Dokodela Wa Mahlo A Byala Mbewu
Xana matshalatshala ya dokodela wa mahlo le Lviv, eUkraine ma hlangana kwihi ni ku simekiwa ka vandlha leri vulavulaka Xirhaxiya ra Timbhoni ta Yehovha le Haifa, eIsrayele, kwalomu ka tikhilomitara ta 2 000, naswona u hundzaka matiko yo hlayanyana loko u ya kona? Leri i hungu leri kombisaka ntiyiso wa marito ya Bibele lama kumekaka eka Eklesiasta 11:6: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi.”
HUNGU ra hina ri sungula hi 1990 loko Ella, wansati la a ha riki muntshwa loyi a nga Muyuda hi ntumbuluko a ha tshama eLviv. Ella ni ndyangu wa ka vona a va tilunghiselela ku rhurhela eIsrayele. Emahlweninyana ka ku va va famba, Ella a a fanele a ya vonana ni dokodela wa mahlo loyi a ri Mbhoni ya Yehovha. Hi nkarhi wolowo ntirho wa Timbhoni ta Yehovha a wu yirisiwile eUkraine. Nilokoswiritano, dokodela wa mahlo u byele Ella hi ripfumelo ra yena leri sekeriweke eBibeleni. U n’wi hlamarisile hi ku vula leswaku Xikwembu xi ni vito. Sweswo swi endle leswaku Ella a lava ku tiva, naswona ku sunguriwe bulo lerinene ra Bibele.
Ella u tsakele bulo rolero lerova a kombela leswaku va va ni rin’wana bulo vhiki leri landzelaka ni vhiki leri tlhandlamaka rero. Ku tsakela ka yena a ku kula, kambe a ku ri ni xiphiqo. Nkarhi wa leswaku ndyangu lowu wu rhurhela eIsrayele a wu ri kusuhi swinene. Ella a ha ri ni swo tala swo swi dyondza! Leswaku a tirhisa nkarhi lowu saleke hi ndlela leyinene, u kombele leswaku a va ni dyondzo ya Bibele siku ni siku ku fikela loko a famba. Hambileswi Ella a nga yangiki emahlweni ni dyondzo ya yena loko a fika eIsrayele ro sungula, mbewu ya ntiyiso a yi mirile embilwini ya yena. Loko lembe ri hela, se a a sungule ku dyondza Bibele hi mapfundza.
Nyimpi yi tlhekekile ePersian Gulf, kutani Israyele ri hlaseriwa hi swibuluki leswi hoxiwaka leswi humaka le Iraq. Leyi a ku ri mhaka leyi un’wana ni un’wana a a bula ha yona. Siku rin’wana loko Ella a ri exitolo, u twe ndyangu wun’wana lowu a wu vulavula Xirhaxiya lowu a wa ha ku fika, wu ri karhi wu vulavula. Hambileswi a a ha dyondza Bibele, Ella u tshinelele ndyangu lowu kutani a wu rungulela hi ntshembo wa Bibele wa misava yo rhula. Hikwalaho ka sweswo kokwana wa xisati Galina; manana la vuriwaka Natasha; jaha leri vuriwaka Sasha (Ariel); ni n’wana wa vona wa xisati llana va hlanganyele edyondzweni ya Bibele leyi Ella a a yi fambisa.
Sasha hi yena wo sungula endyangwini ku khuvuriwa—ku nga khathariseki swiphiqo swo tala. Hambi leswi a ri xichudeni lexi xiximiwaka exikolweni, u hlongoriwile hikuva ripfalo ra yena ra Vukreste a ri nga n’wi pfumeleli ku nghenela vusocha, ku nga xiphemu xa nkoka xa tidyondzo ta xikolo. (Esaya 2:2-4) Mhaka ya Sasha yi yisiwe eHubyeni Leyikulu ya le Israyele eYerusalema, leyi leriseke leswaku Sasha a vuyiseriwa exikolweni leswaku a ta hetisa tidyondzo ta yena ta lembe. Mhaka leyi yi twiwe hi vanhu hinkwavo va tiko. Xisweswo, Vaisrayele vo tala va sungule ku tiva tidyondzo ta Timbhoni ta Yehovha.a
Endzhaku ko heta xikolo xa le henhla, Sasha u nghenele vutirheli bya nkarhi hinkwawo bya Timbhoni ta Yehovha. Namuntlha se i phayona ro hlawuleka tlhelo nkulu wa vandlha. Sesi wa yena, ku nga llana, u n’wi joyinile evutirhelini bya nkarhi hinkwawo. Mana wa vona, ni kokwa wa vona, havambirhi i Timbhoni leti khuvuriweke. Mbewu leyi dokodela wa mahlo a yi byaleke a ya ha veka mihandzu!
Hi nkarhi wolowo, Ella u ye emahlweni a endla nhluvuko hi tlhelo ra moya naswona ku nga ri khale se a chumayela hi yindlu ni yindlu. Eka muti wo sungula lowu a ngheneke eka wona, Ella u kume Faina, loyi a ha ku fika eUkraine. Faina a karhata hi ntshikilelo. Hi ku famba ka nkarhi Ella u kume leswaku emahlweninyana ka ku va a gongondza ekaya ka Faina, nsati loyi a tshikilelekeke a ha ku khongela eka Xikwembu: “A ndzi tivi leswaku u mani, kambe loko u ndzi twa ndzi pfune.” Yena na Ella va ve ni bulo leri khutazaka. Faina u vutise swivutiso swo tala kutani a anakanyisisa hi tinhlamulo hinkwato leti a nyikiweke tona. Hi ku famba ka nkarhi, u khorwisekile leswaku Timbhoni ta Yehovha ti dyondzisa ntiyiso lowu humaka eBibeleni. U cince nkarhi wa tidyondzo ta yena ta le yunivhesiti leswaku a ta heta nkarhi wo tala ni vandlha ni le ntirhweni wo chumayela. Hi May 1994, Faina u khuvuriwile. Na yena u nghenele ntirho wa vuphayona, a ri karhi a tihanyisa hi ku tirha masiku yo karhi endzawulweni ya tikhompyuta.
Hi November 1994, loko Ella a ri entirhweni wo chumayela, u lo na swi pfuketana a titwa a heleriwa hi matimba. U ye exibhedlele laha vukamberi byi kombiseke leswaku rhumbu ra yena a ri ri ni xilondza lexi mpfempfaka ngati. Loko ri pela hemoglobini ya Ella a yi ehle yi va 7,2. Nkulu wa vandlha leri Ella a a ri eka rona, loyi a nga mutshama-xitulu wa Komiti yo Vulavurisana Ni Swibedlhele (HLC [Hospital Liaison Committee]) swa kwalaho, u nyike madokodela rungula leri kombisaka tindlela leti va nga ti tirhisaka ta vutshunguri leti nga laviki ku tirhisiwa ka ngati.b Vuhandzuri byi endliwe kahle handle ka ngati, naswona Ella u hlakarherile.— Mintirho 15:28, 29.
Karl, dokodela wa Ella la kambelaka vuvabyi bya vavasati, loyi a nga Muyuda la tswaleriweke eJarimani, a tsakile swinene. U tsundzuke leswaku vatswari va yena, lava a va pone eku dlayiweni ka Vayuda va le Yuropa hi Manazi, a va tiva Timbhoni ta Yehovha ku suka etikampeni ta nxaniso. Karl u vutise swivutiso swo tala. Hambileswi Karl a a tshama a khomekile swinene hi ntirho wa yena wa swa vutshunguri, u vekele nkarhi etlhelo wa dyondzo ya Bibele ya nkarhi na nkarhi. Lembe leri landzeleke, se a hlanganyela minhlangano ya Vukreste ya vhiki ni vhiki.
Xana vuyelo bya mbewu leyi byariweke hi dokodela wa mahlo byi ve byihi? Se hi swi vonile leswi humeleleke eka Sasha ni ndyangu wa ka vona. Loko ku ri Ella, i mutirheli la nga phayona ro hlawuleka. N’wana wa yena wa n’hwanyana, Eina, wa ha ku heta exikolweni xa le henhla, u le ku sunguleni ka ntirho wa yena tanihi phayona. Faina na yena i phayona ro hlawuleka. Loko ku ri Karl, dokodela wa Ella, wa vuvabyi bya vavasati sweswi i Mbhoni leyi khuvuriweke tlhelo nandza wa vutirheli, u avelana ni vavabyi va yena ni van’wana matimba lama hanyisaka ya ntiyiso wa Bibele.
Ntlawa lowu lowutsongo wa vahlapfa lava vulavulaka Xirhaxiya lowu sunguleke wu ri xiphemu xa Vandlha ra Haifa Hebrew sweswi se i vandlha ra Xirhaxiya leri hisaka leri nga ni vahuweleri va Mfumo lava tlulaka 120. Ku andza loku ku fanerile hikwalaho ka leswi dokodela wa mahlo wa le Lviv a tekeke goza ro byala mbewu!
[Tinhlamuselo ta le hansi]
a Leswaku u kuma rungula leri engetelekeke, vona nkandziyiso wa Xalamuka! (wa Xinghezi) wa November 8, 1994 matluka 12-15.
b HLC yi yimela Timbhoni ta Yehovha emisaveni hinkwayo, yi pfuneta hi ku vulavurisana exikarhi ka muvabyi ni vatirhi va le xibedlhele. Yi tlhela yi nyikela rungula ra vutshunguri byin’wana lebyi sekeriweke eka vukambisisi bya sweswinyana bya swa vutshunguri.
[Mepe eka tluka 29]
(Leswaku u swi vona kahle, pfula nkandziyiso hiwoxe)
UKRAINE
ISRAEL
[N’wini wa Xifaniso]
Mountain High Maps® Copyright © 1997 Digital Wisdom, Inc.
[Swifaniso eka tluka 30]
Ella ni n’wana wa yena wa xisati Eina
[Xifaniso eka tluka 31]
Ntlawa lowu tsakeke wa Timbhoni leti vulavulaka Xirhaxiya eHaifa. Ku suka eximatsini ku ya exineneni: Sasha, Ilana, Natasha, Galina, Faina, Ella, Eina na Karl