Ha Yini Hi Tlangela Xilalelo Xa Hosi?

“Leswi ndzi swi hundziseleke ni le ka n’wina ndzi swi amukele eka Hosi.”—1 Vakorinto 11:23.

1, 2. Yesu u endle yini hi vusiku bya Paseka ya 33 C.E.?

N’WANA wa Yehovha la nga swakwe a a ri kona. Nakambe a ku ri ni vavanuna va 11 lava ‘khomeleleke swin’we na yena emiringweni ya yena.’ (Luka 22:28) A ku ri hi Ravumune nimadyambu, March 31, 33 C.E., naswona a swi kanakanisi leswaku n’weti lowu heleleke a wu tlhave ehenhla ka muti wa Yerusalema. Yesu Kreste ni vaapostola vakwe a va ha ku heta ku tlangela Paseka. Yudasi Iskariyota lowa muxengi a a kombiwe nyangwa, kambe nkarhi wa leswaku lavan’wana va hangalaka a wu nga si fika. Ha yini? Hikuva Yesu a a ri kusuhi ni ku endla nchumu wun’wana wa nkoka swinene. A ku ri yini?

² Leswi Matewu la tsaleke Evhangeli a a ri kona, mi nge hi twa yena a hi byela. U tsarile: “Yesu a teka xinkwa, loko a nkhensile, a xi phema ivi a nyika vadyondzisiwa, a ku: ‘Tekani, mi dya. Leswi swi vula miri wa mina.’ Nakambe, a teka xinwelo, loko a nkhensile, a va nyika xona, a ku: ‘Nwanani eka xona, hinkwenu ka n’wina; hikuva leswi swi vula “ngati ya ntwanano” ya mina, leyi nga ta halateriwa vo tala leswaku va rivaleriwa swidyoho.’” (Matewu 26:26-28) Xana xexo a xi ta va xiendlakalo lexi nga ta endliwa kan’we swi helela kwalaho? Xana a xi pfuna yini? Xana xi vula swo karhi eka hina namuntlha?

“Tshamani Mi Ri Karhi Mi Endla Leswi”

 3. Ha yini leswi Yesu a swi endleke hi vusiku bya Nisan 14, 33 C.E., swi ri swa nkoka?

³ Goza leri Yesu Kreste a ri tekeke hi vusiku bya Nisan 14, 33 C.E., a ku nga ri xiendlakalo xa xitshuketa evuton’wini bya yena. Muapostola Pawulo u xi hlamuserile loko a tsalela Vakreste lava totiweke va le Korinto, lava se a va ri ni malembe yo tlula 20 va ri karhi va tlangela xitsundzuxo. Hambileswi Pawulo a a nga ri kona exikarhi ka Yesu ni vaapostola va 11 hi 33 C.E., handle ko kanakana vaapostola van’wana va n’wi byele leswi endlekeke hi siku rero. Ku tlula kwalaho, Pawulo u fanele a kume nhlamuselo leyi tiyisekisaka xiendlakalo xexo hi ku hlavuteleriwa yona hi moya. Pawulo u te: “Leswi ndzi swi hundziseleke ni le ka n’wina ndzi swi amukele eka Hosi, leswaku Hosi Yesu, evusikwini lebyi a a ta nyiketiwa ha byona u teke xinkwa, kuteloko a nkhensile, a xi phema, a ku: ‘Leswi swi vula miri wa mina hikwalaho ka n’wina. Tshamani mi ri karhi mi endla leswi leswaku mi ndzi tsundzuka.’ A endla hilaha ku fanaka ni hi xinwelo, endzhaku ka loko a dye xilalelo, a ku: ‘Xinwelo lexi xi vula ntwanano lowuntshwa hikwalaho ka ngati ya mina. Tshamani mi ri karhi mi endla leswi minkarhi hinkwayo loko mi xi nwa leswaku mi ndzi tsundzuka.’”—1 Vakorinto 11:23-25.

 4. Ha yini Vakreste va fanele va tlangela Xilalelo xa Hosi?

⁴ Luka la tsaleke Evhangeli u tiyisekisa leswaku Yesu u lerisile a ku: “Tshamani mi ri karhi mi endla leswi leswaku mi ndzi tsundzuka.” (Luka 22:19) Vuhundzuluxeri byin’wana byi tirhise marito lama nge: ‘Endlisani sweswo, mi ta ndzi anakanya ha swona’ (Bibele Ya Xitsonga) ni lama nge, “Endlani leswi hi ku ndzi anakanya.” (Bibele—Mahungu Lamanene) Entiyisweni, xiendlakalo lexi hakanyingi xi vuriwa Xitsundzuxo xa rifu ra Kreste. Nakambe Pawulo u xi vula Xilalelo xa Hosi—ku nga vito leri fanelaka, tanihi leswi xi simekiweke nivusiku. (1 Vakorinto 11:20) Vakreste va lerisiwe ku tlangela Xilalelo xa Hosi. Kambe hikwalaho ka yini xiendlakalo lexi xi simekiwile?

Leswi Endleke Leswaku Xi Simekiwa

5, 6. (a) Hi xihi xivangelo xin’wana xa ku va Yesu a simeke Xitsundzuxo? (b) Nyika xivangelo xin’wana lexi endleke leswaku ku simekiwa Xilalelo xa Hosi.

⁵ Xivangelo xin’wana xa ku simekiwa ka Xitsundzuxo xi katsa xikongomelo xin’wana lexi hetisisiweke hi rifu ra Yesu. U fe a ri mulweri wa vuhosi bya Tata wa yena wa le tilweni. Xisweswo Kreste u kombise leswaku Sathana Diyavulosi i muhembi, loyi a vuleke mavunwa ya leswaku vanhu va tirhela Xikwembu hi nsusumeto wa vutianakanyi. (Yobo 2:1-5) Ku fa ka Yesu a tshembekile ku kombise mhaka leyi yi ri mavunwa naswona swi tsakise mbilu ya Yehovha.—Swivuriso 27:11.

⁶ Xivangelo xin’wana xa ku simekiwa ka Xilalelo xa Hosi i ku hi tsundzuxa leswaku hikwalaho ka rifu ra yena tanihi munhu la hetisekeke, la nga riki na xidyoho, Yesu u ‘nyikele moya-xiviri wakwe wu va nkutsulo wa lavo tala.’ (Matewu 20:28) Loko munhu wo sungula a dyohele Xikwembu, u lahlekeriwe hi vutomi lebyi hetisekeke ni ntshembo lowu fambisanaka na byona. Hambiswiritano, Yesu u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Hakunene, “hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Ku tlangela Xilalelo xa Hosi ku hi tsundzuxa rirhandzu lerikulu leri kombisiweke hi Yehovha ni N’wana wakwe hikwalaho ka rifu ra gandzelo ra Yesu. Hakunene, hi fanele hi ri tlangela rirhandzu rolero!

Xana Xi Fanele Xi Tlangeriwa Rini?

 7. Ha yini Vakreste lava totiweke va dya ni ku nwa eXitsundzuxweni “minkarhi hinkwayo”?

⁷ Pawulo u vule leswi malunghana ni Xilalelo xa Hosi: “Minkarhi hinkwayo loko mi dya xinkwa lexi ni ku nwa xinwelo lexi, mi hambeta mi huwelela rifu ra Hosi, yi kondza yi fika.” (1 Vakorinto 11:26) Vakreste hinkwavo lava totiweke a va ta dya ni ku nwa swifanekiselo swa Xitsundzuxo ku fikela loko va fa. Xisweswo, a va ta hambeta va twarisa ripfumelo leri va nga na rona eka lunghiselelo ra Xikwembu ra gandzelo ra nkutsulo ra Yesu, va ri twarisa emahlweni ka Yehovha Xikwembu ni misava.

 8. Xana ntlawa wa vatotiwa a wu ta tlangela Xilalelo xa Hosi ku fikela rini?

⁸ Xana ntlawa wa Vakreste lava totiweke a wu ta tlangela Xitsundzuxo xa rifu ra Kreste ku fikela rini? Pawulo u vule leswaku ‘a kondza a fika,’ laha handle ko kanakana a a vula leswaku xitsundzuxo lexi a xi ta ya emahlweni ku kondza Yesu a fika a amukela valandzeri vakwe lava totiweke etilweni loko va pfuxiwa hi nkarhi wa “vukona” bya yena. (1 Vatesalonika 4:14-17) Leswi swi fambisana ni marito lawa Yesu a ma byeleke vaapostola vo tshembeka va 11: “Loko ndzi ya mi lunghisela ndhawu, ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona.”—Yohane 14:3.

 9. Xana marito ya Yesu lama tsariweke eka Marka 14:25 ma vula yini?

⁹ Loko Yesu a simeka Xitsundzuxo, u vulavule hi xinwelo xa vhinya, a byela vaapostola va yena vo tshembeka a ku: “A ndzi nge he tlheli ndzi nwa leswi humaka emadiriveni ya vhinya ku fikela siku rero loko ndzi swi nwa hi vuntshwa emfun’weni wa Xikwembu.” (Marka 14:25) Tanihi leswi Yesu a a nga ta nwa vhinya ya xiviri loko a ri etilweni, swi le rivaleni leswaku a a vulavula hi ntsako lowu minkarhi yin’wana wu fanekiseriwaka hi vhinya. (Pisalema 104:15; Eklesiasta 10:19) Ku va eMfun’weni swin’we ni valandzeri va yena ku ta va ntokoto wo tsakisa lowu va wu languteleke hi mahlo-ngati.—Varhoma 8:23; 2 Vakorinto 5:2.

10. Xana Xitsundzuxo xi fanele xi tlangeriwa kangani?

¹⁰ Xana rifu ra Yesu ri fanele ri tlangeriwa kan’we hi n’hweti, hi vhiki, kumbe masiku hinkwawo? Doo! Yesu u simeke Xilalelo xa Hosi hi siku ra Paseka leri nakambe a dlayiweke ha rona, leri a ri tlangeriwa tanihi “xitsundzuxo” xa ku kutsuriwa ka Vaisrayele evuhlongeni aEgipta hi 1513 B.C.E. (Eksoda 12:14) Paseka a yi tlangeriwa kan’we hi lembe, hi siku ra vu-14 ra n’hweti ya Xiyuda ya Nisan. (Eksoda 12:1-6; Levhitika 23:5) Leswi swi kombisa leswaku rifu ra Yesu ri fanele ri tlangeriwa ku fana ni Paseka—kan’we hi lembe—ku nga ri n’hweti na n’hweti, vhiki ni vhiki kumbe siku ni siku.

11, 12. Xana matimu ma kombisa yini malunghana ni ndlela leyi Xitsundzuxo a xi tlangeriwa ha yona eku sunguleni?

¹¹ Kutani, swa fanela ku tlangela Xitsundzuxo kan’we hi lembe hi Nisan 14. Buku yin’wana ya tinhlamuselo yi ri: “Vakreste va le Asia Minor a va vitaniwa Ma-quartodeciman [Ma-14] hikwalaho ka mukhuva wa vona wo tlangela pascha [Xilalelo xa Hosi] hi ti-14 ta Nisan ntsena . . . Siku ra kona ri nga ha va hi Ravuntlhanu kumbe siku rin’wana ni rin’wana evhikini.”—The New Schaff-Herzog Encyclopedia of Religious Knowledge, Vholumo IV, tluka 44.

¹² N’wamatimu J. L. von Mosheim loko a hlamusela hi mukhuva wa lembe-xidzana ra vumbirhi C.E. u vula leswaku Ma-quartodeciman a ma tlangela Xitsundzuxo hi Nisan 14 hikuva “a ma teka xikombiso xa Kreste xi ri nawu lowu faneleke ku yingisiwa.” N’wamatimu un’wana u ri: “Maendlelo ya tikereke ta le Asia ta Ma-quartodeciman a ma fana ni ya kereke ya le Yerusalema. Eka lembe-xidzana ra vumbirhi tikereke leti a ti tlangela Paseka ya tona hi ti-14 ta n’hweti ya Nisan, ti tsundzuka nkutsulo wa rifu ra Kreste.”—Studia Patristica, Vholumo V, 1962, tluka 8.

Leswi Xinkwa Xi Yimelaka Swona

13. Xana Yesu u tirhise xinkwa xa njhani loko a simeka Xilalelo xa Hosi?

¹³ Loko Yesu a simeka Xitsundzuxo, ‘u teke xinkwa, a nkhensa, a xi phema a xi nyika vaapostola.’ (Marka 14:22) Xinkwa lexi tirhisiweke hi nkarhi wolowo a xi fana ni lexi a xa ha ku tirhisiwa eka Paseka. (Eksoda 13:6-10) Tanihi leswi a xi bakiwe xi nga cheriwanga comela, a xi nga kukumukanga naswona a xi phemeka hi ku olova leswaku va avelana xona. Loko Yesu a andzise xinkwa hi singita leswaku xi ringana vanhu va magidi, na xona a xi nga nonon’hwi, hikuva u xi pheme kunene leswaku xi nyikiwa vanhu. (Matewu 14:19; 15:36) Handle ko kanakana, ku phemiwa ka xinkwa xa Xitsundzuxo a swi yimeli mhaka yo karhi ya swilo swa moya.

14. (a) Ha yini swi fanela leswaku xinkwa xa Xitsundzuxo xi va lexi pfumalaka comela? (b) Xana ku fanele ku kumiwa kumbe ku bakiwa xinkwa xa njhani eka Xilalelo xa Hosi?

¹⁴ Malunghana ni xinkwa lexi tirhisiweke loko ku simekiwa Xitsundzuxo, Yesu u te: “Leswi swi vula miri wa mina hikwalaho ka n’wina.” (1 Vakorinto 11:24; Marka 14:22) A swi fanerile leswaku xinkwa xexo xi kala comela. Hikwalaho ka yini? Hikuva comela xi nga vula vubihi, vuhomboloki kumbe xidyoho. (1 Vakorinto 5:6-8) Xinkwa a xi yimela miri wa Yesu lowu hetisekeke wu tlhela wu pfumala xidyoho, lowu a wu faneleka ku nyikeriwa wu va gandzelo ra nkutsulo. (Vaheveru 7:26; 10:5-10) Timbhoni ta Yehovha a ti swi rivali leswi, naswona ti landzela xikombiso lexi vekiweke hi Yesu hi ku tirhisa xinkwa xo kala comela hi nkarhi wa Xitsundzuxo. Minkarhi yin’wana, ti tirhisa xinkwa xo kala comela lexi Vayuda va xi tirhisaka eka Paseka ya vona, lexi nga pfanganisiwangiki na swilo swin’wana, swo fana ni tinyala kumbe matandza. Kumbe ku nga bakiwa xinkwa xo kala comela hi ku tirhisa mapa matsongo lama nga ni tindzoho (ta koroni loko swi koteka) kutani ma pfuviwa hi mati matsongo. Mbila ya kona yi fanele ku andlariwa yi va xiphepherhele kutani yi bakiwa hi pani leri totiweke mafurha matsongo ku kondza xinkwa xi oma.

Leswi Vhinyo Yi Fanekiselaka Swona

15. Xana a ku ri na yini endzeni ka xinwelo lexi tirhisiweke loko Kreste a simeka Xitsundzuxo xa rifu ra yena?

¹⁵ Endzhaku ko hundzisa xinkwa xo kala comela, Yesu u teke xinwelo, “a nkhensa, a [nyika vaapostola], hinkwavo va nwela eka xona.” Yesu u te: “Leswi swi vula ‘ngati ya ntwanano’ ya mina, leyi nga ta halateriwa vo tala.” (Marka 14:23, 24) I yini leswi a swi ri endzeni ka xinwelo? Vhinyo leyi vileke, ku nga ri juzi ya madiriva leyi nga vilangiki. Loko Matsalwa ma vulavula hi vhinyo, a ma vulavuli hi juzi ya madiriva leyi nga vilangiki. Hi xikombiso, Yesu u vule leswaku vhinyo leyi vileke hi yona a yi ta boxa ‘magula ya khale ya vhinyo,’ kambe a ma nga ta boxiwa hi juzi ya madiriva. Naswona valala va Kreste va n’wi hehle hi leswaku a a ‘tinyiketele eku nweni ka vhinyo.’ Xihehlo xexo a xi nga ta vula nchumu loko vhinyo a yi ri juzi ya madiriva ntsena. (Matewu 9:17; 11:19) Vhinyo a yi nwiwa hi nkarhi wa ku tlangela Paseka, naswona Kreste u yi tirhisile loko a simeka Xitsundzuxo xa rifu ra yena.

16, 17. Xana i vhinyo ya njhani leyi fanelekaka loko ku tlangeriwa Xitsundzuxo, naswona ha yini?

¹⁶ I vhinyo yo tshwuka ntsena leyi fambisanaka kahle ni leswi a swi fanekiseriwa hi leswi a swi ri endzeni ka xinwelo, ku nga ngati ya Yesu leyi halatiweke. Yena hi yexe u te: “Leswi swi vula ‘ngati ya ntwanano’ ya mina, leyi nga ta halateriwa vo tala.” Naswona muapostola Petro u tsarile: “[Vakreste lava totiweke] ma swi tiva leswaku swilo leswi onhakaka, silivhere kumbe nsuku, a mi kutsuriwanga ha swona endleleni ya ku tikhoma ka n’wina loku nga vekiki mihandzu loku mi ku kumeke hi ndhavuko eka vatata wa n’wina. Kambe a ku ri hi ngati ya risima, leyi fanaka ni ya xinyimpfana lexi nga solekiki, lexi pfumalaka xivati, yi nga ya yena Kreste.”—1 Petro 1:18, 19.

¹⁷ Handle ko kanakana, Yesu u tirhise vhinyo yo tshwuka ya madiriva loko a simeka Xitsundzuxo. Hambiswiritano, tin’wana ta tivhinyo to tshwuka ta manguva lawa a ti amukeleki hikuva ti pfanganisiwe ni byala byo hisa, burendhi kumbe mitsembyana ni swichela-chelana swin’wana. Ngati ya Yesu a yi hetisekile, a yi nga lavi ku engeteriwa nchumu. Hikwalaho, tivhinyo to fana ni port, sherry na vermouth a ti nge faneleki. Xinwelo xa Xitsundzuxo xi fanele xi cheriwa vhinyo leyi nga tsokomberiki, leyi nga pfanganisiwangiki na nchumu. Ku nga tirhisiwa vhinyo yo tshwuka ya madiriva leyi endliweke ekaya leyi nga cheriwangiki chukele, hikwalaho tivhinyo to fana ni burgundy na claret hi tona leti faneleke.

18. Ha yini Yesu a nga endlanga xinkwa ni vhinyo hi singita eXitsundzuxweni?

¹⁸ Loko a simeka xitsundzuxo lexi, Yesu a nga endlanga singita, a cinca swifanekiselo swi va nyama ni ngati ya xiviri. Ku dya nyama ya munhu ni ku nwa ngati yakwe a ku ta va vukhema, ku nga ku tlula nawu wa Xikwembu. (Genesa 9:3, 4; Levhitika 17:10) Yesu a a ha ri na wona miri wakwe wa nyama hinkwawo ni ngati yakwe hinkwayo. Miri wa yena wu nyikeriwe wu va xitlhavelo lexi hetisekeke, naswona ngati yakwe yi halatiwe hi ndzhenga wa siku leri landzelaka, laha a ka ha ri siku ra Vayuda ra Nisan 14. Hikokwalaho, xinkwa ni vhinyo ya Xitsundzuxo i swifanekiselo leswi yimelaka miri ni ngati ya Kreste.a

Xitsundzuxo—Swakudya Swo Siyerisana

19. Ha yini ku nga tirhisiwaka swinwelo kumbe tindyelo to tlula yin’we loko ku tlangeriwa Xilalelo xa Hosi?

¹⁹ Loko Yesu a simeka Xitsundzuxo, u rhambe vaapostola va yena vo tshembeka leswaku va nwela exinwelweni xin’we. Evhangeli ya Matewu yi ri: “[Yesu] a teka xinwelo, loko a nkhensile, a va nyika xona, a ku: ‘Nwanani eka xona, hinkwenu ka n’wina.’” (Matewu 26:27) Ku tirhisa “xinwelo” xin’we ku nga ri swo tala, a swi vanganga xiphiqo, tanihi leswi eka xiendlakalo xexo a ku ri ni vanhu va 11 ntsena etafuleni rin’we naswona a swi ta va olovela ku nyiketana xinwelo. Lembe leri, timiliyoni ti ta hlengeletana leswaku ti tlangela Xilalelo xa Hosi emavandlheni yo tlula 94 000 ya Timbhoni ta Yehovha emisaveni hinkwayo. Tanihi leswi ku nga ta va ku hlengeletane vanhu vo tala hi vusiku byebyo, a swi nge koteki leswaku ku tirhisiwa xinwelo xin’we eka hinkwavo. Kambe mhaka-nkulu ya xinwelo a yi rivariwi emavandlheni lamakulu loko ku tirhisiwa swinwelo swo hlayanyana leswaku swi kota ku hundziseriwa eka vanhu hinkwavo hi nkarhi lowu nga hetiki mbilu. Hilaha ku fanaka, ku nga tirhisiwa tindyelo to hlaya ta xinkwa. Matsalwa a ma vuli leswaku xinwelo kumbe nghilazi swi fanele swi va swa xivumbeko xo karhi ntsena. Hambiswiritano, xinwelo ni ndyelo swi fanele swi kombisa leswaku xiendlakalo lexi xa xiximeka. I vutlhari ku papalata ku tata xinwelo xi fika enon’weni wa xona hikuva xi nga halaka loko xi ri karhi xi fambisiwa.

20, 21. Ha yini hi nga vulaka leswaku Xitsundzuxo i swakudya swo siyerisana?

²⁰ Hambileswi ku nga tirhisiwaka tindyelo ta xinkwa ni swinwelo swa vhinyo swo tlula xin’we, Xitsundzuxo i swakudya swo siyerisana. Eka Israyele wa khale, munhu a a kota ku endla swakudya swo siyerisana hi ku yisa xifuwo exikwetsimisisweni xa Xikwembu, laha a xi tlhaviwa kona. Xiphemu xa xifuwo lexi a xi hisiwa ealitarini, xin’wana xi yisiwa eka muprista lonkulu kasi xin’wana a xi nyikiwa vana va Aroni lava nga vaprista, ivi loyi a nyikelaka xitlhavelo swin’we ni ndyangu wakwe va hlanganyela eswakudyeni. (Levhitika 3:1-16; 7:28-36) Xitsundzuxo na xona i swakudya swo siyerisana hikuva ka dyiwa ku tlhela ku nyiketaniwa.

²¹ Yehovha wa katseka eswakudyeni leswi swo siyerisana tanihi leswi a nga Musunguri wa lunghiselelo leri. Yesu i xitlhavelo naswona Vakreste lava totiweke va hlanganyela hi ku dya swifanekiselo. Ku dyela etafuleni ra Yehovha swi kombisa leswaku lava dyaka va ni ku rhula na yena. Hikwalaho, Pawulo u tsarile: “Xinwelo xa nkateko lexi hi xi katekisaka, xana a hi ku hlanganyela engatini ya Kreste? Xinkwa lexi hi xi phemaka, xana a hi ku hlanganyela emirini wa Kreste? Hikwalaho ka leswi ku nga ni xinkwa xin’we, hina, hambileswi hi nga tala, hi miri wun’we, hikuva hinkwerhu hi dya xinkwa xexo xin’we.”—1 Vakorinto 10:16, 17.

22. Hi swihi swivutiso leswi ha ha faneleke hi kuma tinhlamulo ta swona malunghana ni Xitsundzuxo?

²² Xilalelo xa Hosi hi wona ntsena nkhuvo wa vukhongeri lowu Timbhoni ta Yehovha ti wu tlangelaka lembe na lembe. Leswi swa fanela hikuva Yesu u lerise valandzeri va yena a ku: “Tshamani mi ri karhi mi endla leswi leswaku mi ndzi tsundzuka.” EXitsundzuxweni, hi anakanya hi rifu ra Yesu, rifu leri tlakuseke vuhosi bya Yehovha. Hilaha hi swi xiyeke hakona, eswakudyeni leswi swo siyerisana, xinkwa xi yimela miri wa Kreste lowu veke xitlhavelo naswona vhinyo yi yimela ngati ya yena leyi halatiweke. Hambiswiritano, ko va vanhu vatsongo lava dyaka xinkwa ni vhinyo yo fanekisela. Ha yini swi ri tano? Xana Xitsundzuxo xi vula swo karhi eka timiliyoni leti nga dyiki swifanekiselo? Kahle-kahle, xana Xilalelo xa Hosi xi fanele xi vula yini eka wena?

[Nhlamuselo ya le hansi]

U Nga Hlamurisa Ku Yini?

• Ha yini Yesu a simeke Xilalelo xa Hosi?

• Xana Xitsundzuxo xi fanele xi tlangeriwa kangani?

• Hikwalaho ka yini ku tirhisiwa xinkwa xo kala comela eXitsundzuxweni?

• Xana vhinyo ya Xitsundzuxo yi fanekisela yini?

[Xifaniso lexi nga eka tluka 15]

Yesu u simeke Xilalelo Xa Hosi