Xana Leswi A Hi Si Tshama Hi Swi Twa?
1 A hi sunguli ku swi twa! Yehovha u phindhe swilo swo tala eRitweni rakwe leswaku vanhu vakwe va vuyeriwa. Hakanyingi, Yesu a a phindha tidyondzo to tala mayelana ni timhaka to hambana-hambana ta Mfumo. Vaapostola vakwe va hambete va pfuxeta timhaka ta moya ni lava a va dzime timitsu entiyisweni.—Rhom. 15:15; 2 Pet. 1:12, 13; 3:1, 2.
2 Enkarhini wa hina, nhlengeletano ya Yehovha yi hlele leswaku timhaka ta risima ti dyondziwa hi ku phindha-phindha eminhlanganweni ya vandlha. Tibuku tin’wana ti dyondziwe hi ku phindha-phindha. Ina, i swa risima ku twa leswi hi tshameke hi swi twa!
3 Ku Phindha-phindha I Swa Risima: Switsundzuxo swa Yehovha swi antswisa ku twisisa ka hina, swi antswisa langutelo ra hina ni ku tiyisa ku tiyimisela ka hina leswaku hi nga hambuki hi tlhelo ra moya. (Ps. 119:129) Ku dyondza mimpimanyeto ya Xikwembu swi fana ni ku tilanguta exivonini. Swi hi pfuna ku tikambisisa kutani hi lwisana ni mboyamelo wa ku va “mutwi loyi a rivalaka.”—Yak. 1:22-25.
4 Loko hi nga tshameli ku titsundzuxa ntiyiso, swilo swin’wana swi ta lawula timbilu ta hina. Hi tiyisiwa hi milawu ya Xikwembu eku lwisaneni ka hina ni nkucetelo lowu onhaka wa misava ya Sathana. (Ps. 119:2, 3, 99, 133; Filp. 3:1) Switsundzuxo leswi hi swi kumaka nkarhi ni nkarhi swa ku hetiseka ka swikongomelo swa Xikwembu, swi hi susumetela ku ‘tshama hi rindzile.’ (Mar. 13:32-37) Ku phindha-phindha mintiyiso ya Matsalwa swi hi pfuna ku tshama endleleni leyi yisaka evuton’wini lebyi nga heriki.—Ps. 119:144.
5 Ndlela Leyi U Nga Vuyeriwaka Ha Yona: Hi fanele hi ‘voyamisela timbilu ta hina eswitsundzuxweni swa Xikwembu.’ (Ps. 119:36) Loko dyondzo leyi hi yi toloveleke yi ta dyondziwa enhlanganweni wa vandlha, hi fanele hi lunghiselela ka ha ri ni nkarhi, hi hlaya matsalwa lama kombisiweke hi tlhela hi anakanyisisa hi ndlela leyi hi nga ri tirhisaka ha yona rungula ra kona. Hi nga tshiki ku lunghiselela mpfuxeto wo tsala wa Xikolo xa Vutirheli bya le Tilweni, a hi fanelanga hi anakanya leswaku a hi wa risima. (Luka 8:18) Hi fanele hi papalata ku nga yingiseli eminhlanganweni ya hina hikwalaho ka leswi hakanyingi ku phindhiwaka mintiyiso ya xisekelo.—Hev. 5:11.
6 Onge hi nga va ni langutelo leri mupisalema a a ri na rona: “Ndzi khanile hi ndlela ya switsundzuxo swa wena, ku fana ni le ka swilo hinkwaswo leswi nga swa nkoka.” (Ps. 119:14) Ina, hi tshame hi swi twa swilo leswi swa risima, naswona swi nga ha endleka hi tlhela hi swi twa. Ha yini? Hikuva Yehovha wa swi tiva leswaku hi fanele hi swi twa!