U Nga Swi Antswisa Njhani Swikhongelo Swa Wena?

 1. Yehovha u lava leswaku vagandzeri vakwe va endla yini? (Nakambe vona xifaniso.)

I MANI loyi hi nga n’wi kombelaka leswaku a hi chavelela ni ku hi kongomisa? Ha yi tiva nhlamulo ya xivutiso xexo. Hi nga vulavula na Yehovha Xikwembu hi xikhongelo. Yehovha u lava leswaku hi endla tano. U lava leswaku hi “[khongela] mikarhi hinkwayo.” (1 Tes. 5:17) Hi nga khongela eka yena hi tshunxekile hi n’wi kombela leswaku a hi kongomisa evuton’wini bya hina. (Swiv. 3:5, 6) Leswi Yehovha a nga Xikwembu lexi hananaka, a nga hi pimeli leswaku hi n’wi khongela kangani.

 2. Hi ta kambisisa yini eka nhlokomhaka leyi?

² Hi yi teka yi ri ya risima nyiko ya xikhongelo. Kambe, leswi hi nga ni swo tala swo swi endla, swi nga hi tikela ku kuma nkarhi wo khongela. Nakambe hi nga ha vona onge hi fanele hi antswisa swikhongelo swa hina. Lexi tsakisaka, Matsalwa ma nga hi kongomisa ni ku hi khutaza swinene. Eka nhlokomhaka leyi, hi ta kambisisa ndlela leyi hi nga tinyikaka nkarhi wo khongela hi ku kambisisa xikombiso xa Yesu. Hi ta tlhela hi bula hi ndlela leyi hi nga antswisaka swikhongelo swa hina hayona hi ku katsa swilo swa ntlhanu swa nkoka.

 3. I yini leswi Yesu a a swi tiva hi xikhongelo?

³ Yesu a a swi tiva leswaku Yehovha u teka xikhongelo xi ri xa nkoka. Khale swinene loko Yesu a nga si ta laha misaveni, u vone Tata wakwe a hlamula swikhongelo swa vavanuna ni vavasati vo tshembeka. Hi xikombiso, Yesu a a ri etlhelo loko Tata wakwe a hlamula swikhongelo leswi humaka embilwini swa Hana, Davhida, Eliya ni van’wana vo tala vo tshembeka. (1 Sam. 1:10, 11, 20; 1 Tih. 19:4-6; Ps. 32:5) Hi yona mhaka leyi Yesu a dyondziseke vadyondzisiwa vakwe ku khongela nkarhi ni nkarhi va nga kanakani.—Mat. 7:7-11.

 4. Hi dyondza yini eka swikhongelo swa Yesu?

⁴ Yesu u vekele vadyondzisiwa vakwe xikombiso lexi va faneleke va xi tekelela eka ndlela leyi a khongeleke hayona eka Yehovha. Loko a endla ntirho wakwe wo chumayela, Yesu a a khongela nkarhi ni nkarhi. Leswi mikarhi yo tala a a tshama a ri ni vanhu naswona a ri ni swo tala swo swi endla, u boheke ku tinyika nkarhi wo khongela. (Mar. 6:31, 45, 46) A a hubuta leswaku a kuma nkarhi wo va yexe leswaku a khongela. (Mar. 1:35) Siku rin’wana loko a nga si endla xiboho xa nkoka swinene, u khongele vusiku hinkwabyo. (Luka 6:12, 13) Nakambe hi vusiku byo hetelela a nga si fa, u khongele hi ku phindhaphindha a kombela matimba yo hetisisa xiavelo xakwe xo tika swinene xa laha misaveni.—Mat. 26:39, 42, 44.

 5. Hi nga n’wi tekelela njhani Yesu loko hi khongela?

⁵ Xikombiso xa Yesu xi hi dyondzisa leswaku hi fanele hi tinyika nkarhi wo khongela hambiloko hi ri ni swo tala swo swi endla. Ku fana na Yesu, swi nga ha lava leswaku hi tinyika nkarhi wo khongela, ku nga ha va nimixo kumbe nimadyambu. Loko hi endla tano, hi kombisa Yehovha leswaku ha yi tlangela nyiko leyi yo hlawuleka. Makwerhu waxisati la vuriwaka Lynne u tsundzuka ndlela leyi a khumbekeke hayona loko a dyondza ro sungula hi nyiko ya xikhongelo. U ri: “Loko ndzi dyondza leswaku ndzi nga vulavula na Yehovha nkarhi wun’wana ni wun’wana, sweswo swi ndzi pfune leswaku ndzi n’wi teka tanihi Munghana wa mina lonkulu nileswaku ndzi antswisa swikhongelo swa mina.” A swi kanakanisi leswaku vo tala va hina hi titwa tano. A hi kambisiseni swilo swa ntlhanu swa nkoka leswi hi nga swi katsaka eswikhongelweni swa hina.

 6. Hi ku ya hi Nhlavutelo 4:10, 11, Yehovha u faneriwa hi yini?

⁶ Dzunisa Yehovha. Eka xivono xo hlamarisa, muapostola Yohane u vone vakulu va 24 etilweni va ri karhi va gandzela Yehovha. Va dzunise Xikwembu ni ku vula leswaku swa xi fanela “ku dzunisiwa ni ku xiximiwa ni ku va ni matimba.” (Hlaya Nhlavutelo 4:10, 11.) Tintsumi to tshembeka na tona ti ni swivangelo swa ntsandzavahlayi swo va ti dzunisa Yehovha ni ku n’wi xixima. Ti tshama na yena etilweni naswona ti n’wi tiva kahle. Ti vona vumunhu byakwe eka leswi a swi endlaka. Loko ti vona ndlela leyi Yehovha a endlaka swilo hayona, sweswo swi endla leswaku ti n’wi dzunisa.—Yobo 38:4-7.

 7. Hi swihi swivangelo leswi endlaka hi dzunisa Yehovha?

⁷ Na hina hi lava ku dzunisa Yehovha loko hi khongela, hi n’wi byela leswi endlaka hi n’wi rhandza ni ku n’wi khensa. Loko u ri karhi u hlaya Bibele, ringeta ku kumisisa vumunhu lebyi Yehovha a byi kombiseke ngopfungopfu lebyi ku tsakisaka. (Yobo 37:23; Rhom. 11:33) Byela Yehovha ndlela leyi u titwaka hayona hi vumunhu byolebyo. Hi nga tlhela hi dzunisa Yehovha hileswi a hi pfunaka ku katsa ni vamakwerhu emisaveni hinkwayo. Mikarhi hinkwayo wa hi sirhelela ni ku hi khathalela.—1 Sam. 1:27; 2:1, 2.

 8. Hi swihi swivangelo swin’wana leswi endlaka hi khensa Yehovha? (1 Vatesalonika 5:18)

⁸ Khensa Yehovha. Hi ni swivangelo swo tala leswi endlaka hi khensa Yehovha hi xikhongelo. (Hlaya 1 Vatesalonika 5:18.) Hi nga n’wi khensa hikwalaho ka swilo hinkwaswo leswinene leswi hi nga na swona hikuva nyiko yin’wana ni yin’wana leyinene yi huma eka yena. (Yak. 1:17) Hi xikombiso, hi nga n’wi byela ndlela leyi hi tlangelaka ku xonga ka misava leyi ni swilo swo hlamarisa leswi hi swi vonaka eka ntumbuluko. Nakambe hi nga n’wi khensa hikwalaho ka vutomi, ndyangu, vanghana ni ntshembo wa hina. Hi lava ku khensa Yehovha hileswi a hi pfumelelaka hi tiphina hi ku va vanghana vakwe.

 9. Hikwalahokayini swi nga ha lavaka hi tidyondzisa ku khensa Yehovha?

⁹ Swi nga ha lava hi tikarhata leswaku hi ehleketa hi swivangelo leswi hi nga na swona swo khensa Yehovha. Hi hanya ni vanhu lava nga khensiki. Mikarhi yo tala vanhu va ehleketa hi leswi va swi lavaka ematshan’weni yo khensa leswi va nga na swona. Loko ho va tekelela, swikhongelo swa hina swi nga hundzuka swikombelo ntsena. Leswaku sweswo swi nga endleki, hi fanele hi tikarhatela ku ya emahlweni hi khensa hinkwaswo leswi Yehovha a hi endlelaka swona.—Luka 6:45.

10. Ku khensa swi n’wi pfune njhani makwerhu un’wana waxisati leswaku a tiyisela? (Nakambe vona xifaniso.)

¹⁰ Ku va vanhu lava khensaka swi nga hi pfuna leswaku hi tiyisela swiphiqo. Xiya ntokoto wa Kyung-sook lowu kumekaka eka Xihondzo xo Rindza xa January 15, 2015. Ku kumeke leswaku u ni khensa ya mahahu leyi a yi ma hlasele swinene. U ri: “Xiphiqo lexi xa rihanyo xi ndzi karhate swinene. Ndzi titwe ndzi lahlekeriwe hi swilo hinkwaswo naswona a ndzi chuhe ngopfu.” I yini leswi n’wi pfuneke ku tiyisela xiyimo lexi? U vule leswaku vusiku byin’wana ni byin’wana loko a nga si etlela, a a ya elwangwini ra yindlu yakwe ivi a khongela eka Yehovha hi rito leri twalaka a khensa swilo swa ntlhanu leswi A n’wi endleleke swona siku rero. Leswi swi endle leswaku a va ni ku rhula ni ku tlhela a byela Yehovha ndlela leyi a n’wi khensaka hayona. U vone ndlela leyi Yehovha a ma pfunaka hayona malandza yakwe yo tshembeka loko ma ri emiringweni naswona u swi xiyile leswaku mikateko leyi hi yi kumaka yi tele ku tlula miringo leyi hi welaka. Ku fana na Kyung-sook, hi ni swivangelo swo tala swo khensa Yehovha hambiloko hi langutane ni ndzingo. Loko hi khensa Yehovha hi xikhongelo, swi nga hi pfuna leswaku hi tiyisela ni ku tshama hi ri ni ku rhula.

11. Hikwalahokayini vadyondzisiwa va Yesu a va fanele va va ni xivindzi endzhaku ka loko Yesu a tlhelele etilweni?

¹¹ Kombela Yehovha a ku nyika xivindzi loko u chumayela. Loko Yesu a ri ekusuhi ni ku tlhelela etilweni, u tsundzuxe vadyondzisiwa vakwe hi xiavelo xa vona xo chumayela hi yena “eYerusalema, etikweni hinkwaro ra Yudiya ni le Samariya ni ku ya fika emakumu ka misava.” (Mit. 1:8; Luka 24:46-48) Endzhakunyana ka sweswo, varhangeri va Vayuda va khome muapostola Petro na Yohane va va yisa emahlweni ka Sanedri kutani va lerisa vavanuna lava vo tshembeka leswaku va tshika ku chumayela ni ku tlhela va va xungeta. (Mit. 4:18, 21) Xana Petro na Yohane va endle yini?

12. Hi ku ya hi Mitirho 4:29, 31, Petro na Yohane va endle yini?

¹² Petro na Yohane va hlamule varhangeri va vukhongeri bya Vayuda va ku: “Loko mi vona swi fanerile emahlweni ka Xikwembu ku yingisa n’wina ku ri na xona, avanyisani hi n’wexe. Kambe loko ku ri hina, a hi nge tshiki ku vulavula hi swilo leswi hi swi voneke ni leswi hi swi tweke.” (Mit. 4:19, 20) Loko Petro na Yohane va tshunxiwa, vadyondzisiwa lava va khongele eka Yehovha va kombela leswaku a va pfuna va endla ku rhandza kakwe. Va khongele va ku: “Endla leswaku malandza ya wena ma ya emahlweni ma vulavula rito ra wena hi vurhena lebyikulu.” Yehovha u xi hlamurile xikhongelo xexo.—Hlaya Mitirho 4:29, 31.

13. Hi nga dyondza yini eka xikombiso xa Jin-hyuk?

¹³ Hi nga tekelela vadyondzisiwa hi ku ya emahlweni hi chumayela hambiloko vafumi va lava leswaku hi tshika ku endla tano. Xiya ntokoto wa makwerhu Jin-hyuk loyi a a khomiwile hikwalaho ka leswi a a ala ku ya evusocheni. Loko a ri ejele, u nyikiwe ntirho wo khathalela swivochwa kambe a a nga pfumeleriwi ku vulavula na swona hi timhaka tin’wana leti nga fambisaniki ni ntirho wakwe ku katsa ni ku vulavula na swona hi Bibele. U khongelele ku va ni xivindzi ni ku va ni vutlhari leswaku a tirhisa nkarhi wun’wana ni wun’wana lowu a wu kumaka leswaku a chumayela. (Mit. 5:29) U ri: “Yehovha u hlamule swikhongelo swa mina hi ku ndzi nyika xivindzi ni vutlhari byo kota ku sungula tidyondzo to tala ta Bibele leti tekaka timinete ta ntlhanu. Nivusiku a ndzi tsala mapapila lawa hi xamundzuku wa kona a ndzi ma nyika swivochwakulobye.” Na hina hi nga tiyiseka leswaku Yehovha u ta hi pfuna hi endla ntirho wa hina wo chumayela. Ku fana na Jin-hyuk, hi nga khongelela ku va ni xivindzi ni vutlhari.

14. I yini leswi nga hi pfunaka loko hi ri ni swiphiqo? (Pisalema 37:3, 5)

¹⁴ Kombela Yehovha a ku pfuna u tiyisela swiphiqo. Vo tala va hina ha xaniseka hikwalaho ka mavabyi kumbe hileswi hi nga tsakangiki emoyeni, hi xanisiwaka, hi loveriweke hi munhu loyi hi n’wi rhandzaka, hi langutaneke ni xiyimo xo tika endyangwini kumbe swiphiqo swin’wana. Kambe swilo swo fana ni mintungu ni tinyimpi swi endle leswaku swiphiqo leswi se hi nga na swona swi tika swinene ku swi tiyisela. Chululela Yehovha ta le mbilwini. N’wi byele hi xiyimo xa wena ku fana ni loko u byela munghana wa wena lonkulu. Tiyiseka leswaku Yehovha “u ta ku pfuna.”—Hlaya Pisalema 37:3, 5.

15. Xikhongelo xi nga hi pfuna njhani leswaku hi “tiyisela nhlomulo”? Vula xikombiso.

¹⁵ Ku phikelela exikhongelweni swi ta hi pfuna ku “tiyisela nhlomulo.” (Rhom. 12:12) Yehovha wa swi tiva leswi vagandzeri vakwe va langutanaka na swona, “u twa xirilo xa vona xo kombela ku pfuniwa.” (Ps. 145:18, 19) Kristie loyi a nga ni malembe ya 29 tlhelo phayona u pfumelelana na yona mhaka leyi. U sungule ku vabya a nga swi langutelanga. Hikwalaho ka sweswo, u ve ni ntshikilelo wa mianakanyo. Hi ku famba ka nkarhi, u twe leswaku mhani wakwe u vabyela ku fa. Kristie u ri: “Ndzi khongele swinene eka Yehovha ndzi n’wi kombela leswaku a ndzi nyika matimba yo kota ku langutana ni siku ha rin’we. A ndzi tshama ndzi ri karhi ndzi endla swilo leswi tiyisaka vuxaka bya mina na Yehovha hi ku ya etinhlengeletanweni ta vandlha ni ku endla dyondzo ya munhu hi yexe.” Nakambe u ri: “Xikhongelo xi ndzi tiyisile loko swilo swi tika. A ndzi swi tiva leswaku Yehovha u na mina mikarhi hinkwayo naswona sweswo swi ndzi chavelele ngopfu. Hambileswi ndzi nga holangiki hi ku copeta ka tihlo, Yehovha u hlamule swikhongelo swa mina hi ku ndzi nyika ku rhula.” A hi tshameni hi ri karhi hi tsundzuka leswaku “Yehovha wa swi kota ku va ponisa endzingweni vanhu lava n’wi gandzelaka hi mbilu hinkwayo.”—2 Pet. 2:9.

16. Hikwalahokayini hi lava ku pfuniwa hi Yehovha leswaku hi lwisana ni ndzingo?

¹⁶ Kombela Yehovha a ku pfuna u lwisana ni ndzingo. Leswi hi nga vanhu lava nga ni xidyoho, hi tshamela ku ringeka leswaku hi dyoha. Sathana u wa a pfuka leswaku a hi tikisela. Ndlela yin’wana leyi a yi tirhisaka leswaku a hi onha miehleketo, i vuhungasi lebyi thyakeke. Vuhungasi byo tano byi nga thyakisa miehleketo ya hina leyi nga ta thyakisa mbilu ya hina kutani hi endla xidyoho lexikulu.—Mar. 7:21-23; Yak. 1:14, 15.

17. Hi nga endla yini leswaku hi fambisana ni xikhongelo xa hina xo va hi papalata ndzingo? (Nakambe vona xifaniso.)

¹⁷ Hi lava ku pfuniwa hi Yehovha leswaku hi kota ku hlula ndzingo. Yesu u katse xikombelo lexi landzelaka eka xikhongelo lexi a xi dyondziseke vadyondzisiwa vakwe, u te: “U nga hi tshiki hi nghena endzingweni, u hi sirhelela eka lowo homboloka.” (Mat. 6:13) Yehovha u lava ku hi pfuna kambe hi fanele hi n’wi kombela. Nakambe hi fanele hi hanya hi ku pfumelelana ni swikhongelo swa hina. Hi nga tirha hi matimba leswaku hi papalata ku va ni mavonelo lama hoxeke ya vanhu va misava leyi ya Sathana. (Ps. 97:10) Hi nga tikarhatela ku hlaya Bibele leswaku hi tshama hi ri karhi hi ehleketa hi swilo leswinene. Loko hi ya etinhlengeletanweni ta vandlha ni ku tlhela hi chumayela swi ta sirhelela miehleketo ya hina. Yehovha u hi tshembisa leswaku a nge pfumeli hi ringiwa hi ndlela leyi hi nga taka hi nga swi koti ku yi tiyisela.—1 Kor. 10:12, 13.

18. Loko swi ta eka xikhongelo, i yini leswi hinkwerhu hi faneleke hi swi endla?

¹⁸ Hinkwerhu hi fanele hi khongela swinene leswaku hi tshama hi tshembekile eka Yehovha emasikwini lawa yo hetelela yo tika. Siku ni siku tinyike nkarhi wo khongela swi huma embilwini. Yehovha u lava leswaku hi n’wi ‘chululela leswi nga etimbilwini ta hina’ hi xikhongelo. (Ps. 62:8) Dzunisa Yehovha ni ku tlhela u n’wi khensa hikwalaho ka swilo hinkwaswo leswi a swi endlaka. N’wi kombele a ku pfuna u va ni xivindzi loko u chumayela. N’wi kombele a ku pfuna u tiyisela swiphiqo ni ku lwisana ni ndzingo lowu u nga ha vaka u langutane na wona. U nga pfumeleli munhu kumbe nchumu wu ku sivela ku khongela eka Yehovha nkarhi ni nkarhi. Kambe, xana Yehovha u swi hlamula njhani swikhongelo swa hina? Eka nhlokomhaka leyi landzelaka hi ta bula hi xivutiso xexo xa nkoka.