“Swilo Swo Sungula A Swi Nge Tsundzukiwi”

SWILO leswi hi swi tsundzukaka swi nga ha va leswi tsakisaka. Ku anakanyisisa hi minkarhi yo tsakisa leyi hi veke na yona ni vanhu lava hi va rhandzaka swi nga hi endla hi tsaka swinene. Kambe minkarhi yin’wana swilo leswi hi swi tsundzukaka swi nga ha va leswi vavaka. Xana u tsundzuka swilo swo vava leswi ku humeleleke enkarhini lowu hundzeke? Loko swi ri tano, u nga ha tivutisa u ku: ‘Xana swilo leswi swo vava leswi ndzi swi tsundzukaka swi ta kala swi suka emianakanyweni ya mina?’ Hi kuma nhlamulo leyi tiyisaka swinene emaritweni lama tsariweke hi muprofeta Esaya.—Hlaya Esaya 65:17.

Xikongomelo xa Yehovha i ku herisa swilo leswi endlaka leswaku hi tsundzuka swilo leswi vavaka. Njhani? Hi ku herisa misava leyi yo homboloka swin’we ni maxangu ya yona kutani a yi siva hi misava leyi nga ta tshama yi ri leyi lulameke hilaha ku nga heriki. Hi ku tirhisa Esaya, Yehovha u tshembisa a ku: “Ndzi tumbuluxa matilo lamantshwa ni misava leyintshwa.” Ku twisisa xikongomelo lexi swi nga endla leswaku hi va ni ntshembo.

I yini matilo lamantshwa? Bibele yi hi nyika tinhla timbirhi leti nga hi pfunaka ku kuma nhlamulo. Yo sungula, mhaka ya matilo lamantshwa yi vuriwe hi vatsari van’wana vambirhi va Bibele naswona eka minkarhi leyi hayimbirhi marito lawa ma fambisana ni ku cinca lokukulu laha misaveni. (2 Petro 3:13; Nhlavutelo 21:1-4) Ya vumbirhi, eBibeleni rito leri nge “matilo” ri nga yimela vulawuri kumbe hulumendhe. (Esaya 14:4, 12; Daniyele 4:25, 26) Kutani matilo lamantshwa i hulumendhe leyintshwa leyi nga ni vuswikoti byo simeka vululami emisaveni. Ku ni vulawuri byin’we lebyi nga kotaka ku hetisisa swilo leswi hinkwaswo, ku nga Mfumo wa Xikwembu, lowu nga hulumendhe ya le tilweni leyi Yesu a hi dyondziseke ku yi khongelela. Mfumo wolowo wu ta endla leswaku ku rhandza ka Xikwembu loku lulameke ku endliwa emisaveni hinkwayo.—Matewu 6:9, 10.

I yini misava leyintshwa? Xiya tinhla timbirhi ta le Matsalweni leti nga hi pfunaka ku fikelela makumu lamanene. Yo sungula, minkarhi yin’wana eBibeleni rito leri nge “misava” ri vula vanhu ku nga ri xirhendzevutana xa misava. (Pisalema 96:1) Ya vumbirhi, Bibele yi profete leswaku ehansi ka mfumo wa Xikwembu, vanhu lava tshembekeke va ta dyondza vululami lebyi nga ta hangalaka ni misava hinkwayo. (Esaya 26:9) Xisweswo, misava leyintshwa yi vula vanhu lava nga ta tiveka ehansi ka mfumo wa Xikwembu va tlhela va hanya hi ku pfumelelana ni milawu ya xona yo lulama.

Xana wa yi vona ndlela leyi Yehovha a nga ta swi herisa ha yona swilo leswi endlaka leswaku hi tsundzuka swilo leswi vavaka? Ku nga ri khale, Yehovha u ta xi hetisisa hi ku helela xitshembiso xa matilo lamantshwa ni misava leyintshwa, a simeka misava leyintshwa yo lulama.a Emisaveni yoleyo leyintshwa, swilo leswi endlaka leswaku hi tsundzuka swilo leswi vavaka—leswi hi endlaka hi xaniseka hi tlhelo ra nyama, ra mianakanyo ni ra moya—swi ta va swilo swa nkarhi lowu hundzeke. Vanhu lava tshembekeke va ta tiphina hi vutomi lebyi nga heriki naswona va ta tsundzuka swilo swo tsakisa leswi nga ta va swi humelela siku ni siku.

Kambe ku vuriwa yini hi ku vava loku hi tikelaka namuntlha? Xitshembiso xa Yehovha lexi a xi vuleke hi ku tirhisa Esaya xi ya emahlweni xi ku: “Swilo swo sungula a swi nge tsundzukiwi, hambi embilwini a swi nge ti.” Ku vava kun’wana ni kun’wana loku hi hlangavetaneke na kona emisaveni leyi ya khale ku ta nyamalala hakatsongo-tsongo. Xana wa xi tsakela xitshembiso xexo? Loko u xi tsakela, ha yini u nga kumi ndlela leyi u nga tshinelaka eka Xikwembu ha yona lexi ku tshembisaka vumundzuku byo tano lebyi tsakisaka?

Tindzimana ta Bibele leti u nga ti hlayaka hi March:

◼ Esaya 63-66–Yeremiya 1-16

[Nhlamuselo ya le hansi]

[Marito lama tshahiweke exihlokweni lama nga eka tluka 19]

Xikongomelo xa Yehovha i ku herisa swilo leswi endlaka leswaku hi tsundzuka swilo leswi vavaka