Xana Xikwembu Xi Tshama eNdhawini Yin’we?

Vukhongeri byo hambana-hambana byi hlamusela Xikwembu tanihi lexi kumekaka kun’wana ni kun’wana, ku nga rito leri hlamuselaka leswaku Xikwembu xi kumeka etindhawini hinkwato hi nkarhi wun’we. Hi xikombiso, New Catholic Encyclopedia yi kombetela eka Xikwembu tanihi “lexi nga kona naswona hi xona lexi endlaka leswaku swilo hinkwaswo swi va kona.” Hilaha ku fanaka, John Wesley, musunguri wa Kereke ya Methodist, u tsale rungula leri nga ni nhloko-mhaka leyi nge, “Eka Xikwembu Lexi Kumekaka Kun’wana Ni Kun’wana” leri eka rona a vuleke leswaku “ku hava ndhawu, leyi nga ni swipimelo kumbe leyi nga riki na swipimelo swa ntumbuluko, leyi Xikwembu xi nga kumekiki eka yona.”

Xana Bibele yi dyondzisa yini? Xana Xikwembu xi kumeka kun’wana kun’wana etindhawini hinkwato etilweni, emisaveni hambi ku ri eka muxaka wa vanhu hi nkarhi wun’we?

Entiyisweni, Bibele yi vula leswaku Xikwembu xi ni ndhawu leyi xi tshamaka eka yona, ku nga matilo. Yi vulavula hi xikhongelo xa Hosi Solomoni lexi eka xona a khongeleke eka Xikwembu a ku: “Onge wena u nga swi yingisa u ri ematilweni, ndhawu ya wena yo tshama eka yona.” (1 Tihosi 8:43) Loko Yesu Kreste a dyondzisa vadyondzisiwa vakwe ndlela yo khongela, u va byele leswaku va fanele va kongomisa swikhongelo swa vona eka “Tata wa hina la nge matilweni.” (Matewu 6:9) Bibele yi vula leswaku endzhaku ka ku pfuxiwa kakwe, Kreste u nghene “etilweni hi koxe, kutani a humelela emahlweni ka Xikwembu hi xiviri.”—Vaheveru 9:24.

Tindzimana leti ti swi veka erivaleni leswaku Yehovha Xikwembu a nga tshami kun’wana ni kun’wana, kambe u tshama etilweni ntsena. Entiyisweni, Xikwembu a xi tshami eka atimosifiya leyi rhendzeleke misava kumbe empfhukeni lowukulu. Matilo ya xiviri a ma nge n’wi ringani Muvumbi wa vuako. (1 Tihosi 8:27) Bibele yi hi byela leswaku “Xikwembu i Moya.” (Yohane 4:24) Xi tshama etilweni laha ku nga xivandla xa moya lexi nga riki xiphemu xa vuako bya xiviri.—1 Vakorinto 15:44.

Xana ku vuriwa yini hi tindzimana ta Bibele leti vulaka leswaku Xikwembu xi kumeka kun’wana ni kun’wana? Hi xikombiso, hilaha swi tsariweke hakona eka Pisalema 139:7-10, Davhida u vule leswi malunghana ni Xikwembu: “Xana ndzi nga ya kwihi ndzi balekela moya wa wena, naswona ndzi nga ya kwihi ndzi balekela xikandza xa wena? Loko ndzo tlhandlukela etilweni, u ta va u ri kona; loko ndzo andlala sangu ra mina eSheol, waswivo, u ta va u ri kona. Loko ndzo teka timpapa ta vurhonga, leswaku ndzi ta tshama elwandle leri nga ekule ngopfu, ni kwalaho voko ra wena ri ta ndzi kongomisa.” Entiyisweni, xana tindzimana leti ti kombisa leswaku Xikwembu xi kumeka kun’wana ni kun’wana, eka tin’wana ta tindhawu leti boxiweke laha henhla?

Xiya leswaku eku sunguleni Davhida u vutise a ku: “Xana ndzi nga ya kwihi ndzi balekela moya wa wena?”a Hi ku tirhisa moya wa xona lowo kwetsima, Xikwembu xi nga vona nchumu wun’wana ni wun’wana ni ku tirhisa matimba ya xona kun’wana ni kun’wana, handle ko ya endhawini yoleyo hi ku kongoma kumbe ku tshama eka yona. Hi xikombiso: Emalembeni ya sweswinyana van’wasayense va kote ku kambela misava eka pulanete ya Mars, laha swi endlaka tikhilomitara ta timiliyoni ku suka eMisaveni. Njhani? Ku nga ri ku ya kona hi ku kongoma, kambe hi ku kambisisa swinepe hi vuenti ni rungula ra swilo leswi rhumelaka rungula ri tlhelela eMisaveni hi ku tirhisa xibamubamu lexi rhumeriwaka eka Mars.

Hilaha ku fanaka, Yehovha Xikwembu a nga fanelanga a va kun’wana ni kun’wana, leswaku a kota ku vona nchumu wun’wana ni wun’wana lowu endlekaka evuakweni. Rito ra Xikwembu ri ri: “A xi kona xivumbiwa lexi nga vonakiki emahlweni ka xona.” (Vaheveru 4:13) Moya lowo kwetsima wa Yehovha wu nga kumeka kun’wana ni kun’wana, wu n’wi pfumelela leswaku a vona swilo hinkwaswo ni ku hetisisa xikongomelo xakwe, a ri “endhawini ya [yena] yo kwetsima” ematilweni.—Deteronoma 26:15.