Xiviko Xa Vahuweleri Va Mfumo

Ku Suka Eka Gome Ku Ya Eku Tsakeni

YEHOVA i Xikwembu lexi tsakeke. (1 Timotiya 1:11) U lava leswaku lava va n’wi tirhelaka va tsaka na vona. Hikwalaho, loko un’wana wa malandza ya yena a ri ni gome, Yehova u ta n’wi pfuna ku tiyisela ku karhateka loku naswona minkarhi yin’wana hambi ku ri ku tlhela a kuma moya wa ntsako. Ntokoto lowu landzelaka lowu humaka eUruguay wu kombisa leswi.

Makwerhu wa xisati a a rindzile ekliniki eMontevideo ku twa vuyelo bya nkambisiso wa X-ray. Wansati loyi a tshameke kusuhi na yena a chava ngopfu hi leswi dokodela a nga tshukaka a n’wi byela swona tanihi vuyelo bya nkambisiso lowu a veke na wona. Makwerhu loyi wa xisati u n’wi byerile leswaku ku sukela loko a ve Mbhoni ya Yehova, a a nga chavi nchumu. Hambi swi ri tano, wansati loyi u vule leswaku a a nga ti lavi Timbhoni hikuva ti langutela mpimanyeto wa le henhla swinene eka vanhu.

Kutani makwerhu loyi wa xisati u n’wi byerile leswaku vutivi bya ntiyiso wa Bibele byi n’wi pfune hi ndlela yihi. U lahlekeriwe hi nhwanyana wa 18 wa malembe hi vukhale hi rifu naswona u nghene exiyin’weni xa gome lerikulu hi malembe ya nhungu. Hambi ku ri vativi va swa vutshunguri kumbe vutshunguri lebyi durhaka a swi n’wi pfunanga ku hlula gome leri. U te hi minkarhi yo talanyana, u amukeriwe exibedlhele, kambe a ku vanga na nhluvuko. Ndyangu wa ya yena a wu languteriwa hi vatirhi hikuva yena hi yexe a a nga swi koti ku khathalela hambi ku ri yini. U ringete ku tisunga hikwalaho ka leswi a lahlekeriweke hi ku tsakela vutomi. A ku na nchumu lexi a xi languteka xi pfuna.

Kutani, u byele wansati loyi, siku rin’wana Timbhoni ta Yehova ti n’wi endzerile kutani ti n’wi siyela tibuku to karhi ta Bibele. Sweswo swi pfuxe ku tsakela ka yena eRitweni ra Xikwembu, naswona u sungule ku hlaya Bibele nkarhi hinkwawo. Swo karhi swi sungule ku cinca eka yena. U sungule ku pfuka na mixo kutani a langutela ndyangu wa yena. Eku heteleleni u bohe ku khathalela yindlu hi yexe naswona u kume a swi kota ku endla tano. A swi tikomba onge a nga kalanga a vabya! Leswi swi n’wi endle a titwa a tsakile.

A nga tlhelelanga eka mutivi wa swa vutshunguri. Ku navela ka yena ku hanya ku nyanyuriwe hi vutivi bya yena bya Rito ra Xikwembu, naswona leswi swi tikombe ku ri murhi lowunene. U lave Timbhoni ta Yehova, kutani va sungule dyondzo ya nkarhi hinkwawo na yena. Nakambe u sungule ku va kona eminhlanganweni, naswona ku nga ri khale u khuvuriwile. A nga ha karhatiwi hi gome, sweswi u kuma ntsako eku tirheleni Yehova.

Wansati loyi a nga ekamareni ro rindzela eka rona u yingisele hi vukheta. Kutani u te eka makwerhu wa xisati: “Hi nkarhi wun’wana, Timbhoni ta Yehova a ti tsemakanya ndlela ya mina; kambe loko nkarhi wun’wana lowu taka, hakunene ndzi va un’wana wa Timbhoni ta Yehova hi ndzexe, ku ta va hikwalaho ka leswi u ndzi byeleke swona ntsena. Ku yingisela wena swi fana ni ku sungula ku vona ku vonakala endhawini ya munyama.”

Vanhu vo tala emisaveni hinkwayo va langutana ni vuhava bya ku ringeta ku lulamisa swiphiqo swa vutomi hi voxe, kutani va hundzulukela eka Yehova Xikwembu. Mawaku ndlela leyi va tsakeke ha yona ku dyondza hi misava leyintshwa leyi taka ya Xikwembu laha un’wana ni un’wana a nga ta tsaka, ni laha gome ku nga ta va nchumu wa nkarhi lowu hundzeke!—Swivuriso 16:20.