Swivutiso Swa Vahlayi

Ha yini Xihondzo xo Rindza xa April 1, 2002, eka tluka 11, ndzimana 7 xi vula leswaku ku khuvuriwa ka vapfumeri lavantshwa va Vayuda hi Pentekosta ya 33 C.E. a ku ri xikombiso xa “ku tinyiketela ka vona eka Xikwembu ha Kreste,” kasi eku sunguleni a ku pfumeriwa leswaku ku tinyiketela ko tano a ku nga laveki eka Vayuda lava khuvuriweke ku sukela hi 33 C.E. ku ya fika hi 36 C.E.?

Hi 1513 B.C.E., Yehovha Xikwembu u nyike Vaisrayele lunghelo ra ku va tiko ro kwetsima eka yena, ntsena loko va ‘yingisa rito ra yena hilaha ku tiyeke, va hlayisa ntwanano wa yena.’ Va hlamule va ku: “Hinkwaswo leswi Yehovha a swi vuleke hi tiyimisele ku swi endla.”—Eksoda 19:3-8; 24:1-8.

Vaisrayele va tinyiketele hi voxe eka Xikwembu hi ku pfumela ku hlayisa Nawu wa ntwanano wa Muxe. Switukulwana leswi landzeleke swa Vayuda swi velekeriwe eka tiko leri ri tinyiketeleke. Hambiswiritano, ku khuvuriwa ka Vayuda lava veke valandzeri va Yesu Kreste ku sukela hi Pentekosta ya 33 C.E. ku ya emahlweni, a ku nga katsi ku tinyiketela eka Xikwembu tanihi swirho swa tiko leri tinyiketeleke ntsena. Nakambe a ku kombisa ku tinyiketela ka vona eka vuxaka lebyintshwa bya vona na Yehovha Xikwembu ha Yesu Kreste. Njhani?

Endzhaku ka loko moya lowo kwetsima wu chuluriwe ehenhla ka vadyondzisiwa va 120 lava a va hlengeletane ekamareni ra le henhla eYerusalema, hi Pentekosta ya 33 C.E., muapostola Petro u yimile kutani a sungula ku chumayela ntshungu wa Vayuda ni vaproselita lava a va tile leswaku va ta vona leswi nga humelela. Endzhaku ka loko a nyikele vumbhoni bya rixaladza, u byele Vayuda lava a va tisola a ku: “Hundzukani, un’wana ni un’wana wa n’wina a khuvuriwa hi vito ra Yesu Kreste leswaku mi rivaleriwa swidyoho swa n’wina.” Xikhutazo xa Petro xi bele etindleveni kutani “lava amukeleke rito rakwe hi mbilu hinkwayo va khuvuriwile, naswona hi siku rero ku engeteriwe mimoya-xiviri ya kwalomu ka 3000.”—Mintirho 2:1-41.

Xana Vayuda lava khuvuriweke endzhaku ko yingisa xikhutazo xa Petro, a va nga ri swirho swa tiko leri tinyiketeleke? Xana a va nga ri na vuxaka lebyi hlawulekeke na Xikwembu? Doo! Muapostola Pawulo u tsale leswaku ‘Xikwembu xi suse Nawu endleleni hi ku wu belela emhandzini ya nxaniso.’ (Vakolosa 2:14) Yehovha Xikwembu u suse ntwanano wa Nawu hi rifu ra Kreste hi 33 C.E.—lowu a wu ri xisekelo xa ku tinyiketela ka Vaisrayele eka Yena. Kutani Xikwembu xi fularhele tiko leri fularheleke N’wana wa xona. ‘Tiko leri ra Israyele hi ndlela ya nyama’ a ri nga ha ta tivula tiko leri tinyiketeleke eka Xikwembu.—1 Vakorinto 10:18; Matewu 21:43.

Ntwanano wa Nawu a wu herisiwe hi 33 C.E., kambe nkarhi wa leswaku Xikwembu xi kombisa Vayuda tintswalo to hlawuleka a wu helanga hi lembe rero.a Nkarhi wolowo a wu ta ya emahlweni ku fikela hi 36 C.E., loko Petro a chumayele Korneliyo wa le Italiya, loyi yena ni vandyangu wa yena a va chava Xikwembu, swin’we ni Vamatiko van’wana. (Mintirho 10:1-48) Xana a xi ri xihi xisekelo xa leswaku va kombiwa tintswalo?

Daniyele 9:27 yi ri: “[Mesiya] u fanele a hlayisa ntwanano wu tirha eka vo tala, ku ringana vhiki rin’we.” Ntwanano lowu a wu ta ya emahlweni wu tirha ku ringana malembe ya nkombo kumbe “vhiki rin’we” ku sukela loko Yesu a khuvuriwile niloko Mesiya a sungula ntirho wo chumayela erivaleni hi 29 C.E., a ku ri ntwanano wa Abrahama. Vatukulu va Abrahama, lava nga Vaheveru, hi vona ntsena lava a va faneleka ku va eka ntwanano wolowo. Ntwanano wolowo lowu a wu nga katsi vanhu hinkwavo a wu nga endli leswaku munhu a va la tinyiketeleke eka Yehovha. Hikwalaho, vapfumeri va Vayuda lava khuvuriweke endzhaku ka nkulumo ya Petro hi Pentekosta ya 33 C.E., hambileswi a va amukeleka hi ndlela yo hlawuleka hileswi a va ri Vayuda va ntumbuluko, a va nga ha faneleki ku tivula lava tinyiketele eka Xikwembu loko ntwanano wa Nawu se wu herisiwile. Munhu a a fanele a tinyiketela eka Xikwembu hi yexe.

Ku tinyiketela ka Muyuda ni muproselita ha un’we loko a khuvuriwa hi siku ra Pentekosta ya 33 C.E. a ku ri ka nkoka hikwalaho ka xivangelo xin’wana. Muapostola Petro u khutaze vayingiseri va yena leswaku va hundzuka va tlhela va khuvuriwa hi vito ra Yesu. Sweswo a swi lava leswaku va fularhela mahanyelo ya misava kutani va amukela Yesu tanihi Hosi tlhelo Mesiya, tanihi Muprista Lonkulu, loyi a tshameke evokweni ra xinene ra Xikwembu etilweni. A va fanele va vitana vito ra Yehovha Xikwembu leswaku va ponisiwa ha Kreste Yesu, leswi lavaka leswaku va kombisa ripfumelo eka Kreste ni ku n’wi teka a ri Murhangeri wa vona. Xisekelo xa ku va ni vuxaka ni Xikwembu ni xa ku rivaleriwa swidyoho se a xi hundzukile. Muyuda un’wana ni un’wana la pfumelaka a a fanele a amukela lunghiselelo leri lerintshwa. Njhani? Hi ku tinyiketela eka Xikwembu ni ku kombisa ku tinyiketela koloko erivaleni hi ku khuvuriwa hi vito ra Yesu Kreste. Nkhuvulo a wu ri xikombiso xa ku tinyiketela ka vona eka Xikwembu, a wu va endla leswaku va va ni vuxaka lebyintshwa na xona ha Yesu Kreste.—Mintirho 2:21, 33-36; 3:19-23.

[Nhlamuselo ya le hansi]