Swivutiso Swa Vahlayi

Xana Yehovha a a kombetela eka mani loko a ku “hina” eka Genesa 3:22?

Swi tikomba onge Yehovha Xikwembu a a kombetela eka yena n’wini ni N’wana wa yena la nga swakwe loko a ku: “Munhu u fana na hina hi ku tiva leswinene ni leswo biha.” (Genesa 3:22) A hi kambisiseni leswaku ha yini hi vula leswi.

Yehovha u vule marito lawa loko a heta ku avanyisa mpatswa wa vanhu vo sungula. Van’wana va teke rito “hina” ri vula vunyingi byo kombisa ku xixima, ku fana ni loko munhu a ku “a hi tsakanga” kambe a vulavula hi yena n’wini. Hambiswiritano, malunghana na Genesa 1:26 na 3:22, xidyondzi xa Bibele Donald E. Gowan u ri: “Eka [Testamente ya Khale], ku hava vumbhoni lebyi kombisaka leswaku “hina” yi kombetela eka munhu un’we kumbe leswaku yi kombetela eka Xikwembu lexi nga vumbirhi-un’we. . . . Leswi a swi fambisani na Genesa 3:22, leyi vulavulaka hi ‘hina.’”

Xana Yehovha a a kombetela eka Sathana Diyavulosi, loyi a a sungule ku tiendlela xiboho malunghana ni “leswinene ni leswo biha” naswona a kuceteleke vanhu vo sungula ku endla leswi fanaka? Leswi a swi twali. Laha Yehovha u tirhise rito leri nge “hina.” Sathana a a nga ha ri kona exikarhi ka tintsumi ta Yehovha to tshembeka, kutani a a nga ta katsiwa ni tintsumi leti yimaka na Yehovha.

Xana Xikwembu a xi kombetela eka tintsumi to tshembeka? A hi tiyiseki hi sweswo. Hambiswiritano, ku yelana ka xiga lexi nga eka Genesa 1:26 ni lexi nga eka 3:22 ka hi voningela emhakeni leyi. Eka Genesa 1:26 hi hlaya leswaku Yehovha u te: “A hi endle munhu hi xifaniso xa hina, a fana na hina.” Xana marito lawa a a ma kongomise eka mani? Loko a vulavula hi xivumbiwa xa moya lexi veke munhu wa nyama, ku nga Yesu, muapostola Pawulo u te: “I xifaniso xa Xikwembu lexi nga vonakiki, mativula ya ntumbuluko hinkwawo; hikuva ha yena swilo hinkwaswo swi tumbuluxiwile ematilweni ni le henhla ka misava.” (Vakolosa 1:15, 16) Ina, swa twisiseka leswaku eka Genesa 1:26, Yehovha a a vulavula ni N’wana wa yena la nga swakwe, “mutirhi la nga ni vuswikoti,” loyi a a ri etlhelo ka yena loko ku vumbiwa matilo ni misava. (Swivuriso 8:22-31) Ku fana ka xiga lexi nga eka Genesa 3:22 ku kombisa leswaku Yehovha nakambe a a vulavula ni loyi a nga ekusuhi swinene na yena, N’wana wakwe la nga swakwe.

Swi le rivaleni leswaku N’wana wa Xikwembu la nga swakwe a a tiva “leswinene ni leswo biha.” Leswi a heteke nkarhi wo leha a ri kusuhi swinene na Yehovha, u fanele a yi dyondze kahle mianakanyo ya Tata wa yena, misinya ya milawu ni leswi a swi rhandzaka. Leswi a a khorwiseka leswaku N’wana wakwe wa swi tiva leswi naswona u hanya hi ku pfumelelana na swona, Yehovha a nga ha va a n’wi nyike mpfumelelo wo tamela timhaka handle ko kombela mpfumelelo eka Yena hi ku kongoma. Kutani etimhakeni leti N’wana a a ri ni vuswikoti byo hambanisa leswi lulameke eka leswi nga lulamangiki. Hambiswiritano, ku hambana na Sathana, Adamu na Evha, Yesu a nga ti endlelanga milawu leyi lwisanaka ni ku rhandza ka Yehovha.