzhaku ka loko vaapostola va Muhlawuriwa wa Yehova va xanisekile hi ku khotsiwa ka vona ko sungula ni ku xanisiwa hi Vayuda valala va vona, va tlhele va joyina Vakriste-kulobye kutani va tshaha marito lama ya Psalma 2 hi laha ya vuriweke ha kona hi Hosi Davhida. Mintirho 4:23-30 yi vika mhaka leyi, yi ku:
15 “Kuteloko Petro na Yohane va ntshunxiwile, va tlhelela eka vanakulobye, kutani va va tivisa hinkwaswo leswi vaprista lavakulu ni vakulukumba va nga va byela swona. Loko vona va swi twile, va huwelela eka Xikwembu hi ku khongela va ri mbilu yin’we, va ku: ‘N’wini wa hina, wena la endleke tilo ni misava ni lwandle, ni hinkwaswo leswi nga ka swona! U vurile hi Moya lowo Kwetsima, hi nomu wa tata wa hina Davhida nandza wa wena, u ku: “Xana vamatiko va kariha-karihela yini, ni matiko ma bohela yini makungu ya hava xana? Tihosi ta misava ti pfukile, ni vafumi va matiko va twananile ku lwa na [Yehova] ni Mesiya wa [yena].”’ Hikuva kunene Heroda na Pontiyo Pilato, ni vamatiko, ni tinxaka ta Israele, va hlangene kun’we emutini lowu ku lwa na Yesu nandza wa wena la hlawulekeke, loyi u nga n’wi endla Mesiya; va hlangane ku endla hinkwaswo leswi u swi boheke khale, hi ntamu wa wena ni makungu ya wena, leswaku swi ta humelela. Sweswi ke [Yehova], languta ku tshukisa ka vona, u nyika malandza ya wena ku vula rito ra wena va tiyile va nga chavi nchumu; tshambuluta voko ra wena ku horisa, u endla leswaku mahlori ni swihlamariso swi va kona hi vito ra Yesu, nandza wa wena la hlawulekeke.”
16, 17. (a) Eka matimu hinkwawo ya vanhu, xana ku na leswi swi nga humelela leswi nga pimanisiwaka ni leswi sunguleke ku humelela hi 1914? Hlamusela. (b) I goza rihi leri matiko ya yaka emahlweni ya ri teka, leri susumeteleke Yehova Xikwembu ku tsala yini eka “[buku] ya Miv̌ango ya Yehova”?
16 Hambi swi ri tano, loko swi ta eka matiko lama dzumadzumaka, tihosi leti tekaka xiyimo xa tona swin’we, varhangeri va politiki lava hlengeletaneke swin’we ku lwa na Yehova na Muhlawuriwa wa yena, Yesu Kriste, i yini lexi ematin’wini hinkwawo ya vanhu xi nga ha ringanisiwaka ni lexi xi sunguleke malembe ya 76 lama hundzeke hi 1914? Rero a ku nga ri lembe leri nyimpi yo sungula ya misava evurungurwini bya vanhu hinkwavo yi sunguleke ha rona ntsena kambe ngopfu-ngopfu i lembe leri minkarhi ya Vamatiko, ‘minkarhi leyi vekiweke ya vamatiko,’ yi heleke ha rona! (Luka 21:24) Entiyisweni Psalma 2 yi ve ni ku hetiseka ka yona lokukulu loku sunguleke hi lembe rolero.
17 Eku heleni ka minkarhi ya Vamatiko hi 1914, a ku na rin’we ra matiko—hambi ku ri matiko lama vuriwaka ya Vujagana, lawa vaaki vo tala va wona hi tlhelo ra vukhongeri va tilangutaka tanihi Vaisrayele va moya—lava voyameleke eka ku amukela Mutotiwa wa Yehova, Yesu Kriste, eka xiluvelo xa vuhosi ehenhla ka misava. Naswona sweswi, malembe lama nga vaka 71 endzhakunyana “evhangeli leyi ya Mfumo” yi sungule ku “twarisiwa emisaveni hinkwayo, leswaku yi va vumbhoni eka vanhu va matiko hinkwawo,” ku sukela hi 1919 ku ya emahlweni, matiko lama nga endzeni ni le handle ka Vujagana entiyisweni a ma nge dzunisi Hosi ya Yehova leyi twarisiweke khale ni ku hlambanya eku titsongahateni eka yona hi ku tshika vuhosi bya wona emisaveni. (Matewu 24:14) Hi ku hambana, eku heteleleni va fikelele nkarhi ni xiyimo lexi eka xona va susumetelaka Yehova ku tsala makumu lama xiyekaka ya “[buku] ya Miv̌ango ya Yehova.”—Tinhlayo 21:14.
Ku Hlula Loko Kwetsima Ka Xikwembu Lexi Nga Nhenha
18. Xana hi rihi goza ra Yehova laha leri hi ri tsakelaka, naswona kavula i mani la nga ta va etlhelweni ra yena, eku hetisekeni ka Psalma 110?
18 Kutani, teka goza ra nyimpi, Wena Yehova wa tinyimpi, ni N’wana wa wena wa vuhosi, Yesu Kriste, etlhelweni ra wena! Marito lawa ya vuprofeta ma kongomisiwe eka yena: “Tlhoma ku fuma ka wena e šikari ka v̌alala v̌a wena! [Yehova la] nge v̌okweni ra wena ra šinene, [u] hete tihosi hi siku ra v̌ukari bya [yena]. [U] ta herisa e šikari ka matiko: hikwako ku ta tala miṭumbu. [U] ta faya tinhloko e tikweni le’rikulu ngopfu.”—Psalma 110:2, 5, 6.
19. Malunghana ni nyimpi ya siku lerikulu ra Xikwembu xa Matimba Hinkwawo leyi nga ekusuhi swinene, i xikhongelo xihi lexi hi nga xi nyikelaka eka yena ematshan’wini ya ntshungu lowukulu wa tinyimpfu tin’wana?
19 Oho Yehova wa tinyimpi, malandza ya wena layo tshembeka emisaveni a ya ve timbhoni leti tsakeke ta ku hlula ka wena loku nga pimanisekiki hi Hosi ya wena loyi a nga nhenha, Yesu Kriste, eka xiendlakalo xa nyimpi ya siku lerikulu ra Xikwembu xa Matimba Hinkwawo exivandleni lexi vuriwaka Armagedoni hi Xiheveru! (Nhlavutelo 16:14) Kun’we ni masalela ya Vaisrayele va moya va ntiyiso, ntshungu lowukulu wa tinyimpfu tin’wana lava “[hlantsweke] tinguvu ta vona, va ti basis[a] hi ngati ya Xinyimpfana” lava hi ntsako va “humaka eku xanisekeni lokukulu” va va timbhoni ta wena emisaveni hi laha ku nga heriki! (Nhlavutelo 7:14) Ehansi ka nkhathalelo wa wena wa rirhandzu, a va hanye handle ko fa va nghena eka xivandla xo pfumala nyimpi xa N’wana wa wena la hlulaka, loyi a nga ta fuma ehenhla ka misava leyi basisiweke leyi nga ta hundzuriwa paradeyisi leyo saseka, hi ku pfumelelana ni xikongomelo xa wena xo sungula. A va ve vumbhoni lebyi vonakaka eka hinkwavo lava pfuxiweke eku lweleni ka vuhosi lebyi hi laha ku faneleke byi nga bya wena ehenhla ka vuako hinkwabyo! Ha ku nkhensa hikuva u ta va u yi tlhantlhele makumu mphikamakaneta ya vuako hinkwabyo, ina, hi laha ku nga heriki!
Wa Tsundzuka Xana?
◻ Hi yini mphikamakaneta leyikulu emahlweni ka vanhu ni tintsumi?
◻ I ku hambana kwihi loku ku nga exikarhi ka ku lwela ka Yehova Israyele wa khale na Israyele wa moya?
◻ Hi nkarhi wa Armagedoni, i xiyimo xihi lexi Timbhoni ta Yehova ti nga ta xi teka, naswona ha yini?
◻ Hi rini laha Psalma 2:1, 2 yi nga ta va ni ku hetiseka ka yona loku nga pimanisekiki?
◻ Xana mphikamakaneta ya vuako hinkwabyo yi ta tlhantlheriwa makumu hi ndlela yihi?
[Xifaniso lexi nga eka tluka 24, 25]
“Ntshungu lowukulu” wu ta twarisa Hosi ni Murisi wa Xikwembu la hlulaka