Ku Languta “Ku Rhula Ni Nsirhelelo” Leswi Tlulaka Swa Munhu

Ntiyiso hi leswaku, vanhu a va nge ku tisi ku rhula ka ntiyiso, loku nga heriki. Ha yini? Hikuva vanhu a hi vona vaherisi va ku rhula, hambi loko va hlanganyela eka nandzu wa matimu ya vona lama taleke hi ngati. Muherisi wa xiviri wa ku rhula u na matimba lamakulu ku tlula ya munhu. A ku na un’wana handle ka Sathana Diyavulosi, loyi a hlamuseriwaka eBibeleni tanihi “Mukanganyisi wa misava hinkwayo.”—Nhlavutelo 12:9.

BIBELE yi ri: “Misava hinkwayo yi le hansi ka matimba ya Lowo biha [Sathana].” (1 Yohane 5:19) Kutani ke, ku kuma ku rhula ka ntiyiso ni nsirhelelo lowu nga heriki swi fanele swi katsa ku herisiwa ka Sathana kun’we ni fambiselo ra misava leri a ri vumbeke ni leri handle ko kanakana a ri lawulaka. (Ringanisa Esaya 48:22; Varhoma 16:20.) Vanhu a va nge swi endli leswi.

Kutani ke, ku rhula ni nsirhelelo swi nga fikelerisiwa ku yini? Hi matimba ya Loyi nkarhi hinkwawo a nga ni matimba ku tlula Sathana. Xikwembu xa matimba Hinkwawo xi veke nkarhi lowu ntirho wa Sathana exikarhi ka vanhu wu nga ta hela ha wona. Loko nkarhi wolowo lowu pimiweke wu fika, “ndzoviso wa xitshuketa” wu ta wela misava leyi nga ematimbeni ya Sathana. (1 Vatesalonika 5:3-7, NW) Vumbhoni hinkwabyo byi yisa eka makumu ya leswaku leswi swi ta humelela ku nga ri khale.

Ku Rhula Ni Nsirhelelo Sweswi!

Kutani, ku vuriwa yini hi sweswi? Mpimo wa ku rhula ni nsirhelelo ka xiviri wa koteka hambi ku ri namunthla. Njhani? Ku nga ri hi ndlela leyi varhangeri vo tala va vukhongeri va ringeteke ha yona, hi ku katseka eka tipolitiki ta misava leyi, kambe, ematshan’wini ya sweswo, hi ku landzela milawu ni xitsundzuxo xa Xikwembu.

Xana xiendlo xo tano xi tisa ku rhula hakunene? Ina, xa ku tisa. Hi xikombiso, Timbhoni ta Yehova ti swi ringetile kutani ti kuma leswaku hakunene swa koteka ku kuma ku rhula ka xiviri kun’we ni nsirhelelo wo karhi. Ku landzela milawu ya Xikwembu hi laha swi kombisiweke ha kona eBibeleni swi endle leswaku va swi kota ku hlangana hi ku rhula ka ntiyiso tanihi nhlengeletano ya misava hinkwayo, ku nga khathariseki rixaka, tiko kumbe ririmi ra vona.—Psalma 133:1.

Hi ku yingisa nawu wa Xikwembu, hi ndlela yo fanekisela va ‘fule matlhari ya va swikomu naswona a va ha dyondzi nyimpi.’ (Esaya 2:2-4) Va titwa va sirheletekile erirhandzwini ra Xikwembu naswona va ni ntshembo wa leswaku vamakwavo va vona va moya va va khathalela. (Varhoma 8:28, 35-39; Vafilipiya 4:7) Loko u kanakana loko leswi ku ri ntiyiso, ha ku rhamba leswaku u va endzela eka yin’wana ya Tiholo ta vona ta Mfumo kutani u tivonela hi wexe.

Ku Rhula Ni Nsirhelelo Wa Misava Hinkwayo

Hambi swi ri tano, leswi a hi ku hetiseka ko hetelela ka xitshembiso xa Bibele xa ku rhula ka ntiyiso ni nsirhelelo. A swi tano! Ko va xikombiso xa leswi misava leyi a yi ta va xiswona loko un’wana ni un’wana a a landzela milawu ya Xikwembu. Ku nga ri khale xikombiso xexo xi ta hundzuka xi va ntiyiso.

Muapostola Pawulo u te: “Hi nkarhi lowu [lava nga tirheleki Xikwembu] va nge: ‘Ku rhula ni nsirhelelo!’ [va ehleketa leswaku eku heteleleni va tise ku rhula ni nsirhelelo hi ndlela ya vona vini] kutani ndzoviso wa xitshuketa wu ta wela ehenhla ka vona hi xihatla.” (1 Vatesalonika 5:3, NW) Xikwembu xi ta swi vona leswaku Sathana u hambukise vanhu hi laha ku ringaneke. Kutani ku ta va nkarhi wo n’wi herisa, kun’we ni fambiselo ra misava yo biha leyi nga ematimbeni ya yena. Kutani ku ta va nkarhi wa ku hetiseka ka vuprofeta bya Daniyele: “E mikarini ya tihosi leti, Šikwembu ša matilo ši ta pfuša ku fuma lo’ku nga taka ku nga onhaki, ni siku riṅwe, kutani v̌uhosi bya kona byi nga ka byi nga hunḍeli ka tiko riṅwana; ku ta seletela ni ku herisa ku fuma kuloku hikwako, kambe kona ku ta v̌a kona hi laha ku nga riki na makumu.”—Daniel 2:44.

Xana Xikwembu xi ta va xi nga kombisanga ku ehleketelela hi ku teka goza leri ke? Nikatsongo. Ndzoviso wa xitshuketa wu ta ta ehenhla ka lava wu va fanelaka ntsena, hi ku ya hi ku avanyisa ka Xikwembu, hi mimpimanyeto ya Xikwembu. Xana wa tshemba leswaku Muvumbi u ta endla xiboho xa vululami emhakeni leyi? Entiyisweni hi nga veka mhaka leyi hi ku tiyiseka emavokweni ya yena! Naswona vuyelo bya ntirho wa ku avanyisa ka yena byi ta va byihi? Xivuriso xi ri: “La’v̌a lulameke v̌a ta aka misav̌eni, lav̌o tenga v̌a ta siyiwa kona; kambe la’v̌o biha v̌a ta susiwa la misav̌eni.” (Swivuriso 2:21, 22) Xana ku na loyi a nga ta rilela ku lahlekeriwa hi lavo biha?

Loko lava herisaka ku rhula va susiwile emisaveni, ku rhula ka xiviri ni nsirhelelo swi ta va leswi taleke eka vanhu emisaveni hinkwayo ehansi ka ku fuma ka Mfumo wa Xikwembu lowu vuyerisaka. “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.” (Esaya 11:9) Xana wa xi tshemba xitshembiso lexi xa Bibele? Xana wa tiyiseka leswaku swilo leswi swi ta humelela ku nga ri khale? Loko u ri ni ku kanakana ko karhi, hi ku khutaza leswaku u ya emahlweni u kambisisa mhaka leyi. Entiyisweni, ndlela ya Xikwembu i ndlela yi ri yoxe leyi munhu a nga fikelelaka eka pakani leyi a yi navelaka ya ku rhula ka xiviri ni nsirhelelo wa ntiyiso ha yona.

[Swifaniso leswi nga eka tluka 8]

Vanhu va Yehova va tiphina hi ku rhula ka ntiyiso ni mpimo wo karhi wa nsirhelelo namuntlha