Swivutiso Swa Vahlayi

Xana a a swi hoxile loko Yakobe a tiendle onge i Esawu, tanihi laha swi tsariweke hakona eka Genesa 27:18, 19?

U nga ha va u yi tiva mhaka leyi. Isaka, loyi a a dyuharile, u byele Esawu leswaku a ya n’wi hlotela xiharhi, kutani a ku: “[U nge] ndzi dya leswaku moya-xiviri wa mina wu ta ku katekisa ndzi nga si fa.” Loko Raveka a twe leswi nuna wakwe a swi vuleke, u endle mpandzwa lowu a wu rhandzaka kutani a ku eka Yakobe: “U ta [yisa mpandzwa] eka tata wa wena a dya leswaku a ta ku katekisa a nga si fa.” Hiloko Yakobe, loyi a a ambale nguvu ya Esawu naswona a pfariwe hi madzovo ya swimbutana enhan’wini ni le mavokweni, a ya eka tata wakwe ni mpandzwa lowu a wu rhandzaka. Loko Isaka a n’wi vutisa a ku “Hi wena mani n’wananga?” Yakobe u te: “Hi mina Esawu mativula ya wena.” Isaka u swi tshembile leswaku hi yena kutani a n’wi katekisa.—Genesa 27:1-29.

Bibele a yi hi byeli vuxokoxoko bya leswaku hikwalaho ka yini Raveka na Yakobe va endle hi ndlela leyi, kambe yi kombisa leswaku xiendlakalo xexo xi endleke hi xitshuketa. Hi fanele hi tsundzuka leswaku Rito ra Xikwembu a ri swi seketeli kumbe ku sola leswi endliweke hi Raveka na Yakobe naswona xiendlakalo lexi a xi hi nyiki mpfumelelo wa ku hemba kumbe ku kanganyisa. Hambiswiritano, swi kona swin’wana leswi Bibele yi swi vulaka hi mhaka leyi.

Xo sungula, yi swi veka erivaleni leswaku Yakobe a a ri na yona mfanelo yo katekisiwa hi tata wakwe; kambe Esawu a a nga ri na yona. Emahlweni ka xiendlakalo lexi, Yakobe a a xave mfanelo ya ku va mativula eka makwavo loyi a nga yi tlangeli, loyi a yi xaviseke leswaku a ta kuma mpandzwa hikwalaho ka leswi a a khomiwe hi ndlala. Esawu u “lahl[e] mfanelo ya ku va lonkulu hi ku velekiwa.” (Genesa 25:29-34) Loko Yakobe a ya eka tata wakwe a a lava nkateko lowu ana se a wu fanele wu ya eka yena.

Xa vumbirhi, loko Isaka a swi xiyile leswaku u katekise Yakobe, a nga ringetanga ku cinca leswi a swi vuleke. Kumbexana a a ma tsundzuka kahle marito lawa Yehovha a ma byeleke Raveka emahlweni ka ku tswariwa ka mahahlwa lawa, loko a ku: “Lonkulu u ta tirhela lontsongo.” (Genesa 25:23) Leswi xiyekaka hi leswaku loko Yakobe a balekela eHarani, Isaka u tlhele a andzisa nkateko lowu a n’wi nyikeke wona eku sunguleni.—Genesa 28:1-4.

Xo hetelela, ku fanele ku tsundzukiwa leswaku Yehovha a a swi vona leswi a swi humelela naswona a a khathala hi vuyelo bya kona. Nkateko lowu Isaka a wu nyikeke Yakobe a wu fambisana ni leswi Xikwembu xi swi tshembiseke Abrahama. (Genesa 12:2, 3) Loko Xikwembu a xi nga swi lavanga leswaku ku katekisiwa Yakobe, a xi ta va xi nghenelerile hi ndlela yo karhi. Ematshan’weni ya sweswo, Yehovha u tiyisekise mhaka leyi eka Yakobe loko a ku: “Kunene mindyangu hinkwayo ya misava yi ta tikatekisa ha wena ni hi mbewu ya wena.”—Genesa 28:10-15.