Varisi Va Vakreste, ‘Pfulani Timbilu Ta N’wina Swinene’!

“YEHOVHA i Murisi wa mina. A ndzi nge pfumali nchumu.” Hi marito wolawo, Davhida u kombise ntshembo wa yena lowu heleleke eka Xikwembu xa yena. Yehovha u n’wi kongomise “emadyelweni lama nga ni byanyi byo tala” hi ndlela ya moya ni le “[tindhawini] to wisela leti kumaka mati kahle,” a n’wi kongomisa “emintileni ya ku lulama.” Loko a rhendzeriwe hi vakaneti, Davhida u kume nseketelo ni xikhutazo, leswi n’wi susumeteleke ku vula leswi eka Yehovha: “A ndzi chavi nchumu xo biha, hikuva u na mina.” Leswi a ri ni Murisi wo tano la Tlakukeke, Davhida a a tiyimiserile ku “tshama endlwini ya Yehovha hi masiku.”—Pisalema 23:1-6.

N’wana la nga tswariwa a ri swakwe wa Xikwembu, na yena u kombisiwe rirhandzu hi Yehovha naswona u wu kombise kahle nkhathalelo wa yena loko a tirhisana ni vadyondzisiwa va yena hi nkarhi wa riendzo ra yena ra xinkarhana emisaveni. Hikokwalaho Matsalwa ma n’wi vula “murisi lonene” ni “murisi lonkulu.”—Yohane 10:11; Vaheveru 13:20; 1 Petro 5:2-4.

Yehovha na Yesu Kreste va hambeta va risa lava va va rhandzaka. Xiphemu xin’wana xa vurisi bya vona xi endliwa hi varisi lava nga ehansi ka vona, lava nga kona evandlheni. Pawulo u vulavule hi varisi volavo loko a te: “Nyikelani nyingiso eka n’wina vini ni le ka ntlhambi hinkwawo, lowu moya lowo kwetsima wu mi vekeke ku va valanguteri va wona, ku risa vandlha ra Xikwembu, leri xi ri xaveke hi ngati ya N’wana wa xona.”—Mintirho 20:28.

Ku risa ntlhambi hi ku ya hi ntila lowu vekiweke hi Yehovha na Kreste Yesu a hi matlangwana, kambe i swa nkoka swinene sweswi ku tlula rini na rini. Anakanya hi Timbhoni leti tlulaka miliyoni leti khuvuriweke exikarhi ka malembe manharhu lama hundzeke! Vanhu lava lavantshwa a va na malembe yo tala va ri vatirheli. Nakambe anakanya hi Timbhoni leti ta ha riki vana kumbe vana va kondlo-a-ndzi-dyi. Va lava nkhathalelo ku nga ri wa vatswari va vona ntsena kambe ni wa varisi va vandlha.

Hakunene Mukreste un’wana ni un’wana u langutane ni mintshikilelo ya misava, ku katsa ni ntshikilelo wa tintangha. Hinkwavo va fanele va lwisana ni nsusumeto wa matimba wo landzela ndlela ya misava ya vutianakanyi. Ematikweni man’wana, vahuweleri va Mfumo va nga ha hela matimba hikwalaho ka leswi rungula ra vona ri nga amukeriwiki. Vahuweleri vo tala va ni swiphiqo leswikulu swa mavabyi. Swiphiqo swa timali swi nga ha endla leswaku van’wana va nga ha rhangisi ku lava Mfumo. Ku vula ntiyiso, hinkwerhu ka hina—ku katsa ni lava nga ni malembe va ri entiyisweni—hi lava mpfuno naswona hi faneriwa hi ku pfuniwa hi varisi va rirhandzu.

Nsusumeto Lowu Faneleke

Vakreste va lembe-xidzana ro sungula va tsundzuxiwile: ‘Pfulani timbilu ta n’wina swinene’! (2 Vakorinto 6:11-13) Vakulu va Vakreste va endla kahle loko va landzela xitsundzuxo lexi loko va endla ntirho wa vona wa vurisi. Xana va nga swi endlisa ku yini leswi? Naswona ku vuriwa yini hi malandza ya vutirheli, lawa yo tala ya wona ma nga ta va varisi enkarhini lowu taka?

Leswaku vakulu va Vakreste va va nkateko entlhambini, a va fanelanga va teka xiavelo xa vona xi ri khwarha. Va tsundzuxiwa: “Risani ntlhambi wa Xikwembu lowu khathaleriwaka hi n’wina, ku nga ri hi ku sindzisiwa, kambe hi ku swi rhandza; ku nga ri hi ku rhandza mpindzulo wa vukanganyisi, kambe hi mapfundza.” (1 Petro 5:2) Hikwalaho vurisi lebyi humelelaka byi katsa ku tirha hi ku swi rhandza ni mapfundza yo pfuna van’wana. (Yohane 21:15-17) Swi vula ku vona swilaveko swa tinyimpfu ni ku angula hi xihatla. Swi vula ku kombisa timfanelo letinene ta Vukreste leti vuriwaka mihandzu ya moya wa Xikwembu loko u ri karhi u tirhisana ni van’wana.—Vagalatiya 5:22, 23.

Vurisi minkarhi yin’wana byi katsa ku endzela vamakwerhu emakaya ya vona.a Kambe varisi lava ‘pfulaka timbilu ta vona swinene’ va tiendla va kumeka. A va endli maendzo ya vurisi hi xiwelo ntsena. Va tirhisa nkarhi wun’wana ni wun’wana va risa van’wana entlhambini.

Ku Letela Van’wana Leswaku Va Va Varisi

Makwerhu un’wana ni un’wana ku nga khathariseki malembe ya yena, loyi “a [lwelaka] ku fikelela ntirho wa ku va mulanguteri, u navela ntirho lowunene.” (1 Timotiya 3:1) Malandza ya vutirheli yo tala ma kombise ku swi rhandza ka wona ku endla nhluvuko wo fanelekela malunghelo lama engetelekeke. Xisweswo hi ntsako, vakulu va pfuna vamakwerhu lava va navelaka ku teka goza leri ra nkoka ro “lwela ku fikelela ntirho wa ku va mulanguteri.” Leswi swi vula ku va letela leswaku va va varisi lava nga ta pfuna.

Hikwalaho ko yi namarhela swinene mimpimanyeto ya Xikwembu leyi tlakukeke, vandlha ra Yehovha ra Vukreste a ri si tshama ri tsanisiwa hi varisi va mavunwa lava fanaka ni lava hlamuseriweke eka Ezekiyele 34:2-6. Varisi lava a va nyenyetsa ematihlweni ya Yehovha naswona a swi fanerile. Ematshan’weni yo phamela ntlhambi a vo tiphamela vona vini. Va tsandzekile ku tiyisa ni ku hanyisa lava vabyaka, ku bohelela lava tshovekeke, kumbe ku vuyisa lava hambukeke kumbe lava lahlekeke. Leswi a va hanya bya mahlolwa ematshan’weni ya ku va varisi, a va tshikilela tinyimpfu. Tinyimpfu leti honisiweke a ti hangalakile, ti tsendzeleka ti nga ri na loyi a ti khathalelaka.—Yeremiya 23:1, 2; Nahume 3:18; Matewu 9:36.

Ku hambana ni varisi volavo lava nga tshembekangiki, varisi va Vakreste va landzela xikombiso xa Yehovha. Va pfuneta ku yisa tinyimpfu “emadyelweni lama nga ni byanyi byo tala” ni le “[tindhawini] to wisela leti kumaka mati kahle.” Va endla matshalatshala yo va kongomisa “emintileni ya ku lulama” hi ku va pfuna ku twisisa Rito ra Yehovha kahle ni ku ri tirhisa eka vona vini. Leswi va nga swi endla hilaha ku humelelaka hikuva va “fanelekela ku dyondzisa.”—1 Timotiya 3:2.

Hakanyingi vakulu va dyondzisa eplatifomo hi nkarhi wa minhlangano ya vandlha. Hambiswiritano, vakulu va tlhela va dyondzisa ni munhu ha un’we. Ina, van’wana va ni vuswikoti byo dyondzisa munhu un’we, kasi van’wana va ni vuswikoti byo nyikela tinkulumo. Kambe ku pfumaleka ka mpimo wo karhi wa vuswikoti eka mfanelo yin’wana ya ku dyondzisa a swi siveli munhu ku va mudyondzisi. Vakulu va dyondzisa etindhawini hinkwato leti va pfulekeleke, ku katsa ni le ka vurisi. Hi xikombiso, vurisi byin’wana byi endliwa hi ndlela leyi hleriweke eka maendzo lama hleriweke. Kambe vurisi byo tala byi nga tlhela byi endliwa na hi tindlela tin’wana, ku nga ndlela leyi vuyerisaka swinene.

I Varisi Ni Vadyondzisi Nkarhi Hinkwawo

Dokodela u lava vutivi ni ntokoto leswaku a ta kota ku endla ntirho wa yena. Kambe vavabyi va yena va swi tlangela loko a va komba musa, ntwela-vusiwana, nkhathalelo ni ku va tsakela hi mbilu hinkwayo. Timfanelo leti ti fanele ti va xiphemu xa vumunhu byakwe. Timfanelo leti fanaka ti fanele ti tlhela ti va xiphemu xa vumunhu bya mudyondzisi tlhelo murisi lonene siku ni siku. Mudyondzisi wa xiviri u ta tshama a swi lunghekerile ku dyondzisa lava nga kusuhi na yena loko swi fanela. Swivuriso 15:23 yi ri: “Rito leri fikeke hi nkarhi wa kona i rinene ngopfu!” “Nkarhi wa kona” ku nga ha va loko a vulavula eplatifomo, loko a chumayela hi yindlu ni yindlu kumbe loko a ri ni bulo eHolweni ya Mfumo kumbe eriqinghweni. Hilaha ku fanaka, murisi lonene u lwela ku kombisa timfanelo letinene, timfanelo to khathalela minkarhi hinkwayo, ku nga ri loko a endla maendzo ya vurisi ntsena. Loko a ‘pfula mbilu yakwe swinene’ u ta tirhisa nkarhi wun’wana ni wun’wana lowu kumekaka a risa tinyimpfu, a ti kombisa nkhathalelo lowu ti wu lavaka hi nkarhi wa kona. Leswi hi swona swi n’wi endlaka a rhandziwa hi tinyimpfu takwe.—Marka 10:43.

Wolfgang, loyi sweswi a nga nkulu, u tsundzuka riendzo ra xinghana leri endliweke endyangwini wa yena hi nandza wa vutirheli ni nsati wakwe. U ri: “Vana va hina a va tsakile hi nyingiso lowu va kombisiweke wona kun’we ni nkarhi lowunene lowu hi veke na wona. Va ha vulavula hi swona ni sweswi.” Ina, nandza loyi wa vutirheli u kombise leswaku wa khathala; a a ‘pfula mbilu ya yena swinene.’

Ndlela yin’wana yo ‘pfula mbilu ya wena swinene’ i ku endzela vavabyi, ku va rhumelela xipapilana xa xikhutazo kumbe ku va bela riqingho—xin’wana ni xin’wana lexi u nga xi endlaka u va kombisa leswaku wa khathala hi vona! Pfuna loko swi laveka. Loko va lava ku vulavula rhiya ndleve. Vulavula hi mintirho leyinene leyi akaka ya swa le tilweni ya vandlha ra ka n’wina ni ya man’wana. Va pfune ku languta eka vumundzuku lebyi vangamaka lebyi vekeriweke lava rhandzaka Xikwembu.—2 Vakorinto 4:16-18.

Ku Engetela Eka Ntirho Wa Vurisi

Malunghana ni xikongomelo xa vurisi, swi le rivaleni leswaku ku endla maendzo ya vurisi emakaya ya vamakwerhu, hambi leswi swi nga swa nkoka, i xiphemu xa leswi katsekaka. Murisi wa rirhandzu u ‘pfula mbilu ya yena swinene’ hi ku va la nghenekaka eka swiyimo hinkwaswo ni hi minkarhi hinkwayo. Vuxaka bya rirhandzu lebyi a byi hlakulelaka ni vamakwavo bya va tiyisekisa leswaku hi minkarhi ya khombo, a va fanelanga va chava nchumu xo biha, hi ku tiva leswaku makwavo wa vona la va rhandzaka, ku nga murisi la nga Mukreste, wa va khathalela.—Pisalema 23:4.

Ina, hinkwenu varisi va Vakreste ‘pfulani timbilu ta n’wina swinene.’ Kombisani rirhandzu ra xiviri eka vamakwenu—va khutazeni, va phyuphyiseni, va akeni hi tindlela hinkwato leti mi nga ti kotaka hi tlhelo ra moya. Va pfuneni va yima va tiyile eripfumelweni. (Vakolosa 1:23) Loko ti ri ni varisi va Vakreste lava ‘pfulaka timbilu ta vona swinene,’ tinyimpfu a ti nge pfumali nchumu. Ku fana na Davhida ti ta tiyimisela ku tshama endlwini ya Yehovha masiku ya tona hinkwawo. (Pisalema 23:1, 6) I yini swin’wana leswi murisi wa rirhandzu a nga swi lavaka?

[Nhlamuselo ya le hansi]

[Bokisi leri nga eka tluka 30]

Varisi Va Vakreste

• Va tirha hi matimba ni hi ku swi rhandza

• Va wundla ntlhambi va tlhela va wu khathalela

• Va pfuna van’wana ku endla nhluvuko wo va varisi

• Va endzela vavabyi va tlhela va va khathalela

• Va tshama va xalamukele ku pfuna vamakwavo minkarhi hinkwayo

[Swifaniso leswi nga eka tluka 31]

Hambi ku ri entirhweni wa nsimu, eminhlanganweni kumbe eminkhubyeni ya xinghana, vakulu va tshama va ri varisi