“Loyi A Nga . . . Ni Musa U Ta Katekisiwa”

KU NYIKELA switlhavelo i khale ku ri xiphemu xa vugandzeri bya ntiyiso. Vaisrayele a va nyikela switlhavelo hi swiharhi kasi namuntlha Vakreste va nyikela hi “xitlhavelo xa ku dzunisa.” Kambe ku ni switlhavelo swin’wana leswi tsakisaka Xikwembu. (Hev. 13:15, 16) Switlhavelo leswi swi tisa ntsako ni mikateko hilaha hi nga ta swi vona hakona eka rungula leri landzelaka.

Hana, i nandza wo tshembeka wa le nkarhini wa khale naswona a lava n’wana wa jaha hi mbilu hinkwayo kambe a a nga kumi vana. U khongele eka Yehovha a n’wi byela leswaku loko o kuma n’wana u ta “n’wi nyika Yehovha masiku hinkwawo ya vutomi byakwe.” (1 Sam. 1:10, 11) Hi ku famba ka nkarhi Hana u tikile kutani a veleka n’wana wa jaha a n’wi thya Samuwele. Endzhaku ka loko Samuwele a lumuriwile Hana n’wi yise etabernakeleni hilaha a tshembiseke hakona. Yehovha u katekise Hana hikwalaho ka leswi a nyikeleke hi n’wana wakwe. Kutani u katekisiwe hi vana van’wana va ntlhanu naswona Samuwele u ve muprofeta tlhelo mutsari wa Bibele.—1 Sam. 2:21.

Ku fana na Hana na Samuwele, Vakreste namuntlha va ni lunghelo ro tinyiketela ku tirhela Muvumbi wa vona. Nakambe Yesu u tshembise leswaku switlhavelo leswi hi swi nyikelaka evugandzerini bya Yehovha, u ta swi katekisa hi ndlela leyikulu.—Mar. 10:28-30.

Enkarhini wa vaapostola, wansati un’wana wa Mukreste la vuriwaka Dorkasi a a tiveka hi “swiendlo swo tala leswinene naswona a a endla tinyiko to tala ta tintswalo” a pfuna van’wana. Lexi twisaka ku vava “u khomiwe hi vuvabyi kutani a fa,” sweswo swi endle leswaku vandlha ri va ni gome. Loko vadyondzisiwa va twa leswaku Petro a a ri endhawini yoleyo va n’wi kombele leswaku a ta hi xihatla. Anakanya ndlela leyi a va tsake ha yona loko Petro a tile a ta pfuxa Dorkasi loyi a file. Xiendlakalo lexi a ku ri ku pfuxiwa ko sungula loku tsariweke eBibeleni loku endliweke hi muapostola. (Mint. 9:36-41) Xikwembu a xi nga yi rivalanga mitirho leyinene leyi Dorkasi a yi endleke. (Hev. 6:10) Rungula rakwe ra ku hanana ri tsariwe eRitweni ra Xikwembu leswaku ri va xikombiso lexi hi faneleke hi xi tekelela.

Hilaha ku fanaka muapostola Pawulo u hi vekele xikombiso lexinene xo nyikela hi nkarhi wakwe ni ku khathala hi vanhu van’wana. Loko a tsalela Vakreste va le Korinto, Pawulo u te: “Loko ku ri mina ndzi ta tirhisa hinkwaswo leswi ndzi nga na swona hi ku tsaka lokukulu naswona ndzi ta tirhisiwa hi ku helela hikwalaho ka mimoya-xiviri ya n’wina.” (2 Kor. 12:15) Pawulo u swi xiyile leswaku ku tinyiketela ku tirhela van’wana swi endla leswaku munhu a eneriseka kasi xa nkoka ngopfu swi endla leswaku a katekisiwa ni ku amukeriwa hi Yehovha.—Mint. 20:24, 35.

Swi le rivaleni leswaku Yehovha wa tsaka loko hi tirhisa nkarhi wa hina ni matimba ya hina ku endla mitirho ya Mfumo swin’we ni ku pfuna vamakwerhu. Kambe xana ku ni tindlela tin’wana leti hi nga seketelaka ntirho wo chumayela ha tona? Ina! Hi nga tlhela hi kombisa leswaku hi rhandza Xikwembu hi ku nyikela hi rifuwo ra hina. Minyikelo leyi hi yi nyikelaka yi tirhisiwa ku yisa ntirho wo chumayela emahlweni swin’we ni ku khathalela varhumiwa ni lava nga entirhweni wo hlawuleka wa nkarhi hinkwawo. Nakambe tivhidiyo, ku akiwa ka Tiholo ta Mfumo, ntirho wo hundzuluxela mikandziyiso ya hina ni wo phalala swi endliwa hikwalaho ka minyikelo ya hina ya ku tirhandzela. Kutani hi nga tiyiseka leswaku “loyi a nga . . . ni musa u ta katekisiwa.” Ku tlula kwalaho, loko hi nyikela hi swilo swa hina swa nkoka eka Yehovha hi kombisa leswaku ha n’wi xixima.—Swiv. 3:9; 22:9.

Tindlela Leti Van’wana Va Hlawulaka Ku Nyikela Ha Tona Eka Ntirho Wa Misava Hinkwayo

Hilaha a swi ri hakona enkarhini wa muapostola Pawulo vanhu vo tala namuntlha va ‘veka swo karhi etlhelo’ kumbe mali yo karhi leswaku va ta nyikela ha yona eka bokisi leri tsariweke leswi, “Ntirho Wa Misava Hinkwayo” emavandlheni ya vona. (1 Kor. 16:2) N’hweti ni n’hweti, mavandlha ma rhumela minyikelo yoleyo erhavini ra Timbhoni ta Yehovha leri langutelaka tiko ra wona. Nakambe swa koteka leswaku u rhumela minyikelo hi ku kongoma erhavini ra Timbhoni ta Yehovha etikweni ra ka n’wina. Leswaku u tiva laha u faneleke u yi rhumela kona, hi kombela u nghena eka www.jw.org kumbe u fonela rhavi ra Timbhoni ta Yehovha ra le tikweni ra ka n’wina. U nga nyikela hi ku tirhisa tindlela leti landzelaka:

MINYIKELO LEYI NGA RIKI NA SWIPIMELO

U nga nyikela hi ku tirhisa Internet, khadi ra le bangi. Emarhavini man’wana swa koteka ku nyikela hi ku tirhisa jw.org kumbe website yin’wana.
U nga nyikela hi mali, swin’wetsin’wetsi kumbe nhundzu yin’wana ya nkoka. Katsa ni papila leri kombisaka leswaku mali kumbe nhundzu ya kona i minyikelo leyi nga riki na swipimelo.

MINYIKELO LEYI NGA NI SWIPIMELO

U nga nyikela hi mali leyi yi nga ha tlhelaka yi vuyisiwa eka wena loko u yi lava.
Loko u nyikela hi ndlela leyi, katsa ni papila leri hlamuselaka swipimelo swa minyikelo ya kona.

TINDLELA TIN’WANA TO NYIKELA

Handle ka ku nyikela hi mali ni swilo swin’wana swa nkoka, laha hansi ku xaxametiwe tindlela tin’wana leti u nga ha nyikelaka ha tona leswaku u seketela ntirho wo chumayela emisaveni hinkwayo. Loko u nga si nyikela, hi kombela leswaku u rhanga u fonela rhavi leri langutelaka tiko ra ka n’wina leswaku u ta tiva ndlela yo nyikela leyi tirhaka laha u tshamaka kona. Swilaveko swa le nawini ni milawu ya swibalo swa hambana hi ku ya hi tindhawu, hikwalaho vutisa un’wana loyi a nga ni vutivi hi swa nawu u nga si nyikela.

Ndzindzakhombo: Minyikelo yi nga endliwa hi ku tsala rhavi ra Timbhoni ta Yehovha tanihi leri nga ta kuma mali ya ndzindzakhombo wa loko munhu a fa kumbe mali leyi munhu a yi kumaka loko a huma penceni.

Tiakhawunti Ta Bangi: Munhu a nga ha hlela leswaku bangi yi rhumela mali leyi humaka eka akhawunti yakwe erhavini ra Timbhoni ta Yehovha hi ku ya hi ndlela leyi bangi ya le tikweni ra ka n’wina yi tirhisaka xiswona.

Tixere Ni Mali Leyi Lombisiweke Hi Ntswalo (Bonds): Munhu a nga nyikela hi tixere ni mali leyi lombisiweke hi ntswalo eka Timbhoni ta Yehovha. A nga ha tlhela a tsala papila leri vulaka leswaku mali ya kona yi ta tekiwa loko a fa.

Tindlu: Loko munhu a ri ni yindlu leyi nga ha xavisiwaka, a nga ha yi nyikela eka rhavi ra Timbhoni ta Yehovha. Loko a tshama eka yona, a nga ha hlela leswaku a ya emahlweni a tshama kona ku fikela loko a fa.

Ku Nyikela Hi Mali Leyi Vekisiweke: Munhu a nga nyikela hi mali leyi a yi vekiseke erhavini ra Timbhoni ta Yehovha, a tlhela a hlela ku kuma mali yo karhi lembe ni lembe loko a ha hanya. A nga ha kuma phepha ra xibalo leri kombisaka mali ya lembe leyi kokiweke loko a nyikela.

Mapapila Ya Ndzhaka Ni Vulawuri Bya Timali (Wills and Trusts): Munhu a nga ha hlela leswaku mali ya yena kumbe nhundzu ku nyikeriwa ha swona loko a file. A nga endla leswi hi ku landza endlelo ra nawu ro tsala papila leri kombisaka leswaku rhavi ra Timbhoni ta Yehovha ri ta kuma nhundzu kumbe mali ya yena. Lunghiselelo leri ri nga endla leswaku ku nga vi na xibalo.

Tindlela leti kombisiweke laha henhla to nyikela ti kombisa leswaku munhu u fanele a hlela kahle leswaku a kota ku nyikela. U nga kuma rungula leri engetelekeke malunghana ni ku nyikela eka ntirho wa misava hinkwayo wa Timbhoni ta Yehovha eka broxara leyi nge, Charitable Planning to Benefit Kingdom Service Worldwide, leyi kumekaka hi Xinghezi ni hi Xipaniya ntsena. Broxara leyi yi ni tindlela to hambanahambana ta ndlela leyi munhu a nga nyikelaka ha yona. Swi nga endleka leswaku rungula rin’wana leri nga eka broxara leyi ri nga tirhi eka wena hikwalaho ka ku hambana ka milawu ya swibalo kumbe milawu yin’wana ya le tikweni ra ka n’wina. Vanhu vo tala va hoxe xandla leswaku va seketela ntirho wa hina lowu endliwaka emisaveni hinkwayo ni ku va va nga hakeli xibalo hi ku va va nyikela hi yin’wana ya tindlela leti. Loko broxara leyi yi kumeka laha u tshamaka kona, u nga kombela kopi ya yona eka matsalana wa vandlha ra n’wina.

Leswaku u kuma rungula leri engetelekeke, tlika linki leyi nge, “Seketela Ntirho Wa Hina Wa Misava Hinkwayo Hi Ku Nyikela” ehansi ka tlukankulu ra jw.org/ts kumbe u fonela rhavi ra Timbhoni ta Yehovha ra laha u tshamaka kona.