Xitiviso Xo Hlawuleka

EMAKUMU ka nhlangano wa lembe ni lembe wa Watch Tower Bible and Tract Society of Pennsylvania hi October 7, 2000, ku endliwe xitiviso xo hlawuleka hi mutshama-xitulu John E. Barr wa Huvo leyi Fumaka. Xitiviso lexi xi andlariwe khwatsi eka tinkulumo leti nyikeriweke eku sunguleni ka siku rero hi Theodore Jaracz na Daniel Sydlik.—Vona matluka 12-16 na 28-31 eka magazini lowu.

Makwerhu Barr loko a andlala mhaka ya nkoka swinene u te: “‘Hlonga ro tshembeka ni ro tlhariha’ swin’we ni Huvo ya rona leyi Fumaka va tamerisiwe swilo swa xiyimo xa le henhla ni leswi katsaka swo tala ku tlula leswi tamerisiweke mavandla ya swa nawu. Leswi tsariweke eka vumbiwa bya vandla ha rin’we, i timhaka leti ringaneke vuswikoti bya wona. Hambiswiritano, N’wini wa hina Yesu Kreste, u hlawule hlonga ro tshembeka leswaku ri langutela ‘leswi nga swa’ yena, kumbe timhaka ta Mfumo ta laha misaveni.”—Matewu 24:45-47.

Malunghana ni vandla ra Pennsylvania, Brother Barr u te: “Ku sukela loko ri hlanganisiwile hi 1884, Watch Tower Bible and Tract Society of Pennsylvania ri hoxe xandla swinene ematin’wini ya manguva lawa. Hambiswiritano, ro va xitirho xa le nawini lexi nga kona lexi tirhisiwaka hi ‘hlonga ro tshembeka ni ro tlhariha’ loko swi fanela.”

Etinkulumeni ta vona, Makwerhu Sydlik na Jaracz va hlamusele leswaku mhaka ya leswaku “hlonga ro tshembeka ni ro tlhariha” ri tamerisiwe hinkwaswo leswi nga swa Hosi emisaveni, a swi siveli ntlawa wa hlonga ku pfumelela vavanuna lava fanelekaka exikarhi ka “tinyimpfu tin’wana” ku khathalela vutihlamuleri byin’wana bya vulawuri bya ntirho. (Yohane 10:16) Naswona a ku na xivangelo xa Matsalwa lexi sindzisaka leswaku hinkwavo kumbe un’wana ni un’wana wa vakongomisi va mavandla ya swa nawu lowu tirhisiwaka hi Timbhoni ta Yehovha, u fanele ku va Mukreste la totiweke.

Makwerhu Barr u byele vayingiseri leswaku sweswinyana swirho swin’wana swa Huvo leyi Fumaka ya Timbhoni ta Yehovha leswi a swi tirha tanihi vakongomisi swi tshike hi ku tirhandzela ku va huvo ya vakongomisi eka mavandla hinkwawo lama tirhisiwaka hi “hlonga ro tshembeka ni ro tlhariha” eUnited States. Ku hlawuriwe vamakwerhu va tinyimpfu tin’wana lava nga ni vutihlamuleri leswaku va va siva.

Xiboho lexi i xinene hakunene. Xi pfumelela swirho swa Huvo leyi Fumaka ku heta nkarhi wo tala swi lunghiselela swakudya swa moya ni ku khathalela swilaveko swa moya swa vamakwerhu emisaveni hinkwayo.

Emaritweni yo gimeta, mutshama-xitulu u byele vayingiseri va yena lava tsakeke a ku: “Hambi leswi mintirho ya swa le nawini yo hambana-hambana ni yo lawula yi averiweke valanguteri lava nga ni ntokoto, . . . hinkwavo ka vona va tirha ehansi ka nkongomiso wa swa moya wa Huvo leyi Fumaka. . . . Hinkwerhu hi langute eka Yehovha hi mbilu hinkwayo leswaku a katekisa matshalatshala ya hina yo endla ku rhandza ka yena hi vun’we, leswaku ku fundzhiwa ku tlhela ku dzunisiwa vito ra yena lerikulu.”