“A A Nga Vulavuli Na Vona Handle Ko Tirhisa Xifaniso”

“Yesu a byela mintshungu . . . hi ku tirhisa swifaniso. Entiyisweni, a a nga vulavuli na vona handle ko tirhisa xifaniso.”—MATEWU 13:34.

1, 2. (a) Ha yini swifaniso leswi pfunaka swi nga rivaleki hi ku olova? (b) Yesu a a tirhisa swifaniso swa njhani, naswona hi swihi swivutiso leswi tlakukaka mayelana ni ku tirhisa ka yena swifaniso? (Nakambe vona nhlamuselo ya le hansi.)

XANA wa xi tsundzuka xifaniso lexi u xi tweke eka nkulumo ya le rivaleni eka malembe yo tala lama hundzeke? Swifaniso leswi pfunaka a swi rivaleki hi ku olova. Mutsari un’wana u xiye leswaku swifaniso “leswi u byeriwaka swona u kota ku swi vona hi mahlo ya mianakanyo.” Leswi hakanyingi swifaniso swi hi pfunaka ku anakanya, swi nga endla leswaku hi swi twisisa hi ku olova leswi dyondzisiwaka. Swifaniso swi endla leswaku leswi hi swi dyondzaka swi tshama emianakanyweni ya hina.

² Ku hava mudyondzisi ni un’we laha misaveni loyi a a ri ni vuswikoti byo tirhisa swifaniso handle ka Yesu Kreste. Swifaniso swo tala swa Yesu swi tsundzukeka hi ku olova hambileswi swi vuriweke malembe ya 2 000 lama hundzeke.a Ha yini Yesu a a ma tirhisa ngopfu madyondziselo lawa? Naswona i yini lexi xi endleke swifaniso swakwe swi pfuna?

Leswi Endleke Yesu A Dyondzisa Hi Ku Tirhisa Swifaniso

 3. (a) Hi ku ya hi Matewu 13:34, 35, hi xihi xivangelo xo sungula lexi endleke Yesu a tirhisa swifaniso? (b) I yini leswi kombisaka leswaku Yehovha a a ma teka ma ri ya nkoka madyondziselo lawa?

³ Bibele yi hi nyika swivangelo swimbirhi leswikulu swa leswaku ha yini Yesu a a tirhisa swifaniso. Xo sungula, loko a swi tirhisa a ku hetiseka vuprofeta. Muapostola Matewu u tsarile: “Yesu a byela mintshungu swilo leswi hinkwaswo hi ku tirhisa swifaniso. Entiyisweni, a a nga vulavuli na vona handle ko tirhisa xifaniso; leswaku ku ta hetiseka leswi nga vuriwa hi muprofeta la nga te: ‘Ndzi ta pfula nomu wa mina hi swifaniso.’” (Matewu 13:34, 35) “Muprofeta” loyi a tshahiweke hi Matewu a a ri muqambhi wa Pisalema 78:2. Mupisalema yoloye u huhuteriwe hi moya wa Xikwembu leswaku a tsala rungula eka malembe-xidzana yo tala Yesu a nga si velekiwa. Leswaku Yesu a a ta dyondzisa hi ku tirhisa swifaniso, xana a swi tsakisi ku twa leswaku Yehovha u swi vule ka ha sale madzana ya malembe N’wana wakwe a nga si ta laha misaveni? Hakunene Yehovha a a ma teka ma ri ya nkoka madyondziselo lawa!

 4. Xana Yesu u xi hlamusele njhani xivangelo xa ku tirhisa ka yena swifaniso?

⁴ Xa vumbirhi, Yesu hi yexe u hlamusele leswaku u tirhise swifaniso leswaku a hambanisa lava timbilu to sihalala. Loko a hete ku hlamusela “mintshungu leyikulu” hi xifaniso xa muhaxi, vadyondzisiwa vakwe va vutisile va ku: “Ha yini u tirhisa swifaniso loko u vulavula na vona?” Yesu u hlamule a ku: “N’wina mi nyikiwe ku twisisa swihundla swo kwetsima swa mfumo wa matilo, kambe vanhu volavo a va nyikiwanga. Hi yona mhaka leyi ndzi tirhisaka swifaniso loko ndzi vulavula na vona, hikuva, loko va languta, a va voni nchumu, naswona loko va twa, va twa swa hava, a va wu kumi mongo wa swona; naswona vuprofeta bya Esaya byi hetiseka eka vona, lebyi nge, ‘Loko ku ri ku twa, mi ta twa kambe mi nga ka mi nga wu kumi mongo wa kona; naswona loko ku ri ku languta, mi ta languta kambe mi nga ka mi nga voni nikatsongo. Hikuva timbilu ta vanhu lava ti sihalarile.’”—Matewu 13:2, 10, 11, 13-15; Esaya 6:9, 10.

 5. Swifaniso swa Yesu swi va hambanise njhani vayingiseri lavanene eka lava nga ni timbilu leti tinyungubyisaka?

⁵ Swifaniso swa Yesu swi paluxe yini mayelana ni vonelo ra vanhu? Minkarhi yin’wana, vayingiseri va yena a va fanele va anakanyisisa leswaku va ta twisisa leswi a swi vulaka. Vanhu va timbilu letinene va susumeteleke ku kombela nhlamuselo leyi engetelekeke. (Matewu 13:36; Marka 4:34) Kutani ke, swifaniso swa Yesu a swi paluxa ntiyiso eka vanhu lava timbilu ta vona ti nga ni ndlala ya ntiyiso; eka nkarhi wun’wana, swifaniso swa yena a swi tumbeta ntiyiso eka lava nga ni timbilu leti tinyungubyisaka. Hakunene Yesu a ri mudyondzisi la hlamarisaka! Sweswi a hi kambisise timhaka tin’wana leti endleke swifaniso swa yena swi pfuna.

Ku Hlawula Vuxokoxoko Lebyi Faneleke Byi Tirhisiwa

6-8. (a) I yini leswi vayingiseri va Yesu va lembe-xidzana ro sungula a va nga ri na swona? (b) Hi swihi swikombiso leswi kombisaka leswaku Yesu a a hlawula vuxokoxoko lebyi a a fanele a byi tirhisa?

⁶ Xana u tshama u tivutisa leswaku a swi ri njhani eka vadyondzisiwa va le ka lembe-xidzana ro sungula lava tweke Yesu loko a dyondzisa? Hambileswi a va ri ni lunghelo ro twa rito ra Yesu hi byakwe, a va nga ri na tona tibuku leti tsariweke leswaku ti va tsundzuxa leswi a swi vuleke. Hikwalaho, a va fanele va hlayisa marito ya Yesu emianakanyweni ya vona ni le timbilwini ta vona. Hikwalaho ka vutshila byakwe byo tirhisa swifaniso, Yesu a a endla leswaku swi va olovela ku tsundzuka leswi a swi dyondziseke. Njhani?

⁷ Yesu a a hlawula vuxokoxoko lebyi a faneleke a byi tirhisa. Loko vuxokoxoko bya kona byi fanela xitori kumbe byi xi kandziyisa, a a byi vula. Kutani u vule hi ku kongoma leswaku a ku ri tinyimpfu tingani leti a ti sele loko n’wini wa tona a ya lava leyi lahlekeke, ni leswaku i tiawara tingani leti vatirhi va tirhaka tona ensin’wini ya vhinya, ni leswaku i titalenta tingani leti va nyikiweke tona.—Matewu 18:12-14; 20:1-16; 25:14-30.

⁸ Hi nkarhi lowu fanaka, Yesu u siye vuxokoxoko lebyi nga riki bya nkoka lebyi nga ha hi endlaka hi nga ha twisisi leswi swifaniso swi vulaka swona. Hi xikombiso, exifanisweni xa hlonga leri nga riki na musa, a nga hlamuselanga leswaku swi te njhani leswaku ri kolota tidenari ta 60 000 000. Yesu a a kandziyisa xilaveko xo rivalela. Xa nkoka a ku nga ri leswaku hlonga ri nghene njhani exikweletini, kambe a ku ri leswi endleke leswaku xikweleti xa rona xi suriwa ni leswaku rona ri ri khome njhani hlonga-kulobye leri a ri ri kolota mali yitsongo. (Matewu 18:23-35) Hilaha ku fanaka, eka xifaniso xa n’wana wa vusopfa, Yesu a nga xi hlamuselanga lexi endleke leswaku jaha leritsongo ro na swipfuketana ri lava ku nyikiwa rifuwo ra rona ni leswaku ha yini ri tlange ha rona. Kambe Yesu u byi hlamuserile vuxokoxoko bya leswaku ha yini tatana a twele jaha rakwe vusiwana loko ri cince mbilu ya rona kutani ri vuya ekaya. Vuxokoxoko byo tano mayelana ni ndlela leyi tatana a endleke ha yona a a byi ri bya nkoka eka yinhla leyi Yesu a a yi vula, ya leswaku Yehovha u rivalela “hi ndlela leyikulu.”—Esaya 55:7; Luka 15:11-32.

9, 10. (a) I yini lexi Yesu a xi kandziyiseke loko a vulavula hi vanhu eswifanisweni swakwe? (b) Xana Yesu u endle njhani leswaku vayingiseri va yena ni van’wana swi va olovela ku tsundzuka swifaniso swakwe?

⁹ Yesu a a nga vuli swo tala hi vumunhu bya vanhu lava a va tirhiseke eswifanisweni swa yena. Ematshan’weni yo hlamusela ndlela leyi vanhu va le switorini swa yena va langutekaka ha yona, hakanyingi Yesu a a kombetela eka leswi va swi endleke ni ndlela leyi va anguleke ha yona. Hikwalaho, ematshan’weni yo hlamusela leswi Musamariya wa musa a a langutekisa xiswona, Yesu u hlamusele leswi nga swa nkoka ngopfu—ku nga ntwela-vusiwana lowu Musamariya a wu kombiseke Muyuda la vavisiweke loyi a a etlele egondzweni. Yesu u nyike vuxokoxoko lebyi a byi laveka leswaku a dyondzisa leswaku rirhandzu ra vuakelani ri fanele ri kombisiwa eka vanhu hinkwavo ku nga ri eka vanhu va rixaka ra hina kumbe va tiko ra rikwerhu ntsena.—Luka 10:29, 33-37.

¹⁰ Ku tirhisa ka Yesu vuxokoxoko byitsongo swi endle leswaku swifaniso swakwe swi nga lehi. Xisweswo u endle leswaku swi olovela vayingiseri vakwe va lembe-xidzana ro sungula swin’we ni van’wana va ntsandza-vahlayi lava endzhakunyana a va ta hlaya Tievhangeli leti huhuteriweke—ku tsundzuka swifaniso ni leswi swi swi dyondzisaka.

Ku Vulavula Hi Timhaka Ta Siku Ni Siku

 11. Nyika swikombiso leswi kombaka leswaku Yesu a a tirhisa swifaniso swa swilo leswi a swi voneke loko a ri karhi a kula eGaleliya.

¹¹ Yesu a a ri ni vutshila byo tirhisa swifaniso leswi a swi fambisana ni vutomi bya vanhu. Swifaniso swa yena swo tala swi kombisa swilo leswi a swi voneke loko a ri karhi a kula eGaleliya. Wa nga anakanya hi vutomi bya yena loko a ha rintsongo. I kangani a ri karhi a vona mana wakwe a baka xinkwa lexi nga ni comela hi ku teka mbila leyitsongo leyi vileke leyi nga sala loko a baka siku rin’wana kutani a yi chela leswaku yi ta kukumukisa xinkwa? (Matewu 13:33) I kangani a ri karhi a hlalela vaphasi va tinhlampfi loko va ri karhi va nghenisa tinkoka ta vona ematini yo tenga ya le Lwandle ra Galeliya? (Matewu 13:47) I kangani a vona vana va ri karhi va tlanga endhawini yo xavisela eka yona? (Matewu 11:16) Yesu u xiye ni swilo swin’wana leswi tolovelekeke leswi a swi tirhiseke eswifanisweni swakwe—ku nga timbewu leti byariwaka, minkhuvo ya vukati leyi tsakisaka ni masimu ya koroni leyi wupfeke.—Matewu 13:3-8; 25:1-12; Marka 4:26-29.

12, 13. Xana xifaniso xa Yesu xa koroni ni mfava xi swi kombisa njhani leswaku a a swi toloverile swiyimo swa ndhawu yoleyo?

¹² Kutani a swi hlamarisi leswi swifaniso swo tala swa Yesu swi vulavulaka hi timhaka ta siku ni siku. Hikokwalaho, leswaku u byi twisisa kahle vutshila bya yena byo tirhisa ndlela leyi yo dyondzisa, swa pfuna ku xiya leswi marito yakwe a ma vula swona eka vayingiseri vakwe va Vayuda. A hi xiyeni swikombiso swimbirhi.

¹³ Xo sungula, eka xifaniso xa koroni ni mfava, Yesu u vulavule hi wanuna loyi a haxeke mbewu leyinene ensin’wini yakwe kutani “nala” a nghena ensin’wini a haxa mfava. Ha yini Yesu a hlawule xiendlo xexo xa tihanyi? Tsundzuka leswaku u vule xifaniso lexi a ri ekusuhi ni Lwandle ra Galeliya, naswona swi nga ha endleka leswaku ntirho wa vanhu va le Galeliya a ku ri ku rima. A ku na xo vava ku fana ni loko nala a ngungumela ensin’wini ya murimi a fika a haxa mfava ehenhla ka mbewu ya yena. Milawu leyi a yi tirha hi nkarhi wolowo yi komba leswaku timhaka toleto a ti endleka. Swa twisiseka leswaku ha yini Yesu a tirhise mhaka yoleyo leyi vayingiseri vakwe va nga ta kota ku yi twisisa.—Matewu 13:1, 2, 24-30.

 14. Exifanisweni xa Musamariya wa musa, ha yini Yesu a tirhise gondzo leri ‘sukaka eYerusalema ri ya eYeriko’ leswaku a hlamusela dyondzo yakwe?

¹⁴ Xa vumbirhi, tsundzuka xifaniso xa Musamariya wa musa. Yesu u sungule hi ku: “Munhu un’wana a a rhelela a suka eYerusalema a ya eYeriko ivi a wela emavokweni ya swigevenga, leswi swi nga n’wi hluvula kutani swi n’wi bukuta, ivi swi famba, swi n’wi siya a ri kusuhi ni ku fa.” (Luka 10:30) Hikwalaho, Yesu u tirhise gondzo leri ‘sukaka eYerusalema ri ya eYeriko’ leswaku a hlamusela dyondzo yakwe. Loko a rungula xifaniso lexi, a a ri eYudiya laha a ku ri ekusuhi ni le Yerusalema; kutani vayingiseri va yena a va ri tiva gondzo leri a a vulavula ha rona. Gondzo rolero a ri dume hi leswaku ri ni khombo, ngopfu-ngopfu loko munhu a famba a ri yexe. Gondzo rero leri a ri nga tirhisiwi ngopfu a ri jikajika, kutani a ri ri ni tindhawu to tala leti swigevenga swi tumbelaka eka tona.

 15. Ha yini ku ri hava ni un’we loyi a a ta yimelela mona wa muprista ni Mulevhi va le xifanisweni lexi katsaka Musamariya wa musa?

¹⁵ Ku na swin’wana leswi xiyekaka hi ku vulavula ka Yesu hi gondzo leri ‘rhelelaka ri suka eYerusalema ri ya eYeriko.’ Hi ku ya hi xifaniso lexi, muprista wo sungula ni Mulevhi na vona a va famba hi gondzo rero—kambe a va n’wi pfunanga loyi a hlaseriweke. (Luka 10:31, 32) Vaprista a va tirha etempeleni eYerusalema, naswona Valevhi a va va pfuna. Vaprista vo tala ni Valevhi a va tshama eYeriko loko va nga ri ku tirheni etempeleni, hikuva ku suka eYeriko u ya eYerusalema a ku ri 23 wa tikhilomitara. Hikwalaho, a swi kanakanisi leswaku minkarhi yin’wana a va famba hi gondzo rolero. Nakambe xiya leswaku muprista ni Mulevhi a va famba hi gondzo rero loko va ‘suka etempeleni ya le Yerusalema.’b Kutani ku hava ni un’we loyi a nga va yimelelaka vavanuna lava hi ku vula a ku, ‘Va papalate wanuna loyi a vavisiweke hikuva a a vonaka a file, naswona loko a va lo n’wi khumba a swi ta va nyamisa swa nkarhinyana kutani va nga faneleki ku ya tirha etempeleni.’ (Levhitika 21:1; Tinhlayo 19:11, 16) Xana a swi le rivaleni leswaku xifaniso xa Yesu a xi vulavula hi swilo leswi a swi tolovelekile eka vayingiseri vakwe?

Ku Vulavula Hi Ntumbuluko

 16. Ha yini swi nga kanakanisi leswaku Yesu a a wu tiva kahle ntumbuluko?

¹⁶ Swifaniso swo hlayanyana swa Yesu swi kombisa leswaku a a swi tiva swimilana, swiharhi ni maxelo. (Matewu 6:26, 28-30; 16:2, 3) Xana a a byi kuma kwihi vutivi byo tano? Loko a ri karhi a kula eGaleliya, a swi kanakanisi leswaku a ri ni nkarhi wo tala wo xiya ntumbuluko wa Yehovha. Ku tlula kwalaho, Yesu i “mativula ya ntumbuluko hinkwawo,” naswona Yehovha u n’wi tirhise tanihi “mutirhi la nga ni vuswikoti” loko a vumba swilo hinkwaswo. (Vakolosa 1:15, 16; Swivuriso 8:30, 31) Xana a swi tsakisi ku twa leswaku Yesu a a wu tiva kahle ntumbuluko? A hi voneni ndlela leyi a swi kombiseke ha yona leswaku a a wu tiva kahle ntumbuluko loko a ri karhi a dyondzisa.

17, 18. (a) Xana marito ya Yesu lama tsariweke eka Yohane ndzima 10 ma swi kombise njhani leswaku a a byi tiva kahle vutomi bya tinyimpfu? (b) Xana vanhu lava endzeleke ematikweni ya le Bibeleni va vone yini eka vuxaka lebyi nga kona exikarhi ka varisi ni tinyimpfu?

¹⁷ Xin’wana xa swifaniso swa rirhandzu swa Yesu xi tsariwe eka Yohane ndzima 10, laha vuxaka lebyikulu bya yena ni valandzeri vakwe a byi fanisaka ni bya murisi ni tinyimpfu takwe. Marito ya Yesu ma kombisa leswaku a a byi tiva ngopfu vutomi bya tinyimpfu. U kombise leswaku tinyimpfu ta swi tsakela ku kongomisiwa naswona ti landzelela murisi wa tona hi ku tshembeka. (Yohane 10:2-4) Vanhu lava endzeleke ematikweni ya le Bibeleni va byi vonile vuxaka lebyi byo hlawuleka lebyi nga kona exikarhi ka varisi ni tinyimpfu. Eka lembe-xidzana ra vu-19, mutivi wa matimu ya ntumbuluko H. B. Tristram u te: “Ndzi tshame ndzi hlalela murisi a ri karhi a tlanga ni ntlhambi wakwe. A a endla onge wa tsutsuma; ivi tinyimpfu ti n’wi landzelela kutani ti n’wi rhendzela. . . . Ntlhambi hinkwawo wu hetelele wu n’wi rhendzerile wu ri karhi wu n’wi tlulatlulela.”

¹⁸ Ha yini tinyimpfu ti landzelele murisi wa tona? Yesu u te: “Hikuva ti tiva rito rakwe.” (Yohane 10:4) Xana tinyimpfu ti ri tiva hakunene rito ra murisi wa tona? Hi ku ya hi langutelo ra yena George A. Smith ebukwini ya yena leyi nge The Historical Geography of the Holy Land u tsarile: “Minkarhi yin’wana a hi dzumbe etlhelo ka xin’wana xa swihlovo swoleswo swa le Yudiya, laha varisi vanharhu kumbe va mune va nwisaka mintlhambi ya vona kona. Mintlhambi yi hlanganile, kutani hi tivutisa leswaku murisi ha un’we u ta wu hlawula njhani ntlhambi wakwe. Kambe loko mintlhambi yi hetile ku nwa mati ni ku tlanga, varisi va yime ematlhelo yo hambana-hambana, kutani un’wana ni un’wana a vitana tinyimpfu takwe hi khwela; kutani tinyimpfu ti huma entlhambini ti n’wi landza hi ku hleleka.” Lexi a ku ri xifaniso xa kahle ngopfu lexi Yesu a xi tirhiseke leswaku a kandziyisa yinhla yakwe. Loko hi tiva tidyondzo takwe hi tlhela hi ti yingisa, hi landzelela nkongomiso wa yena, kutani u ta hi khathalela hi rirhandzu tanihi “murisi lonene.”—Yohane 10:11.

Ku Vulavula Hi Swiendlakalo Leswi Vayingiseri Va Yena Va Swi Tivaka

 19. Leswaku a kaneta dyondzo ya mavunwa, xana Yesu u yi nghenise njhani mhaka ya khombo leri nga endleka kwalaho?

¹⁹ Swifaniso leswi pfunaka swi nga ha katsa mintokoto kumbe swikombiso leswi ku nga dyondziwaka swo karhi eka swona. Enkarhini wun’wana, Yesu u tirhise mhaka leyi a ya ha ku endleka leswaku a kaneta mianakanyo ya mavunwa ya leswaku khombo ri wela lava swi va faneleke. U te: “Lava 18 lava weriweke hi xihondzo xa Silowama, xi va dlaya, xana mi anakanya leswaku va kumeke va [ri vadyohi lava a va] kolota ngopfu ku tlula vanhu lavan’wana hinkwavo lava tshamaka eYerusalema?” (Luka 13:4) Yesu u lwisane hi ku kongoma ni mianakanyo yoleyo ya ku kunguhateriwa. Vanhu volavo va 18 a va dlayiwanga hikwalaho ka xidyoho xo karhi lexi hlundzukiseke Xikwembu. Kahle-kahle, rifu ra vona leri khomisaka gome ri vangiwe hikwalaho ka nkarhi ni xiendlakalo lexi nga languteriwangiki. (Eklesiasta 9:11) Xisweswo u kanete dyondzo leyi ya mavunwa hi ku vulavula hi xiendlakalo lexi vayingiseri vakwe a va xi tiva kahle.

20, 21. (a) Hikwalaho ka yini Vafarisi va sole vadyondzisiwa va Yesu? (b) Hi yihi mhaka leyi nga eMatsalweni leyi Yesu a vulavuleke ha yona loko a kombisa leswaku Yehovha a nga vekanga nawu wo tika mayelana ni Savata ya yena? (c) I yini leswi ku nga ta buriwa hi swona exihlokweni lexi landzelaka?

²⁰ Loko Yesu a ri karhi a dyondzisa u tlhele a tirhisa swikombiso swa Matsalwa. Tsundzuka nkarhi lowu loko Vafarisi va sole vadyondzisiwa leswi va nga kha swichocho va dya hi Savata. Entiyisweni, vadyondzisiwa a va tshovanga Nawu wa Xikwembu, kambe a va tlule swinawana swa Vafarisi swa mintirho leyi a yi nga fanelanga yi endliwa hi Savata. Yesu u va hlamusele mhaka leyi tsariweke eka 1 Samuwele 21:3-6, a va kombisa leswaku Xikwembu a xi vekanga nawu wolowo wo tika mayelana ni Savata ya xona. Loko va twa ndlala, Davhida ni vavanuna vakwe va ye etabernakeleni va fika va dya swinkwa swa nkombiso, leswi a swi susiwile. Swinkwa sweswo a swi vekeriwa vaprista leswaku va swi dya. Kambe, ehansi ka swiyimo sweswo, Davhida ni vavanuna vakwe a va soriwanga loko va swi dyile. Lexi xiyekaka, mhaka yoleyo hi yona ntsena leyi tsariweke eBibeleni malunghana ni ku dyiwa ka swinkwa swa khale hi vanhu lava nga riki vaprista. Yesu a a yi tiva kahle mhaka leyi faneleke yi tirhisiwa, naswona a swi kanakanisi leswaku vayingiseri vakwe va Vayuda a va yi toloverile mhaka yoleyo.—Matewu 12:1-8.

²¹ Hakunene, Yesu a a ri Mudyondzisi Lonkulu! Bya hlamarisa vuswikoti bya yena byo dyondzisa tidyondzo ta nkoka lerova vayingiseri vakwe va ti twisisa. Xana hi nga n’wi tekelela njhani loko hi dyondzisa? Hi ta bula hi swona eka xihloko lexi landzelaka.

[Tinhlamuselo ta le hansi]

Wa Tsundzuka Xana?

• Ha yini Yesu a dyondzisa hi swifaniso?

• Hi xihi xikombiso lexi kombisaka leswaku Yesu a a tirhisa swifaniso leswi vayingiseri va yena va lembe-xidzana ro sungula a va swi twisisa?

• Leswi Yesu a a wu tiva kahle ntumbuluko, xana u wu nghenise njhani eka swifaniso swa yena?

• Xana Yesu u swi tirhise hi tindlela tihi swiendlakalo leswi vayingiseri va yena a va swi tiva?

[Swifaniso leswi nga eka tluka 15]

Yesu u vulavule hi hlonga leri aleke ku sula xikweleti xa tidenari titsongo ni xa tatana la rivaleleke n’wana wa yena la tlangiseke rifuwo rakwe hinkwaro

[Xifaniso lexi nga eka tluka 16]

Hi yihi yinhla ya xifaniso xa Yesu xa Musamariya wa musa?

[Xifaniso lexi nga eka tluka 17]

Xana hakunene tinyimpfu ta ri tiva rito ra murisi wa tona?