Nongonoko Lowuntshwa Wa Nhlengeletano Yo Hlawuleka Ya Siku Rin’we

Lunghiselelo ra tinhlengeletano to hlawuleka ta siku rin’we ri sungule hi 1987. Tinhlengeletano leti ta siku rin’we ti ve leti akaka eka malandza ya Yehovha ni le ka vanhu lava tsakelaka lava vaka kona. Ku sukela hi September 1998, ku ta va ni nongonoko lowuntshwa wa nhlengeletano yo hlawuleka ya siku rin’we. U ta kuma leswaku tinkulumo ta kaye ni mimbulavurisano yo tala ni mintokoto swi ri leswi pfunaka hi tlhelo ra moya.

Nhloko-mhaka ya nongonoko lowuntshwa yi ri “Kombisa Ku Tlangela Tafula Ra Yehovha.” (Esa. 65:14; 1 Kor. 10:21) Wu ta tiyisa xiboho xa hina lexi hi xi endleke xa leswaku vugandzeri bya Yehovha byi fanele byi va byo rhanga evuton’wini bya hina. (Ps. 27:4) Nkulumo ya mulanguteri wa xifundzha yi ta vulavula hi “Ku Kambisisa Mboyamelo Wa Timbilu Ta Hina” malunghana ni ku va kona eminhlanganweni. Xivulavuri xa muendzi xi ta hi kombisa ndlela yo “Tshama [Hi] Hanyile eMoyeni Hi Ku Dya eTafuleni Ra Yehovha.” Xikhutazo lexinene xi ta tlhela xi nyikiwa vantshwa lava nga enhlengeletanweni ya Yehovha leswaku va tshama va tiyile eku tirheleni Xikwembu. Nkulumo-nkulu ya xivulavuri lexi nga muendzi, leyi nge “Ku Tiyisiwa eMoyeni Leswaku Hi Nyikela Vumbhoni Hi Xivindzi,” yi ta kombisa ndlela leyi malunghiselelo lama endliwaka hi ku tirhisa vandlha ma hi hlomiselaka ha yona ku nyikela vumbhoni malunghana ni Mfumo hi xivindzi. I mani la nga swi laviki ku vuyeriwa eka nongonoko lowu?

Vanhu lava ha ku tinyiketelaka lava navelaka ku khuvuriwa va fanele va tivisa mulanguteri la ungamelaka hi ku hatlisa hilaha swi nga kotekaka hakona. Ha tiyiseka leswaku leswi se hi sungulaka lembe ra vu-12 ra lunghiselelo ra nhlengeletano yo hlawuleka ya siku rin’we, un’wana ni un’wana la nga ta va kona u ta khutaziwa emoyeni leswaku a lunghekela ntirho lowu wa ha taka.