Mphalalo Wa Timhangu Hi 2023—“Hi Vona Rirhandzu Ra Yehovha”

Bibele yi profete leswaku “matiko ma ta hlaselana” ni leswaku a ku ta va ni timhangu hi nkarhi wa “ku fika ka makumu.” (Matewu 24:3, 7) Hi vone marito lawa ya vuprofeta ma hetiseka hi lembe ra ntirho ra 2023.a Kambe exikarhi ka tinyimpi ni timhangu ta ntumbuluko ematikweni ya kwalomu ka 100, Timbhoni ta Yehovha ti kombise rirhandzu leri Yehovha a nga na rona. Njhani?

Hi lembe ra ntirho ra 2023, vamakwerhu va hlaseriwe hi timhangu ta ntumbuluko kumbe leti vangiweke hi vanhu leti tlulaka 200. Mihlangano ya le nawini leyi tirhisiwaka hi Timbhoni ta Yehovha yi tirhise ntsengo lowu tlulaka khume ra timiliyoni ta tidolarab eka minyikelo leyi nyikeriweke entirhweni wa misava hinkwayo leswaku yi phalala timhangu. Ntsengo lowu wu engetela eka mali hinkwayo leyi vamakwerhu va yi tirhiseke entirhweni wo tirhandzela endhawini ya ka vona. Vona ndlela leyi minyikelo leyi u yi nyikeleke yi tirhisiweke hayona ku pfuna lava hlaseriweke eka timhangu timbirhi eka to tala leti hlaseleke vamakwerhu.

Swifundzha swin’wana swa le Nigeria swi va ni ndhambi nkarhi ni nkarhi. Kambe ndhambi ya October 2022 a yi ri yikulu ku tlula leti tiko rero ri tshameke ri va na tona eka malembe ya khume. Tihekitara leti tlulaka 676 000 ta purasi ti onhiwile, naswona vanhu lava tlulaka timiliyoni timbirhi va rhurhisiwile emakaya ya vona. Rhavi ra le Nigeria ri hlawule Tikomiti ta Mphalalo wa Timhangu leswaku ti hlela mphalalo ni ku tiyisa ripfumelo ra vamakwerhu.

• Vahuweleri va 7 505 va rhurhisiwile emakaya

• Makaya ya 860 ma onhiwile kumbe ma mbundzumuxiwa

• Tiholo ta Mfumo ta 90 ni Holo yin’we ya Tinhlengeletano ti ngheneriwe hi mati yo tala

Ku tirhisiwe ku tlula $250 000 eka mphalalo wa timhangu eka leswi landzelaka:

• Swakudya swo fana ni rhayisi, tiboncisi ni tinoodle

• Switirhisiwa swa le kaya swo fana ni swiponci ni tinete ta tinsuna

• Ku lunghisa kumbe ku ma aka hi vuntshwa makaya lama onhakeke

Vamakwerhu va tiyiseke njhani leswaku mali leyi nyikeriweke yi tirhisiwa hi vutlhari? Ndlela yin’wana a ku ri ku kambela muako wun’wana ni wun’wana hi vukheta ku vona loko swi ta koteka ku wu lunghisa. Loko swi boha leswaku ku akiwa muako lowuntshwa, a wu akiwa hi ku tirhisa pulani yo olova leyi tolovelekeke endhawini yoleyo.

Vamakwerhu lava pfuniweke va khensa swinene. Makwerhu un’wana wa xisati u te: “Ndhambi yi onhe vutomi bya hina hikuva mapurasi ya hina hinkwawo ma onhiwile naswona hi sale hi nga ri na makaya. Hi titwe hi tshunxekile loko vamakwerhu va fika hi siku rero leswaku va hi pfuna ni ku hi nyika ndhawu leyi hlayisekeke yo tshama. Mphalalo lowukulu wu ve kona loko hi amukela swakudya swi huma erhavini. A hi tsake ni swikunwana loko hi vona ku hetiseka ka Yohane 13:34, 35 evuton’wini bya hina. . . . Rirhandzu ra ntiyiso ri kona hakunene. Mina ni ndyangu hinkwawo, hi va khensa swi suka embilwini, hi ba mavoko hi vuyelela leswi vamakwerhu va hi pfuneke hi nkarhi lowu faneleke.”

Vanhu van’wana emugangeni va wu xiyile ntirho wa hina wo phalala. Hosi ya muganga eSabagreia, Bayelsa State, yi te: “Ku ni mihlangano ni tikereke to tala emisaveni, kambe i Timbhoni ta Yehovha ntsena leti endleke leswi. . . . Nhlangano wa [n’wina] wu famba emahlweni emisaveni hinkwayo.”

Hi February 2023, ku ve ni ku onhaka lokukulu loku vangiweke hi mindzilo yo tlula 400 le Chile. Xiphemu xa misava lexi tlulaka 430 000 ni switirhisiwa swa nkoka swa le Chile swi onhiwile. Kwalomu ka vanhu va 8 000 va rhurhisiwile emakaya ya vona. Hi ku hatlisa loko ku ve ni mhangu, rhavi ri sungule ku lunghiselela mphalalo.

• Vahuweleri va 222 va rhurhisiwile emakaya ya vona

• Makaya ya 20 ma onhiwile

Ku tlula $200 000 yi tirhisiwile eku phalaleni ka timhangu eka leswi landzelaka:

• Swakudya ni mati

• Petiroli, swilo swo basisa ni mirhi ya vutshunguri

• Ku akiwa hi vuntshwa ka makaya lama onhiweke

Ndyangu wun’wana wu tsemeke nhlana loko wu twa leswaku swilo hinkwaswo leswi a wu ri na swona swi tshwile, ku katsa ni kaya ni bindzu ra wona. Ndyangu lowu wu sale wu nga ha ri ni ntirho. Masiku ma nga ri mangani loko swa ha ku endleka, ndyangu lowu a wu twa ku vava loko wu vona laha yindlu a yi ri kona ku nga ha ri na nchumu. Kambe loko yindlu yi tlhela yi akiwa, ku vilela ka vona ku hungutekile hakatsongotsongo. Ku vona rihandzu ni ku tinyiketela ka vatirhi vo tirhandzela swi endle leswaku va titwa va antswa. Ntokoto lowu wu tsakise ndyangu lowu lerova wu sungule ku tirha ni vatirhi va ku tirhandzela loko ku tlhela ku akiwa yindlu ya makwerhu un’wana.

Vamakwerhu vo tala va tsakisiwe ngopfu hi ntirho wo phalala. Makwerhu un’wana u te: “Lunghiselelo ra Yehovha ra Tikomiti ta Mphalalo wa Timhangu ra hlamarisa hakunene. Hi siku leri landzelaka endzhaku ka mhangu, se a va fikile ni swilo leswi lavekaka. Swa tsakisa ku hlaya hi mphalalo wa timhangu eswiphen’wini swin’wana swa misava. Kambe loko swi khumba wena swa vava swinene. Swi endla u tlangela nhlangano swinene; ndlela leyi vamakwerhu a va kombisa vunene bya Yehovha ni ndlela leyi a va tikarhatela ku hi nyika leswi hi swi lavaka, va tiyisa ripfumelo ra hina eka Xikwembu ni ku hi thova timbilu. Hi vona ku kombisiwa ka rirhandzu ra Yehovha.”

Loko makumu ya misava leyi ma ri karhi ma tshinela hi ta ya hi vona ku andza ka timhangu. (Luka 21:10, 11) Hambiswiritano, hi ku tirhisa vandlha ra Vukreste, hi tlhela hi swi vona leswaku Hosi ya hina leyi nga ni rirhandzu, Kreste Yesu, yi na hina “mikarhi hinkwayo kukondza makumu ma fika.” (Matewu 28:20) Ku hanana ka n’wina hi minyikelo eka ntirho wa misava hinkwayo, hi ku tirhisa donate.jw.org ni tindlela tin’wana, ni ku nyikela ka n’wina hi nkarhi ni matimba, ku kombisa ku seketela Mfumo ni Hosi ya wona leyi nga ni rirhandzu. Ha ku khensa ku hanana ka n’wina loku yaka emahlweni.