Tshinela Eka Xikwembu

Muhetisisi Wa Switshembiso

YOXUWA 23:14

XANA swa ku tikela ku tshemba vanhu van’wana? Khombo ra kona hileswaku mfanelo ya ku tshembana a ya ha vonaki emisaveni leyi hi hanyaka eka yona. Loko u tshame u khunguvanyisiwa hi munhu loyi a wu n’wi tshemba—kumbexana hikwalaho ka leswi a nga ku hembela kumbe hikwalaho ka leswi a nga swi hetisisangiki switshembiso swakwe—sweswo swi nga va swi endle leswaku u nga ha tshembi munhu. Hambiswiritano, u kona loyi u nga n’wi tshembaka naswona a nga ta ka a nga ku khomisi tingana. Swivuriso 3:5 yi hi khutaza yi ku: “Tshemba Yehovha hi mbilu ya wena hinkwayo.” Ha yini Yehovha a faneriwa hi ku tshembiwa ku tlula vanhu hinkwavo? Leswaku hi hlamula xivutiso lexi, a hi kambisiseni marito ya Yoxuwa—wanuna loyi a a tshemba Yehovha hi ku helela—lama nga eka Yoxuwa 23:14.

Anakanya hi xiyimo lexi Yoxuwa a a ri eka xona. Yoxuwa, murhangeri wa tiko ra Israyele loyi a tlhandlameke Muxe, se a a ri ekusuhi no fika emalembeni ya 110. Loko a ri karhi a kula, u vone mintirho leyikulu ya matimba leyi Yehovha a yi endleleke tiko ra Israyele, ku katsa ni ku ponisiwa eLwandle ro Tshuka hi singita kwalomu ka malembe ya 60 lama nga hundza. Loko a anakanyisisa hi mhaka leyi, Yoxuwa u vitane ‘vakulukumba va tiko ra Israyele ni varhangeri va rona ni vaavanyisi va rona ni tindhuna ta rona.’ (Yoxuwa 23:2) Marito lawa sweswi a ma vulaka a ma kombisi ntsena vutlhari lebyi a nga lo velekiwa na byona, kambe ma kombisa ni vutlhari bya ku anakanyisisa hi mbilu leyi teleke ripfumelo.

Yoxuwa u ri: “Namuntlha ndzi famba hi ndlela ya misava hinkwayo.” Xiga lexi nge “ndlela ya misava hinkwayo” xi vula rifu. Entiyisweni, Yoxuwa a a ku: “A ndzi nge he hanyi nkarhi wo leha.” Tanihi leswi a swi tiva leswaku u ta fa ku nga ri khale, Yoxuwa u hete nkarhi wo leha a ri endhawini leyi rhuleke a ri karhi a anakanyisisa hi vutomi byakwe. Hi wahi marito yo hetelela lawa a a lava ku ma byela vagandzeri-kulobye?

Yoxuwa u ye emahlweni a ku: “A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina. A ku wanga ni rito rin’we eka wona.” Lawa i marito lama vuriweke hi wanuna loyi a a tshemba Xikwembu hi ku helela. Ha yini a vule marito wolawo? Loko a anakanya hi swilo hinkwaswo leswi a swi voneke, Yoxuwa u swi xiyile leswaku minkarhi hinkwayo Yehovha wa swi hetisisa switshembiso Swakwe.a Xivangelo xo va a vule marito wolawo xi le rivaleni: Yoxuwa a a lava leswaku Vaisrayele-kulobye va va ni ripfumelo leri tiyeke ra leswaku switshembiso hinkwaswo leswi Yehovha a va tshembiseke swona swi ta hetiseka.

Loko buku yin’wana ya tinhlamuselo ta Bibele yi vulavula hi Yoxuwa 23:14 yi ri: “Ehleketa hi switshembiso hinkwaswo leswi nga eBibeleni; swiendlakalo leswi nga endleka hi ku landzelelana swa misava; naswona u kambisisa ni swivumbiwa hinkwaswo, u nge kumi hambi ku ri xin’we xa swona leswi Xikwembu xi nga swi tlula kumbe xi nga rivala ku swi hetisisa.” Loko na hina a ho swi kota ku endla ndzavisiso lowu fanaka, a hi ta ma vula marito lawa Yoxuwa a nga ma byela Vaisrayele—hambi ko ba lexi dumaka, switshembiso swa Yehovha swa hetiseka.—1 Tihosi 8:56; Esaya 55:10, 11.

Bibele yi ni switshembiso swo tala leswi Xikwembu xi swi hetisiseke, ku katsa ni swin’wana leswi hi swi vonaka swi hetiseka. Hi hala tlhelo, yi ni switshembiso leswi nga ta hetiseka enkarhini lowu taka.b Ha yini u nga tiendleli ndzavisiso wolowo hi wexe? Ku dyondza Bibele swi ta ku pfuna u swi xiya leswaku swi fanerile ku va u tshemba Muhetisisi wa switshembiso.

[Tinhlamuselo ta le hansi]