Nongonoko Lowuntshwa Wa Siku Ra Nhlengeletano Yo Hlawuleka
Loko hi twa ku biwa hungwe ya leswaku ku balekiwa ivi hina hi nga baleki, hi nga weriwa hi khombo. Hikwalaho i swa nkoka swinene leswaku hi landzela nkongomiso wa moya lowu Yehovha a hi nyikaka wona. Mhaka leyi yi ta kandziyisiwa eka siku ra nhlengeletano yo hlawuleka ya lembe ra ntirho leri taka. Nhloko-mhaka ya kona yi ri “Nyikelani Nyingiso Eka Ndlela Leyi Mi Yingisaka Ha Yona.”—Luka 8:18.
Eka nkulumo ya xona yo sungula, xivulavuri lexi nga endza xi ta kandziyisa ndlela leyi ndzayo leyi nga eka tindzima to sungula ta papila leri huhuteriweke ra Pawulo leri yaka eka Vaheveru yi tirhaka ha yona eka hina namuntlha. Eka nkulumo yo gimeta, leyi nge “Tshama U ri Karhi U Yingisa Ndzetelo Wa Xikwembu,” xi ta pfuna hinkwavo leswaku va tikambisisa ku vona loko hakunene va yingisa Yehovha ni N’wana wakwe swin’we ni “hlonga ro tshembeka ni ro tlhariha.”—Mat. 24:45.
Tinkulumo to tala ta nhlengeletano leyi ti ta yi pfuna ngopfu mindyangu. Nkulumo leyi nge “Mindyangu Leyi Yingisaka Rito Ra Xikwembu Yi Nga Kavanyeti Hi Nchumu” yi ta hi pfuna ku papalata swilo swa misava leswaku swi nga hi tsanisi emoyeni. Yi ta va ni mimbulavurisano ya lava va endleke ku cinca ko karhi leswaku va ta kota ku rhangisa timhaka ta moya. Nkulumo leyi nge “Ndlela Leyi Ku Yingisa Rito Ra Xikwembu Ku Tiyisaka Vantshwa Va Hina Ha Yona” yi ta va ni mimbulavurisano ya vantshwa lava yimeleke ntiyiso loko va ri exikolweni, loko va ri ni tintangha ta vona kumbe loko va ri ensin’wini. Xihloko lexi nge “Swihlangi Leswi Yingisaka Xikwembu Ivi Swi Dyondza” xi ta hi pfuna leswaku hi nga byi tekeli ehansi vuswikoti byo dyondza lebyi swihlangi swi nga na byona. Mimbulavurisano leyi nga ta va kona ya swihlangi ni vatswari va swona yi ta hi pfuna leswaku hi vona vuyelo lebyinene lebyi vaka kona loko swihlangi swi dyondzisiwe tindlela ta Yehovha ku sukela evutsongwanini.
Loko Sathana a ri karhi a ‘xisa misava hinkwayo leyi akiweke,’ hi hala tlhelo Yehovha u karhi u komba malandza yakwe lama tshembekaka ndlela leyi ma faneleke ma famba ha yona. (Nhlav. 12:9; Esa. 30:21) Loko hi yingiserisisa ndzayo ya yena hi tlhela hi yi tirhisa evuton’wini bya hina yi ta hi tlharihisa, yi hi nyika ntsako ni ku hi kongomisa evuton’wini lebyi nga heriki.—Swiv. 8:32-35.