Tshinela Eka Xikwembu
Xitiyisekiso Xa Leswaku Xikwembu Xa Hi Rhandza
ABRAHAMA a a rhandza Xikwembu. Naswona wanuna yoloye wo tshembeka a a n’wi rhandza Isaka, n’wana wakwe wa jaha loyi a n’wi velekeke loko se a dyuharile. Kambe loko Isaka a ri ni malembe ya kwalomu ka 25, Abrahama u ringiwe ku endla nchumu lowu a wu nga fambisani nikatsongo ni rirhandzu ra ntumbuluko leri tatana a nga na rona. Xikwembu xi n’wi byele leswaku a endla gandzelo hi n’wana wakwe. Hambiswiritano, Isaka a nga dlayiwanga. Loko ku sele katsongo ku va Abrahama a dlaya n’wana wakwe, Xikwembu xi nghenelerile hi ku rhumela ntsumi. Rungula leri leri tsariweke eka Genesa 22:1-18, ri yi kombise katsongo mhaka leyi nga ya vuprofeta ya ndlela leyi Xikwembu xi hi rhandzaka ha yona.
Ndzimana yo sungula yi ri: “Xikwembu . . . xi ringa Abrahama.” Abrahama a a ri ni ripfumelo leri tiyeke kambe hi nkarhi wolowo ripfumelo ra yena a ri ta ringiwa hi ndlela leyikulu. Xikwembu xi te: “Ndzi kombela u teka n’wana wa wena, n’wana wa wena loyi u n’wi rhandzaka swinene, Isaka . . . u n’wi nyikela a va gandzelo ro hisiwa eka yin’wana ya tintshava leyi ndzi nga ta ku hlawulela yona.” (Ndzimana 2) Tsundzuka, Xikwembu a xi pfumeleli malandza ya xona ma ringiwa hi ndlela leyi ma nga ta ka ma nga yi tiyiseleli. Kutani Xikwembu a xi tshemba leswaku Abrahama u ta swi kota ku hlula ndzingo wolowo.—1 Vakorinto 10:13.
Abrahama u nambe a endla hilaha a a lerisiwe hakona. Ha hlaya: “Abrahama a pfuka nimpundzu swinene a bohela mbhongolo yakwe, a teka ni vatirhi vakwe vambirhi na Isaka n’wana wakwe; a pandzela ni tihunyi ta gandzelo ro hisiwa. Kutani a suka a yima a teka riendzo.” (Ndzimana 3) Swi le rivaleni leswaku Abrahama a nga byelanga munhu hi vuxokoxoko bya ndzingo lowu.
Kutani Abrahama u teke riendzo leri a ri ta teka masiku manharhu naswona a a ri ni nkarhi lowu ringaneke wo anakanyisisa swinene hi mhaka leyi. Kambe sweswo a swi n’wi endlanga a lava ku tshika ku endla leswi a a tiyimisele ku swi endla. Marito lawa a ma vuleke ma kombise leswaku a a ri ni ripfumelo leri tiyeke. Loko a vona ntshava leyi a hlawuleriweke yona a ha ri ekule, u byele malandza yakwe a ku: “Tshamani laha . . . , kambe mina ni mufana hi lava ku tlhandlukela lahaya hi ya gandzela kutani hi ta tlhelela eka n’wina.” Loko Isaka a vutise leswaku yi kwihi nyimpfu leyi a ku ta endliwa gandzelo ha yona, Abrahama u te: “Xikwembu xi ta lunghiselela hi xoxe nyimpfu.” (Tindzimana 5, 8) Abrahama a a tshemba leswaku u ta tlhela ni n’wana wakwe. Ha yini? Hikuva “a a anakanya leswaku Xikwembu a xi ta swi kota ku n’wi pfuxa [Isaka] hambi ku ri eka lava feke.”—Vaheveru 11:19.
Loko va ri entshaveni, Abrahama u teke “mukwana . . . leswaku a ta dlaya n’wana wakwe,” kambe ntsumi yi n’wi tshikisile. Kutani Xikwembu xi kombe Abrahama khuna leri a ri phasekile eswikhwatanini leswaku a ta endla ha rona magandzelo “ematshan’weni ya n’wana wakwe.” (Tindzimana 10-13) Entiyisweni, eka Xikwembu a swi fana ni loko se Isaka a nyikeriwile. (Vaheveru 11:17) Mukambisisi un’wana u te: “Eka Xikwembu, ndlela leyi Abrahama a a tiyimisele ha yona ku nyikela hi n’wana wakwe a swi fana ni loko se a nyikerile ha yena.”
Abrahama a nga n’wi khomisanga ribye Yehovha. Naswona Abrahama u katekisiwile hileswi a tshembeke Yehovha, hikuva U tlhele a vulavula hi vuenti hi ntwanano lowu a wu endleke na Abrahama, ku nga xitshembiso xa leswaku vanhu va matiko hinkwawo va ta katekisiwa.—Tindzimana 15-18.
Xikwembu a xi n’wi pfumelelanga Abrahama leswaku a endla gandzelo hi n’wana wakwe, kambe endzhaku ka nkarhi xona a xi ta nyikela hi n’wana wa xona leswaku a va gandzelo. Ku tiyimisela ka Abrahama ku nyikela hi Isaka a swi fanekisela ku va Xikwembu xi nyikela hi Yesu, N’wana wa xona la tswariweke a ri swakwe, hikwalaho ka swidyoho swa hina. (Yohane 3:16) Gandzelo ra Kreste i xitiyisekiso xa leswaku Yehovha wa hi rhandza. Leswi Xikwembu xi hi endleleke gandzelo ro tano, hi fanele hi tivutisa, ‘Hi swihi leswi ndzi tiyimiseleke ku swi endla leswaku ndzi tsakisa Xikwembu?’