Yehova U Lulameriwa Hi Ku Dzunisiwa Hi Laha Ku Nga Heriki
“Nḍi ta ku v̌onga hi masiku hikwawo, nḍi ḍunisa v̌ito ra wena hi mikari le’yi nga heriki.”—PSALMA 145:2.
1. Hikwalaho ka yini Davhida a a ri ni swivangelo swo tala swo dzunisa Yehova?
NANDZA wo tshembeka wa Yehova Davhida a a ri ni swivangelo swo tala swo dzunisa Xikwembu. Hosi leyi yi tivekaka kahle ya Israyele wa khale a yi byi tiva vukulu ni vunene bya Yehova naswona yi xiye leswaku vuhosi bya Yena a byi ri bya hi laha ku nga heriki. La Tlakukeke swinene u lulameriwe hi ku dzunisiwa hikwalaho ka ku anerisa ku navela ka xin’wana ni xin’wana lexi hanyaka na hikwalaho ka tintswalo eka malandza ya yena lama tshembekaka.
2. (a) Psalma 145 yi xaxametiwe hi ndlela yihi? (b) Hi swihi swivutiso leswi hi nga ta swi kambisisa?
2 Davhida u nyikele ku dzunisa ko tano eka Xikwembu eka Psalma ya vu-145. Ndzimana yin’wana ni yin’wana ya nxaxamelo lowu wa Pisalema wu sungula hi letere leri humelelaka ra tinhlanga ta Xiheveru, hambi leswi letere rin’we (nun) a ri tshikiwile. Nxaxamelo lowu wu nga ha va wu tirhe tanihi xipfuneto xo tsundzuka. Psalma 145 yi dzunisa Yehova, tanihi marito lawa: “Nḍi ta ku v̌onga hi masiku hikwawo, nḍi ḍunisa v̌ito ra wena hi mikari le’yi nga heriki.” (Psalma 145:2) Kambe Pisalema leyi yi nga hi khumba hi ndlela yihi? Xana yi nga endla yini eka vuxaka bya hina na Xikwembu? Leswaku hi swi kuma, a hi sunguleni hi xiya tindzimana 1 ku ya ka 10.
Vukulukumba Bya Yehova Lebyi Fihlekeke
3. Ku fana na Davhida, i yini lexi hi xi kolotaka eka ‘Hosi Xikwembu xa hina,’ naswona ha yini?
3 Davhida a a ri hosi, kambe u xiye vukulukumba bya Yehova eka yena, a ku: “Nḍi ta ku kurisa, Šikwembu ša mina, Hosi ya nga! Nḍi ta v̌onga v̌ito ra wena hi mikari le’yi nga yiki helo.” (Psalma 145:1) Hi xichavo lexi fanaka, Timbhoni ta Yehova ti tlakusa vito ra Xikwembu ni ku xi dzunisa emisaveni hinkwayo. Vutomi bya hina bya fuwisiwa loko hi hlanganyela entirhweni wo tano. Ku fana na Davhida, hi kolota ku yingisa ni ku titsongahata eka Yehova tanihi ‘Hosi Xikwembu xa hina.’ Naswona swa fanela! I ‘Hosi ya hi laha ku nga heriki.’ (Nhlavutelo 15:3) Ku tlula kwalaho, Davhida Lonkulu, Yesu Kriste, loyi a ri karhi a fuma a ri eNtshaveni ya Siyoni ya le tilweni ku sukela hi 1914, u hi nyika xikombiso lexinene xa ku titsongahata eka Yehova, Hosi ya hi laha ku nga Heriki.
4. Hi nga ri ‘dzunisa hi ndlela yihi vito ra Xikwembu’?
4 Davhida u vule leswaku u ta ‘dzunisa vito ra Xikwembu.’ Leswi swi koteka hi ndlela yihi eka munhu ntsena? Kahle-kahle, eka swin’wana, ku dzunisa un’wana swi vula ku vulavula leswinene hi yena. Ku dzunisa vito ra Xikwembu swi kombisa leswaku hi ni rirhandzu ra matimba eka yena ni vito ra yena ro kwetsima, Yehova. A hi vileli hi Xikwembu, a hi lavi ku kuma xihoxo eka xona, a hi kanakani vunene bya xona. Hi loko ntsena hi ri na langutelo rero, hi tinyiketele eka Yehova, ni ku hlayisa vutshembeki tanihi Timbhoni ta yena leti khuvuriweke, laha hi nga vulaka kun’we na Davhida leswaku ‘hi ta dzunisa vito ra Xikwembu hi laha ku nga heriki.’ Loko hi tihlayisa hi ri erirhandzwini ra Xikwembu, hi ta amukela nyiko ya vutomi lebyi nga heriki kutani xisweswo hi swi kota ku dzunisa Yehova hi masiku.—Yuda 20, 21.
5. Ku navela ku dzunisa Yehova “hi mikari le’yi nga heriki” ku fanele ku va ni vuyelo byihi eka hina?
5 Loko entiyisweni hi rhandza Munyiki wa hina wa Vutomi, hi ta vula kun’we na Davhida: “Nḍi ta ku v̌onga hi masiku hikwawo, nḍi ḍunisa v̌ito ra wena hi mikari le’yi nga heriki.” (Psalma 145:2) Vona ndlela leyi siku ri nga ta va ri nga pfunanga nchumu ha yona loko hi nga dzunisanga Xikwembu! Hi nga tshuki hi khomeka swinene kumbe hi hiseka hi swilo swa nyama lerova hi tsandzeka ku vulavula kahle hi Tata wa hina wa le tilweni kumbe ku khongela eka yena masiku hinkwawo. Yesu u kombise leswaku hi fanele ku khongela siku na siku loko eka xikhongelo xa xikombiso a te: “U hi nyika masiku hinkwawo vuswa bya hina bya siku rin’wana ni rin’wana.” (Luka 11:3) Vo tala lava nga evutirhelini bya nkarhi hinkwawo va dzunisa Xikwembu siku na siku loko va nghenela vutirheli bya Vukriste. Kambe ku nga khathariseki swiyimo swa hina mbilu ya hina yi fanele ku hi susumetela ku dzunisa Xikwembu hi ndlela yin’wana siku rin’wana ni rin’wana. Naswona ehleketa! Tanihi Timbhoni leti ti tinyiketeleke ta Yehova leti nga ni ntshembo wa vutomi lebyi nga heriki, hi ni langutelo lerinene ra ku dzunisa vito ra yena hi laha ku nga heriki.—Yohane 17:3.
6. Hikwalaho ka yini Yehova a “faneriwa hi ku v̌ongiwa hikwaku”?
6 Hakunene hi ni xivangelo xa ku dzunisa Xikwembu siku hinkwaro, hikuva Davhida u engetile: “Yehova o nkulukumba, o faneriwa hi ku v̌ongiwa hikwaku; v̌ukulukumba bya yena [byi fihlekile].” (Psalma 145:3) Yehova i nkulukumba swinene lerova a nga ringanisiwi, naswona vuhosi bya yena i byikulu. Hosi ya le Babilona Nebukadnetsara a a fanele ku pfumela: “Kutani a ku na uṅwana l’a nga . . . siv̌elaka [Xikwembu], a ku ka [xona]: U endla yini?” (Daniel 4:34, 35) Yehova “wa tšhav̌isa e ku tlurisa ŝikwembu hikwaŝo.” (Psalma 96:4) A swi hlamarisi leswi a ‘fanelaka ku dzunisiwa ngopfu.’ Phela, ku hava marito ya ku dzunisa lama tlakukeke swinene loko ku dzunisiwa Yehova! U lulameriwa hi ku dzunisiwa loku nga hikiwangiki, loku nga heriki.
7. I yini leswi kombisaka leswaku ‘vukulu bya Xikwembu byi fihlekile’?
7 ‘Vukulukumba bya Yehova byi fihlekile.’ Ku nga khathariseki ndlela leyi a nga nkulu ha yona emirini, vukulukumba bya yena byi titshege hi muxaka wa Xikwembu lexi a nga xona. Ina, swilo leswi a swi vumbeke swi hlamarisa ngopfu eka hina leswaku hi swi twisisa, naswona hina hi hexe hi ‘vumbiwe hi ndlela leyi hlamarisaka.’ (Psalma 139:14; Yobo 9:10; 37:5) Ku tlula kwalaho, vona ndlela leyi Yehova Xikwembu a tikhomaka kahle ha yona! Hi ku tshembeka u hlayisa switshembiso swa yena ni ku paluxa swikongomelo swa yena hi rirhandzu. Hambi swi ri tano, a hi nge tivi hinkwaswo hi Xikwembu. Hi laha ku nga heriki, hi ta swi kota ku kula evutivini bya yena, ntumbuluko wa yena, ni swikongomelo swa yena.—Varhoma 11:33-36.
Tlakusa Mintirho Ya Yehova
8. (a) Xana ‘rixaka rin’wana endzhaku ka rin’wana’ ri twarise mintirho ya Yehova hi ndlela yihi? (b) Loko hi dyondzisa vana va hina hi mintirho ni swiendlo swa Yehova, xana va ta byi languta hi ndlela yihi vugandzeri bya yena? (c) Tanihi “rišaka” leri tsakeke, i yini leswi masalela lama totiweke ma swi endleke?
8 Swo tala swi nga vuriwa eku dzuniseni ka Xikwembu xa hina lexikulu lexi fihlekeke lerova Davhida u susumeteleke ku vula a ku: “Rišaka riṅwana a ri byele rišaka le’ri tlhandlamaka e mitiro ya wena, ri twarisa mitiro ya wena le’yi tlakukeke.” (Psalma 145:4) Tinxaka leti tlhandlamaka ta vanhu ti tlakuse mintirho ya Yehova ni ku tivisa mintirho ya yena ya matimba. Mawaku lunghelo ronghasi ra ku tivisa swilo leswi eka lava hi va fambiselaka tidyondzo ta Bibele ta le kaya! Hi xikombiso, hi nga va byela leswaku Xikwembu xi vumbe swilo hinkwaswo. (Genesa 1:1–2:25; Nhlavutelo 4:11) Hi nga vulavula hi mintirho ya yena ya matimba hi nkarhi lowu a nga kutsula Vaisrayele evuhlongeni aEgipta, a va pfuna ku hlula valala va Vakanana, a va ponisa ku lovisiwa ka rixaka ePeresi wa khale, ni swin’wana swo tala. (Eksoda 13:8-10; Vaavanyisi 4:15; Ester 9:15-17) Kutani xana a hi susumeteriwi ku byela vana va hina hi mintirho ni swiendlo swa Yehova? Loko hi nyika vana va hina vuleteri byo tano kutani va hi vona hi tirhela Xikwembu hi ku tsaka, kumbexana va ta languta vugandzeri bya yena tanihi lebyi tsakisaka ni ku kula hi ‘ntsako wa Yehova tanihi khokholo ra vona.’ (Nehemia 8:10; Psalma 78:1-4) Masalela lama totiweke ma vumba “rišaka” leri tsakeke ra Timbhoni ta Yehova leri tlakusaka mintirho ya Xikwembu eka “ntshungu lowukulu,” xiphemu xa rixaka leri nga ta tshama emisaveni ya Paradeyisi.—Nhlavutelo 7:9.
9. Loko hi anakanyisisa hi mintirho ni swiendlo swa matimba swa Xikwembu, i yini leswi hi nga tiyisekaka ha swona?
9 Loko hi anakanyisisa hi mintirho ya Xikwembu ni swiendlo swa matimba, hi va lava khorwisekaka swinene leswaku “Yehova a nga ka a nga ṭhiki tiko ra yena hikwalaho ka v̌ito ra yena le’rikulu.” (1 Samuel 12:22; Psalma 94:14) Loko hi langutana ni mindzingo, ku karhateka, ni nxaniso, hi nga rhula ni ku tiyiseka leswaku “ku rhula ka Xikwembu” ku ta hlayisa timbilu ta hina ni matimba ya miehleketo. (Vafilipiya 4:6, 7) Kutani vona ndlela leyi swi fanelaka ha yona swonghasi leswaku hi byela van’wana hi Tata wa hina, wa le tilweni la nga ni rirhandzu, la sirhelelaka!
10. “Mitiro le’yi hlamarisaka” ya Yehova yi katsa yini, naswona hi pfuneka hi ndlela yihi loko hi ehleketisisa ha yona?
10 Hi fanele hi teka nkarhi leswaku hi ehleketisisa hi vukulukumba ni mintirho ya Yehova, hikuva Davhida u engeterile a ku: “Nḍi ta ṭunḍuka v̌unene ni ku twala ka v̌ukulu bya wena, ni mitiro le’yi hlamarisaka ya wena.” (Psalma 145:5) Vukulu bya Xikwembu bya chavisa naswona a byi ringanisiwi. (Yobo 37:22; Psalma 148:13) Xisweswo, Davhida u endle ku kwetsima lokukulu ka vukulu bya Yehova nkhathelelo wa yena. Mupisalema nakambe u ti karhatele timhaka ta “mitiro le’yi hlamarisaka” ya Xikwembu. Leswi swi katsa ku tirhisa vululami bya Xikwembu eku heriseni ka vadyohi ni ku hlayisa lava chavaka Xikwembu, tanihi le nkarhini wa Ndhambi. (Genesa 7:20-24; 2 Petro 2:9) Ku ehleketisisa hi timhaka to tano swi tiyisa vuxaka bya hina na Yehova naswona swi hi pfuna ku byela van’wana hi vukulu ni mintirho ya yena leyi hlamarisaka. Hi nkarhi wa masiku ya 40 emananga, Yesu u tiyisiwile leswaku a lwisana ni ndzingo hi ku ehleketisisa hi swilo leswi matilo lama pfulekeke ma n’wi kombiseke swona. (Matewu 3:13–4:11) Endzhaku ka sweswo u vulavule ni van’wana hi vukulu ni mintirho leyi hlamarisaka ya Yehova.
11. (a) Hikwalaho ka yini ku chava ku wele vaaki va Yeriko? (b) I moya wihi lowu Timbhoni ta Yehova ti vulavulaka ha wona mayelana ni “mitiro leyi tšhav̌isaka” ya Xikwembu ni “v̌ukulu” bya xona?
11 Loko hi vulavula hi vukulu ni mintirho ya Xikwembu, hi susumetela van’wana ku vulavula hi swona. Davhida u te: “V̌anhu v̌a ta v̌ula mitiro le’yi tšhav̌isaka ya wena, mina nḍi v̌ula v̌ukulu bya wena.” (Psalma 145:6) Rahava u vulavule hi ku chava loku weleke vaaki va Yeriko loko va twe ndlela leyi Yehova a hlayiseke Vaisrayele ha yona eLwandle ro Tshwuka kutani a va endla va hlula eka tihosi timbirhi ta Vaamor. Ku fanele ku ve ni ku vulavula ngopfu hi mayelana ni ‘swilo swo tano leswi chavisaka’ eYeriko. (Yoxuwa 2:9-11) Naswona hakunene ‘nhlomulo lowukulu’ lowu tshineleke wu ta chavisa. (Matewu 24:21) Kambe swilo leswi chavisaka swinene eka vanhu lava hambukeke eka Xikwembu etimbilwini to lulama swi tisa “ku tšhava Yehova,” ku n’wi chava loku tengeke. (Swivuriso 1:7) Hi moya wo tano wa xichavo, Timbhoni ta Yehova ti vulavula hi ku kombisiwa ka matimba ya Xikwembu. Phela, Muendli lonkulu wa Xihlamariso hi yena loyi ku vulavuriwaka ngopfu ha yena exikarhi ka vatotiwa ni vanghana va vona va la misaveni! Naswona hambi ku ri nxaniso a wu va siveli ku byela van’wana hi swilo leswi ni “v̌ukulu” bya Yehova.—Mintirho 4:18-31; 5:29.
Dzunisa Yehova Hikwalaho Ka Vunene Bya Yena
12. Vunene bya Yehova byi hi endla njhani leswaku hi “khapa-khapa”?
12 Xikwembu xi lulameriwa hi ku dzunisiwa ku nga ri hikwalaho ka vukulu bya xona ntsena kambe na hi vunene ni vululami bya xona. Kutani Davhida u te: “Hi ku boxiwa ka vukulu bya vunene bya wena va ta khapa-khapa, naswona hikwalaho ka vululami bya wena va ta huwelela hi ku tsaka.” (Psalma 145:7, NW) Vunene bya Yehova byikulu swinene lerova hi “khapa-khapa” hi marito ya ntsako malunghana na byona. Hi Xiheveru, mianakanyo hi liya ya mati lama khulukaka ma huma exihlobyeni. Kutani onge hi nga humesa hi ku dzunisa ka ku tlangela Xikwembu, ku fana ni boboma. (Swivuriso 18:4) Leswi nga ni khombo ra moya eka yena, Israyele u rivale vunene bya Yehova. (Psalma 106:13-43) Kambe timbilu ta hina a ti khapa-khape hi ku tlangela ko tano leswi van’wana va hundzuka endzhaku ka loko va dyondze hi ndlela leyi Yehova a lulameke ha yona eka Timbhoni ta yena leti ti tinyiketeleke.—Varhoma 2:4.
13. Swikombiso swa vululami bya Xikwembu ni vunene swi fanele ku va ni vuyelo byihi eka hina?
13 Swikombiso swo tala swa vululami bya Xikwembu ni vunene nakambe swi hi susumetela ku ba minkulungwana. Loko hi titwa hi ndlela leyi, hi nge lavi Mfumo wa Xikwembu ku sungula ntsena kambe ni vululami bya xona. Minkarhi hinkwayo hi ta lava leswaku ku tikhoma ka hina ku tisa ku dzuneka eka Yehova. Ina, hi ta va vahuweleri va Mfumo va nkarhi hinkwawo hi ri ni swo tala swo swi endla entirhweni wa Xikwembu. A hi nge tshiki ku dzunisa ka hina Yehova.—Matewu 6:33; 1 Vakorinto 15:58; Vaheveru 10:23.
Yehova U Ni Tintswalo
14. Hi byihi vumbhoni lebyi nga kona bya leswaku ‘Yehova u ni tintswalo ni nsovo’?
14 Loko a tshaha timfanelo tin’wana ta Xikwembu leti lulameriwaka hi ku dzunisiwa, Davhida u te: “Yehova o ni tintŝalo, o ni nsov̌o, o hlwela ku kariha, o ṭeṭelela ngopfu.” (Psalma 145:8) Xikwembu xi ni musa hi leswi xi nga xinene ni ku hanana hi laha ku heleleke. (Matewu 19:17; Yakobo 1:5) Xi endla swilo leswinene hambi eka lava va nga xi tirheliki. (Mintirho 14:14-17) Yehova nakambe u ni tintswalo, u ni ntwela-vusiwana, “wa ṭunḍuka leŝaku hi nṭhuri.” A nga yi sandzi mbilu leyo biha kumbe a hi khoma hi ku ya hi swidyoho swa hina kambe u ni tintswalo ngopfu ku tlula tatana la nga munhu la nga ni rirhandzu lerikulu. (Psalma 51:17; 103:10-14) Phela, hi ku kombisa lokukulu ka tintswalo, u rhumele N’wana wa yena la rhandzekaka leswaku a hi fela leswaku hi ta vuyelelana ni Xikwembu ivi hi tokota tintswalo ta yena hakunene!—Varhoma 5:6-11.
15. Hikwalaho ka yini ku nga vuriwaka leswaku Yehova Xikwembu u “hlwela ku kariha” ni leswaku u “ṭeṭelela ngopfu”?
15 Tata wa hina wa le tilweni u hlwela ku kariha. A a nga karihi hi ndlela leyi nga fanelangiki. Yehova nakambe u “ṭeṭelela ngopfu.” Laha Xiheveru xi kombisa tintswalo leti humaka eka rirhandzu kutani ri tinamarheta ni nchumu wo karhi. Ri endla leswi kukondza xikongomelo xa rona malunghana ni nchumu wolowo xi hetiseka. Nhlamuselo yin’wana i ‘rirhandzu leri tshembekaka.’ Hi xikombiso, rirhandzu ra tintswalo ra Xikwembu kumbe rirhandzu leri tshembekaka, ri kombisiwa hi swiendlo swa ku kutsula, ku hlayisa, nsirhelelo, ku ntshunxiwa eku karhatekeni ni ku hlakarhela exidyohweni hi nkutsulo. (Psalma 6:4; 25:7; 31:16, 21; 40:11; 61:7; 119:88, 159; 143:12; Yohane 3:16) Mhaka ya leswaku Yehova a nga yi tisanga Armagedoni hi xihatla endzhaku ka ‘nyimpi etilweni’ yi endla leswaku mintshungu yi swi kota ku kuma ku pona, xikombiso lexikulu xa tintswalo ta rirhandzu ta Xikwembu.—Nhlavutelo 12:7-12; 2 Petro. 3:15.
16. Yehova u tikombise hi ndlela yihi a ri ni “v̌unene ka hikwav̌o”?
16 Hikwalaho ka musa wa Xikwembu, ku nga vuriwa leswaku u ni mbilu leyikulu. Davhida u te: “Yehova o ni v̌unene ka hikwav̌o, tintŝalo ta yena ti eneta mitiro hikwayo ya yena.” (Psalma 145:9) Ina, Xikwembu a xi ri xinene eka Vaisrayele. Hikwalaho, “ú tsuvukisa dyambu ra yena ehenhla ka lavo biha ni lavanene, ú nisa mpfula ehenhla ka lavo lulama ni lavo homboloka.” (Matewu 5:43-45) AEdeni, Yehova u tshembise ‘mbewu’ leyi a yi ta va nkateko. Endzhakunyana u byele Abrahama a ku: “Kutani matiko hikwawo ya misav̌a ma ta tinkhensa hi [mbewu ya] wena.” (Genesa 3:15; 22:18) Naswona vunene bya Xikwembu i byikulu swinene ‘enkarhini lowu wa makumu’ lerova un’wana ni un’wana ‘a nga ta a ta teka ntsena mati ya vutomi.’ (Daniel 12:4; Nhlavutelo 22:17) Yehova u tsakela ku endla leswinene eka swivumbiwa hinkwaswo swo tlhariha, naswona vunene bya yena byi fanele ku hi kokela ekusuhi na yena.
17. ‘Tintswalo ta Yehova ti eneta mintirho hinkwayo ya yena’ hi ku twisisa kwihi?
17 “Tintŝalo ta [Yehova] ti eneta mitiro hikwayo ya yena” hi leswi a nyikelaka swakudya leswi aneleke eka vanhu ni swiharhi. U ‘nyika nyama hinkwayo swakudya.’ (Psalma 136:25; 147:9) Xikwembu a xi xiximi vafumi kutani xi sandza lava xanisekaka, a xi kurisi lava tinyungubyisaka kutani xi sola lava titsongahataka, a xi tlakusi swiphukuphuku kutani xi tsongahata lavo tlhariha. Vanhu lava dyohaka va endla tano kambe ku nga ri Tata wa hina wa tintswalo wa le tilweni. (Psalma 102:17; Sofonia 3:11, 12; Eklesiasta 10:5-7) Naswona vona ndlela leyi tintswalo ta Xikwembu, musa wa vunene bya rirhandzu byi nga byikulu ha yona eku endleni ka leswaku ku ponisiwa ku koteka hi ku tirhisa gandzelo ra nkutsulo ra N’wana wa yena la rhandzekaka!—1 Yohane 4:9, 10.
Lavo Tshembeka Va Dzunisa Yehova
18. (a) Mintirho ya Xikwembu yi xi “ḍunisa” hi ndlela yihi? (b) Hi rini laha hi faneleke ku susumeteleka ku dzunisa Yehova?
18 Xikwembu xi lulameriwa hi ku dzunisiwa loku humaka eka xiyenge xin’wana ni xin’wana. Hi laha Davhida a swi vekaka ha kona: “Yehova, mitiro ya wena hikwayo ya ku ḍunisa, ni la’v̌a ku ranḍaka v̌a ku v̌onga.” (Psalma 145:10) Mintirho ya Xikwembu ya ntumbuluko ya n’wi “ḍunisa,” tanihi leswi yindlu leyi akiweke kahle yi nga ku dzuneka eka muaki wa yona ni mbita leyi rhandzekaka eka muvumbi wa yona wa vutshila. (Ringanisa Vaheveru 3:4; Esaya 29:16; 64:8.) Mintirho ya Yehova ya ntumbuluko yi hlamarisa ngopfu lerova yi susumetele tintsumi ni vanhu ku n’wi dzunisa. Vana va Xikwembu va tintsumi va huwelele hi ku tsaka loko a vumbe misava. (Yobo 38:4-7) Davhida u vule leswaku “matilo ma v̌ula ku kwetsima ka Šikwembu, ni mpfhuka wu tiv̌isa ntiro wa mav̌oko ya šona.” (Psalma 19:1-6) Hi nga dzunisa Yehova swinene loko hi vona koti ri haha ematilweni kumbe mhala yi tlula exintshabyanini xa rihlaza. (Yobo 39:26; Risimu Ra Tinsimu 2:17) Ku dzunisa ka fanela loko hi tshovela swa le masin’wini kumbe hi tiphina hi swakudya ni vanghana. (Psalma 72:16; Swivuriso 15:17) Mimiri ya hina leyi vumbiweke hi laha ku hlamarisaka na yona yi nga ha susumetela marito ya ku dzunisa ko tlangela Xikwembu.—Psalma 139:14-16.
19. I vamani ‘lavo tshembeka,’ naswona va endla yini?
19 Namuntlha, ‘vanhu lava tshembekaka lava totiweke hi moya wa Yehova laha misaveni va n’wi dzunisa. Va vulavula hi ndlela leyinene ha yena naswona va navela ku vona ku rhandza ka yena ku endliwa la misaveni tanihi loko ku endliwa etilweni. (Matewu 6:9, 10) Loko lava totiweke va byela van’wana hi mintirho leyi hlamarisaka ya Xikwembu, ntshungu lowukulu wu hlamula hi tinhlayo leti tshamelaka ku andza. Kun’we ni vatotiwa lava tshembekaka, va tirha hi ku chivirika tanihi vahuweleri va Mfumo. Xana ku tlangela ku ku susumetela ku hlanganyela nkarhi hinkwawo eka ntirho lowu leswaku ku dzunisiwa Xikwembu?
20. (a) Vito ra Yehova ri ta kwetsimisiwa hi ndlela yihi? (b) Malunghana na Psalma 145, i swivutiso swihi leswi salelaka ku kambisisiwa?
20 Tanihi Timbhoni ta Yehova, hi fana na Davhida eku nyikeni ka Xikwembu ku dzuneka. Eka hina ku kwetsimisa vito ra Yehova leri kwetsimaka ni ku ri dzunisa i timhaka leti khathaleriwaka swinene. Tanihi leswi vito ra le henhla ri nga ta kwetsimisiwa hi Mfumo wa Xikwembu, dyondzo leyi ya Bibele ya Mfumo i xivumbeko lexikulu xa mahungu lamanene lawa hi ma twarisaka. Xana Psalma 145 ya ku nyikela ku voningeriwa ka moya emhakeni leyi? I yini leswi bulo ra hina leri seleke ra pisalema leyi ri nga ta swi paluxa? Hi tihi tindlela tin’wana leti yi kombisaka ha tona leswaku Yehova u lulameriwa hi ku dzunisiwa hi laha ku nga heriki?
Hi Tihi Tinhlamuselo Ta Wena Ke?
◻ Hi nga ri dzunisa njhani vito ra Yehova?
◻ Hi yini yin’wana ya mintirho leyi dzunekaka ya Xikwembu?
◻ Hi ta endla njhani loko hi byi tlangela vunene bya Yehova?
◻ Musa wa Xikwembu wu kombisiwe hi tindlela tihi?
[Xifaniso lexi nga eka tluka 12]
Xana wa va byela vana va wena hi swiendlo swa matimba swa Yehova, tanihi laha vatswari lava chavaka Xikwembu va endleke ha kona eIsrayele wa khale?
[Xifaniso lexi nga eka tluka 15]
Tanihi leswi yindlu leyi akiweke kahle yi dzunisaka muaki wa yona, mintirho ya ntumbuluko ya Yehova yi N’wi tisela ku dzuneka hi ndlela yoleyo