Leswi Nga Hi Pfunaka Leswaku Hi Tshika Ku Vilela Ngopfu

KU VILELA ku nga ha fana ni ndzhwalo wo tika etimbilwini ta hina. (Swiv. 12:25) Xana u tshame u titwa u tshikilelekile hikwalaho ko vilela? Xana a wa ha koti nchumu? Loko u titwa tano a wu wexe. Van’wana va hina hi nga va hi khathalela vavabyi, hi feriwe hi xaka, hi weriwe hi mhangu ya ntumbuluko kumbe hi hlangane na swiyimo leswi hi siyeke hi lo lakahla, emiehleketweni ni le mitlhavekweni. I yini leswi nga hi pfunaka hi tshika ku vilela ngopfu?a

Loko hi kambisisa vutomi bya Hosi Davhida hi nga dyondza swo tala leswi nga hi pfunaka hi tshika ku vilela ngopfu. U hlangane ni swiyimo swo tika evuton’wini bya yena naswona mikarhi yin’wana a va lava ni ku nʼwi dlaya. (1 Sam. 17:34, 35; 18:10, 11) I yini lexi pfuneke Davhida a tshika ku vilela ngopfu? Hi nga dyondza yini eka yena?

Davhida u ve ni swiphiqo swo tala hi nkarhi wun’we. Hi xikombiso, xiya xiyimo lexi veke kona loko a ri karhi a baleka Hosi Sawulo loyi a a lava ku n’wi dlaya. Loko Davhida ni vanhu vakwe va vuya hi le nyimpini swi va tseme nhlana loko va kuma leswaku valala va phange nhundzu ya vona, va hisa makaya ya vona ni ku tlhela va tlhakisa mindyangu ya vona. Xana Davhida u endle yini? “Davhida ni vanhu vakwe va sungula ku tlakusa marito va rila swinene kukondza va heleriwa hi matimba.” Xo vava no tlurisa eka Davhida hi leswaku vanhu vakwe a va “vulavula hi ku n’wi khandla hi maribye.” (1 Sam. 30:1-6) Sweswi Davhida a a ri ni swiphiqo swinharhu leswikulu: Ndyangu wakwe a wu ri ekhombyeni, a a chava ku vanhu vakwe va nga n’wi dlaya naswona Hosi Sawulo a ha ri eku n’wi hlongoriseni. Anakanya ndlela leyi Davhida a a tshikileleke hayona!

Xana Davhida u endle yini? U nambe a “titiyisa hi Yehovha Xikwembu xakwe.” Xana u swi endle njhani sweswo? Davhida a a tolovele ku khongela eka Yehovha a kombela mpfuno ni ku tlhela a ehleketisisa hi ndlela leyi A n’wi pfuneke hayona enkarhini lowu nga hundza. (1 Sam. 17:37; Ps. 18:2, 6) Davhida u vone swi fanerile ku lava nkongomiso wa Yehovha kutani u vutise Yehovha leswi a a fanele a swi endla. Endzhaku ka loko Davhida a kume nkongomiso wa Yehovha a nga banga mariri. Hikwalaho ka sweswo, yena ni vanhu vakwe va ponise mindyangu ya vona ni ku tlhela va kuma nhundzu ya vona hikwalaho ko katekisiwa hi Yehovha. (1 Sam. 30:7-9, 18, 19) Xana u swi xiyile swilo swinharhu leswi Davhida a swi endleke? U kombele mpfuno eka Yehovha hi xikhongelo, a ehleketisisa hi ndlela leyi Yehovha a n’wi pfuneke hayona emikarhini leyi nga hundza, ni ku endla leswi a n’wi byeleke swona. Hi nga n’wi tekelela njhani Davhida? A hi kambisiseni tindlela tinharhu.

1. Khongela. Nkarhi na nkarhi loko ku ri ni leswi hi dyisaka mbitsi hi nga khongela eka Yehovha leswaku a hi pfuna ni ku hi nyika vutlhari. Hi nga tirhula ndzhwalo hi ku phofulela Yehovha leswi nga embilwini. Kumbe hi nga ha ba xikhongelo xo koma hi mbilu loko swiyimo swi pfumela. Mikarhi hinkwayo loko hi kombela Yehovha leswaku a hi pfuna hi va hi kombisa leswaku ha n’wi tshemba ku fana na Davhida loyi a nga te: “Yehovha i ribye ra mina ni khokholo ra mina ni Loyi a ndzi ponisaka. Xikwembu xanga i ribye ra mina leri ndzi tumbelaka eka rona.” (Ps. 18:2) Xana xikhongelo xa pfuna hakunene? Makwerhu wa xisati Kahlia loyi a nga phayona u ri: “Endzhaku ko khongela ndzi titwa ndzi pepile emoyeni. Xikhongelo xi ndzi pfuna ndzi languta swilo hi ndlela leyi Yehovha a swi langutaka hayona naswona ndzi ya ndzi n’wi tshemba swinene.” Hakunene xikhongelo i nyiko ya risima leyi humaka eka Yehovha leyi hi pfunaka leswaku hi tshika ku vilela.

2. Ehleketisisa. Loko u ehleketisisa hi leswi endlekeke evuton’wini bya wena, xana yi kona miringo leyi u koteke ku yi hlula hi ku pfuniwa hi Yehovha? Loko hi ehleketisisa hi ndlela leyi Yehovha a hi pfuneke hayona ku katsa ni malandza yakwe ya le mikarhini ya khale hi ta tiya ni ku tlhela hi n’wi tshemba. (Ps. 18:17-19) Nkulu loyi a vitaniwaka Joshua u ri: “Ndzi ni nxaxamelo wa swikhongelo leswi Yehovha a swi hlamuleke. Sweswo swi ndzi tsundzuxa ndlela leyi Yehovha a nga tshama a ndzi pfuna hayona.” Loko hi ehleketisisa hi ndlela leyi Yehovha a nga tshama a hi pfuna hayona hi kuma matimba yo lwisana ni ku vilela.

3. Endla swo karhi. Loko hi nga si teka xiboho, hi nga ha kambisisa Rito ra Xikwembu leswaku ri hi kongomisa. (Ps. 19:7, 11) Vo tala va kume leswaku loko endla va ndzavisiso hi tsalwa ro karhi va kota ku vona ndlela leyi va nga ri tirhisaka hayona evuton’wini bya vona. Nkulu loyi a vitaniwaka Jarrod u ri: “Ku endla ndzavisiso swi ndzi pfuna ndzi vona ndlela leyi ndzimana yin’we yi tirhaka hayona eka swiyimo swo hambanahambana ni ku twisisa leswi Yehovha a ndzi byelaka swona. Leswi swi ndzi pfuna ndzi tshemba leswi ndzi swi hlayaka ni ku ndzi pfuna ndzi endla leswi a swi lavaka.” Loko hi lava nkongomiso wa Yehovha eMatsalweni hi tlhela hi wu yingisa hi ta kota ku jamelana ni ku tshikileleka.

Davhida a a swi twisisa leswaku i Yehovha loyi a nga n’wi pfunaka leswaku a nga ha vileli ngopfu. A a wu tlangela swinene nseketelo wa Yehovha lerova u kale a ku: “Hi matimba ya Xikwembu ndzi nga khandziya khumbi. Xikwembu xa ntiyiso hi xona xi ndzi nyikaka matimba.” (Ps. 18:29, 32) Hi nga ha twa onge maxangu ya hina ma fana ni ntshava leyi hi nga taka hi nga swi koti ku yi gonya. Kambe hi ku pfuniwa hi Yehovha hi nga swi kota ku hlula maxangu wolawo! Loko hi khongela eka Yehovha leswaku a hi pfuna, hi ehleketisisa hi leswi a hi endleleke swona ni ku endla leswi a swi lavaka, hi nga tiyiseka leswaku u ta hi nyika matimba ni vutlhari leswaku hi nga vileli ngopfu!