Lexi Endleke Leswaku Yesu A Hlwela Ku Fika

YESU u byeriwe leswaku munghana wakwe lonkulu Lazaro wa vabya swinene. Vasesi wa Lazaro, ku nga Mariya na Marta, va rhumele munhu leswaku a ya byela Yesu hi mhaka leyi. Munhu yoloye a a huma eBetaniya, laha ndyangu wa ka va Lazaro a wu tshama kona. Vasesi vakwe a va tiyiseka leswaku Yesu u ta n’wi hanyisa makwavo wa vona, hambileswi a va tshama ekusuhi ni Nambu wa Yordani lowu a wu ri ekule ni laha Yesu a a ri kona. A va swi tiva leswaku Yesu u tshame a hanyisa vanhu lava a va ri ekule na yena.—Matewu 8:5-13; Yohane 11:1-3.

Loko munhu yoloye a fika laha Yesu a a ri kona kutani a n’wi byela mahungu lawa yo vava, Yesu a nga endlanga nchumu ha wona. Bibele yi ri: “Kunene a tshama masiku mambirhi endhawini leyi a a ri eka yona.” (Yohane 11:6) Xana wa swi tiva leswi endleke leswaku Yesu a hlwela ku ya pfuna Lazaro?—a A hi kambisiseni mhaka leyi.

Yesu a a swi tiva leswaku Lazaro u file hikwalaho ka leswi a a vabya, kutani u byele vaapostola vakwe a ku: “A hi tlheleleni eYudiya.” Kambe va arile va ku: “Ku nga ri khale Vayudiya a va lava ku ku khandla hi maribye, kambe wa ha tlhelela kona ke?” Yesu u te: “Lazaro nakulorhi u ye eku wiseni, kambe ndzi ya kona leswaku ndzi n’wi pfuxa evurhongweni.”

Vaapostola va angule va ku: “Hosi, loko a ye eku wiseni, u ta hanya.” Hiloko Yesu a ku: “Lazaro u file.” Hiloko a va byela mhaka leyi va hlamariseke a ku: “Ndza tsaka hikwalaho ka n’wina hikuva a ndzi nga ri kona . . . Kambe a hi yeni eka yena.”

Hi xivindzi Tomasi u te: “A hi yeni, leswaku hi ta fa na yena.” Tomasi a a swi tiva leswaku valala va ta tlhela va ringeta ku dlaya Yesu naswona na vona swi nga ha endleka leswaku va va dlaya. Nilokoswiritano, va fambe na yena. Endzhaku ka masiku mambirhi kumbe ku tlula, va fike eBetaniya laha Lazaro a a tshama kona. A swi teka tikhilomitara ta kwalomu ka tinharhu ku suka eYerusalema ku ya eBetaniya.—Yohane 11:7-18.

Xana wa swi tiva leswaku ha yini Yesu a a tsakile leswi a hlweleke ku fika?— Phela ku ni vanhu lava Yesu a nga tshama a va pfuxa, kambe a vo va ni tiawara ti nga ri tingani ntsena va file. (Luka 7:11-17, 22; 8:49-56) Kambe ntsumbu wa Lazaro se a wu ri ni masiku ya mune wu ri esirheni. A nga kona loyi a a kanakana leswaku Lazaro u file!

Loko Marta a twa leswaku Yesu u le kusuhi ni muti wa Betaniya, u tsutsume a n’wi hlanganisa. Hiloko a ku: “Hosi, loko a wu ri kona laha, makwerhu ingi a nga fanga.” Yesu u n’wi chavelele a ku: “Makwenu u ta pfuka.” Marta u tsutsume a ya byela sesi wakwe Mariya exihundleni a ku: “Mudyondzisi u fikile, wa ku vitana.”

Mariya u lo namba a suka a ya eka Yesu. Leswi ntshungu a wu ehleketa leswaku Mariya u ya esirheni, wu n’wi landzerile. Loko Yesu a vona Mariya ni ntshungu lowu a wu ri na yena wu rila, hiloko na yena a “humesa mihloti.” Swi nga si ya kwihi, hinkwavo se a va ri esirheni leri a ri pfariwe hi ribye lerikulu. Loko va fika, Yesu u te: “Susani ribye.” Kambe Marta u arile a ku: “Hosi, u fanele se a nun’hwa hikuva swi endla mune wa masiku” a file.

Vanhu va yingise Yesu kutani va susa ribye. Endzhaku ka sweswo, u sungule ku khongela, a nkhensa Xikwembu ka ha ri emahlweni hi matimba lawa a a swi tiva leswaku xi ta n’wi nyika wona leswaku a pfuxa Lazaro. U huwelele hi “rito lerikulu a ku: ‘Lazaro, huma!’” Hiloko Lazaro a huma, a “boheleriwe hi swo tsondzela.” Kutani Yesu a ku eka vona: “N’wi ntshunxeni, mi n’wi tshika a famba.”—Yohane 11:19-44.

Xana sweswi se wa swi twisisa leswaku ha yini Yesu a hlwele ku fika?— A a swi tiva leswaku sweswo swi ta endla leswaku vanhu va dzunisa Tata wakwe, ku nga Yehovha. Leswi a nga hlawula nkarhi lowunene, vo tala va ve vagandzeri va Xikwembu. (Yohane 11:45) Xana wa swi xiya leswi hi swi dyondzaka eka xikombiso xa Yesu?—

Na wena u nga swi kota ku hlawula nkarhi lowunene wo chumayela leswaku u byela vanhu hi swilo leswinene leswi Xikwembu xi swi endleke ni leswi xi nga ta swi endla enkarhini lowu taka. Kumbexana u nga ha swi byela swichudeni-kulobye kumbe vadyondzisi va wena. Hambi hi nkarhi wa xikolo, vantshwa van’wana va tirhisa nkarhi lowu va pfulekelaka leswaku va byela van’wana hi mikateko leyi Mfumo wa Xikwembu wu nga ta yi tisela vanhu. I ntiyiso leswaku a wu nge swi koti ku pfuxa vanhu lava feke, kambe u nga swi kota ku pfuna van’wana leswaku va dyondza hi Xikwembu lexi nga ta pfuxa varhandziwa va hina lava feke.