Ha Yini Hi Fanele Hi Tirhisa Vito Ra Xikwembu?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

 1. Ha yini Xikwembu xi tinyike vito?

Handle ko kanakana, wa swi rhandza ku vitaniwa hi vito ra wena ematshan’weni ya xithopo xo tanihi lexi nge “tatana,” “nkulukumba” kumbe “manana.” Vito ri pfuna ku ku hambanisa eka vanhu van’wana. Xikwembu xi vitaniwa hi swithopo swo tanihi leswi nge “Hosi leyi Lawulaka,” “Xikwembu xa Matimba Hinkwawo” ni ‘Mutumbuluxi Lonkulu.’ (Genesa 15:2; 17:1; Eklesiasta 12:1) Kambe xi tlhele xi tinyika vito leswaku xi hi pfuna ku va ni vuxaka na xona. Hi Xitsonga vito ra Xikwembu i Yehovha.—Hlaya Esaya 42:8.

Hambileswi vahundzuluxeri vo tala va Bibele va siveke vito ra Xikwembu hi swiga swo tano swo tanihi leswi nge “Xikwembu” ni “Hosi,” vito rero ri kumeka minkarhi ya kwalomu ka 7 000 ematsalweni ya khale ya Xiheveru ya Bibele. Swi le rivaleni leswaku Xikwembu xi lava leswaku vito ra xona ri tiviwa.—Hlaya Esaya 12:4.

 2. Ha yini swi ri swa nkoka ku tiva vito ra Xikwembu?

Ku tiva vito ra Xikwembu swi vula swo tala ku tlula ku tiva ndlela leyi ri vuriwaka ha yona. Ku tiva vito ra Xikwembu swi vula ku va ni vuxaka lebyikulu na xona. Vito leri nge Yehovha ri vula leswaku “U Endla Leswaku Swi Va Kona.” Nhlamuselo ya vito ra Xikwembu i xitiyisekiso xa leswaku Xikwembu xi ta va xin’wana ni xin’wana lexi xi lavaka ku va xona leswaku xi hetisisa swikongomelo swa xona. Kutani, ku tiva vito ra Xikwembu swi vula ku pfumela leswaku Xikwembu xi ta hetisisa switshembiso swa xona. (Pisalema 9:10) Ripfumelo ra vanhu lava tivaka Xikwembu ni ku tirhisa vito ra xona ri va susumetela ku xi tshemba ni ku xi rhangisa evuton’wini bya vona. Yehovha Xikwembu u ta sirhelela vanhu vo tano.—Hlaya Pisalema 91:14.

 3. Ha yini Xikwembu xi lava leswaku vito ra xona ri tiviwa?

Xikwembu xi lava leswaku vanhu va xi tiva hi vito hikuva swi vuyerisa vona. Swi va pfuna ku va vanghana va Xikwembu, va ri ni ntshembo wo hanya hilaha ku nga heriki. A swi hlamarisi leswi Yehovha a lavaka leswaku hi endla vito rakwe ri tiviwa.—Hlaya Yohane 17:3; Varhoma 10:13, 14.

Yesu u endle vito ra Xikwembu ri tiviwa hi ku dyondzisa vanhu tindlela ta xona, milawu ni switshembiso swa xona. Namuntlha, valandzeri va Yesu va ya emahlweni va endla leswaku vito ra Xikwembu ri tiviwa ematikweni hinkwawo. Va endla tano tanihi ‘vanhu lava nga ni vun’we va vito ra Xikwembu.’—Hlaya Mintirho 15:14; Yohane 17:26.

 4. Xana Xikwembu xi ta ri kwetsimisa njhani vito ra xona?

Yehovha Xikwembu u lava ku kwetsimisa vito rakwe hikuva ri onhiwile. Hi xikombiso, vanhu van’wana va vula leswaku a xi tumbuluxanga vutomi naswona a swi bohi leswaku hi xi yingisa. Van’wana va vula leswaku a xi khathali hi hina naswona hi xona xi vangaka ku xaniseka. Vanhu vo tano va onha Xikwembu vito. Kambe sweswo a va nge swi endli hilaha ku nga heriki. Xikwembu xi ta herisa vanhu lava xi onhaka vito.—Hlaya Pisalema 83:17, 18.

Yehovha u ta kwetsimisa vito rakwe loko Mfumo wakwe wu herisa vulawuri hinkwabyo bya vanhu ni ku kondletela ku rhula ni nsirhelelo eka vanhu. (Daniyele 2:44) Ku nga ri khale, un’wana ni un’wana u ta tiva leswaku Yehovha i Xikwembu xa ntiyiso.—Hlaya Ezekiyele 36:23; Matewu 6:9.

Xana u fanele u endla yini? Tshinela eka Xikwembu hi ku dyondza Rito ra xona ni ku tihlanganisa ni vanhu lava xi rhandzaka. Loko Yehovha a kwetsimisa vito rakwe, u ta tsundzuka malandza yakwe yo tshembeka.—Malakiya 3:16.

Leswaku u kuma rungula leri engetelekeke, vona ndzima 1 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 16]

Vito ra Xikwembu eka tsalwa ro sungula ra Xiheveru