Yehovha—Xikwembu Lexi Dyondzisaka
“Hinkwavo va ta dyondzisiwa hi Xikwembu.”—YOHANE 6:45.
1. Xana Yesu u endla yini sweswi eKapernawume?
YESU KRESTE wa ha ku endla masingita naswona sweswi u voniwa a ri karhi a dyondzisa esinagogeni ra le Kapernawume, ekusuhi ni Lwandle ra Galeliya. (Yohane 6:1-21, 59) Vo tala va kombisa ku nga pfumeli, loko a ku: “Ndzi xikile hi le tilweni.” Va n’unun’uta va ku: “Xana loyi a hi yena Yesu n’wana Yosefa, loyi hi tivaka tata wa yena ni mana wa yena ke? Kutani sweswi ú vurisa ku yini, loko a ku: ‘Ndzi xikile hi le tilweni?’” (Yohane 6:38, 42) Loko a va tshinya, Yesu u ri: “A ku na munhu la nga taka ka mina, loko a nga kokeriwi ka mina hi Tatana la ndzi rhumeke, kutani mina ndzi ta n’wi pfuxa hi siku ra makumu.”—Yohane 6:44.
2. Hi xihi xisekelo lexi nga kona xo pfumela eka xitshembiso xa Yesu mayelana ni ku pfuka ka vafi?
2 Mawaku xitshembiso lexinene swonghasi—ku pfuxiwa hi siku ra makumu, loko Mfumo wa Xikwembu wu fuma! Hi nga xi tshemba xitshembiso lexi hikuva xi tiyisiwile hi Tatana, Yehovha Xikwembu. (Yobo 14:13-15; Esaya 26:19) Hakunene, Yehovha la dyondzisaka leswaku vafi va ta pfuka, i “mudyondzisi lonkulu ku tlula hinkwavo.” (Yobo 36:22, Today’s English Version) Loko a yisa nyingiso eka dyondzo ya Tatana, Yesu u ri: “Ku tsariwile etibukwini ta vaprofeta, va ku: ‘Hinkwavo va ta dyondzisiwa hi Xikwembu.’”—Yohane 6:45.
3. Hi swihi swivutiso leswi hi nga ta swi kambisisa?
3 Entiyisweni, ku ta va lunghelo ku va exikarhi ka lava muprofeta Esaya a tsaleke ha vona a ku: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova.” (Esaya 54:13) Xana hi nga va vona? I vamani lava a va fana ni vana va xinuna eka yena naswona va kumeke tidyondzo ta yena? Hi tihi tidyondzo ta nkoka ta Yehovha leti hi faneleke hi ti tiva ni ku hanya hi ku pfumelelana na tona leswaku hi kuma nkateko wa yena? Xana Yehovha a a dyondzisa njhani enkarhini lowu hundzeke, naswona xana wa ha dyondzisa hi ndlela leyi fanaka ni namuntlha? Leswi i swivutiso leswi hi nga ta swi kambisisa.
Tatana, Mudyondzisi, Nuna
4. I vamani eka vana va Yehovha, lava va veke vo sungula ku kuma tidyondzo ta yena?
4 Yehovha u ve Tatana ni Mudyondzisi ro sungula loko a vumbe N’wana wa yena la velekiweke a ri yexe, ku nga Yesu a nga si va munhu wa nyama. U vuriwa “Rito” hikuva i Muvulavuleri-nkulu wa Yehovha. (Yohane 1:1, 14; 3:16) Rito ri tirhe “[etlhelo ka Tatana] tanihi mutatisi wa yena,” naswona ri dyondze swo tala eka dyondzo ya Tata wa rona. (Swivuriso 8:22, 30) Entiyisweni, u ve Muyimeri kumbe xitirho, lexi Tatana a xi tirhiseke ku vumba swilo leswin’wana hinkwaswo, ku katsa ni “v̌ana v̌a Šikwembu” va moya. Mawaku ndlela leyi va faneleke va swi tsakele ha yona ku dyondzisiwa hi Xikwembu! (Yobo 1:6; 2:1; 38:7; Vakolosa 1:15-17) Endzhakunyana, munhu wo sungula Adamu u vumbiwile. Na yena a a ri “n’wana wa Xikwembu,” naswona Bibele yi paluxa leswaku Yehovha u n’wi dyondzisile.—Luka 3:38; Genesa 2:7, 16, 17.
5. Hi rihi lunghelo ra risima leri lahliweke hi Adamu, kambe Yehovha u dyondzisa vamani, naswona ha yini?
5 Lexi khomisaka gome, hikwalaho ko hlawula ku nga yingisi, Adamu u lahle lunghelo ra ku ya emahlweni a ri n’wana wa Xikwembu. Hikwalaho, vana va yena a va nga to swipfuketana va kuma vuxaka byo va vana va Xikwembu, loko va velekiwa. Kambe, Yehovha u va dyondzisile vanhu lava nga hetisekangiki, lava a va lava ku kongomisiwa hi yena. Hi xikombiso, Nowa u tikombise a ri “l’a lulameke” loyi a “a famba ni Šikwembu [xa ntiyiso, NW],” xisweswo Yehovha u letele Nowa. (Genesa 6:9, 13–7:5) Hi ku yingisa ka yena, Abrahama u tikombise a ri “nakulobye wa Xikwembu,” hikwalaho na yena u dyondzisiwe hi Yehovha.—Yakobo 2:23; Genesa 12:1-4; 15:1-8; 22:1, 2.
6. I vamani lava Yehovha a va langutaka tanihi “vana” naswona a ri mudyondzisi wa muxaka muni eka vona?
6 Endzhakunyana, enkarhini wa Muxe, Yehovha u endle ntwanano wa vuxaka ni tiko ra Israyele. Hikwalaho, tiko rero ri ve vanhu va xona lava xi va hlawuleke naswona a ri langutiwa tanihi “ṅwana” wa xona. Xikwembu xi te: “Israel i ṅwana nga.” (Eksoda 4:22, 23; 19:3-6; Deteronoma 14:1, 2) Hikwalaho ka ntwanano wolowo wa vuxaka, Vaisrayele a va ta vula hi laha swi rhekhodiweke ha kona hi muprofeta Esaya: “Wena Yehova, u tata wa hina.” (Esaya 63:16) Yehovha u byarhe vutihlamuleri bya yena bya vutatana naswona hi rirhandzu u dyondzise vana va yena, Israyele. (Pisalema 71:17; Esaya 48:17, 18) Entiyisweni, loko va sungule ku ka va nga ha tshembeki, u va komberile hi tintswalo a ku: “Tlhelani, ṅwina v̌ana la’v̌a hambukeke.”—Yeremiya 3:14.
7. Xana Israyele a ri ri ni vuxaka byihi na Yehovha?
7 Hikwalaho ka ntwanano wa vuxaka na Israyele, Yehovha u tlhele a va Nuna wo fanekisela, wa tiko leri, naswona ri ve nsati wa yena wo fanekisela. Mayelana na yena muprofeta Esaya u tsarile: “Nuna wa wena, hi loyi a ku endleke, v̌ito ra yena i Yehova wa tinyimpi.” (Esaya 54:5; Yeremiya 31:32) Hambi leswi Yehovha a hetisiseke xiphemu xa yena hi ku tshembeka tanihi Nuna, tiko ra Israyele ri ve nsati la nga tshembekangiki. Yehovha u te: “Ku kotisa wansati l’a dyelelaka nakulobye hi ririmi, mi nḍi dyelele hi mukhuv̌a wolowo, ṅwina v̌a-yindlu ya Israel.” (Yeremiya 3:20) Yehovha u ye emahlweni a endla xikombelo eka vana va nsati wa yena wo pfumala ripfumelo; u hambete a va “Muleteri Lonkulu” wa vona.—Esaya 30:20, NW; 2 Tikronika 36:15.
8. Hambi leswi Israyele tanihi tiko a lahliweke hi Yehovha, hi wihi wansati wo fanekisela loyi a nga na yena?
8 Loko Israyele a ale N’wana wa xona, Yesu Kreste, a tlhela a N’wi dlaya eku heteleleni Xikwembu xi n’wi arile. Kutani tiko rolero ra Vayuda a ri nga ha ri nsati wo fanekisela eka xona, na yena a a nga ha ri Tatana ni Mudyondzisi, eka vana va yena lava hambukaka. (Matewu 23:37, 38) Hambi swi ri tano, Israyele o va nsati wo fanekisela. Muapostola Pawulo u tshahe Esaya 54:1, leyi vulavulaka hi “mhika” leyi nga faniki naswona yi tlhela yi hambana swinene ni “[wansati] l’a tekiweke,” tiko ra Israyele wa ntumbuluko. Pawulo u paluxa leswaku Vakreste lava totiweke i vana va “mhika,” leyi a yi vitanaka “Yerusalema wa le tilweni.” Wansati loyi wo fanekisela, a nga riki wa xiviri, u vumbiwa hi nhlengeletano ya Xikwembu ya le tilweni ya swivumbiwa swa moya.—Vagalatiya 4:26, 27.
9. (a) Xana Yesu a vulavula hi mani loko a vulavula hi leswaku ‘vana va wena va xinuna va ta dyondzisiwa hi Yehovha’? (b) Xana vanhu va va vana va xinuna va Xikwembu exisekelweni xihi?
9 Xisweswo, esinagogeni ya le Kapernawume, loko Yesu a tshahe vuprofeta bya Esaya lebyi nge: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova,” a vulavula hi lava nga ta va “v̌ana” va “Yerusalema wa le tilweni,” nhlengeletano ya le tilweni ya Xikwembu leyi fanaka ni wansati. Hi ku amukela tidyondzo ta muyimeri wa Xikwembu la taka hi le tilweni, Yesu Kreste, vayingiseri volavo va Vayuda a va ta va vana va wansati wa le tilweni wa Xikwembu, loyi khale a a ri mhika naswona va endla ‘tiko leri hlawuriweke,’ ‘Israyele wa Xikwembu’ wa moya. (1 Petro 2:9, 10; Vagalatiya 6:16) Loko a hlamusela lunghelo lerikulu leri Yesu a endleke leswaku va ri kuma, ra ku va vana va Xikwembu va moya, muapostola Yohane u te: “Ú tile ekaya ka yena, kambe varikwavo a va n’wi amukelanga. Hambiswiritano, hinkwavo lava nga n’wi amukela, lava nga pfumela eka vito ra yena, ú va nyikile matimba ya ku hundzuka vana va Xikwembu.”—Yohane 1:11, 12.
Tidyondzo Ta Nkoka Ta Yehovha
10. Endzhakunyana ka nxandzuko wa le Edeni, xana Yehovha u dyondzise yini malunghana ni ‘mbewu,’ naswona Mbewu yoleyo yi tikombe yi ri mani?
10 Yehovha, tanihi Tatana la nga ni rirhandzu, u tivisa vana va yena hi swikongomelo swa yena. Xisweswo, loko ntsumi leyi xandzukeke yi yenge mpatswa wo sungula wa vanhu leswaku va nga yingisi, Yehovha u va tivise leswi a nga ta swi endla hi ku hatlisa leswaku a hetisisa xikongomelo xa yena xo endla misava yi va paradeyisi. U vule leswaku u ta veka ku vengana exikarhi ka “nyoka ya khale,” leyi ku nga Sathana Diyavulosi, ni “wansati.” U tlhele a hlamusela leswaku ‘mbewu’ ya wansati yi ta vavisa Sathana swinene, “enhlokweni.” (Genesa 3:1-6, 15, ringanisa NW; Nhlavutelo 12:9; 20:9, 10.) Hi laha se hi swi xiyeke ha kona, wansati—loyi endzhakunyana a hlamuseriweke tanihi “Yerusalema wa le tilweni”—i nhlengeletano ya Xikwembu ya le tilweni ya swivumbiwa swa moya. Kambe i mani ‘mbewu’ ya yena? I N’wana wa Xikwembu, Yesu Kreste, loyi a rhumiweke a huma etilweni ni loyi eku heteleleni a nga ta herisa Sathana.—Vagalatiya 4:4; Vaheveru 2:14; 1 Yohane 3:8.
11, 12. Xana Yehovha u yi ndlandlamuxe njhani dyondzo ya yena ya nkoka malunghana ni “mbewu”?
11 Yehovha u ndlandlamuxe dyondzo leyi ya nkoka malunghana ni ‘mbewu’ loko a tshembise Abrahama a ku: “Nḍi ta ku katekisa kunene, nḍi anḍisa v̌atukulu v̌a wena ngopfu-ngopfu, v̌a ta kotisa tinyeleti ta le tilweni . . . Kutani matiko hikwawo ya misav̌a ma ta tinkhensa ha [mbewu, NW] ya wena.” (Genesa 22:17, 18) Yehovha u tirhise muapostola Pawulo ku hlamusela leswaku Yesu Kreste i Mbewu ya Abrahama leyi tshembisiweke, kambe ni leswaku ku na van’wana lava nga ta va xiphemu xa “mbewu” leyi. Pawulo u tsarile: “Loko mi ri va ka Kriste, swi vula leswaku mi [mbewu, NW] ya Abrahama, mi vadyandzhaka hikwalaho ka xitshembiso.”—Vagalatiya 3:16, 29.
12 Nakambe Yehovha u paluxe leswaku Kreste, Mbewu, u ta ta a huma enxaxamelweni wa vuhosi bya Yuda ni leswaku “v̌a matiko v̌a ta yingisela yena.” (Genesa 49:10) Malunghana na Hosi Davhida wa rixaka ra Yuda, Yehovha u tshembisile: “[Mbewu] [y]a yena [y]i ta v̌a le’[y]i nga heriki; šiluv̌elo ša yena ši ta tiya tani hi masiku ya matilo. [Mbewu] ya yena yi ta v̌a kona hi laha ku nga heriki. Šiluv̌elo ša yena ši ta v̌a kona e mahlweni ka mina tani hi dyambu.” (Pisalema 89:3, 4, 29, 36, ringanisa NW.) Loko ntsumi Gabriyele yi tivisa ta ku velekiwa ka Yesu, yi hlamusele leswaku n’wana a a ri Mufumi la hlawuriweke hi Xikwembu, Mbewu ya Davhida. Gabriyele u te: “Yena ú ta va nkulukumba, a vuriwa N’wana wa Loyi-a-nge-henhla-henhla; Hosi Xikwembu xi ta n’wi nyika xiluvelo xa Davhida tata wa yena. . . . Vuhosi bya yena byi nga ka byi nga vi na makumu.”—Luka 1:32, 33; Esaya 9:6, 7; Daniyele 7:13, 14.
13. Leswaku hi kuma nkateko wa Yehovha, xana hi fanele hi angula njhani etidyondzweni ta yena?
13 Leswaku hi kuma nkateko wa Yehovha, hi fanele ku tiva ni ku endla hi ku pfumelelana ni dyondzo leyi ya nkoka ya Mfumo wa Xikwembu. Hi fanele hi pfumela leswaku Yesu u te laha misaveni a huma etilweni, leswaku i Hosi leyi hlawuriweke ya Xikwembu—Mbewu ya vuhosi leyi nga ta langutela ku vuyeteriwa ka Paradeyisi emisaveni—ni leswaku u ta pfuxa vafi. (Luka 23:42, 43; Yohane 18:33-37) Le Kapernawume loko Yesu a vulavule hi ku pfuxiwa ka vafi, swi fanele swi ve erivaleni eka Vayuda leswaku a vulavula ntiyiso. Phela, mavhiki ma nga ri mangani emahlweninyana, kumbexana kwalaho eKapernawume, u pfuxe n’wana wa n’hwanyana wa malembe ya 12 hi vukhale, wa mulanguteri wa sinagoga! (Luka 8:49-56) Entiyisweni, na hina hi ni swivangelo leswi eneleke swo pfumela ni ku hanya hi ku pfumelelana ni dyondzo ya Yehovha leyi nyikaka ntshembo malunghana ni Mfumo wa yena!
14, 15. (a) Xana Mfumo wa Yehovha i wa nkoka ku fikela kwihi eka Yesu? (b) I yini lexi hi faneleke hi xi twisisa ni ku kota ku xi hlamusela mayelana ni Mfumo wa Yehovha?
14 Yesu u tirhise vutomi bya yena bya laha misaveni ku dyondzisa hi Mfumo wa Yehovha. U wu endle nhloko-mhaka ya vutirheli bya yena, naswona u letele valandzeri va yena leswaku va wu khongelela. (Matewu 6:9, 10; Luka 4:43) Vayuda va ntumbuluko a va ri enxaxamelweni wo va “vana va mfumo,” kambe hikwalaho ko pfumala ripfumelo, vo tala va vona va lahlekeriwe hi lunghelo rero. (Matewu 8:12; 21:43) Yesu u paluxe leswaku i “ntlhambinyana” ntsena lowu kumaka lunghelo ro va “vana va mfumo.” “Vana” lava va va “vadyandzhaka swin’we na Kriste” eMfun’weni wakwe wa le tilweni.—Luka 12:32; Matewu 13:38; Varhoma 8:14-17; Yakobo 2:5.
15 I vadyandzhaka vangani va mfumo lava Kreste a nga ta va tekela etilweni leswaku va ya fuma misava na yena? Hi ku ya hi Bibele, i 144 000 ntsena. (Yohane 14:2, 3; 2 Timotiya 2:12; Nhlavutelo 5:10; 14:1-3; 20:4) Kambe Yesu u vule leswaku u ni “tinyimpfu tin’wana,” leti nga ta va vafumiwa va laha misaveni va ku fuma ka Mfumo wolowo. Vona va ta tsakela rihanyo leri heleleke ni ku rhula loku nga heriki emisaveni ya paradeyisi. (Yohane 10:16; Pisalema 37:29; Nhlavutelo 21:3, 4) Hi fanele hi twisisa, hi tlhela hi kota ku hlamusela dyondzo ya Yehovha, mayelana ni Mfumo.
16. Hi yihi dyondzo ya nkoka ya Yehovha leyi hi faneleke hi yi tiva ni ku yi endla?
16 Muapostola Pawulo u boxe dyondzo yin’wana ya nkoka ya Yehovha. U te: “I Xikwembu lexi xi mi dyondziseke ku rhandzana.” (1 Vatesalonika 4:9) Leswaku hi tsakisa Yehovha hi fanele hi kombisa rirhandzu ro tano. Bibele yi ri, “Xikwembu i rirhandzu,” kutani hi fanele ku tekelela xikombiso xa xona xo kombisa rirhandzu. (1 Yohane 4:8; Vaefesa 5:1, 2) Lexi khomisaka gome, vanhu vo tala va tsandzeke hi laha ku hlomulaka mbilu ku dyondza ku rhandza vanhu-kulobye hi laha Xikwembu xi hi dyondzisaka ku endla ha kona. Ku vuriwa yini hi hina? Xana ha yi tirhisa dyondzo leyi ya Yehovha?
17. Xana i langutelo ra mani leri hi faneleke hi ri tekelela?
17 I swa nkoka leswaku hi amukela tidyondzo hinkwato ta Yehovha. Onge langutelo ra hina ri nga fana ni ra mupisalema wa le Bibeleni loyi a tsaleke a ku: “Yehova! Nḍi kombe tindlela ta wena, u nḍi dyonḍisa mikhuv̌a ya wena. Nḍi fambise ntiyisweni wa wena, u ri kari u nḍi dyonḍisa.” “Nḍi dyonḍise tifanelo ta wena. Nḍi dyonḍise, nḍi he ku twa lo’kunene, ni ku twisisa! . . . U nḍi dyonḍisa milawu ya wena!” (Pisalema 25:4, 5; 119:12, 66, 108) Loko marito ya wena ma fana ni lawa ya mupisalema, u nga va exikarhi ka ntshungu lowukulu lowu dyondzisiwaka hi Yehovha.
Ntshungu Lowukulu Wa Lava Dyondzisiweke
18. I yini leswi muprofeta Esaya a swi vhumbheke leswaku swi ta humelela enkarhini wa hina?
18 Muprofeta Esaya u vhumbhe leswi nga ta humelela enkarhini wa hina a ku: “E mikarini ya makumo, ku ta humelela leŝaku nṭhav̌a ya yindlu ya Israel yi v̌ekiwa e nhlohlorini ya tinṭhav̌a, . . . Matiko la’yo tala ma ta ta kona, ma ku: Tanani, hi ta tlhandlukela nṭhav̌eni ya Yehova, e ndlwini ya Šikwembu ša Yakobo; ši ta hi dyonḍisa tindlela ta šona.” (Esaya 2:2, 3, xiitaliki i xerhu; Mikiya 4:2.) I vamani vanhu lava lava dyondzisiwaka hi Yehovha?
19. I vamani lava katsiwaka namuntlha exikarhi ka lava dyondzisiwaka hi Yehovha?
19 Ku na van’wana handle ka lava nga ta fuma etilweni na Kreste. Hi laha swi boxiweke ha kona eku sunguleni, Yesu u vule leswaku u ni “tinyimpfu tin’wana”—vafumiwa va Mfumo va laha misaveni—ku engetela eka “ntlhambinyana” wa vadyandzhaka va Mfumo. (Yohane 10:16; Luka 12:32) “Ntshungu lowukulu” lowu ponaka ‘nhlomulo lowukulu’ i wa ntlawa wa tinyimpfu tin’wanana, naswona va kuma ku amukeriwa emahlweni ka Yehovha exisekelweni xa ripfumelo ra vona eka ngati leyi halatiweke ya Yesu. (Nhlavutelo 7:9, 14, ringanisa NW.) Hambi leswi tinyimpfu tin’wana ti nga katsiwiki hi ku kongoma exikarhi ka “vana” lava ku vulavuriwaka ha vona eka Esaya 54:13, va kuma nkateko wo dyondzisiwa hi Yehovha. Hikwalaho, va vitana Xikwembu tanihi “Tatana” hikuva xi ta va Kokwa wa vona hi “Tatana l’a nga riki na ku hela,” Yesu Kreste.—Matewu 6:9; Esaya 9:6.
Ndlela Leyi Yehovha A Dyondzisaka Ha Yona
20. Xana Yehovha u dyondzisa hi tindlela tihi?
20 Yehovha u dyondzisa hi tindlela to tala. Hi xikombiso, u dyondzisa hi ku tirhisa mintirho ya yena yo vumba, leyi humesaka vumbhoni bya vukona bya yena ni vutlharhi bya yena lebyikulu. (Yobo 12:7-9; Pisalema 19:1, 2; Varhoma 1:20) Ku engetela kwalaho, u dyondzisa hi mbulavurisano lowu kongomeke, hi laha a endleke ha kona loko a letela Yesu a nga si va munhu wa nyama. Hi ku fanana, eminkarhini yinharhu leyi rhekhodiweke, u vulavule hi ku kongoma a ri etilweni ni vanhu lava nga laha misaveni.—Matewu 3:17; 17:5; Yohane 12:28.
21. Hi yihi ntsumi leyi Yehovha a yi tirhisaka ngopfu tanihi muyimeri wa yena, kambe hi swi tivisa ku yini leswaku letin’wana na tona ti tirhisiwile?
21 Yehovha nakambe u tirhisa vayimeri lava nga tintsumi leswaku a dyondzisa, ku katsa ni Mativula ya yena, “Rito.” (Yohane 1:1-3) Hambi leswi Yehovha a a ta va a vulavule hi ku kongoma ni n’wana wa yena la hetisekeke, Adamu, entangeni wa Edeni, a swi kanakanisi leswaku u tirhise Yesu a nga si va munhu wa nyama ku N’wi vulavulela. (Genesa 2:16, 17) Yena kumbexana a a ri “nṭumi ya Šikwembu [xa ntiyiso] le’yi rangeleke mav̌andla ya Israel” naswona loyi malunghana na yena, Yehovha a leriseke a ku: “Yingisa rito ra yona.” (Eksoda 14:19; 23:20, 21) A swi kanakanisi leswaku Yesu la nga siki tswariwaka tanihi munhu wa nyama a a ri “hosi ya nyimpi ya Yehova” loyi a humeleleke eka Yoxuwa leswaku a n’wi tiyisa. (Yoxuwa 5:14, 15) Yehovha nakambe u tirhisa tintsumi ta yena tin’wana ku dyondzisa tidyondzo ta yena, to tanihi leti a ti tirhiseke ku nyikela Nawu wa yena eka Muxe.—Eksoda 20:1; Vagalatiya 3:19; Vaheveru 2:2, 3.
22. (a) I vamani lava Yehovha a va tirhiseke emisaveni leswaku va dyondzisa? (b) Hi yihi ndlela yo hlawuleka leyi Yehovha a letelaka vanhu ha yona namuntlha?
22 Ku engetela kwalaho, Yehovha Xikwembu u tirhisa vayimeri lava nga vanhu ku dyondzisa. Le Israyele vatswari a va fanele va dyondzisa vana va vona; vaprofeta, vaprista, tihosana ni Valevhi a va fanele va dyondzisa tiko, Nawu wa Yehovha. (Deteronoma 11:18-21; 1 Samuwele 12:20-25; 2 Tikronika 17:7-9) Yesu a ri Muvulavuleri lonkulu wa Xikwembu emisaveni. (Vaheveru 1:1, 2) Hakanyingi Yesu u vule leswaku leswi a swi dyondziseke a ku ri leswi a swi dyondzeke hi ku kongoma eka Tatana, kutani, entiyisweni vayingiseri va yena a va dyondzisiwa hi Yehovha. (Yohane 7:16; 8:28; 12:49; 14:9, 10) Yehovha u endle leswaku marito ya yena ma tsariwa, naswona esikwini ra hina, u dyondzisa vanhu ngopfu-ngopfu hi ku tirhisa Matsalwa lawa lama huhuteriweke.—Varhoma 15:4; 2 Timotiya 3:16.
23. Hi swihi swivutiso leswi nga ta kambisisiwa exihlokweni lexi landzelaka?
23 Hi hanya eminkarhini ya nkoka, tanihi leswi Matsalwa ma tshembisaka leswaku ‘exiphen’wini xa makumu xa masiku [lawa hi hanyaka eka wona] vanhu vo tala va ta dyondzisiwa tindlela ta Yehovha.’ (Esaya 2:2, 3, ringanisa NW.) Xana xiletelo lexi xi nyikeriwa hi ndlela yihi? Xana hi fanele hi endla yini leswaku hi pfuneka eka nongonoko lowu lowukulu wo dyondzisa wa Yehovha, lowu sweswi wu yaka emahlweni, ku katsa ni ku hlanganyela eka wona? Hi ta kambisisa swivutiso swoleswo exihlokweni lexi landzelaka.
A Wu Ta Hlamurisa Ku Yini?
◻ Xana Yehovha u ve Tatana, Mudyondzisi ni Nuna hi ndlela yihi?
◻ Xana Yehovha u dyondzisa yini mayelana ni ‘mbewu’?
◻ Hi yihi dyondzo ya nkoka ya Xikwembu leyi hi faneleke hi yi xiya?
◻ Xana Yehovha u dyondzisa hi ndlela yihi?
[Xifaniso lexi nga eka tluka 10]
Ku pfuxa nhwanyana wa Yayiro ku nyikele xisekelo xo pfumela eka xitshembiso xa Yesu xa ku pfuka ka vafi