Leswi Ku Tiva Vito Ra Xikwembu Swi Katsaka Swona

XANA vito ra wena ri ni nhlamuselo yo karhi? Ematikweni man’wana, swi tolovelekile ku va n’wana a thyiwa vito leri nga ni nhlamuselo yo karhi. Vito leri vatswari va ri thyaka n’wana wa vona ri nga ha kombisa leswi va swi pfumelaka ni leswi va swi tekaka swi ri swa nkoka kumbe leswi va n’wi navelelaka swona.

Mukhuva wo va vanhu va thyiwa mavito lama nga ni tinhlamuselo to karhi i khale wu ri kona. Eminkarhini ya Bibele, hakanyingi vanhu a va nyikiwa mavito hi ku ya hi leswi va nga ta swi endla. Mavito ma nga ha yimela ntirho kumbe vutihlamuleri lebyi munhu a nga ta va na byona evuton’wini. Hi xikombiso, loko Yehovha a byela Davhida hi ntirho lowu n’wana wakwe Solomoni a a ta wu endla enkarhini lowu taka u te: “Vito rakwe u ta va Solomoni [leswi vulaka “Ku Rhula”], ndzi ta nyika Israyele ku rhula ni ku tshamiseka emasikwini yakwe.”—1 Tikronika 22:9.

Minkarhi yin’wana Yehovha a a thya munhu vito lerintshwa hikwalaho ka vutihlamuleri lebyintshwa lebyi a a ta byi hetisisa. Nsati wa Abrahama loyi a a ri mhika u thyiwe vito leri nge Sara, leri vulaka “Hosi Ya Xisati.” Ha yini? Yehovha u te: “Ndzi ta n’wi katekisa ndzi tlhela ndzi ku nyika n’wana hi yena; ndzi ta n’wi katekisa naswona u ta va matiko; tihosi ta matiko ti ta huma eka yena.” (Genesa 17:16) Kutani ku twisisa leswaku ha yini Sara a thyiwe vito lerintshwa swi ta hi pfuna leswaku hi twisisa vutihlamuleri lebyintshwa lebyi a a ta byi hetisisa.

Ku vuriwa yini hi vito leri nge Yehovha leri tlakukeke ku tlula mavito hinkwawo? Xana ri vula yini? Loko Muxe a vutisa Xikwembu hi vito ra xona, xi te: “Ndzi ta tikombisa ndzi ri lexi ndzi nga ta tikombisa ndzi ri xona.” (Eksoda 3:14) Vuhundzuluxeri bya Rotherham byi hundzuluxela xiga lexi hi ndlela leyi: “Ndzi ta hundzuka xin’wana ni xin’wana lexi ndzi tsakelaka ku va xona.” Vito leri nge Yehovha ri kombisa leswaku i Xikwembu lexi hetisisaka mintirho yo tala. Xiya xikombiso lexi landzelaka: Siku ni siku manana a nga ha boheka ku endla mintirho yo tala leswaku a khathalela vana vakwe, a nga ha va muongori, musweki tlhelo mudyondzisi hi ku ya hi xilaveko lexi vaka kona. Swi tano ni hi Yehovha, hambileswi a nga endhawini leyi tlakukeke swinene. Leswaku a hetisisa xikongomelo xakwe hi vanhu, a nga ha va xin’wana ni xin’wana lexi a lavaka ku va xona, a endla ntirho wun’wana ni wun’wana lowu faneleke wu endliwa. Ku tiva vito ra Xikwembu swi katsa ku twisisa ni ku tlangela leswi xi swi endlaka.

Lexi twisaka ku vava hileswaku vanhu lava nga ri tiviki vito ra Xikwembu a va swi tivi leswi vito ra xona ri yimelaka swona. Hambiswiritano, ku dyondza Bibele swi nga endla leswaku u twisisa mintirho ya Yehovha yo tanihi ku va Mutsundzuxi la tlhariheke, Muponisi la nga ni matimba ni Munyiki la nga ni malwandla, ku katsa ni swin’wana. Hakunene leswi vito ra Xikwembu ri yimelaka swona swa hlamarisa.

Nilokoswiritano, a hi minkarhi hinkwayo swi olovaka ku tiva vito ra Xikwembu. Xihloko lexi landzelaka xi ta hlamusela xivangelo xa kona.