Ku Hlangavetana Ni Ntlhontlho Wa Vutshembeki Lebyi Tiyeke
“Ambalani munhu lontshwa la vumbiweke hi xifaniso xa Xikwembu, la tikombaka hi ku lulama ka yena ni ku hlawuleka loku nga ni ntiyiso.”—VAEFESA 4:24.
1. Ha yini hi kolota Yehovha Xikwembu vutshembeki lebyi tiyeke?
KU HLANGAVETANA ni ntlhontlho wa vutshembeki lebyi tiyeke ku ni swivumbeko swo tala. Xa nkoka swinene i ku hlangavetana ni ntlhontlho wa vutshembeki lebyi tiyeke eka Yehovha Xikwembu. Entiyisweni, hikwalaho ka leswi Yehovha a nga swona ni leswi a hi endleleke swona, na hikwalaho ka ku tinyiketela ka hina eka yena, hi n’wi kolota vutshembeki lebyi tiyeke. Xana hi byi kombisa njhani vutshembeki lebyi tiyeke eka Yehovha Xikwembu? Ndlela-nkulu leyi hi nga kombisaka ha yona i ku tshembeka eka misinya ya milawu ya Yehovha leyo lulama.
2, 3. Hi byihi vuxaka lebyi nga kona exikarhi ka vutshembeki lebyi tiyeke ni ku lulama?
2 Leswaku hi hlangavetana ni ntlhontlho wolowo, hi fanele hi yingisa marito lama kumekaka eka 1 Petro 1:15, 16: “Leswi loyi a nga mi vitana a hlawulekeke, hlawulekani na n’wina emahanyelweni hinkwawo ya n’wina. Hikuva ku tsariwile va ku: ‘Hlawulekani, hikuva mina ndzi hlawulekile.’” Ku tshembeka hi laha ku tiyeke eka Yehovha Xikwembu ku ta hi endla leswaku hi n’wi yingisa minkarhi hinkwayo, hi endla mianakanyo, marito ni swiendlo swa hina swi twanana ni ku rhandza ka yena loko kwetsima. Swi vula ku hlayisa ripfalo lerinene, hi laha hi lerisiwaka ha kona eka 1 Timotiya 1:3-5: “Kasi, laha xitsundzuxo xa hina xi kongomeke kona [hi leswaku ku tshikiwa ku dyondzisa tidyondzo tin’wana kumbe ku nyikela nyingiso eka mintsheketo ya mavunwa], i ku pfuxa rirhandzu leri humaka embilwini leyo tenga ni le ripfalweni lerinene, ni le ku pfumeleni ka xiviri.” I ntiyiso, a hi hetisekanga, kambe hi fanele hi ringeta ku endla hi laha hi nga kotaka ha kona, a hi swona ke?
3 Ku tshembeka hi laha ku tiyeke eka Yehovha swi ta hi pfuna leswaku hi nga yi landzuli misinya ya milawu yo lulama, hikwalaho ka vutianakanyi. Hakunene, ku tshembeka hi laha ku tiyeke swi ta hi endla leswaku hi nga vi munhu un’wana endzeni, ehandle hi va un’wana. Ku tshembeka loku tiyeke hi loku mupisalema a ri na kona emianakanyweni loko a yimbelele a ku: “Oho Yehova, nḍi dyonḍise ndlela ya wena! Nḍi ta famba e ku ṭhembekeni ka wena. Byisa mbilu ya nga e ku tšhav̌a v̌ito ra wena.” (Pisalema 86:11) Vutshembeki lebyi tiyeke byi katsa leswi swi hlamuseriweke kahle tanihi ku “titsongahatela milawu leyi munhu a nga sindzisiwiki ku yi landzelela.”
4, 5. Ku tshembeka hi laha ku tiyeke ku ta hi endla leswaku hi papalata yini?
4 Ku tshembeka loku tiyeke eka Yehovha Xikwembu ku ta hi endla leswaku hi papalata ku endla swilo leswi nga ta tisa xisandzu evitweni ra yena ni le Mfun’weni wa yena. Hi xikombiso, Vakreste vambirhi va tshame va hambana lerova va kala va yisana ehubyeni ya nawu ya misava, ku nga nchumu lowu nga fanelangiki. Muavanyisi u vutisile, ‘Xana havambirhi ka n’wina mi Timbhoni ta Yehovha?’ Entiyisweni a a nga twisisi leswaku a va ta lava yini ehubyeni. Vona xisandzu xonghasi! Vutshembeki lebyi tiyeke eka Yehovha Xikwembu a byi ta va byi susumetele vamakwerhu volavo ku yingisa ndzayo ya muapostola Pawulo leyi nge: “Mhaka ya kona hileswaku ku mangalelana ka n’wina ku komba ku hluleka ka n’wina nisweswi. Ematshan’wini ya swona, hikwalaho ka yini mi nga pfumeli ku dyoheriwa, ha yini mi nga pfumeli ku dyeleriwa xana?” (1 Vakorinto 6:7) Hakunene, swa antswa munhu a lahlekeriwa hi swilo swakwe hi ku kombisa vutshembeki lebyi tiyeke eka Yehovha Xikwembu ematshan’weni ya ku tisa xisandzu evitweni ra Yehovha ni nhlengeletano ya yena.
5 Vutshembeki lebyi tiyeke eka Yehovha Xikwembu byi tlhela byi katsa ku nga pfumeleli ku chava munhu. “Ku tšhav̌a v̌anhu ka riya ntlhamu, kambe l’a ṭhembaka Yehova o le ku tlakukeni.” (Swivuriso 29:25) Xisweswo, a hi landzuli loko hi langutane ni nxaniso, kambe hi landzelela xikombiso lexi vekiweke hi Timbhoni ta Yehovha le khale ka Soviet Union, eMalawi, le Etiyopiya ni le ka matiko man’wana yo tala.
6. Vutshembeki lebyi tiyeke byi ta hi endla leswaku hi papalata ku tihlanganisa na vamani?
6 Loko hi tshembeka hi laha ku tiyeke eka Yehovha Xikwembu, hi ta papalata ku endla vunghana ni vanhu hinkwavo lava nga valala va yena. Hi yona mhaka leyi mudyondzisiwa Yakobo a tsaleke a ku: “Vanhu ndzi n’wina lava nga tshembekiki, xana a mi swi tivi leswaku ku rhandza swa misava swi vula ku lwa na Xikwembu xana? Hikokwalaho, loyi a tinyiketaka eku rhandzeni ka swa misava, ú tiendla nala wa Xikwembu.” (Yakobo 4:4) Hi lava ku va ni vutshembeki lebyi tiyeke lebyi Hosi Davhida a nyikeleke vumbhoni ha byona loko a te: “Yehova, a nḍi v̌a v̌enganga la’v̌a ku v̌engaka šana? A nḍi karihelanga la’v̌a ku pfukelaka šana? Nḍi v̌a v̌engile ha kunene; ka mina i v̌alala.” (Pisalema 139:21, 22) A hi lavi ku tihlanganisa ni vadyohi vahi ni vahi lava dyohaka hi vomu, hikuva a hi fani na vona. Xana vutshembeki lebyi tiyeke eka Xikwembu a byi nge hi endli hi papalata ku tihlanganisa ni valala vahi ni vahi vo tano, va Yehovha, hambi i munhu hi xiviri kumbe hi ku tirhisa thelevhixini?
Ku Lwela Yehovha
7. Vutshembeki lebyi tiyeke byi ta hi pfuna leswaku hi endla yini malunghana na Yehovha, naswona xana Elihu u swi endlise ku yini leswi?
7 Vutshembeki lebyi tiyeke byi ta hi susumetela ku lwela Yehovha Xikwembu. Wa nga vona xikombiso lexinene lexi Elihu a nga xona emhakeni leyi! Yobo 32:2, 3 ya hi byela: “Kav̌a loko ku pfura v̌ukari bya Elihu, . . . V̌ukari bya yena byi pfurela Yobo hikuv̌a a a tiv̌ekile l’a lulameke e mahlweni ka Šikwembu. V̌ukari bya yena byi pfurela ni v̌anakulobye la’v̌anharu hikuv̌a a v̌a pfumarile ŝo hlamula, hambi ŝi ri tano, a v̌a kaneta Yobo.” Eka Yobo tindzima 32 ku ya ka 37, Elihu u lwele Yehovha. Hi xikombiso, u te: “Wa nga nḍi rulela mbilu ŝiṭongo, nḍi ta ku ṭunḍuša, hikuv̌a nḍa ha ri ni leši nḍi nga ši v̌ulelaka Šikwembu. . . . Nḍi ta v̌eka L’a lulameke e muv̌umbi wa mina. . . . A ši fulareli la’v̌o lulama.”—Yobo 36:2-7.
8. Ha yini hi fanele hi lwela Yehovha?
8 Hikwalaho ka yini ku ri ni xilaveko xo lwela Yehovha? Namuntlha, Xikwembu xa hina Yehovha xa sandziwa hi tindlela to tala. Ku vuriwa leswaku a xi kona, leswaku i xiphemu xa Vunharhu-un’we, leswaku xi xanisa vanhu hi laha ku nga heriki etiheleni leti pfurhaka, leswaku hi ku hlala xi endla matshalatshala yo hundzula misava, leswaku a xi na mhaka ni vanhu, ni swin’wana ni swin’wana. Hi kombisa vutshembeki bya hina lebyi tiyeke eka yena hi ku lwela ni ku kombisa leswaku Yehovha u kona; leswaku u tlharihile, u lulamile, i wa matimba hinkwawo ni Xikwembu xa rirhandzu; leswaku eka yena xin’wana ni xin’wana xi ni nkarhi wa xona; ni leswaku loko nkarhi wa yena lowu faneleke wu fika, u ta herisa vubihi hinkwabyo a endla misava hinkwayo yi va paradeyisi. (Eklesiasta 3:1) Leswi swi lava leswaku hi tirhisa nkarhi wun’wana ni wun’wana leswaku hi nyikela vumbhoni hi vito ra Yehovha ni Mfumo wa yena.
Ku Tshembeka Hi Laha Ku Tiyeke Eka Nhlengeletano Ya Yehovha
9. Hi le timhakeni tihi leti eka tona van’wana va kombiseke ku pfumala ka vona vutshembeki lebyi tiyeke?
9 Sweswi hi nghena emhakeni ya ku tshembeka hi laha ku tiyeke eka nhlengeletano ya Yehovha leyi vonakaka. Hakunene, hi yi kolota vutshembeki lebyi tiyeke, ku katsa ni “nandza la tshembekaka, wo tlhariha,” loyi vandlha ra Vukreste ri wundliwaka hi ku tirhisa yena. (Matewu 24:45-47) A hi nge eka tibuku ta Watch Tower, ku humelela mhaka yin’wana leyi hi nga yi twisisiki kumbe leyi hi nga pfumelelaniki na yona hi nkarhi wolowo. Xana hi ta endla yini? Xana hi ta khunguvanyeka ivi hi siya nhlengeletano? Sweswo hi leswi van’wana va swi endleke loko The Watch Tower, malembe yo tala lama hundzeke, yi vule leswaku ntwanano lowuntshwa i wa lava hanyaka hi nkarhi wa Gidi ra Malembe. Van’wana va khunguvanyisiwe hi leswi The Watchtower yi tshameke yi swi vula emhakeni ya vukala-tlhelo. Loko lava khunguvanyisiweke hi timhaka leti a va tshembekile enhlengeletanweni ni le ka vamakwavo va vona, a va fanele va yimele Yehovha leswaku a va vekela timhaka leti erivaleni, ku nga leswi a swi endleke hi nkarhi wa yena lowu faneleke. Xisweswo, vutshembeki lebyi tiyeke byi katsa ku rindza, hi ku lehisa mbilu, ku kondza nandza lowo tshembeka, wa vutlhari a humesa ku twisisa loku engetelekeke.
10. Ku tshembeka hi laha ku tiyeke ku ta hi endla leswaku hi papalata ku lava ku tiva yini?
10 Vutshembeki lebyi tiyeke eka nhlengeletano leyi vonakaka ya Yehovha nakambe swi vula ku papalata vagwinehi. Vakreste lava tshembekaka hi laha ku tiyeke a va nge swi naveli ku tiva swo karhi malunghana ni leswi vanhu volavo va swi vulaka. I ntiyiso, lava tirhisiwaka hi Yehovha Xikwembu ku kongomisa ntirho wa yena emisaveni, a va hetisekanga. Kambe i yini lexi Rito ra Xikwembu ri hi byelaka leswaku hi xi endla? Xana ri hi byela ku sukela nhlengeletano ya Xikwembu? E-e. Rirhandzu ra vumakwerhu ri fanele ri hi endla hi tshembeka hi laha ku tiyeke eka yona, naswona hi fanele hi ya emahlweni hi “rhandzan[a] swinene hi timbilu ta [hina] hinkwato.”—1 Petro 1:22.
Ku Tshembeka Hi Laha Ku Tiyeke Eka Vakulu Lava Tshembekaka
11. Ku tshembeka hi laha ku tiyeke swi ta hi pfuna leswaku hi tivonela eka mianakanyo yihi leyi hoxeke?
11 Loko ku vuriwa xo karhi kumbe ku endliwa xo karhi evandlheni, lexi swi hi nonon’hwelaka ku xi twisisa, ku tshembeka hi laha ku tiyeke ku ta hi endla leswaku hi nga hatliseli ku avanyisa naswona ku ta hi endla leswaku hi swi teka tanihi ndlela leyi va voneke ha yona. Xana a swi antswi ku languta timfanelo letinene ta vakulu lava vekiweke ni ta vapfumeri-kulobye lavan’wana, ematshan’weni yo languta swihoxo swa vona? Ina, hi fanele hi tilangutela eka mianakanyo yo tano yo homboloka, hikuva yi fambisana ni ku nga tshembeki! Ku tshembeka hi laha ku tiyeke ku ta tlhela ku hi pfuna ku yingisa nkongomiso wa Pawulo wa leswaku hi “nga tshuki [hi] onha van’wana emavito.”—Tito 3:1, 2.
12, 13. Hi yihi mintlhontlho leyi vakulu va bohekaka ku langutana na yona?
12 Ku tshembeka hi laha ku tiyeke ku tisa mintlhontlho yin’wana eka vakulu. Wun’wana wa mintlhontlho leyi i mhaka ya ku va ni xihundla. Xirho xa vandlha xi nga ha tiphofula eka nkulu. Ku tshembeka hi laha ku tiyeke eka munhu yoloye, swi ta endla nkulu leswaku a papalata ku tlula nsinya wa nawu wa ku va ni xihundla. U ta yingisa ndzayo leyi nga eka Swivuriso 25:9: “U nga boši makungu ya uṅwana.” Leswi swi vula ku nga ma paluxi ni le ka nsati wa yena n’wini!
13 Vakulu nakambe va ni miringo yin’wana ya vutshembeki lebyi tiyeke leyi va faneleke va hlangavetana na yona. Xana va ta lava ku tsakisa vanhu, kumbe hi xivindzi na hi musa va ta pfuna lava lavaka ku ololoxiwa, hambiloko va ri maxaka ya xiviri kumbe vanghana va le kusuhi? Ku tshembeka hi laha ku tiyeke enhlengeletanweni ya Yehovha, swi ta endla leswaku lava va nga vakulu va ringeta ku pfuna munhu wihi na wihi la lavaka mpfuno wa moya. (Vagalatiya 6:1, 2) Hambileswi hi nga ta va hi ri na musa, ku tshembeka hi laha ku tiyeke ku ta hi endla hi kongoma loko hi vulavula ni vakulu-kulobye, hi laha Pawulo a vulavuleke ha kona na muapostola Petro, hi ku kongoma. (Vagalatiya 2:11-14) Hi hala tlhelo, ku laveka leswaku valanguteri va va ni vukheta, hikuva va nga ha endla swihoxo kumbe va va ni xihlawuhlawu kumbe hi ndlela yo karhi va tirhisa vulawuri bya vona hi ndlela yo biha, kutani va endla leswaku lava va nga ehansi ka vona, swi va nonon’hwela ku tshembeka hi laha ku tiyeke enhlengeletanweni ya Xikwembu.—Vafilipiya 4:5.
14, 15. Hi swihi swilo leswi nga ha ringaka vutshembeki bya swirho swa vandlha?
14 Ku ni swivumbeko swin’wana emhakeni ya ku hlangavetana ni ntlhontlho wa vutshembeki lebyi tiyeke evandlheni ni le ka vakulu va rona. Loko ku ri ni swiyimo leswi nonon’hwaka evandlheni, sweswo swi hi nyika nkarhi wo kombisa vutshembeki lebyi tiyeke eka Yehovha ni le ka lava n’wi yimelaka. (Vona Xihondzo xo Rindza xa June 15, 1987, matluka 15-17.) Loko ku ve ni ku susiwa, vutshembeki lebyi tiyeke byi lava leswaku hi seketela vakulu, hi nga ringeti ku vhumbha loko ku ri ku a ku ri malunghana ni leswaku swivangelo swo teka goza leri a swi enerile kumbe e-e.
15 Vutshembeki lebyi tiyeke evandlheni nakambe byi lava leswaku hi seketela minhlangano hinkwayo ya ntlhanu ya vhiki na vhiki hi laha swiyimo swa hina swi hi pfumelelaka ha kona ni hi laha hi kotaka ha kona. Ku tshembeka hi laha ku tiyeke ku lava leswaku hi nga hlanganyeli ntsena nkarhi na nkarhi kambe hi tlhela hi yi lunghiselela ni ku hlamula hi ndlela leyi akaka loko nkarhi wu pfumela.—Vaheveru 10:24, 25.
Ku Tshembeka Hi Laha Ku Tiyeke eVukatini
16, 17. I mintlhontlho yihi ya vutshembeki lebyi tiyeke leyi Vakreste lava ngheneleke vukati va faneleke va langutana na yona?
16 I mani un’wana loyi hi n’wi kolotaka vutshembeki lebyi tiyeke? Loko hi nghenele vukati, hikwalaho ka swiboho swa hina swa vukati, hi fanele hi hetisisa xilaveko xo tshembeka hi laha ku tiyeke eka munghana wa hina wa vukati. Ku tshembeka hi laha ku tiyeke eka vanghana va hina va vukati swi ta hi endla hi papalata xihoxo xo tiendla lonene eka vavasati kumbe vavanuna van’wana ku tlula leswi hi nga xiswona eka nsati kumbe nuna wa hina. Nakambe, ku tshembeka hi laha ku tiyeke eka munghana ku hi endla leswaku hi nga paluxi ku tsana kumbe swihoxo swa munghana wa hina eka van’wana. Swa olova swinene ku titshandza eka van’wana ku tlula ku tirha hi matimba leswaku hi pfula tindlela to vulavurisana ni munghana wa hina wa vukati, leswi hi faneleke hi swi endla, hi ku pfumelelana ni Nsiya wa Nawu. (Matewu 7:12) Entiyisweni, xiyimo xa vukati i ntlhontlho lowukulu eka vutshembeki bya hina lebyi tiyeke bya Vukreste.
17 Leswaku hi hlangavetana ni ntlhontlho lowu wa vutshembeki, a hi fanelanga ntsena hi papalata ku va ni nandzu lowukulu wa ku tikhoma loko biha kambe hi fanele hi tlhela hi lawula mianakanyo ya hina ni mintlhaveko ya hina. (Pisalema 19:14) Hi xikombiso, loko timbilu ta hina leti nga ni vukanganyisi, ti ri ni makwanga yo lava ku titsakisa ni nyanyuko, swa olova leswaku hi sungula ku lava nchumu lowu hi wu navelaka. Loko a khutaza hi vutshembeki evukatini, Hosi Solomoni u laya vavanuna hi ndlela yo fanekisela leswaku va ‘nwa mati lama humaka eswihlobyeni swa vona vini.’ (Swivuriso 5:15) Naswona Yesu u te: “Un’wana ni un’wana la langutaka wansati hi ku n’wi navela, u n’wi oswile embilwini ya yena.” (Matewu 5:28) Vavanuna lava tipetaka eka tibuku ta swifaniso swa vanhu lava nga ambalangiki va tiveka ekhombyeni ro yengiwa leswaku va endla vuoswi, xisweswo va dyohela vavasati va vona va tlhela va nga tshembeki eka vona. Hi ndlela leyi fanaka, wansati la katsekaka swinene eku hlaleleni ka mintlangu ya swiphemu leyi vulavulaka hi swiendlo swa vuoswi, a nga ha ringiwa leswaku a nga tshembeki eka nuna wa yena. Hambiswiritano, hi ku va lava tshembekaka hi laha ku tiyeke eka vanghana va hina, hi tiyisa xiboho xa vukati, naswona ha pfunana eka matshalatshala ya hina yo tsakisa Yehovha Xikwembu.
Swipfuneto Swo Hlayisa Vutshembeki Lebyi Tiyeke
18. I yini lexi hi faneleke hi xi twisisa loko hi ta kota ku tshembeka?
18 I yini lexi nga ta hi pfuna leswaku hi hlayisa vutshembeki lebyi tiyeke etindhawini leti ta mune: vutshembeki lebyi tiyeke eka Yehovha, enhlengeletanweni ya yena, evandlheni ni le ka munghana wa hina wa vukati? Xipfuneto xin’wana i ku twisisa leswaku ku hlayisa vutshembeki lebyi tiyeke swi fambisana swinene ni ku lweriwa ka vuhosi bya Yehovha. Ina, hi ku tshama hi tshembekile hi laha ku tiyeke hi kombisa leswaku hi languta Yehovha tanihi Hosi ya Vuako Hinkwabyo. Xisweswo hi nga kota ku tixixima ni ku va ni ntshembo wa vutomi lebyi nga heriki emisaveni leyintshwa ya Yehovha. Hi nga tipfuna leswaku hi tshama hi tshembekile hi laha ku tiyeke hi ku kambisisa swikombiso leswinene swa vutshembeki lebyi tiyeke, ku sukela eka Yehovha ku ya eka lava boxiweke eBibeleni ni le ka tibuku ta hina ta Watch Tower, ku katsa ni timhaka ta le ka Yearbook.
19. Ripfumelo ri hi pfunisa ku yini leswaku hi tshembeka?
19 Ripfumelo leri tiyeke eka Yehovha Xikwembu ni ku chava ku n’wi hlundzukisa swi ta hi pfuna leswaku hi hlangavetana ni ntlhontlho wo hlayisa vutshembeki lebyi tiyeke. Hi tiyisa ripfumelo ra hina eka Yehovha ni ku n’wi chava, hi ku hlaya Rito ra Xikwembu hi ku hiseka na hi ku hlanganyela evutirhelini bya Vukreste. Leswi swi ta hi endla leswaku hi fambisana ni ndzayo ya Pawulo leyi tsariweke eka Vaefesa 4:23, 24: “Mimoya ya n’wina ni miehleketo ya n’wina a swi hundzuke swi va leswintshwa. Ambalani munhu lontshwa la vumbiweke hi xifaniso xa Xikwembu, la tikombaka hi ku lulama ka yena ni ku hlawuleka loku nga ni ntiyiso.”
20. Ku tlula hinkwaswo, i mfanelo yihi leyi nga hi pfunaka leswaku hi tshembeka hi laha ku tiyeke eka Yehovha ni le ka van’wana hinkwavo lava hi va kolotaka vutshembeki lebyi tiyeke?
20 Ku tlangela timfanelo ta Yehovha swi hi pfuna leswaku hi va lava tshembekeke hi laha ku tiyeke. Ku tlula kwalaho, ku rhandza Tata wa hina wa le tilweni hi ndlela yo pfumala vutianakanyi ni ku nkhensa hinkwaswo leswi a hi endleleke swona, ku n’wi rhandza hi mbilu ni moya-xiviri ni mianakanyo ni matimba ya hina hinkwawo swi ta hi pfuna leswaku hi tshembeka hi laha ku tiyeke eka yena. Ku tlula kwalaho, ku va ni rirhandzu leri Yesu a vuleke leswaku ri ta endla valandzeri va yena va tiviwa hi rona, swi ta hi pfuna leswaku hi tshembeka hi laha ku tiyeke eka Vakreste hinkwavo evandlheni ni le ndyangwini wa hina. Hi marito man’wana, entiyisweni i mhaka yo va ni vutianakanyi kumbe ku pfumala vutianakanyi. Ku nga tshembeki swi vula ku va ni vutianakanyi. Ku tshembeka hi laha ku tiyeke swi vula ku pfumala vutianakanyi.—Marka 12:30, 31; Yohane 13:34, 35.
21. Xana mhaka ya ku hlangavetana ni ntlhontlho wo hlayisa vutshembeki lebyi tiyeke yi nga katsakanyiwa hi ndlela yihi?
21 Hi ku komisa: Ku tshembeka hi laha ku tiyeke i mfanelo leyikulu leyi kombisiwaka hi Yehovha Xikwembu, hi Yesu Kreste ni hi malandza hinkwawo ya ntiyiso ya Yehovha. Leswaku hi va ni vuxaka lebyinene na Yehovha Xikwembu, hi fanele hi hlangavetana ni ntlhontlho wo hlayisa vutshembeki lebyi tiyeke eka yena hi ku hanya hi ku landza swilaveko swa yena leswo lulama, hi papalata valala va yena ni hi ku lwela Yehovha hi ku nyikela vumbhoni hi ku tiyimisela na hi xitshuketa. Hi fanele hi tlhela hi hlangavetana ni ntlhontlho wa ku tshembeka hi laha ku tiyeke eka nhlengeletano ya Yehovha leyi vonakaka. Hi fanele hi tshembeka emavandlheni ya hina hi tlhela hi tshembeka eka vanghana va hina va vukati. Hi ku hlangavetana ni ntlhontlho wo hlayisa vutshembeki lebyi tiyeke, hi laha ku humelelaka, hi ta va hi hoxa xandla eku tlakuseni ka vuhosi bya Yehovha naswona hi ta va hi yima eka tlhelo ra yena eka mphikamakaneta leyi. Xisweswo hi ta kuma ku amukeriwa hi yena hi tlhela hi kuma hakelo ya vutomi lebyi nga heriki. Leswi muapostola Pawulo a swi vuleke malunghana ni ku tinyiketela eka Xikwembu swi nga ha tirha ni le ka hina mayelana ni ku hlangavetana ka hina ni ntlhontlho wo hlayisa vutshembeki lebyi tiyeke. I swa nkoka eka vutomi bya sweswi ni le ka lebyi nga ta ta.—Pisalema 18:25; 1 Timotiya 4:8.
A Wu Ta Hlamurisa Ku Yini?
◻ Xana hi nga hlangavetana ni ntlhontlho wo hlayisa vutshembeki lebyi tiyeke eka Xikwembu hi tindlela tihi?
◻ Xana ku laveka yini eka hina leswaku hi tshembeka hi laha ku tiyeke enhlengeletanweni ya Yehovha?
◻ Xana vakulu va nga hlangavetana njhani ni ntlhontlho wo hlayisa vutshembeki lebyi tiyeke?
◻ Hi wihi ntlhontlho lowu katsaka vutshembeki lebyi tiyeke lowu Vakreste lava ngheneleke vukati va faneleke va hlangavetana na wona?
◻ Hi tihi timfanelo leti nga ta hi pfuna leswaku hi hlangavetana ni ntlhontlho wo hlayisa vutshembeki lebyi tiyeke?
[Xifaniso lexi nga eka tluka 17]
Ku tshembeka hi laha ku tiyeke eka swirho swa vandlha swi ta sirheleta vakulu eku paluxeni ka timhaka ta xihundla
[Swifaniso leswi nga eka tluka 18]
Ku tshembeka hi laha ku tiyeke eka munghana wa vukati swi ta tiyisa xiboho xa vukati