Swivutiso Swa Vahlayi

Ku humelele yini eka xiendlakalo lexi kumekaka eka Eksoda 4:24-26, naswona i vutomi bya mani lebyi a byi ri ekhombyeni?

Muxe a a ri endleleni a ya aEgipta swin’we ni nsati wakwe, Zipora, ni vana vakwe, Gerixomu na Eliyezere, loko ku humelela xiendlakalo lexi landzelaka: “Egondzweni laha a a etlele kona, Yehovha a hlangana na yena a lava ndlela ya ku n’wi dlaya. Eku heteleleni Zipora a teka ribye ro tiya a tsema nsuvu wa n’wana wakwe, a wu khumbanisa ni nenge wa yena a ku: ‘Hikuva u loyi a tekaneke ni ngati eka mina.’ Hikwalaho a n’wi tshika. Hi nkarhi wolowo a ku: ‘Loyi a tekaneke ni ngati,’ hikwalaho ka ku yimbisiwa.” (Eksoda 4:20, 24-26) Hambileswi tindzimana leti ti nga twisisekiki naswona swi nga kotekiki ku tiyiseka hi nhlamuselo ya tona, Matsalwa ma hi voningela eka tona.

Rungula leri a ri hlamuseli hi ku kongoma leswaku i vutomi bya mani lebyi a byi ri ekhombyeni. Hambiswiritano, swa twala ku gimeta hileswaku a ku nga ri vutomi bya Muxe, hikuva Xikwembu a xa ha ku n’wi lerisa leswaku a ya rhangela Vaisrayele va huma aEgipta. (Eksoda 3:10) Ntsumi ya Xikwembu a yi nga ta xungeta vutomi bya Muxe kasi u le ndleleni yo ya hetisisa xiavelo xexo. Hikwalaho ku fanele ku ri vutomi bya un’wana wa vana vakwe. Nawu lowu a wu nyikiwe Abrahama emahlweninyana malunghana ni ku yimba a wu ku: “Waxinuna la nga yimbangiki, la nga ta ka a nga yimbisi nyama ya nsuvu wakwe, moya-xiviri wolowo wu ta herisiwa eka vanhu va ka vona. U tlule ntwanano wa mina.” (Genesa 17:14) Swi vonaka onge Muxe u honise ku yimbisa n’wana wakwe, hikwalaho vutomi bya mufana loyi a byi xungetiwa hi ntsumi ya Yehovha.

Zipora u khumbe milenge ya mani loko a tsema nsuvu wa n’wana wakwe, a ringeta ku lulamisa xiyimo? A ku ri milenge ya ntsumi ya Yehovha leyi a yi ri ni matimba ya ku dlaya n’wana loyi a nga yimbisiwangiki. Kutani a swi fanerile leswi Zipora a endleke leswaku nsuvu wa n’wana wakwe wu khumba milenge ya ntsumi, a wu nyikela eka yona tanihi vumbhoni bya leswaku u hetisise xilaveko xa ntwanano.

Marito ya Zipora lama nge “u loyi a tekaneke ni ngati eka mina” a ma tolovelekanga. Xana ma kombisa yini hi yena? Leswi a fambisaneke ni swilaveko swa ntwanano wa ku yimba, Zipora a a pfumela leswaku u endle ntwanano na Yehovha. Ntwanano wa Nawu lowu endzhakunyana wu endliweke ni Vaisrayele wu kombise leswaku eka ntwanano wolowo, Yehovha a nga ha tekiwa tanihi nuna ivi munhu lowun’wana a tekiwa tanihi nsati. (Yeremiya 31:32) Hikwalaho, loko a vula leswaku Yehovha (hi ku tirhisa muyimeri wakwe la nga ntsumi) hi “loyi a tekaneke ni ngati,” swi tikomba onge Zipora a a kombisa ku titsongahata ka yena eka swilaveko swa ntwanano wolowo. A swi fana ni loko a pfumele ku va nsati wa Yehovha Xikwembu eka ntwanano wa ku yimbisiwa. Mhaka ya xiheri hileswaku vutomi bya n’wana wakwe a byi nga ha ri ekhombyeni hikwalaho ka goza ra nkoka leri a ri tekeke ro yingisa xilaveko xa Xikwembu.