U Swi Vona Njhani Leswaku Munhu Wa Humelela?

XIHLAMUSELA-MARITO xin’wana xi ri munhu loyi a humelelaka hi loyi a nga ni “rifuwo ro tala, la amukelekaka kumbe loyi a dumeke swinene.” Xana leyi i nhlamuselo leyi heleleke? Xana rifuwo, ku amukeleka kumbe ku duma hi swona ntsena swi kombisaka leswaku munhu wa humelela? Loko u nga si hlamula, anakanya hi leswi: Yesu Kreste a nga kalanga a hlengeleta rifuwo ra swilo leswi vonakalaka loko a ha ri laha misaveni. Vanhu vo tala a va nga n’wi rhandzi; naswona vanhu lava tlakukeke va le nkarhini wa yena a va nga n’wi tekeli nhlokweni. Kambe Yesu a a ri munhu la humelelaka. Hikwalaho ka yini?

Loko a ha ri emisaveni, Yesu a a ‘fuwile eka Xikwembu.’ (Luka 12:21) Endzhaku ka ku pfuxiwa ka yena, Xikwembu xi n’wi nyike ku “vangama ni ku xiximiwa.” Yehovha u tlakuse N’wana wakwe a n’wi veka “exiyin’weni lexi tlakukeke kutani hi musa [a] n’wi nyika vito leri nga ehenhla ka mavito man’wana hinkwawo.” (Vaheveru 2:9; Vafilipiya 2:9) Ndlela leyi Yesu a hanyeke vutomi byakwe ha yona yi tsakise mbilu ya Yehovha. (Swivuriso 27:11) Hi nga vula leswaku u humelerile loko a ri laha misaveni hikuva u hetisise xikongomelo xa vukona byakwe. Yesu u endle ku rhandza ka Xikwembu a tlhela a endla leswaku vito ra xona ri dzuneka. Hikwalaho, Xikwembu xi endle Yesu a va ni rifuwo, a amukeleka ni ku va la tlakukeke hi ndlela leyi yi tlulaka swinene ya munhu wihi na wihi la nga vaka nghwazi eka ta dyondzo, eka swa tipolitiki kumbe eka ta mintlango. Yesu hakunene a a ri munhu la humeleleke swinene ku tlula vanhu hinkwavo lava tshameke va va kona emisaveni.

Vatswari lava va nga Vakreste va swi xiya leswaku loko vana va vona vo landzela minkondzo ya Kreste naswona va fuwa eka Xikwembu ku fana na Yesu, va ta kuma mikateko yo tala sweswi va tlhela va tsakela hakelo leyikulu swinene emafambiselweni ya swilo lama taka. A ku na yin’wana ndlela yo antswa leyi muntshwa a nga landzelaka minkondzo ya Kreste ha yona, ku tlula ku endla ntirho lowu Yesu a wu endleke—ku nga ku nghenela vutirheli bya nkarhi hinkwawo loko sweswo swi koteka.

Hambiswiritano, eka vanhu va mindhavuko yin’wana, mukhuva lowu tolovelekeke i wa leswaku vantshwa va nga byi ngheneli vutirheli bya nkarhi hinkwawo. Loko jaha ri heta xikolo, ku nga ha languteriwa leswaku ri kuma ntirho wa ku tihanyisa wa nkarhi hinkwawo, ri teka nsati ivi ri tshamiseka. Minkarhi yin’wana, vantshwa lava kumekaka eka tindhawu to tano hi xihoxo va papalata ku nghenela vutirheli bya nkarhi hinkwawo. (Swivuriso 3:27) Hikwalaho ka yini? Hikwalaho ka ntshikilelo lowu nga kona, va pfumelelana ni leswi vanhu va ndhavuko wa ka vona va swi languteleke. Leswi hi leswi swi endlekeke eka Robert.a

Loko Ndhavuko Wu Lwisana Ni Ripfalo

Robert u kurisiwe a ri Mbhoni ya Yehovha. Loko a ri emalembeni ya kondlo-a-ndzi-dyi, ndlela leyi a a tikhoma ha yona a yi nga ri kahle naswona vanghana lava a a va hlawula a va nga ri vanene. Mana wa yena a a nga ha dyi byi rhelela loko a anakanya ha yena. Hiloko a kombela phayona, ku nga mutirheli wa nkarhi hinkwawo la nga Mbhoni ya Yehovha, leswaku ri n’wi khutaza. Robert u hlamusela leswi humeleleke endzhaku ka sweswo.

“Yi ndzi tsakisile ndlela leyi makwerhu loyi wa phayona a ndzi khathaleleke ha yona. Xikombiso xakwe lexinene xi ndzi endle ndzi lava ku endla vuphayona byi va ntirho-vutomi wa mina hi ku hatlisa loko ndzi heta xikolo. Hiloko mana wa mina a tlhela a karhateka nakambe—sweswi xivangelo xa ku karhateka ka yena a xi hambanile ni lexo sungula. Phela, hi ku ya hi ndhavuko wa ka hina, a swi na mhaka loko wanhwana o nghenela vuphayona hi ku hatlisa loko a heta xikolo, kambe jaha ku languteriwe leswaku ri sungula ri hlengeletanyana mazukwa, hi kona ri nga anakanyaka timhaka ta ku phayona.

“Ndzi dyondzele ntirho kutani ndzi pfula bindzu ra mina. Ku nga ri khale bindzu se a ku ri rona ntsena ri dumaka enhlokweni ya mina naswona se a ndzo tikoka ku ya emihlanganweni ni le nsin’wini. Ripfalo ra mina ri sungule ku ndzi karhata—a ndzi swi tiva leswaku a xi kona lexi ndzi sivelaka ku tirhela Yehovha hi xitalo. Hambiswiritano, a swi nga olovi ku tshika ku endla leswi vanhu van’wana a va swi languterile eka mina, kambe ndza tsaka leswi ndzi chupuleke. Sweswi ndzi tekile, mina ni nsati se hi ni malembe mambirhi hi ri karhi hi phayona. Sweswinyana ndza ha ku hlawuriwa ku va nandza wa vutirheli evandlheni. Sweswi ndzi nga vula ndzi tiyisile leswaku ndzi kuma ku eneriseka ka xiviri hi leswi ndzi tirhelaka Yehovha hi mbilu ya mina hinkwayo ni hi xitalo.”

Magazini lowu hi ku phindha-phindha wu khuthaze vantshwa leswaku va dyondzela ntirho kumbe ku dyondza vutshila byo karhi—loko va ha ri exikolweni loko swi koteka. Hi xikongomelo xihi? Leswaku va va swigwili? Doo! Xikongomelo-nkulu hi leswaku va kota ku tilangutela kahle loko va kurile ni leswaku va kota ku tirhela Yehovha hi xitalo hilaha va nga kotaka hakona, ngopfu-ngopfu evutirhelini bya nkarhi hinkwawo. Kambe majaha ni tintombhi tin’wana, va tikume va nghene hi nhloko emhakeni ya dyondzela ntirho-vutomi lerova ntirho wo chumayela va wu bakanyela etlhelo. Van’wana a va swi anakanyi ni ku nghenela vutirheli bya nkarhi hinkwawo. Hikwalaho ka yini?

Marito ya Robert ma hi nyika nhlamulo ya xivutiso lexi. Loko a hete ku dyondzela ntirho, Robert u sungule bindzu. Hi ku hatlise u tikume a khomeke swinene hi ntirho lowu nga n’wi pfuniki nchumu. Pakani yakwe a ku ri ku hlengeleta mazukwa yo vonaka. Kambe, xana evandlheni ra Vukreste kumbe ehandle ka rona, u kona munhu loyi a swi kotaka ku hlengeleta mazukwa yo nyawula hi ku hetiseka? Vakreste va fanele va lwela ku byarha vutihlamuleri bya vona hi tlhelo ra timali, va yi khathalela swinene mindzhwalo ya vona ya swa timali; hi hala tlhelo, va fanele va swi xiya leswaku eminkarhini leyi yi nga tshembekiki, a hi vangani vanhu lava va fikelelaka yinhla leyi eka yona va nga vulaka leswaku va hlayisekile hi tlhelo ra timali. Hi yona mhaka leyi xitshembiso xa Yesu lexi tsariweke eka Matewu 6:33 xi nga nchavelelo swinene eka Vakreste.

Robert u tsakile leswi a endleke xiboho xo landzela ku navela ka mbilu yakwe ku ri ni ku landzela leswi ndhavuko wa ka vona wu lavaka swona. Namuntlha wa tiphina hi ntirho-vutomi wakwe wa vutirheli bya nkarhi hinkwawo. Ina, vutirheli bya nkarhi hinkwawo i ntirho-vutomi lowu dzunekaka. Robert u dya byi rhelela hikuva u tirhela Yehovha ‘hi xitalo,’ hilaha a swi vekaka hakona.

Tirhisa Vutshila Bya Wena Hi Xitalo

Va tele vanhu lava nga ni vutshila exikarhi ka Timbhoni ta Yehovha. Van’wana va ni vuswikoti byo tirhisa byongo; kasi van’wana va tiva mintirho ya mavoko. Tinyiko leti hinkwato ti huma eka Yehovha, loyi a nyikaka “vanhu hinkwavo vutomi ni ku hefemula ni swilo hinkwaswo.” (Mintirho 17:25) Loko vutomi byi nga ri kona, tinyiko leti a ti nge pfuni nchumu.

Kutani, swa fanela leswaku hi tirhisa vutomi bya hina ku endla ntirho wa Yehovha. Sweswo hi leswi jaha rin’wana leri tlhariheke swinene ri boheke ku swi endla. U hanye hi lembe-xidzana ro sungula C.E. Leswi a a ri xirho xa ndyangu lowu dumeke swinene, u hete malembe ya yena ya vuntshwa a ri edorobeni leri tivekaka swinene ra Tarso, le Kilikiya. Hambileswi a a ri Muyuda hi ku velekiwa, u kume mfanelo ya ku va muaka-tiko wa le Rhoma hikwalaho ka tata wakwe. Leswi swi n’wi endle a va ni timfanelo ni malunghelo yo tala. Loko se a kurile, u nghene xikolo xa Nawu ni un’wana wa “vaprofesa” lava tivekaka swinene va nkarhi wolowo—ku nga Gamaliyele. Swi vonaka onge ku nga ri khale a a ta va ‘ni rifuwo, a amukeleka eka vanhu ni ku va la dumeke.’—Mintirho 21:39; 22:3, 27, 28.

Jaha leri a ku ri mani? Vito ra rona a ku ri Sawulo. Kambe Sawulo u hundzuke Mukreste kutani eku heteleleni a va muapostola Pawulo. U tshike tipakani takwe ta khale kutani a tiyimisela ku tirhela Yehovha vutomi byakwe hinkwabyo tanihi Mukreste. Pawulo a nga tiviwanga a a ri gqweta lerikulu ntsena, kambe u tiviwe a a ri muchumayeri la hisekaka wa mahungu lamanene. Endzhaku ko heta malembe ya kwalomu ka 30 a ri murhumiwa, Pawulo u tsalele vanghana vakwe va le Filipiya papila. Eka rona u boxe swilo leswi a swi endleke khale a nga si va Mukreste kutani a ku: “Hikwalaho ka [Yesu Kreste] ndzi pfumele ku lahlekeriwa hi swilo hinkwaswo naswona ndzi swi teka ku ri nhulu ya thyaka, leswaku ndzi kuma Kreste.” (Vafilipiya 3:8) Ina, Pawulo a nga tisolanga hi ndlela leyi a hanyeke vutomi byakwe ha yona!

Ku vuriwa yini hi ndzetelo lowu Pawulo a wu kumeke eka Gamaliyele? Xana ku kona laha a wu tirhiseke kona? Ina! Minkarhi yo tala u hoxe xandla eku “lweleni ni le ku simekeni ka mahungu lamanene hi nawu.” Kambe ntirho lowukulu wa Pawulo a wu ri wa ku chumayela mahungu lamanene—ku nga nchumu lowu a ta va a nga wu dyondzisiwanga.—Vafilipiya 1:7; Mintirho 26:24, 25.

Hilaha ku fanaka ni namuntlha, van’wana va swi kotile ku tirhisa tinyiko ni vuswikoti bya vona hambi ku ri dyondzo ya vona leswaku va seketela timhaka ta Mfumo. Hi xikombiso, Amy, u ni degree le yunivhesiti ya commerce ni ya nawu. Khale a a tirha kahle swinene etihofisini ta nawu, kambe namuntlha i mutirhi wa ku tirhandzela eka yin’wana ya tihofisi ta rhavi ta Sosayiti ya Watch Tower naswona a nga hakeriwi. Loko Amy a hlamusela vutomi byakwe bya sweswi, u ri: “Ndzi tivona ndzi hlawule ku endla nchumu lowunene ngopfu evuton’wini. . . . A ndzi swi naveli ku endla leswi endliwaka hi lava ndzi dyondzeke na vona eyunivhesiti. Ndza tinyungubyisa hi leswi ndzi hlawuleke ku swi endla. Leswi ndzi swi lavaka ndzi na swona—ku nga ku eneriseka ni ku tsaka evuton’wini, swin’we ni ntirho-vutomi lowu tsakisaka wu tlhela wu enerisa.”

Amy u hlawule ndlela leyi n’wi tiseleke ku rhula ka mianakanyo, ku eneriseka ni mikateko leyi humaka eka Yehovha. Handle ko kanakana, leswi hi swona leswi vatswari lava va nga Vakreste va swi navelelaka vana va vona!

Ku Humelela eVutirhelini Bya Vukreste

Ina, i swa nkoka ku va ni langutelo lerinene hi ku humelela loku munhu a vaka na kona evutirhelini bya Vukreste. Hi titwa hi tsakile loko hi ve ni nkarhi lowunene evutirhelini bya nsimu, hi fambise tibuku leti dyondzisaka Bibele kumbe loko hi ve ni bulo lerinene leri sekeriweke eBibeleni ni vini va mindyangu. Kambe loko hi nga tali ku kuma vanhu lava yingisaka, hi nga ha anakanya leswaku hi tlanga hi nkarhi wa hina. Kambe, tsundzuka leswaku yin’wana ya tinhlamuselo ta ku humelela i ku ‘amukeleka.’ I mani loyi hi lavaka ku amukeleka eka yena? Ina, i Yehovha. Leswi hi nga swi kuma hambi vanhu va ri yingisa rungula ra hina kumbe e-e. Yesu u dyondzise valandzeri vakwe dyondzo ya matimba emhakeni leyi.

Tsundzuka leswaku Yesu u rhume vachumayeri va Mfumo va 70 “emutini ni le ndhawini yin’wana ni yin’wana leyi [a] ta ya eka yona hi xiviri.” (Luka 10:1) A va fanele va chumayela emadorobeni ni le swimitanini va nga ri na yena Yesu. Lowu a ku ri nchumu lowuntshwa eka vona. Hi yona mhaka leyi Yesu a va nyikeke swileriso hi vukheta a nga si va rhuma. Loko va kuma “nakulorhi wa ku rhula,” a va fanele va n’wi chumayela hi rixaladza malunghana ni Mfumo. Kambe, loko va honisiwa a va fanele va ya emahlweni, va nga karhateki. Yesu u vule leswaku lava va alaka ku va yingisa kahle-kahle a va ala Yehovha hi byakwe.—Luka 10:4-7, 16.

Loko lava va 70 va hete xiavelo xa vona xo chumayela, va te va ta vikela Yesu “va tsakile, va ku: ‘Hosi, hambi ku ri madimona ma titsongahata eka hina loko hi tirhisa vito ra wena.’” (Luka 10:17) Handle ko kanakana, ku hlongola swivumbiwa swa moya leswi nga ni matimba, a ku ri mhaka leyi nyanyulaka eka vanhu lava va nga hetisekangiki! Hambiswiritano, Yesu u tsundzuxe vadyondzisiwa vakwe lava hisekaka a ku: “Swi nga tshuki swi mi tsakisa leswi, leswaku mimoya ya titsongahata eka n’wina, kambe tsakisisani hileswaku mavito ya n’wina ma tsariwile etilweni.” (Luka 10:20) A swi vuli swona leswaku minkarhi hinkwayo vanhu lava va 70 a va ta va na wona matimba yo hlongola madimona, kumbe leswaku minkarhi hinkwayo swilo a swi ta va fambela kahle ensin’wini. Kambe loko minkarhi hinkwayo va tshama va tshembekile, a va ta amukeleka eka Yehovha.

Xana U Ma Teka Ma Ri Ya Risima Malandza Ya Nkarhi Hinkwawo?

Jaha rin’wana ri tshame ri byela nkulu un’wana la nga Mukreste ri ku: “Loko ndzi heta xikolo ndzi ta ringeta ku kuma ntirho. Loko ndzi nga wu kumi, ndzi ta anakanya hi ku nghenela vutirheli byo karhi bya nkarhi hinkwawo.” Hambiswiritano, leri a hi rona langutelo leri vunyingi bya lava va nga evutirhelini bya vuphayona va nga na rona. Leswaku va va maphayona, van’wana va boheke ku bakanya lunghelo ro va ni ntirho-vutomi lowu nga ni mali swinene. Van’wana va bakanye lunghelo ro kuma dyondzo leyi tlakukeke swinene. Ku fana ni muapostola Pawulo, va boheke ku tshika swilo swo karhi, kambe hilaha Pawulo, Robert na Amy va endleke hakona, a va tisoli hi leswi va hlawuleke ku swi endla. Va ri tlangela swinene lunghelo ra ku tirhisa tinyiko ta vona leswaku va dzunisa Yehovha, loyi a faneriwaka hi leswinene ngopfu.

Hikwalaho ka swivangelo swo hambana-hambana Timbhoni ta Yehovha to tala, leti tshembekaka, a ti swi koti ku phayona. Kumbexana ti ni vutihlamuleri bya Matsalwa lebyi ti faneleke ti byi hetisisa. Kambe, loko ti tirhela Xikwembu hi ‘mbilu ya tona hinkwayo, moya-xiviri wa tona hinkwawo ni mianakanyo ya tona hinkwayo,’ Yehovha wa tsaka ha tona. (Matewu 22:37) Hambileswi tona hi toxe ti nga swi kotiki ku phayona, ta swi xiya leswaku lava va phayonaka va hlawule ntirho-vutomi lowunene.

Muapostola Pawulo u tsarile: “Tshikani ku titwananisa ni mafambiselo lawa ya swilo.” (Varhoma 12:2) Hi ku pfumelelana ni ndzayo ya Pawulo, hi nga tshuki hi pfumelela ndhavuko kumbe mimpimanyeto ya mafambiselo lawa ya swilo, leswaku yi lawula ndlela leyi hi anakanyaka ha yona. Hambi wa swi kota ku va phayona kumbe a wu swi koti, rhangisa ntirho wa Yehovha evuton’wini bya wena. U ta humelela ntsena loko u amukeleka eka Yehovha.

[Nhlamuselo ya le hansi]

[Xifaniso lexi nga eka tluka 19]

U nga khomeki hi ntirho lowu nga pfuniki nchumu