“Hi Nyike Ripfumelo Leri Engetelekeke”

 1. Ripfumelo i ra nkoka hi ndlela yihi? (Vona xifaniso lexi nga eku sunguleni ka xihloko lexi.)

XANA u tshame u tivutisa leswi, ‘Xana Yehovha u ta ndzi ponisa hi nkarhi wa nhlomulo lowukulu?’ Muapostola Pawulo u vule leswaku mfanelo ya nkoka leyi hi faneleke hi va na yona leswaku hi pona i ripfumelo. U te: ‘Handle ka ripfumelo a swi koteki ku xi tsakisa kahle Xikwembu.’ (Vaheveru 11:6) Sweswo swi nga vonaka swi olova ku swi endla, kambe ntiyiso hi leswaku “ripfumelo a hi ra vanhu hinkwavo.” (2 Vatesalonika 3:2) Matsalwa lamambirhi ma hi pfuna ku twisisa leswaku i swa nkoka hi ndlela yihi ku tiyisa ripfumelo ra hina.

2, 3. (a) Xana ripfumelo ra hina i ra nkoka ku fikela kwihi? (b) I yini leswi hi nga ta swi kambisisa sweswi?

² Muapostola Petro u vulavule hi ku ‘ringiwa’ ka ripfumelo. (Hlaya 1 Petro 1:7.) Nhlomulo lowukulu wu le kusuhi swinene naswona hi lava ku va “muxaka lowu nga ni ripfumelo eku londzovotiweni ka moya-xiviri wu hanya.” (Vaheveru 10:39) Hi fanele hi tikarhatela ku tiyisa ripfumelo ra hina. Hi lava ku va exikarhi ka vanhu lava nga ta ponisiwa loko Yesu Kreste, Hosi ya hina, a hlavuteriwa. Kutani ku fana ni wanuna loyi a kombeleke Yesu leswaku a n’wi nyika ripfumelo leri engetelekeke, na hina hi nga ha ku: “Ndzi pfune laha ndzi lavaka ripfumelo kona!” (Marka 9:24) Kumbe ku fana ni vaapostola, na hina hi nga ha ku: “Hi nyike ripfumelo leri engetelekeke.”—Luka 17:5.

³ Exihlokweni lexi hi ta kambisisa tinhla leti landzelaka: ndlela leyi hi nga ri tiyisaka ha yona ripfumelo ra hina, ndlela leyi hi nga swi kombisaka ha yona leswaku hi ni ripfumelo leri tiyeke ni ndlela leyi hi nga tiyisekaka ha yona leswaku Xikwembu xi ta hi hlamula loko hi kombela ku va ni ripfumelo leri tiyeke.

 4. Hi swihi swikombiso leswi nga hi susumetelaka ku tiyisa ripfumelo ra hina?

⁴ Yehovha u hi nyike swikombiso swo tala swa vanhu lava kombiseke ripfumelo eBibeleni, hikwalaho ka leswi ripfumelo ri nga ra nkoka swinene. Swikombiso leswi “swi tsaleriwe ku letela hina.” (Varhoma 15:4) Xikombiso xa Abrahama, Sara, Isaka, Yakobe, Muxe, Rahava, Gidiyoni, Baraka ni swa van’wana vo tala swi nga hi susumetela leswaku hi tiyisa ripfumelo ra hina. (Vaheveru 11:32-35) Ku engetela eka swikombiso swa le nkarhini lowu hundzeke, na hina hi ni swikombiso leswi tsakisaka swa vamakwerhu namuntlha.a (Vona nhlamuselo ya le hansi.)

 5. Eliya u swi kombise njhani leswaku u ni ripfumelo leri tiyeke eka Yehovha, naswona hi fanele hi tivutisa yini?

⁵ Xikombiso xin’wana xa le Bibeleni i xa muprofeta Eliya. Loko u ri karhi u anakanyisisa hi xikombiso xakwe, xiya swiyimo swa ntlhanu leswi a kombiseke leswaku u ni ripfumelo leri tiyeke eka Yehovha. (1) Loko Eliya a byela Hosi Akabu leswaku Yehovha u ta tisa dyandza, hi xivindzi u te: “Leswi Yehovha Xikwembu xa Israyele loyi ndzi yimeke emahlweni ka yena a hanyaka, a ku nge vi na mberha kumbe mpfula.” (1 Tihosi 17:1) (2) Eliya a a tshemba leswaku Yehovha a a ta nyika yena ni vanhu van’wana leswi va swi lavaka hi nkarhi wa dyandza. (1 Tihosi 17:4, 5, 13, 14) (3) Eliya a a tiyiseka ni leswaku Yehovha u ta pfuxa n’wana wa noni. (1 Tihosi 17:21) (4) A a nga kanakani leswaku ndzilo lowu humaka eka Yehovha a wu ta hisa gandzelo rakwe eNtshaveni ya Karimeli. (1 Tihosi 18:24, 37) (5) Emahlweni ko va mpfula yi na, Eliya u byele Akabu hi xivindzi a ku: “Tlhandluka u ya dya, u nwa; hikuva ku ni mpfumawulo wa ku pfilunganyeka ka maboboma ya mpfula.” (1 Tihosi 18:41) Endzhaku ko kambisisa swikombiso leswi, u nga tivutisa leswi, ‘Xana ndzi ni ripfumelo leri tiyeke ku fana na Eliya?’

 6. I yini lexi hi nga xi kombelaka eka Yehovha leswaku hi tiyisa ripfumelo ra hina?

⁶ Leswi hi nga taka hi nga swi koti ku tiyisa ripfumelo ra hina handle ko pfuniwa, hi fanele hi kombela Xikwembu leswaku xi hi nyika moya lowo kwetsima. Ha yini? Hikuva ripfumelo i xiphemu xa mbhandzu wa moya lowo kwetsima. (Vagalatiya 5:22) Hi ta va hi tlharihile loko hi yingisa ndzayo ya Yesu ya leswaku hi khongela hi kombela moya lowo kwetsima lowu engetelekeke. Yesu u tshembise leswaku Yehovha u ta ‘nyika lava n’wi kombelaka moya lowo kwetsima.’—Luka 11:13.

 7. Hlamusela ndlela leyi hi nga ri tiyisaka ha yona ripfumelo ra hina.

⁷ Loko se hi ri ni ripfumelo leri tiyeke eka Xikwembu, hi fanele hi ri hlayisa. Hi nga fanisa ripfumelo ni ndzilo. Loko ndzilo wa ha ku tshiveriwa wu pfurha swinene. Hambiswiritano, loko hi nga wu hlanganyeti wu ta hetelela wu timekile. Kambe loko hi tshamela ku wu hlanganyeta wu ta hambeta wu pfurha. Swi tano hi ripfumelo ra hina. Loko hi ya emahlweni hi hlaya ni ku dyondza Rito ra Xikwembu siku ni siku, ndlela leyi hi rhandzaka Bibele swin’we na Yehovha ha yona yi ta kula. Hikwalaho ka sweswo, hi ta va ni ripfumelo leri tiyeke.

 8. I yini leswi nga ta ku pfuna ku tiyisa ripfumelo ra wena?

⁸ A wu fanelanga u eneriseka ntsena hi swilo leswi u swi dyondzeke emahlweni ko va u khuvuriwa. (Vaheveru 6:1, 2) Hi xikombiso, ku dyondza hi vuprofeta bya Bibele lebyi se byi hetisekeke swi ta ku pfuna leswaku u tiyisa ripfumelo ra wena. Nakambe u nga tirhisa Rito ra Xikwembu ku vona loko ripfumelo ra wena ri tiyile hakunene.—Hlaya Yakobo 1:25; 2:24, 26.

9, 10. Ripfumelo ra hina ri tiyisiwa njhani hi (a) vanghana lavanene? (b) minhlangano? (c) ku chumayela?

⁹ Muapostola Pawulo u vule leswaku Vakreste va nga “khutazana, un’wana hi ripfumelo ra un’wana.” (Varhoma 1:12) Xana sweswo swi vula yini? Loko hi heta nkarhi ni vamakwerhu, hi nga tiyisana ripfumelo. Leswi i ntiyiso ngopfungopfu loko hi heta nkarhi ni lava “ringiweke” ripfumelo. (Yakobo 1:3) Vanghana vo biha va nga dlaya ripfumelo ra hina, kambe vanghana lavanene va nga ri tiyisa. (1 Vakorinto 15:33) Hi yona mhaka hi khutaziwaka ku va kona eminhlanganweni nkarhi ni nkarhi. Loko hi ri kwalaho, hi kota ku ya emahlweni hi “khutazana.” (Hlaya Vaheveru 10:24, 25.) Ku engetela kwalaho, switsundzuxo leswi hi swi kumaka eminhlanganweni swi tiyisa ripfumelo ra hina. Bibele yi vula leswaku “ripfumelo ri landzela leswi twiweke.” (Varhoma 10:17) Kutani tivutise, ‘Xana ndzi ya nkarhi ni nkarhi eminhlanganweni ya Vukreste?’

¹⁰ Hi tlhela hi tiyisa ripfumelo ra hina loko hi chumayela mahungu lamanene ya le Bibeleni eka van’wana. Ku fana ni Vakreste vo sungula, hi dyondza ku tshemba Yehovha ni ku vulavula hi xivindzi eka xiyimo xin’wana ni xin’wana.—Mintirho 4:17-20; 13:46.

11. Ha yini Kalebe na Yoxuwa a va ri ni ripfumelo leri tiyeke, naswona hi nga swi kotisa ku yini ku fana na vona?

¹¹ Ripfumelo ra hina eka Yehovha ra kula loko hi vona ndlela leyi a hi pfunaka ha yona ni ndlela leyi a swi hlamulaka ha yona swikhongelo swa hina. Leswi hi leswi endlekeke eka Kalebe na Yoxuwa. Va kombise ripfumelo eka Yehovha loko va kambela Tiko leri Tshembisiweke. Loko nkarhi wu ri karhi wu famba, ripfumelo ra vona ri ye ri tiya loko va vona ndlela leyi Yehovha a va pfuneke ha yona. Yoxuwa u byele Vaisrayele a ku: “A ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke.” Endzhakunyana u te: “Sweswi chavani Yehovha mi n’wi tirhela hi ndlela leyi pfumalaka xihoxo ni ntiyiso.” Kutani u tlhele a ku: “Loko ku ri mina ni vandyangu wa mina, hi ta tirhela Yehovha.” (Yoxuwa 23:14; 24:14, 15) Loko hi tshemba Yehovha ni ku tlhela hi vona ndlela leyi a hi pfunaka ha yona, ripfumelo ra hina ri ta tiya.—Pisalema 34:8.

12. Hi nga swi kombisa njhani leswaku hi ni ripfumelo leri tiyeke?

¹² Hi nga swi kombisa njhani leswaku hi ni ripfumelo leri tiyeke? Mudyondzisiwa Yakobo u te: “Ndzi ta ku komba ripfumelo ra mina hi mintirho ya mina.” (Yakobo 2:18) Swiendlo swa hina swi kombisa leswaku hi ni ripfumelo leri tiyeke. A hi voneni leswaku hi ndlela yihi.

13. Hi ri kombisa njhani ripfumelo ra hina loko hi chumayela?

¹³ Ku chumayela i ndlela leyinene ngopfu yo kombisa ripfumelo ra hina. Ha yini? Hikuva loko hi chumayela, hi kombisa leswaku ha tshemba leswaku makumu ma le kusuhi ni leswaku a ma “nge hlweli!” (Habakuku 2:3) Leswaku hi tiva loko hi ri ni ripfumelo leri tiyeke, hi nga tivutisa leswi: ‘Xana ku chumayela i swa nkoka ku fikela kwihi eka mina? Xana ndzi endla hinkwaswo leswi ndzi nga swi kotaka leswaku ndzi byela van’wana hi Xikwembu? Xana ndzi lava tindlela to endla leswi engetelekeke eka ntirho lowu ndzi wu endlelaka Yehovha?’ (2 Vakorinto 13:5) A hi kombiseni ndlela leyi ripfumelo ra hina ri tiyeke ha yona hi ku ‘vula erivaleni ku ponisiwa,’ ku nga ku chumayela mahungu lamanene.—Hlaya Varhoma 10:10.

14, 15. (a) Hi nga ri kombisa njhani ripfumelo evuton’wini bya hina bya siku ni siku? (b) Hlamusela ntokoto lowu kombisaka ndlela leyi ripfumelo leri tiyeke ri nga kombisiwaka ha yona.

¹⁴ Hi tlhela hi kombisa ripfumelo ra hina eka Yehovha loko hi tiyisela swiphiqo emisaveni leyi. Loko hi vabya, hi hele matimba, hi tshikilelekile, hi ri evuswetini kumbe hi ri ni swiphiqo swin’wana, hi fanele hi tshemba leswaku Yehovha na Yesu va ta hi “pfuna hi nkarhi wa kona.” (Vaheveru 4:16) Hi kombisa leswaku hi ni ripfumelo eka Yehovha loko hi kombela mpfuno eka yena. Yesu u vule leswaku hi nga kombela Yehovha leswaku a hi nyika “xinkwa xa hina xa siku hi ku ya hi xilaveko xa siku.” (Luka 11:3) Timhaka leti nga eBibeleni ti kombisa leswaku Yehovha a nga hi nyika swin’wana ni swin’wana leswi hi swi pfumalaka. Hi xikombiso, hi nkarhi lowu a ku ri ni dyandza eIsrayele, Yehovha u nyike Eliya swakudya ni mati. Bibele yi vula leswaku “mawukuwuku a ma n’wi tisela xinkwa ni nyama nimixo, ni xinkwa ni nyama nimadyambu, a hambeta a nwa mati enkoveni.” (1 Tihosi 17:3-6) Ha tshemba leswaku na hina Yehovha a nga hi nyika leswi hi swi pfumalaka.

¹⁵ Ha tshemba leswaku loko hi tirhisa milawu ya Bibele, hi ta swi kota ku khathalela swilaveko swa mindyangu ya hina. Rebecca, makwerhu wa xisati la tekiweke wa le Asia, u hlamusela ndlela leyi yena ni ndyangu wakwe va yi tirhiseke ha yona milawu leyi kongomisaka leyi kumekaka eka Matewu 6:33 na Swivuriso 10:4. U vule leswaku nuna wakwe a a vona onge ntirho wakwe a wu ta veka vuxaka bya vona na Yehovha ekhombyeni. Kutani nuna wakwe u tshike ntirho. Kambe a va ri ni vana va mune lava a va fanele va va khathalela, kutani va sungule ku xavisa swakudya. Hikwalaho ka leswi a va tirha hi matimba, minkarhi hinkwayo a va swi kota ku kuma mali leyi ringaneke leyi a va ta kota ku tihanyisa ha yona. Rebecca u ri: “Hi swi vonile leswaku Yehovha a nga hi tshikanga. A hi si tshama hi etlela ni ndlala.” Xana u tshame u va eka xiyimo lexi fanaka lexi tiyiseke ripfumelo ra wena?

16. Ku ta endleka yini loko hi ri ni ripfumelo eka Xikwembu?

¹⁶ A hi fanelanga hi kanakana leswaku Yehovha u ta hi pfuna loko hi landzela nkongomiso wakwe. Pawulo u tshahe marito ya Habakuku loko a ku: “Loyi a lulameke u ta hanya hikwalaho ka ripfumelo.” (Vagalatiya 3:11; Habakuku 2:4) Hi yona mhaka hi faneleke hi va ni ripfumelo leri tiyeke eka Loyi a nga hi pfunaka. Pawulo u hi tsundzuxa leswaku Xikwembu hi ‘xona xi swi kotaka, hi ku ya hi matimba ya xona lama tirhaka eka hina, ku endla swo tala swinene ku tlula leswi hi swi kombelaka kumbe leswi hi swi ehleketaka.’ (Vaefesa 3:20) Malandza ya Yehovha ma endla hinkwaswo leswi ma nga swi kotaka leswaku ma endla ku rhandza kakwe, nakambe ma swi tiva leswaku ku ni leswi ma nga kotiki ku swi endla. Ha swi tlangela swinene leswi Xikwembu xi nga na hina naswona xi katekisaka matshalatshala ya hina hinkwawo.

17. (a) Yesu u va hlamule njhani vaapostola? (b) Ha yini hi tshemba leswaku Yehovha u ta hlamula swikombelo swa hina swo va ni ripfumelo leri engetelekeke?

¹⁷ Hi ku ya hi leswi hi swi kambisiseke, hi nga ha titwa hi ndlela leyi vaapostola va titweke ha yona loko va kombele Yesu va ku: “Hi nyike ripfumelo leri engetelekeke.” (Luka 17:5) Yesu u hlamule vaapostola vakwe hi ndlela yo hlawuleka hi Pentekosta hi lembe ra 33, loko va kuma moya lowo kwetsima naswona va kote ku twisisa xikongomelo xa Xikwembu hi vuenti. Leswi swi tiyise ripfumelo ra vona. Ku ve ni vuyelo byihi? Va sungule tsima lerikulu ro chumayela hi nkarhi wolowo. (Vakolosa 1:23) Xana hi fanele hi langutela leswaku swikombelo swa hina swo kombela ku va ni ripfumelo leri engetelekeke swi hlamuriwa? Yehovha u hi tshembisa leswaku hi nga swi langutela loko hi ‘kombela hi ku ya hi ku rhandza ka yena.’—1 Yohane 5:14.

18. Yehovha u va katekisa njhani lava tiyisaka ripfumelo ra vona?

¹⁸ Loko hi tshemba Yehovha hilaha ku heleleke, u ta hi tsakela. U ta hi nyika ripfumelo leri engetelekeke, ripfumelo ra hina ri ta tiya naswona hi ta ‘faneriwa hi Mfumo wa Xikwembu.’—2 Vatesalonika 1:3, 5.